“Umphefumulo Nomoya”—Asho Ukuthini Ngempela La Magama?

UMA uzwa igama elithi “umphefumulo” nelithi “umoya,” kufikani engqondweni yakho? Abaningi bakholelwa ukuthi la magama asho okuthile okungabonakali nokungafi okuhlala ngaphakathi kithi. Bacabanga ukuthi lapho umuntu efa, le ngxenye yakhe engabonakali iyaphuma emzimbeni iqhubeke iphila. Njengoba le nkolelo isakazeke kakhulu kangaka, abaningi bayamangala uma bezwa ukuthi iBhayibheli aliyifundisi nhlobo. Ngokusho kweZwi likaNkulunkulu, uyini-ke pho umphefumulo, futhi uyini umoya?

Okokuqala, cabanga ngelithi umphefumulo. Uzokhumbula ukuthi ekuqaleni iBhayibheli lalibhalwe ikakhulukazi ngesiHebheru nesiGreki. Lapho bebhala ngomphefumulo, abalobi beBhayibheli basebenzisa igama lesiHebheru elithi neʹphesh noma elesiGreki elithi psy·kheʹ. Womabili la magama avela izikhathi ezingaphezu kuka-800 emiBhalweni, futhi INguqulo Yezwe Elisha iwahumusha ngendlela efanayo, ithi “umphefumulo.” Lapho uhlola indlela okusetshenziswe ngayo igama elithi “umphefumulo” noma “imiphefumulo” eBhayibhelini, kuba sobala ukuthi leli gama ngokuyinhloko lisho (1) abantu, (2) izilwane, noma (3) ukuphila komuntu noma kwesilwane. Masifunde eminye yemibhalo eveza le miqondo emithathu.

Abantu. “Ezinsukwini zikaNowa . . . abantu abambalwa, okungukuthi, imiphefumulo eyisishiyagalombili, bathwalwa ngokuphepha emanzini.” (1 Petru 3:20) Kusobala lapha ukuthi igama elithi “imiphefumulo” lisho abantu—uNowa, umkakhe, amadodana akhe amathathu nomkawo. U-Eksodusi 16:16 ukhuluma ngemiyalo eyanikezwa ama-Israyeli maqondana nokubutha imana. Atshelwa: ‘Buthani elinye lalo ngokwesibalo semiphefumulo umuntu ngamunye kini anayo etendeni lakhe.’ Ngakho kwakubuthwa imana elingangesibalo sabantu emkhayeni ngamunye. Ezinye izibonelo eziseBhayibhelini ezibiza umuntu noma abantu ngegama elithi “umphefumulo” noma “imiphefumulo” zitholakala kuGenesise 46:18; Joshuwa 11:11; IzEnzo 27:37; nakweyabaseRoma 13:1.

Izilwane. Ekulandiseni kweBhayibheli ngendalo, siyafunda: “UNkulunkulu wathi: ‘Amanzi mawaswebezele uswebezane lwemiphefumulo ephilayo, kundize izidalwa ezindizayo phezu komhlaba ebusweni bomkhathi wamazulu.’ UNkulunkulu wathi: ‘Umhlaba mawuveze imiphefumulo ephilayo ngezinhlobo zayo, izilwane ezifuywayo nezilwane ezihambayo nezilo zasendle zomhlaba ngezinhlobo zazo.’ Kwaba njalo.” (Genesise 1:20, 24) Kula mavesi, izinhlanzi, izilwane ezifuywayo nezilwane zasendle zonke zibizwa ngegama elilodwa—“imiphefumulo.” Izinyoni nezinye izilwane zibizwa ngokuthi imiphefumulo nakuGenesise 9:10; Levitikusi 11:46; nakuNumeri 31:28.

Ukuphila komuntu. Ngezinye izikhathi igama elithi “umphefumulo” lisho ukuphila komuntu. UJehova watshela uMose: “Bonke abantu abebezingela umphefumulo wakho bafile.” (Eksodusi 4:19) Zazizingelani izitha zikaMose? Zazifuna ukumbulala. Ngaphambi kwalokho, ngenkathi uRaheli ebeletha indodana yakhe uBhenjamini, ‘umphefumulo wakhe wawuphuma (ngoba wafa).’ (Genesise 35:16-19) Ngaleso sikhathi, uRaheli wafa. Cabanga nangala mazwi kaJesu: “Mina ngingumalusi omuhle; umalusi omuhle unikela umphefumulo wakhe ngenxa yezimvu.” (Johane 10:11) UJesu wanikela ngomphefumulo wakhe, noma ukuphila kwakhe, ngenxa yesintu. Kula mavesi eBhayibheli, kucacile ukuthi igama elithi “umphefumulo” lisho ukuphila komuntu. Uzothola ezinye izibonelo zalo mqondo wegama elithi “umphefumulo” kweyoku-1 AmaKhosi 17:17-23; Mathewu 10:39; Johane 15:13; nezEnzo 20:10.

Uma uqhubeka utadisha iZwi likaNkulunkulu uzobona ukuthi akukho ndawo kulo lonke iBhayibheli lapho igama elithi “ukungafi” noma elithi “ukuphila phakade” ehlobaniswa khona nelithi “umphefumulo.” Kunalokho, imiBhalo ithi umphefumulo uyafa. (Hezekeli 18:4, 20) Ngakho, iBhayibheli libiza umuntu ofile ngokuthi “umphefumulo ofile.”—Levitikusi 21:11.

Manje masibheke indlela iBhayibheli elisebenzisa ngayo igama elithi “umoya.” Abanye abantu bacabanga ukuthi igama elithi “umoya” elinye nje igama “lomphefumulo.” Kodwa akunjalo. IBhayibheli likwenza kucace ukuthi igama elithi “umoya” nelithi “umphefumulo” asho izinto ezimbili ezingefani. Uyini umehluko?

Abalobi beBhayibheli básebenzisa igama lesiHebheru elithi ruʹach noma elesiGreki elithi pneuʹma lapho bebhala ‘ngomoya.’ ImiBhalo nayo iyayiveza incazelo yalawo magama. Ngokwesibonelo, iHubo 104:29 lithi: “Uma ususa umoya [ruʹach] wazo [Jehova], ziyaphangalala, zibuyele othulini lwazo.” UJakobe 2:26 yena uthi “umzimba ngaphandle komoya [pneuʹma] ufile.” Khona-ke, kula mavesi, elithi “umoya” libhekisela kulokho okwenza umzimba uphile. Ngaphandle komoya, umzimba ufile. Ngakho, eBhayibhelini igama elithi ruʹach aligcini ngokuhunyushwa ngokuthi “umoya” kodwa lihunyushwa nangokuthi “amandla,” noma amandla okuphila. Ngokwesibonelo, mayelana noZamcolo wosuku lukaNowa, uNkulunkulu wathi: “Ngiletha uzamcolo wamanzi phezu komhlaba ukuba ngichithe phansi kwamazulu yonke inyama okukhona kuyo amandla okuphila [ruʹach].” (Genesise 6:17; 7:15, 22) Ngakho elithi “umoya” lisho amandla angabonakali (inhlansi yokuphila) aphilisa zonke izidalwa eziphilayo.

Umphefumulo nomoya akufani. Umzimba udinga umoya njengoba nje nomsakazo udinga ugesi—ukuze usebenze. Nasi esinye isibonelo. Cabanga ngomsakazo ophathwayo. Uma ufaka amabhethri kulo msakazo bese uyawuvula, ugesi osemabhethrini wenza umsakazo usebenze. Kodwa uma amabhethri engekho, umsakazo awusebenzi. Kuba njalo nangolunye uhlobo lomsakazo uma lungaxhunyiwe kugesi. Ngokufanayo, umoya ungamandla enza imizimba yethu iphile. Kanti futhi lo moya awunamizwa futhi awukwazi ukucabanga, njengoba unjalo nogesi. Ungamandla angenazo izici zobuntu. Kodwa ngaphandle kwalowo moya, noma amandla okuphila, imizimba yethu ‘iyaphangalala, ibuyele othulini lwayo,’ njengoba umhubi asho.

Lapho ekhuluma ngokufa komuntu, umShumayeli 12:7 uthi: “Uthuli [lomzimba wakhe] lubuyela emhlabeni njengoba nje lwalulapho nomoya ubuyela kuNkulunkulu weqiniso owawunikeza.” Lapho umoya, noma amandla okuphila, uphuma emzimbeni, umzimba uyafa futhi ubuyele lapho wavela khona—emhlabeni. Ngokufanayo, namandla okuphila abuyela lapho avela khona—kuNkulunkulu. (Jobe 34:14, 15; IHubo 36:9) Lokhu akusho ukuthi amandla okuphila ayahamba aye ezulwini. Kunalokho kusho ukuthi ithemba lesikhathi esizayo ngomuntu ofayo likuJehova uNkulunkulu. Ukuphila kwakhe kusuke sekusezandleni zikaNkulunkulu. Amandla kaNkulunkulu kuphela angabuyisela umoya, noma amandla okuphila, kumuntu ukuze abuye aphile.

Yeka ukuthi kududuza kanjani ukwazi ukuthi yilokhu kanye uNkulunkulu azokwenzela abantu “abasemathuneni”! (Johane 5:28, 29) Ngesikhathi sovuko, uJehova uyomenzela umzimba omusha umuntu ofileyo abese ewuphilisa ngokuwufaka umoya, noma amandla okuphila. Yeka injabulo eyobe ikhona ngalolo suku!

Uma ungathanda ukufunda okwengeziwe ngendlela elisetshenziswe ngayo eBhayibhelini igama elithi “umphefumulo” nelithi “umoya,” uzothola amaphuzu abalulekile encwajaneni ethi Kwenzekani Kithina Lapho Sifa?, nasemakhasini 369-373 no-377-382 encwadi ethi Ukubonisana NgemiBhalo, zombili ezinyatheliswa oFakazi BakaJehova.