INdwanguYaseTurin—Ingabe Iyindwangu UJesu Angcwatshwa Ngayo?

NGUMLOBELI WE-PHAPHAMA! E-ITALY

Kusukela ngo-April 18 kuya ku-June 14, 1998, indwangu okuthiwa isidumbu sikaJesu waseNazaretha sasongwa ngayo ngemva kokufa kwakhe yabukiswa e-Italy eThempelini likaSan Giovanni Battista, eTurin. Yayifakwe ebhokisini lengilazi elingangenwa moya nanhlamvu, elaligcwaliswe ngesisi se-inert. Lapho, yagcinwa ngaphansi kwezimo zezulu ezingaguquguquki.

IZIVAKASHI zazidlula phambi kwale ndwangu evikelwe kahle emizileni emithathu eyayinokuphakama okuhlukene. Lokhu kwenza bonke abantu ukuba bakwazi ukubona kahle. Izivakashi zazivunyelwe ukubuka imizuzu emibili kuphela futhi kwakuvunyelwa ababefake izicelo kusengaphambili kuphela. Abanye babezindla ngenjabulo, bekhala kanti abanye babemane benelukuluku lokufuna ukwazi. Kubikwa ukuthi kwakunezivakashi ezicishe zibe izigidi ezimbili nengxenye.

Umbuzo owawusematheni wawuthi: “Le ndwangu isho ukuthini kuwe?” Kulabo abathanda ukuxoxa ngenkolo, lesi senzakalo sabanika ithuba lokuhlolisisa le ndaba nokuphinde bafunde amakhasi eBhayibheli akhuluma ngokungcwatshwa kukaJesu.—Bheka ibhokisi elisekhasini elilandelayo.

Le ndwangu eyelineni elingamamitha angu-4,36 ubude nangu-1,1 ububanzi enomaka wangaphandle wesidumbu sendoda okuthiwa yafa kabuhlungu. Kodwa umbuzo uwukuthi, Ingabe le Ndwangu yaseTurin iyona eyasetshenziswa ukusonga isidumbu sikaJesu eminyakeni engaphezu kwamakhulu angu-19 edlule?

Izenzakalo Zomlando

I-New Catholic Encyclopedia ithi: “Abukho ubufakazi obubonisa ukuthi yayikhona le ndwangu phakathi namakhulu okuqala enkathi yobuKristu.” Ngo-544 C.E., kwatholakala isithombe okwakukholelwa ukuthi asenziwanga ngezandla e-Edessa, indawo eseTurkey yanamuhla. Lesi sithombe kwathiwa sibonisa ubuso bukaJesu. Ngo-944 C.E., kwathiwa lesi sithombe siseConstantinople. Nokho, izazi-mlando eziningi azikholelwa ukuthi leso sithombe sasiyilokho manje okwaziwa ngokuthi iNdwangu yaseTurin.

EFrance, phakathi nekhulu le-14, uGeoffroi de Charny wayenendwangu ethile. Ngo-1453, yathathwa uLouis, uMbusi waseSavoy, owayidlulisela esontweni eChambéry, inhloko-dolobha yaseSavoyard. Kusukela lapho, ngo-1578, u-Emmanuel Philibert wayiyisa eTurin.

Imibono Ehlukene

Ngo-1988 owayengumbhishobhi omkhulu waseTurin, u-Anastasio Ballestrero, wayisa iNdwangu yaseTurin ukuba iyohlolwa ngenqubo ye-radiocarbon dating ukuthi indala kangakanani. Lokhu kuhlola, okwenziwa ezindaweni ezintathu ezaziwayo zokucwaninga ngezesayensi eSwitzerland, eNgilandi nase-United States, kwaveza ukuthi le ndwangu eyangenkathi ephakathi, ngakho yaba khona ngemva kwesikhathi eside uKristu afa. UBallestrero wasamukela leso sinqumo, wamemezela okulandelayo enkulumweni yakhe: “Ngokuphathisa isayensi umsebenzi wokuba ihlole le miphumela, isonto livuselela inhlonipho yalo ejulile ngalesi sithombe sikaKristu esifanelwe udumo, esiyinto yokukhulekelwa kwabathembekile.”

Umbhishobhi omkhulu ophethe manje, uGiovanni Saldarini, wathi: “Asinakusho ukuthi lesi sithombe esikaKristu lapho ehliswa esiphambanweni.” Nokho, ngesikhathi esifanayo, wagomela: “Akungabazeki ukuthi lapho okholwayo ebuka lesi sithombe angabona isithombe sendoda echazwe emaVangelini.” Ngo-May 24, 1998, lapho le ndwangu isabukiswa, uPapa John Paul II wabiza lesi sithombe ngokuthi “umaka owashiywa umzimba owahlushwa waLowo Owabethelwa.”

Njengoba kusobala, kunobufakazi obuningi obumelene nokuthi iNdwangu yaseTurin iyona okwangcwatshwa ngayo uJesu. Kodwa kuthiwani ukuba bekuyiyona? Ingabe bekuyofaneleka ngomuntu ofuna ukulalela izimfundiso zeBhayibheli ukuba adumise leyo ndwangu?

Cabangela umyalo wesibili eMiyalweni Eyishumi, onala magama ngokwenguqulo yeBhayibheli yamaRoma Katolika: “Ungazenzeli isithombe esibaziweyo noma umfanekiso wanoma yini esezulwini phezulu noma esemhlabeni phansi noma esemanzini ngaphansi komhlaba. Ungazikhothameli.” (Eksodusi 20:4, 5, New Jerusalem Bible) Ngempela, amaKristu eqiniso alalela amazwi omphostoli uPawulu: “Sihamba ngokholo, hhayi ngokubona.”—2 Korinte 5:7; 1 Johane 5:21.

[Ibhokisi ekhasini 24]

INdwangu Nokulandisa KwamaVangeli

Abalobi bamaVangeli bathi ngemva kokuba uJosefa wase-Arimatheya esusé isidumbu sikaJesu esigxotsheni, isidumbu sasongwa “ngelineni elicolekileyo elihlanzekile.” (Mathewu 27:57-61; Marku 15:42-47; Luka 23:50-56) Umphostoli uJohane uyenezela: “UNikodemu . . . naye weza elethe umqulu wemure nenhlaba, amaphawundi acishe abe ikhulu ako. Ngakho basithatha isidumbu sikaJesu basibopha ngamabhandeshi kanye neziqholo, ngayo kanye indlela yenkambiso yamaJuda yokulungiselela ukungcwaba.”—Johane 19:39-42.

Kwakuyisiko lamaJuda ukugeza isidumbu abese esebenzisa amafutha neziqholo ukusigcoba. (Mathewu 26:12; IzEnzo 9:37) Ekuseni ngemva kweSabatha, abangane bakaJesu besifazane babefuna ukuqedela ukulungiselela umzimba wakhe, owawususethuneni kakade. Nokho, lapho befika bephethe ‘iziqholo bezomgcoba,’ isidumbu sikaJesu sasingekho ethuneni!—Marku 16:1-6; Luka 24:1-3.

UPetru watholani lapho efika ngemva nje kwalokho futhi engena ethuneni? UJohane, owayengufakazi wokuzibonela wabika: “Wabona amabhandeshi ephansi, nendwangu eyayisekhanda lakhe ingekho phansi kanye namabhandeshi kodwa igoqwe yodwa endaweni eyodwa.” (Johane 20:6, 7) Qaphela ukuthi akukhulunywa lutho ngelineni ecolekileyo—kodwa kukhulunywa ngamabhandeshi nendwangu eyayisekhanda kuphela. Njengoba uJohane ekhuluma ngokuqondile ngamabhandeshi nangendwangu yekhanda, wayengeke yini akhulume ngelineni ecolekileyo, noma indwangu, ukube yayikhona lapho?

Ngaphezu kwalokho, cabangela lokhu: Ukube izindwangu uJesu angcwatshwa ngazo zazinomfanekiso wakhe, zazingeke yini ziqapheleke futhi kukhulunywe ngazo? Nokho, ngaphandle kwalokho okusemaVangelini, akukhulunywa lutho eBhayibhelini ngezindwangu angcwatshwa ngazo.

Ngisho nabalobi ababethi bangamaKristu bekhulu lesithathu nelesine, abaningi ababhala ngezinto eziningi okwakuthiwa izimangaliso eziphathelene nezinsalela eziningi, abakhulumanga lutho ngokuthi kwakukhona indwangu eyayinomfanekiso kaJesu. Lokhu kunzima ukukuqonda, njengoba ngokwesazi esingumJesuit uHerbert Thurston, izingqapheli zekhulu le-15 nele-16 “zichaza ukuthi imifanekiso esendwangwini yayinemibala ecace kangangokuba kungenzeka yayisanda kwenziwa.”

[Umthombo Wesithombe ekhasini 23]

David Lees/©Corbis