Imibuzo Evela Kubafundi

◼ Kungani iNew World Translation ihumusha igama lesiHeberu elithi ‛a·rumʹ kuGenesise 3:1 ngokuthi “qaphile” kuyilapho ezinye izinguqulo zeBhayibheli zithi “nobuqili” noma “hlakaniphile”?

Lowombhalo ufundeka kanje: “Inyoka yayinobuqili [“yayiqaphile,” NW] kunazo zonke izilwane zasendle abezenzile uJehova uNkulunkulu. Yathi kowesifazane: Ngempela uNkulunkulu ushilo yini ukuthi: Ningadli emithini yasensimini, na?”

KuzAga 12:23 nakwezinye izindawo, iNew World Translation ihumusha igama lesiHeberu elithi ‛a·rumʹ ngokuthi “nobuhlakani,” okuyincazelo efanayo eyisisekelo yaleligama lapho lisetshenziswa kubantu. Kodwa njengoba kunjalo nangamanye amagama amaningi, elithi ‛a·rumʹ linemiqondo ehlukahlukene. Ngokwesibonelo, uBenjamin Davidson uchaza elithi ‛a·rumʹ ngalendlela: “I. nobuphiciphici, nobuqili, namaqhinga.—II. khaliphile, qaphile.”—The Analytical Hebrew and Chaldee Lexicon.

Kungani-ke, iNew World Translation ikhetha umqondo wesibili othi “qaphile” kuGenesise 3:1? Lokho kukhetha kuyavumelana nezinye izinguqulo. Ngokwesibonelo, lapho uGenesise 3:1 ayehunyushelwa esiGrekini enguqulweni yeSeptuagint yekhulu lesithathu leminyaka B.C.E., kwasetshenziswa igama elithi phroʹni·mos—igama elifanayo nalelo elisetshenziswa kamuva kuMathewu 10:16: “Kumelwe niqaphe njengezinyoka futhi nibe-mnene njengamajuba.”—Today’s English Version.

Isazi esingumHeberu uLudwig Koehler emuva ngo-1945 saphawula: “Inyoka inamahloni. Lokhu kungaboniswa kahle kakhulu ngesiGreki ngelithi phronimos, ngoba ngalamahloni noma ukuqapha inyoka ibonisa ukuba nephrenes kanye nokuyisebenzisa.” Lapha elithi phreʹnes lisho uhlobo lokuhlakanipha okungokomzwelo ongokwemvelo nezinye izilwane ezilubonisayo.—Qhathanisa nezAga 30:24.

Nokho, kunesizathu esibaluleke kakhulu sokusetshenziswa kwegama elithi “qaphile” kunelithi “nobuhlakani” noma “hlakaniphile” kuGenesise 3:1. Ukubiza inyoka lapha ngokuthi ihlakaniphile, ngaphambi nje kokuba ichazwe njengeyengela uEva esonweni, bekungase kuholele abafundi abaningi ukuba baphethe ngokuthi iBhayibheli libonisa inyoka njengeyenza lelisu ngokuhlakanipha kwayo siqu okungavamile. Incazelo enjalo ibiyokwenza lendaba ibe sesimweni senganekwane—futhi empeleni inganekwane ewubuwula.

Ngokuphambene, iBhayibheli lifundisa ukuthi kwakunokungaphezu nje kwenyoka ehlakaniphile okwakusebenza lapho ensimini yase-Edene. IsAmbulo 12:9 sibonisa ngokucacile ukuthi ‘leyonyoka endala’ kwakunguSathane uDeveli. Wayengamandla angabonakali, angaphezu kwawomuntu esebenzisa lesilwane esivamile esihuquzelayo ngendlela umlozi asebenzisa ngayo isachuse sakhe. Ukuqapha kwenyoka okungokwemvelo kwayenza yafaneleka ukuba ikhethelwe lokhu kuphamba. Lapho ngokuqapha ingahlehliswa amahloni njengoba yayinjalo ngokwemvelo kodwa kunalokho ivula umlomo wayo ngesibindi futhi iqala ukukhuluma noEva, yathumba ukunakekela kukaEva ngokuphumelela ngisho nangokwengeziwe.

IZwi likaNkulunkulu eliphefumlelwe alinazo izinganekwane, futhi ngokuhumusha okuqondile, iNew World Translation isisiza ukuba siliqonde leliqiniso.—2 Thimothewu 3:16.

◼ Njengoba oFakazi BakaJehova bazi ukuthi abafileyo abezwa lutho, kungani besenomuzwa wokuthi kubalulekile ukuba khona emingcwabeni yabakholwa kanye nabo?

Ulwazi oluqondile oluvela eBhayibhelini ngesimo sabafileyo luvikela oFakazi BakaJehova ezimweni zengqondo eziyiphutha nasenkambweni ewubuwula eba umphumela wazo emingcwabeni. Futhi lubanikeza isizathu sokuba khona emingcwabeni yobuKristu.

IZwi likaNkulunkulu libonisa ngokucacile ukuthi lapho umuntu efa, akaqhubeki ephila njengomphefumulo ongafi. (UmShumayeli 9:5) Ngemva kokufa, isidumbu sibuyela othulini, kungaba ngokubola okungokwemvelo noma ngokushiswa. Ofileyo akasaphili; uyobuye aphile kuphela uma uNkulunkulu emvusa esikhathini esizayo.—Johane 5:28, 29; IzEnzo 24:15.

Ngakho, oFakazi BakaJehova abayilandeli imikhuba yasemingcwabeni esekelwe enkolelweni yokuthi umuntu ofile ubenomphefumulo ongafi, oqhubeka uphila endaweni ethile. Abahlanganyeli emilindelweni, enamaculo aklabalasayo noma izililo zokuba kwesatshiswe “imimoya,” nasemilindweni ethatha ubusuku bonke noma ukudabuka okweqile okuhloselwe ukushweleza kofileyo.

Nokho, lokhu akusho ukuthi abantu bakaNkulunkulu abalili. Ukufa kwesihlobo noma komngane oseduze kungokuhlangenwe nakho okudabukisayo, ngisho nakubakhulekeli beqiniso abanolwazi oluqondile ngabafileyo. Ngokwesibonelo, lapho uJakobe ecabanga ukuthi isilwane sasendle sasibulele uJosefa, lenzalamizi ‘yalilela indodana yayo izinsuku eziningi.’ Sifunda ukuthi “onke amadodana akhe nawo onke amadodakazi akhe asuka ukuyomduduza.” (Genesise 37:33-35) Lapho uJakobe othembekile efa, uJosefa “wayala izinceku zakhe izinyanga ukuba zimgqumise uyise ngemithi,” futhi “abaseGibithe bamkhalela izinsuku ezingamashumi ayisikhombisa.” Nakuba umkhaya kaJakobe ungazange ubambelele emibonweni engamanga yabaseGibithe ngabafileyo, ngokucacile kwawuphazamisa ukufa kukaJakobe. ‘Indlu yonke kaJosefa nabafowabo’ yafuna ukuba uJakobe angcwatshwe kahle, futhi ngisho nabangaphandle babengaphawula ukuthi yayilila.—Genesise 50:1-11.

Kungacashunwa ezinye izibonelo eziningi eziseBhayibhelini lapho izinceku zikaJehova zaziphazamiseke ngempela ngokufa kwezikholwa kanye naye noma kwesihlobo futhi ngenxa yalokho zalila ngokufanelekile.a Lapho uJesu ayenezihlobo zikaLazaru ezidabukile, uJesu akazange abe ngongaphazamiseki noma ajabule ngokungafanele. Nakuba ayethembele emandleni ovuko, uJesu wakhala. (Johane 11:33-35) Ngemva kokuba uJesu ngokwakhe efile, abafundi bakhe balila, ngisho nakuba ayebatshelile ukuthi wayezobulawa futhi aphinde avuselwe ekuphileni.—Mathewu 16:21, 28; Johane 16:17-20; 20:11.

Izinceku zikaNkulunkulu namuhla zingakuzwa futhi ziyakuzwa ukudumazeka okulethwa ukufa. Nokho, ukuqonda kwazo okungokweBhayibheli kuzisiza ukuba zilawule noma zilinganisele ukulila kwazo, ngokuvumelana neyoku-1 Thesalonika 4:13, 14: “Asithandi, bazalwane, ukuba ningabi-nakwazi ngabalalayo, ukuze ningadabuki njengabanye abangenalo ithemba. Ngokuba uma sikholwa ukuthi uJesu wafa, wavuka, ngokunjalo-ke uNkulunulu uyakubaletha nabaleleyo kuJesu kanye naye.”

Kuthiwani-ke, ngokuba khona emngcwabeni womKristu (noma enkulumweni yesikhumbuzo ephathelene nokholwayo)? Kunezizathu ezingokweBhayibheli ezibangela ukuba oFakazi babe nomuzwa wokuthi kunenzuzo ukukwenza lokho nokuba khona kukho.

Khumbula ukuthi lapho kubonakala sengathi uJakobe wayeselahlekelwe yindodana yakhe, “onke amadodana akhe nawo onke amadodakazi akhe asuka ukuyomduduza.” (Genesise 37:35) Emazweni amaningi kungumkhuba ngezihlobo ukuba zihlangane uma kunomngcwabo. Lokho kunikeza abanye ithuba, okungenzeka bebengasondele kangako futhi ngalokho bengathintekile kangako ngokomzwelo, ukuba banikeze amazwi ozwela nenduduzo. Ngemva kokuba uLazaru efile ‘abaningi babaJuda bafika kuMarta noMariya ukuze babaduduze ngomnewabo.’ (Johane 11:19, NW) Lokhu futhi kuhilela namaKristu afuna ukuba “namandla okududuza abasosizini, nolunjani.”—2 Korinte 1:4.

Ababonisi abangamaKristu, ngisho nakuba bengase babe matasa kakhulu, kumelwe bahole ekunikezeni induduzo emhlanjini. Bayakhumbula ukuthi isibonelo sabo uJesu, uMalusi Omuhle, wathunyelwa ‘ukubopha abanhliziyo ezaphukileyo nokududuza bonke abalilayo.’ (Isaya 61:1, 2; Johane 10:14) UJesu akazange anikeze induduzo enjalo lapho izimo zizinhle kuphela. Wayezimisele ukuzidela ukuze abe nezihlobo zikaLazaru ezishonelwe—ukuze ahlanganyele nazo usizi lwazo.—Johane 11:11, 17, 33.

Ngisho namaKristu okungenzeka angakwazi ukusho okuningi kwabashonelwe emngcwabeni angenza okuhle ngokumane nje abe khona. Amalungu omkhaya alilayo angase aduduzeke kakhulu ngokuba khona okubonisa uzwela kwabaningi—abancane nabadala—bebandla lobuKristu. Khumbula ukusabela kwamanye amaJuda lapho uJesu eza kodadewabo bakaLazaru abadabukile: “Bheka, ukumthanda kwakhe okungaka.” (Johane 11:36) Izihlobo ezingakholwa, omakhelwane, noma abantu esisebenza nabo ababa khona emngcwabeni womKristu baye bahlabeka umxhwele ngenani elikhulu loFakazi eliba khona futhi ngenxa yalokho baye bawamukela kalula amaqiniso angokweBhayibheli anikezwayo.

Inkambo yoFakazi ababa khona kumelwe ifanelane nesimo. Nakuba bazi ukuthi lowo ofile akezwa buhlungu, futhi benethemba lokuthi uvuko lulindele bonke abathembekile, basithatha ngokungathi sína leseluleko: ‘Kunesikhathi sokukhala nesikhathi sokuhleka, isikhathi sokulila nesikhathi sokusina.’ (UmShumayeli 3:4) Umngcwabo noma inkonzo yesikhumbuzo akusona isikhathi sokukhulumela phezulu, ngokuhlekisa. Yisikhathi sokubonisa uzwela, ngokuvumelana naleseluleko: “Thokozani nabathokozayo, nikhale nabakhalayo.”—Roma 12:15.

Kunesinye isizathu esibangela oFakazi BakaJehova babe khona emingcwabeni. IZwi likaNkulunkulu lithi: “Kungcono ukuya endlini yokulila kunokuya endlini yedili, ngokuba lokho kungukuphela kwabantu bonke; nophilayo makakubeke enhliziyweni yakhe. . . . Inhliziyo yabahlakaniphileyo isendlini yokulila, kepha inhliziyo yeziwula isendlini yentokozo.”—UmShumayeli 7:2-4.

Nakuba oFakazi BakaJehova benesizathu sokuba nethemba, lawomazwi aphefumlelwa futhi afakwa eBhayibhelini ngenxa yenzuzo yethu. Umngcwabo ungafaniswa ‘nendlu yokulila.’ Njengoba siba khona, imicabango yethu ingasuka eminakweni yethu evamile noma emisebenzini yethu futhi igxile ebufushaneni bokuphila. Kungakhathaliseki ukuthi kungokugula noma ‘kungesenzakalo esingalindelekile,’ ukufa kungagadla kunoma ubani kithi futhi ngokushesha kusenze singabikho, ngoba “umuntu akasazi isikhathi sakhe.” (UmShumayeli 9:11, 12, qhathanisa neNW.) Abazali abeza nezingane zabo emngcwabeni womKristu bangase bathole ukuthi lokhu kungaholela ekuxoxeni ngobunjalo bokufa, isidingo sethu sesihlengo, kanye nokuhlakanipha kokukhonza “uNkulunkulu ovusa abafileyo.”—2 Korinte 1:9; UmShumayeli 12:1, 13.

OFakazi BakaJehova ababheki imingcwabo njengezinto ezingcwele, kodwa bayaqaphela ukuthi lezizehlakalo ezidabukisayo zivula ithuba lokunikeza induduzo. Ngokuba khona kuzo, amaKristu anganikeza ubufakazi bothando nenhlonipho abekade enakho ngomKristu akanye naye. Futhi angase ashukunyiselwe ukuba acabange ngokungathi sína ngokwengeziwe ngalokho okushiwo ukuphila, ngendlela okumelwe ngabe asebenzisa ngayo ukuphila kwawo siqu phambi kukaNkulunkulu.

[Umbhalo waphansi]