Isahluko 75

Umthombo Wenjabulo

PHAKATHI nenkonzo yakhe eGalile, uJesu wenza izimangaliso, futhi manje useyaziphinda eJudiya. Ngokwesibonelo, ukhipha kwenye indoda idemoni ebeliyenza ingakwazi ukukhuluma. Izixuku ziyamangala, kodwa abagxeki baphakamisa ukuphikisa okufana nalokho okwaphakanyiswa eGalile. “Ukhipha amademoni ngoBelzebule umbusi wamademoni,” besho. Abanye bafuna ubufakazi obukhudlwana kuJesu ngokuqondene nokuthi ungubani, futhi bazama ukumlinga ngokucela isibonakaliso esivela ezulwini.

Njengoba ekwazi abakucabangayo, uJesu unikeza abagxeki bakhe baseJudiya impendulo efana naleyo ayinikeza labo baseGalile. Uphawula ukuthi yonke imibuso ehlukene yodwa iyokuwa. “NoSathane,” ebuza, “uma ehlukene yedwa, umbuso wakhe uyakuma kanjani na?” Ubonisa isimo esiyingozi abagxeki bakhe abakuso ngokuthi: “Uma ngikhipha amademoni ngomunwe kaNkulunkulu, umbuso kaNkulunkulu usufikile phela kini.”

Labo ababona izimangaliso zikaJesu kufanele basabele kuzo ngendlela efana neyalabo ababona uMose enza isimangaliso emakhulwini eminyaka ngaphambili. Bamemeza: “Lokhu kungumunwe kaNkulunkulu.” ‘Kwakuwumunwe kaNkulunkulu’ futhi owaqopha iMiyalo Eyishumi ezibhebheni zamatshe. Futhi “umunwe kaNkulunkulu”​—⁠umoya wakhe ongcwele, noma amandla ayisiphekupheku—yiwo owenza uJesu akwazi ukukhipha amademoni nokwelapha abagulayo. Ngakho uMbuso kaNkulunkulu usufikile ngempela kulabagxeki, njengoba uJesu, iNkosi yoMbuso ekhethiwe, ekhona lapho kanye phakathi kwabo.

Khona-ke uJesu ubonisa ngomfanekiso ukuthi ukukwazi kwakhe ukukhipha amademoni kuwubufakazi bokuba kwakhe namandla phezu kukaSathane, njengalapho indoda enamandla ifika futhi inqoba indoda ehlome yaphelela eqaphe isigodlo sayo. Uphinda futhi umfanekiso awulandisa eGalile omayelana nomoya ongcolile. Lowomoya uyaphuma kumuntu, kodwa lapho lowomuntu engasigcwalisi isikhala ngezinto ezinhle, lomoya ubuya neminye eyisikhombisa, futhi isimo salowomuntu siba sibi kunasekuqaleni.

Njengoba elalele lezimfundiso, owesifazane othile osesixukwini ushukunyiselwa ukuba amemeze kakhulu: “Sibusisiwe isisu esakuthwalayo namabele owawancelayo.” Njengoba isifiso sabo bonke abesifazane abangamaJuda siwukuba umama womprofethi futhi ikakhulukazi uMesiya, kuyaqondakala ukuthi lona owesifazane wayengase akusho lokhu. Ngokusobala wayecabanga ukuthi uMariya wayengajabula ngokukhethekile ngenxa yokuba unina kaJesu.

Nokho, ngokushesha uJesu uyamqondisa lona owesifazane ngokuphathelene nomthombo wangempela wenjabulo. “Yebo,” esabela, “kodwa kakhulu babusisiwe abalizwa izwi likaNkulunkulu, balilondoloze.” UJesu akazange neze asikisele ukuthi unina, uMariya, kufanele anikezwe inhlonipho ekhethekile. Kunalokho, wabonisa ukuthi injabulo yeqiniso itholakala ekubeni yinceku ethembekile kaNkulunkulu, hhayi kunoma ibuphi ubuhlobo obungokwenyama noma okufezwayo.

Njengoba enza eGalile, uJesu nalapha uyaqhubeka esola abantu eJudiya ngenxa yokucela isibonakaliso esivela ezulwini. Ubatshela ukuthi ngeke banikezwe isibonakaliso ngaphandle kwesibonakaliso sikaJona. UJona waba isibonakaliso kokubili ngezinsuku zakhe ezintathu esenhlanzini nangokushumayela kwakhe ngesibindi, okwaphumela ekubeni abaseNineve bashukunyiselwe ukuba baphenduke. “Bhekani,” kusho uJesu, “lapha kukhona okukhulu kunoJona.” Ngokufanayo, indlovukazi yaseSheba yamangazwa ukuhlakanipha kukaSolomoni. “Bhekani,” kuphinda uJesu, “lapha kukhona okukhulu kunoSolomoni.”

UJesu uchaza ukuthi lapho umuntu ekhanyisa isibani, akasibeki esitha noma ngaphansi kwesitsha kodwa othini ukuze abantu babone ukukhanya. Mhlawumbe usikisela ukuthi ukufundisa nokwenza izimangaliso phambi kwalabantu abalukhuni abasezilalelini zakhe kufaniswa nokusithibeza ukukhanya kwesibani. Amehlo ezibukeli ezinjalo awamahle, noma awabonisi kahle, ngakho injongo ehloselwe lezimangaliso zakhe ayifezwa.

UJesu usanda kukhipha idemoni futhi ubangele ukuba isimungulu sikhulume. Lokhu kufanele kushukumisele abantu abanamehlo amahle, noma abonisa kahle, ukuba badumise lesisenzo esihle kakhulu futhi bamemezele izindaba ezinhle! Nokho, kulabagxeki, lokhu akukhona okwenzekayo. Ngakho uJesu uyaphetha: “Ngakho qaphela ukuba ukukhanya okukuwe kungabi-ngubumnyama. Njalo-ke uma umzimba wakho wonke ungukukhanya ungenandawo emnyama, uyakukhanya wonke njengesibani sikukhanyisa ngokukhanya kwaso.” Luka 11:14-36; Eksodusi 8:18, 19; 31:18; Mathewu 12:22, 28.

▪ Kuyini ukusabela ekuphulukiseni kukaJesu lendoda?

▪ Uyini “umunwe kaNkulunkulu,” futhi uMbuso kaNkulunkulu wawusufike kanjani ezilalelini zikaJesu?

▪ Uyini umthombo wenjabulo yeqiniso?

▪ Umuntu angaba kanjani neso elihle?