Umbono WeBhayibheli

Ingabe Kufanele Bahlonishwe Abafileyo?

“UMUZWA OJULILE USHUKUMISELA ABANTU ABANINGI UKUBA BAHLONIPHE ISIDUMBU SOFILEYO NGENDLELA ABANGASIHLONIPHI NGAYO ISILWANE ESIFILE.”—ENCYCLOPÆDIA BRITANNICA.

ABANTU abaningi bahlonipha abathandekayo babo abafileyo ngandlela-thile. Abafileyo bahlonishwa ngezibikezelo zemingcwabo emaphephandabeni, futhi badunyiswa ngezinkulumo. Kwamanye amazwe kuvamile ukuba kube nemingcwabo emikhulu enamasiko enkolo noma endabuko. Izinkonzo zabafileyo zingathatha izinsuku, amasonto, noma izinyanga eziningi. Izikole, izikhumulo zezindiza, imigwaqo, namadolobha kwethiwe ngabantu abadumile asebafa. Kwakhiwa amatshe ezikhumbuzo kumiswe nezinsuku zeholide zokukhumbula izicukuthwane ezingamaqhawe.

Nokho, ngokweZwi likaNkulunkulu, abafileyo abakuboni konke lokhu kuhlonishwa abakunikezwayo. (Jobe 14:10, 21; IHubo 49:17) Abafileyo baphila ezingqondweni zalabo ababakhumbulayo kuphela. IBhayibheli lithi: “Abaphilayo bayazi ukuthi bayakufa, kepha abafileyo abazi-lutho.” (UmShumayeli 9:5) ImiBhalo inikeza ithemba lokuthi kuyoba novuko esikhathini esizayo. (Johane 5:28, 29; 11:25) Kodwa kuze kube yileso sikhathi, abafileyo abekho. Baphenduka uthuli ngokoqobo.—Genesise 3:19; Jobe 34:15.

Ngenxa yokuma okucacile kweBhayibheli ngokuphathelene nesimo sabafileyo, ingabe kubaluleke ngempela ukubahlonipha? Ingabe amaKristu kufanele alandele amasiko endabuko aphathelene nemingcwabo yabathandekayo?

Amasiko Asekelwe Emangeni

Amasiko amaningi aphathelene nabafileyo asekelwe ngokuqinile ezimfundisweni zenkolo ezingqubuzana neBhayibheli. I-Encyclopædia Britannica ithi amanye amasiko ahloselwe “ukuvikela abafileyo bangahlaselwa amademoni; ngezinye izikhathi injongo yala masiko iwukuvikela abaphilayo ethonyeni lokufa noma enzondweni yabafileyo.” Wonke amasiko anjalo asekelwe embonweni ongamanga wokuthi abafileyo bayaqhubeka bephila endaweni engabonakali angqubuzana ngokuqondile namaqiniso eBhayibheli.—UmShumayeli 9:10.

Abantu abaningi bayabahlonipha abafileyo. Lolu hlobo lokukhulekela luhlanganisa nokuhlabela okhokho abafileyo nokuthandaza kubo. Abanye abagcina amasiko anjalo ababheki izenzo zabo njengokukhulekela, kodwa kunalokho, bazibheka njengendlela yokubonisa ukuthi babahlonipha ngokujule kangakanani abafileyo. Noma kunjalo, ukuzinikela okunjalo kokhokho abafileyo kunezisekelo ezingokwenkolo futhi kungqubuzana nezimfundiso zeBhayibheli. UJesu Kristu wathi: “NguJehova uNkulunkulu wakho okumelwe umkhulekele, futhi nguye yedwa okumelwe unikele kuye inkonzo engcwele.”—Luka 4:8.

Umbono Olinganiselayo

Ukuhlonipha abafileyo akuhlangene nezimfundiso zenkolo ezingamanga ngaso sonke isikhathi. Ngokwesibonelo, ukulandisa kweBhayibheli kubonisa indlela iNkosi uHezekiya ethembekile eyahlonishwa ngayo ngemva kokufa. Abantu bakaNkulunkulu “bammbela emmangweni wamathuna amadodana kaDavide; wonke uJuda nabakhileyo eJerusalema bamenzela udumo ekufeni kwakhe.” (2 IziKronike 32:33) Esinye isibonelo esikaJesu. IBhayibheli lithi abafundi bakhe “basithatha isidumbu sikaJesu basibopha ngamabhandeshi kanye neziqholo, ngayo kanye indlela yenkambiso yamaJuda yokulungiselela ukungcwaba.”—Johane 19:40.

ImiBhalo ilandisa ngezinye izimo eziningi lapho kwalandelwa khona izinqubo ezikhethekile eziphathelene nesidumbu nokungcwatshwa kwabafileyo. Lezi zenzo zazingekona ukukhulekela okhokho, futhi zazingasekelwe enkolelweni eyiphutha yokuthi abafileyo bayaqhubeka benethonya ezindabeni zabaphilayo. Kunalokho, abalilayo babebonisa inhlonipho ejulile ngabantu ababebathanda. IBhayibheli alikwenqabeli ukubonisa inhlonipho okunjalo, njengoba kusekelwe endleleni abantu abazizwa ngayo ngokwemvelo, kodwa alihambisani nemingcwabo kanokusho noma ukuklabalasa emingcwabeni. Ngakolunye uhlangothi, aliwakhuthazi amaKristu ukuba angabonisi uzwela nokunganaki lapho ebhekene nokufa kothandekayo.

Ngenxa yalokho, lapho beya emngcwabeni wothandekayo wabo, oFakazi BakaJehova babonisa inhlonipho efanele ngoshonile. (UmShumayeli 7:2) Ngokuphathelene nezimbali, izinkonzo zomngcwabo, namanye amasiko endawo, amaKristu akhetha ngokucophelela ukuze agweme imikhuba engqubuzana nezimfundiso zeBhayibheli. Kulokhu, kudingeka ukwahlulela okuhle nokulinganisela. I-Encyclopædia of Religion and Ethics ichaza ukuthi “okushiwo yisiko nokubaluleka kwalo kuyashintsha ngokuhamba kwesikhathi, okwenza ukuthi ngemva kwesikhathi ukubaluleka kwalo kushintshe kulokho kwasekuqaleni, futhi ukuchazwa kwalo okuvamile kungase kungavezi lutho ngomsuka walo.”a

Ingabe Akulungile Ukudumisa Oshonile?

Isimiso esinokulinganisela sithinta nendaba yokudumisa oshonile. Ezinkonzweni zomngcwabo, oFakazi BakaJehova bazama ukududuza abashonelwe. (2 Korinte 1:3-5) Isimiso senkonzo singahlanganisa isikhulumi esisodwa noma ngaphezulu. Kodwa bekuyoba yinto engafanele ukuphendula lesi senzakalo sibe umbukiso omude wabantu abadumisa oshonile. Kunalokho, umngcwabo usinika ithuba lokuphakamisa izimfanelo zikaNkulunkulu ezimangalisayo, ezihlanganisa nomusa wakhe ngokusilungiselela ithemba lovuko.

Nokho, lokhu akusho ukuthi akulungile ukukhumbula izimfanelo ezinhle zoshonile phakathi nenkulumo yomngcwabo. (Qhathanisa neyesi-2 Samuweli 1:17-27.) Lapho umuntu eshoné ethembekile kuNkulunkulu, uba isibonelo esihle sokulingiswa. (Heberu 6:12) Kuhle ukuzindla ngenkambo yokugcina ubuqotho yezinceku zikaNkulunkulu. Ukuhlanganyela la maphuzu amahle nabanye phakathi nenkonzo yomngcwabo kududuza abaphilayo futhi kuhlonipha ukukhunjulwa koshonile.

AmaKristu eqiniso awabakhulekeli abafileyo. Awagcini amasiko athandwayo angqubuzana namaqiniso eBhayibheli. Ngakolunye uhlangothi, izinceku zikaNkulunkulu azivumelani nombono oweqisayo wokuthi wonke amasiko omngcwabo awananjongo futhi awadingekile, ngenxa nje yokuthi abafileyo baluthuli. Ziyalila futhi zikhumbule abafileyo bazo. Kodwa ubuhlungu nokudabuka kwazo kudanjiswa amaqiniso eBhayibheli okuthi abafileyo abahlupheki nokuthi kunethemba lovuko.

[Umbhalo waphansi]

[Isithombe ekhasini 10]

Udwendwe lomngcwabo kuhlonishwa uGustav II, inkosi yaseSweden, ngemva kokufa kwakhe ngo-1632

[Umthombo]

From the book Bildersaal deutscher Geschichte