Ukugibela Kwabagibeli Abane—Kuyisibonakaliso
‘Ngabona, bheka, nanto ihashi elimhlophe, ihashi elibomvu, ihashi elimnyama, ihashi elimpofu nohlezi phezu kwalo, igama lakhe lalingukuFa, neHayidese lalandelana naye.’—ISAMBULO 6:2-8.
1. Ngaphambi kokuba ahlale esihlalweni sakhe etafuleni lokudla kwasekuseni ngo-October 2, 1914, wenzani umongameli weWatch Tower Bible and Tract Society endlunkulu yaseBrooklyn?
KWAKUNGOLWESIHLANU, usuku lwesibili lwenyanga kaOctober ngonyaka ka-1914. Endlini yokudlela endlunkulu yezisebenzi zeWatch Tower Bible and Tract Society e-124 Columbia Heights, eBrooklyn, New York, U.S.A., kwangena umongameli weNhlangano. Cishe kwakuyihora lesi-7 ekuseni. Ngaphambi kokuba aye endaweni yakhe enhloko yetafula endlini yokudlela, wahlaba ikhefu. Ukuze athole ukunaka okuphelele komkhaya wamalungu aseBethel owawuhlezi ematafuleni, washaya izandla. Khona-ke, ngezwi eliqinile, wenza ukubhekisela emazwini okuqala evesi lesi-3 leculo elithi “Our King Is Marching On!” njengoba litholakala emakhasini 162, 163 eculo iHymns of Millennial Dawn, ethi, “Izikhathi zabeZizwe Ziphelile, ngoba amakhosi azo abusile.” Khona-ke wahlala esihlalweni sakhe esivamile okokuqala, ukuba angamele isimiso senkonzo yansuku zonke yokudla kwasekuseni komkhaya waseBethel.
2. Umongameli wakhomba phambili kulowo nyaka ophawuliwe kusekude kangakanani, futhi wavunyelwa ukuba aphile isikhathi esingakanani ngemva kokuqala kwalesosiyaluyalu sezwe?
2 Ngaphambili kangango-1876, esihlokweni asithumela ukuba sisakazwe kuyi-The Bible Examiner, umongameli wayekhombe phambili ku-1914 njengonyaka wokuphela kwe“zikhathi zabeZizwe,” nemiphumela ebuhlungu ngalo lonke izwe lesintu. (Luka 21:24) Ngokumangalisayo, ngesikhathi umongameli amemezela ngaso emkhayeni waseBethel eBrooklyn ukuthi iZikhathi zabeZizwe ziphelile, impi yezwe yokuqala yawo wonke umlando wesintu yayisosukwini lwayo lwama-66. Kakade ngaleso sikhathi izimemezelo zempi eziyi-14 zazenziwe yilabo ababelwa kuleyompi esabekayo. Ngaphambi kokuphela kwalowomzabalazo onamandla wokulwela ukubuswa kwezwe nezimakethe zezentengiselwano zezwe, izizwe ezingama-29 nemibuso zase zihilelekile kuleso siwombe esasingenakucatshangwa. Umongameli weNhlangano, owakhuluma lawomazwi afanelekile, wafa ngaphambi kokuba izwe lakubo, iUnited States yaseNyakatho Melika, ihileleke eMpini Yezwe I, ngoApril 6, 1917, ukuba ihlangane noMbuso waseBrithani ilwe neMibuso ePhakathi neYurophu.
3. Umongameli wayephinde wakugcizelela kanjani ukubaluleka kuka-1914, futhi wayengazizwa kanjani lapho ethi, “IZikhathi zabeZizwe ziphelile”?
3 Umongameli weNhlangano wayephinde wagcizelela ukubaluleka okuvelele kuka-1914 ezinhlwini zikamagazini iWatchtower kusukela ngo-1879 kuya phambili, futhi ikakhulu encwadini iThe Time Is at Hand, eyakhishwa ngo-1889. Kodwa ngo-October 2, 1914, wayesewabone ngokwanele amagagasi ezenzakalo zezwe ngalowonyaka okhumbulekayo ukuze athole ukuqinisekiswa futhi ngalokho akusho. Wayengazizwa ephakanyisiwe, okungenani kulendaba, njengomfundi oqaphelisisayo nonakekelayo wokubala izikhathi, noma uhlelo lwezikhathi, zeBhayibheli, eliprofetha ngezikhathi zikaNkulunkulu nezinkathi.
4. Ngaphambi kokufa kwakhe umongameli weNhlangano wayebone ukuqala kokugibela kukabani, futhi lokhu kwakungabizwa ngokufanelekile ngokuthi “isibonakaliso” sani?
4 Khona-ke ngaphambi kokufa kwakhe okwakungalindelwe ngoLwesihlanu ebusuku, ngo-October 31, 1916, umongameli weNhlangano wayebone ukuqala kokugibela kwabagibeli bamahhashi abane bencwadi yokugcina yeBhayibheli kusukela ngonyaka izikhathi zabeZizwe okwakumelwe ziphele ngawo ngokokubalwa kwezikhathi zeBhayibheli. Incwadi yokugcina yeBhayibheli noma isAmbulo, yincwadi yokugcina yemiBhalo yamaKristu yesiGreki, ngokuvamile ebizwa ngokuthi iTestamente Elisha. Ukugibela kwabagibeli bamahhashi abane kunokubaluleka kwezwe lonke, ngoba kuyingxenye ye“sibonakaliso” esikhomba ukuthi umkhaya wesintu ukuphi nezikhathi. Kubonisa ukuthi sikulokho abafundi bakaJesu abakubiza ngokuthi “isiphelo sezwe.” (Mathewu 24:3, NW) Ukuthi kuyi“sibonakaliso” sikuboniswa evesini lokuqala lesAmbulo, lapho sifunda ukuthi: “Isambulo sikaJesu Kristu amnika sona uNkulunkulu ukuba abonise izinceku zakhe izinto ezimelwe ukwenzeka masinyane, ethuma ngengelosi yakhe, esibonakalisa encekwini yakhe uJohane.”—IsAmbulo 1:1.
5. Izinguqulo zeBhayibheli ezihlukahlukene zihluka kanjani kwenye nenye ngendlela izimpawu zesAmbulo ezavezwa ngayo, futhi ngokuvumelana nesandulela saso, isAmbulo sigcwaliswe ngani?
5 Ukugibela kwabagibeli bamahhashi abane kuchaziwe kusAmbulo 6:1-8. Ngokuthakazelisayo lapho iNew World Translation isebenzisa amazwi “yasiveza ngezibonakaliso” futhi ivumelana neThe Emphasised New Testament kaRotherham, amazwi “esibonakaliso” asetshenziswa iKing James Version, noma iAuthorized Version ka-1611, iThe Emphatic Diaglott kaB. Wilson neLiteral Translation of the Holy Bible kaYoung. Ngokuvumelana nalawomazwi ayisingeniso encwadi yokugcina yeBhayibheli, isAmbulo sigcwele izibonakaliso, imifanekiso nokubaluleka okukhulu emlandweni wesintu. Lokhu kwakuzokwenzeka esikhathini esizayo, “masinyane.”
Amahhashi Amane Nabagibeli Bawo
6. Kugcinelwe bani ukungena ekujabuleni okwabikezelwa kusAmbulo 1:3, futhi kanjani?
6 Azikho izehlakalo ezingokomlando ezibonisa ukuthi lezozinto zenzeka ngokoqobo phakathi namakhulu ayi-18 ngemva kokufa komphostoli uJohane, cishe ngo-98 C.E., futhi manje, ukunakekela kwethu kugxila kulesikhathi sekhulu lama-20 C.E. Ngokwenza kanjalo, sithola ukuthi thina balelikhulu elivusa amadlingozi sisalelwe ukungena ekujabuleni umphostoli ophefumlelwe akhomba kukho lapho ebhala: “Ubusisiwe ofundayo nabo abawezwayo amazwi alesisiprofetho bagcine okulotshiweyo kuso, ngokuba isikhathi siseduze.” (IsAmbulo 1:3) Ngokwenjabulo yethu masihlole “isibonakaliso” samahhashi amane nabagibeli bawo. Masifunde isAmbulo 6:1-8:
7. Kwaqhamukani lapho iWundlu likaNkulunkulu livula uphawu lokuqala lwencwadi eyayisesandleni salo?
7 “Ngase ngibona lapho iWundlu [uJesu Kristu] livula olunye lwezimpawu eziyisikhombisa [zomqulu owawusesandleni sakhe], ngezwa esinye sezidalwa ezine sisho njengezwi lokuduma, sithi: Woza! Ngabona, bheka nanto ihashi elimhlophe, nohlezi phezu kwalo ephethe umnsalo wanikwa umqhele, waphuma engonqobayo noyakunqoba.
8. Yini umphostoli uJohane ayibona ekuvulweni kophawu lwesibili lwencwadi?
8 “Nalapho livula uphawu lwesibili, ngezwa isidalwa sesibili sithi: Woza! Kwase kuphuma elinye ihashi elibomvu, nohlezi phezu kwalo waphiwa ukususa ukuthula emhlabeni, ukuze babulalane, wanikwa nenkemba enkulu.
9. Yini uJohane ayibona futhi wayizwa ekuvulweni kophawu lwesithathu?
9 “Kuthé selivula uphawu lwesithathu, ngezwa isidalwa sesithathu sithi: Woza! Ngase ngibona, bheka, nanto ihashi elimnyama nohlezi phezu kwalo ephethe isilinganiso ngesandla sakhe. Ngase ngizwa izwi phakathi kwezidalwa ezine lithi: Imbenge kakolweni ngodenariyu nezimbenge ezintathu zebhali ngodenariyu, kepha amafutha newayini ungakoni.
10. Ekuvulweni kophawu lwesine, yini uJohane ayibona futhi wayizwa embonweni?
10 “Nalapho livula uphawu lwesine, ngezwa izwi lesidalwa sesine sithi: Woza! Ngase ngibona, bheka nanto ihashi elimpofu nohlezi phezu kwalo, igama lakhe lalingukuFa, neHayidese lalandelana naye; base benikwa amandla phezu kokwesine komhlaba ukuba babulalane ngenkemba, nangendlala, nangokufa, nangezilwane zomhlaba.”
IHHASHI ELIMHLOPHE NOMGIBELI WALO
11-13. (a) Ihhashi elimhlophe lifanekiselani, futhi umgibeli walo ufanekisela umuntu onjani? (b) Umgibeli lapho ufana namuphi umgibeli umhubi akhuluma ngaye, futhi kumaHeberu 1:8, 9, uPawulu uwasebenzisa kubani lawomazwi angokwesiprofetho?
11 Ihhashi elimhlophe lalifanekisela intaba yobukhosi, umphathi wobukhosi, umphathi olungile nomsulwa, onesivinini njengehhashi loqobo. Umgibeli walendlela esheshayo yokuhamba wayefanekisela inkosi entsha ebekiwe, ngoba wanikwa umqhele wobukhosi. Wayeyinkosi eyiqhawe, ngoba wayehlome ngomsalo. Ngaphezu kwalokho waqhubekela phambili enqoba, kwaze kwaba sesitheni sokugcina soMbuso wakhe esabekwa ngaphansi kwakhe njengesinqotshiwe. Kwakumelwe kube ukunqoba okuphelele! Ukuze kube njalo, wanikwa inkemba ende, isikhali sobukhosi sokulwa. Ubanike, obegcwalisa lendima ekhulwini lethu lama-20? Ngokusobala kungofanayo neNkosi egcwalisa amaHubo 45, lapho sifunda ukuthi:
12 “Inhliziyo yami iyachichima ngendaba enhle; ngikhuluma igama engiliqambé ngenkosi; . . . Bophela inkemba yakho okhalweni lwakho wena-qhawe, kube-ngukuphakama kwakho nobukhosi bakho. Hlahlameleka ebukhosini bakho, uqhubeke ngenxa yeqiniso nokuthobeka nokulunga; isandla sakho sokunene siyakukufundisa izinto ezesabekayo. Imicibisholo yakho ibukhali, izizwe ziyawa phansi kwakho; isenhliziyweni yezitha zenkosi. Isihlalo sakho sobukhosi, Nkulunkulu, singesiphakade naphakade; intonga yobuqotho iyintonga yombuso wakho. Ukuthandile ukulunga, wakuzonda okubi; ngakho-ke uNkulunkulu, uNkulunkulu wakho, ukugcobile ngamafutha enjabulo ngokungaphezu kwabangane bakho.”—IHu 45, Amavesi 1-7.
13 KumaHeberu 1:8, 9 umphostoli uPawulu ucaphuna amaHubo 45:6, 7 futhi asebenzise lawomazwi eNdodaneni kaNkulunkulu, uJesu Kristu. Ngokungenakugwenywa-ke, umgibeli wehhashi elimhlophe ogibela ngokunqoba kumelwe kube uJesu Kristu ekugcotshweni kwakhe ezulwini ekupheleni kweZikhathi zabeZizwe ngo-1914.
14. (a) UJesu wangena nini futhi kanjani eJerusalema njengokungathi kusekugcotshweni kwakhe, futhi ekugcwalisekeni kwasiphi isiprofetho? (b) Imuphi ukhokho ongokomfanekiso uJesu amlingisa ngokugibela ngesikhathi esinjalo?
14 Siyakhumbula isikhathi lapho uJesu Kristu egibele njengenkosi ekhethiwe njengokungathi kusekugcotshweni kwakhe ethempelini eJerusalema. Ngaleso sikhathi wayengagibele ihhashi elimhlophe elitshakadulayo. Wayegibele imbongolo. Lokhu kwakuwukugcwaliseka kwesiprofetho sikaZakariya 9:9, esifundeka kanje: “Thokoza kakhulu, ndodakazi yaseSiyoni; jabula nokujabula; ndodakazi yaseJerusalema; bheka, iNkosi yakho iza kuwe, ilungile, inensindiso, ithobekile, ikhwele imbongolo, ithole, inkonyane yembongolokazi.” Ngokuvumelana nalesiprofetho, uJesu wayekhwele isilwane esinokuthula lapho enza ukungena kwakhe okungumvuthwandaba eJerusalema ngosuku lweshumi lwenyanga yesiJuda kaNisan, ngo-33 C.E., ngalokho ezibonakalisa njengeWundlu likaNkulunkulu ngalo kanye usuku amaJuda ayisa ngalo imvu yePhasika ezindlini zawo ukuze ayigcine lapho kuze kugujwe usuku lwePhasika ngoNisan 14. Ngokugibela ngaleyondlela uJesu wayelingisa ukhokho wakhe ongokomfanekiso, uSolomoni, indodana kaDavide. Lapho uDavide eyeka ubukhosi ngemva kokuhlala esihlalweni sobukhosi sombuso kaIsrayeli iminyaka engama-40, wenza ukuba uSolomoni agibele umnyuzikazi ekugcotshweni kwakhe. Khona-ke, ngemva kokuba umPristi Omkhulu uSadoki esemgcobile ukuba alandele uyise, isixuku esasikhona samaIsrayeli samemeza, “Mana njalo, nkosi Solomoni!”—1 AmaKhosi 1:33-40.
15. (a) Yisiphi isenzo esisobala ekungeneni kukaJesu eJerusalema egibele imbongolo yensikazi? (b) Luhlobo luni lokwamukelwa iJerusalema elamnika khona, futhi ngani?
15 Manje kwakuzoba yini ukwamukelwa okwakuzonikezwa uJesu lapho, ezinsukwini ezine ngaphambi kwePhasika, egibele imbongolo ehla eNtabeni yemiNqumo eya emzini wokugcotshwa? Izixuku ezaqala ukumhlangabeza zawuthola umqondo walokho okwakwenzeka ngaleso sikhathi ngokuma kwezinto futhi zaba nomuzwa wokuthi wayenguMesiya inkosi yakwaIsrayeli ethenjisiwe. Zavayizisa amagatsha esundu. Zandlala izingubo zazo ukuba ahambe phezu kwazo. “Izixuku ezazihamba phambili nezazimlandela zamemeza zathi: Hosiyana kuyo iNdodana kaDavide! Ubusisiwe ozayo egameni leNkosi. Hosiyana kweliphezulu!” (Mathewu 21:1-9) Lokhu kwakuwukusabela kweningi. Kodwa iJerusalema ngokwalo, lalingaphansi kwethonya labaholi benkolo bamaJuda ababengaqondiswa ukugcwaliseka kwesiprofetho ababesibona. Ngakho iJerusalema alizange limamukele njengenkosi.
16. Abaphathi bethempeli bamphatha kanjani uJesu ngokuphambene nokuphatha kwabo abathengisi?
16 Lapho uJesu eya ethempelini, umPristi Omkhulu uKayafase akazange amgcobe ukuba abe inkosi enguMesiya ekhululekile eMbusweni wamaRoma. Abapristi babevumela abathengisi ukuba basebenzise izindawo zethempeli ukuze baqhube amabhizinisi abo enzuzo, kodwa uJesu wabonakalisa izimfanelo eziqondile zompristi omkhulu ngokubaxosha, futhi wakhuza labo ababenenkani ngokuba athi kubo: “Kulotshiwe ukuthi: Indlu yami iyakubizwa ngokuthi indlu yokukhulekela, kepha nina niyenza umhume wabaphangi.” AmaJuda ayeyizimpumputhe nezinyonga eza kuye ethempelini, futhi wawaphulukisa. Kodwa abapristi abakhulu nababhali bakusola lokho okwakwenzeka, futhi benqaba ukumamukela njenge“Ndodana kaDavide” nokummisa njengombusi ofanelekile wombuso wakwaIsrayeli. Lapho uJesu ebashiya ethempelini futhi eya eBethaniya, akazange enze kanjalo njengenkosi esanda kubekwa.—Mathewu 21:1-17.
17. UPontiyu Pilatu wasibonisa kanjani isithakazelo ngokusho kukaJesu ukuthi uyinkosi, futhi wasichitha kanjani isifiso sabapristi abakhulu maqondana nobukhosi bukaJesu?
17 Ezinsukwini ezine kamuva, lapho uJesu ephambi kombusi waseRoma uPontiyu Pilatu, lona oweZizwe wambuza ukuthi uyinkosi yini. UJesu waphendula ngokuthi umbuso wakhe wawungesiwo owalelizwe uPilatu ayengowalo. Ngalokho okwashiwo abapristi abakhulu ukuthi, “Asinankosi, uKesari kuphela,” uPilatu wanikela uJesu ukuba aphanyekwe eKalvari. Nokho uPilatu wama eqinile ngokubeka ngaphezu kwekhanda likaJesu esigxotsheni isaziso: “UJESU WASENAZARETHA INKOSI YABAJUDA.”—Johane 19:15, 19-22.
18. Kungaluphi usuku olubalulekile uJehova avusa ngalo iNdodana yakhe kwabafileyo, futhi ayethini amazwi okuvalelisa kaJesu ovusiwe kubafundi bakhe ngaphambi kokuba anyukele ezulwini?
18 Kwasala kuNkulunkulu uMninimandla onke, uJehova, ukuba avuse iNdodana yakhe engumfel’ ukholo njenge“zibulo labafileyo” ngoNisani 16, ngalo usuku amaJuda ayenikela ngalo izithelo zokuqala zebhali kuJehova ethempelini. (IsAmbulo 1:5) Khona-ke iNkosi yesikhathi esizayo yakwazi ukuzibonakalisa kubafundi bayo abathembekile ngalo lolosuku. Ezinsukwini ezimbalwa kamuva, ngaphambi kokuba anyukele ezulwini, wathi kubo: “Ngiphiwe amandla onke ezulwini nasemhlabeni; ngalokho hambani nenze izizwe zonke abafundi, nibabhapathize egameni likaYise neleNdodana nelikaMoya oNgcwele.”—Mathewu 28:18, 19; Levitikusi 23:10-12; 1 Korinte 15:20.
Ukuphelelisa Ukunqoba Kwakhe
19. Khona-ke yimuphi umfanekiso ongokwesiprofetho uJesu akwazi ukuwugcwalisa ngesikhathi esifanele, futhi uye waba luhlobo luni lwenkosi kusukela ngalesosikhathi?
19 Khona-ke uJesu wakwazi ukugcwalisa umfanekiso ongokwesiprofetho wokugibela ehhashini elimhlophe, agibele njengenkosi ethweswe umqhele ukuba aphelelise ukunqoba kwakhe kuzo zonke izitha zakhe ezulwini nasemhlabeni. (IsAmbulo 6:1, 2) Kusukela ekupheleni kwe“zikhathi zabezizwe ezimisiwe” ngonyaka ka-1914 C.E. uyiNkosi eyiqhawe, kunjengokungathi uhlome ngomnsalo ukuze abulale izitha zakhe ezikude. Ngokoqobo amazwi angokwesiprofetho akumaHubo 45:3-8 ayebhekiselwe kuleNkosi eyiqhawe:
20. Amazwi ashiwo umhubi kuye amtshela ukuba enzeni?
20 “Bophela inkemba yakho okhalweni lwakho wena-qhawe, kube-ngukuphakama kwakho nobukhosi bakho. Hlahlameleka ebukhosini bakho, uqhubeke ngenxa yeqiniso nokuthobeka nokulunga; isandla sakho sokunene siyakukufundisa izinto ezesabekayo. Imicibisholo yakho ibukhali, izizwe ziyawa phansi kwakho; isenhliziyweni yezitha zenkosi. Isihlalo sakho sobukhosi, Nkulunkulu, singesaphakade naphakade; intonga yobuqotho iyintonga yombuso wakho. Ukuthandile ukulunga, wazonda okubi; ngakho-ke uNkulunkulu, uNkulunkulu wakho, ukugcobile ngamafutha enjabulo ngokungaphezu kwabangane bakho. Zonke izingubo zakho ziqholiwe ngenhlaka, nenhlaba, nekasiya; ezindlini zobukhosi zophondo lwendlovu ukubethwa kwezingubhu zezintambo kukujabulisile.”
21. (a) Singaqiniseka kanjani ukuthi amazwi omhubi asebenza kuJesu Kristu okhazinyulisiwe? (b) Kugcizelelwa kanjani ukuqondisa kwakhe okunembayo ezitheni zakhe kumaHubo 45:5?
21 KumaHeberu 1:8, 9 umphostoli uPawulu ucaphuna amazwi akumaHubo 45:3-8 asebenzise leyongcaphuno kuJesu Kristu, ukuze adonsele ukunakekela esikhundleni sakhe manje esiphakeme. Lokhu kwenza kuqiniseke ukuthi “inkosi” leyo “amadodana kaKora” aphefumlelwa ukuba ahlabelele ngayo kwakuyiNkosi uJesu Kristu omiswe ngokufanelekile. (Bheka amazwi alotshwe ngenhla kumaHubo 45 umbhalo ongenhla.) Imicibisholo yo“mnsalo” wakhe yayizoqondiswa enhliziyweni yabamelene noMbuso wakhe ngokushaya emhloleni ngaphezu kwalokho kwabaseParthi lasendulo, ababengompetha bemicibisholo nakuba begibele amahhashi.
22. (a) Kukuyiphi enye ingxenye yesAmbulo lomgibeli wehhashi elimhlophe afanekiswa kuyo, futhi ngaphansi kwaliphi igama? (b) Amehlo ethu abusiswa kanjani ngokubona muphi umbono, futhi sisabela kanjani kulokho esikubonayo?
22 Umgibeli wehhashi elimhlophe kusAmbulo 6:2 ubonakala efana nomgibeli wehhashi elimhlophe ochazwe kusAmbulo 19:11-16. Kulokhu kwamuva igama lakhe libizwa ngokuthi “uLizwi kaNkulunkulu,” futhi ethangeni lakhe kulotshwe amazwi athi: “INKOSI YAMAKHOSI NOMBUSI WABABUSI.” Lapha ufanekiswa esemvuthwandabeni wokuhlasela izitha zakhe, lapho enza ukugibela kwakhe kube ukunqoba kokugcina “ekulweni kosuku olukhulu lukaNkulunkulu uMninimandla onke” enkundleni yempi yeHarmagedoni, noma iNtaba yaseMegido. (IsAmbulo 16:14-16; 19:17-21) Ngokungabonakali emehlweni esintu, khona-ke kufika ukuboshwa kukaSathane uDeveli namademoni akhe kwalasha iminyaka eyinkulungwane. (IsAmbulo 20:1-3) Abusisiwe amehlo ethu ngokuba sibone ngokholo ukugibela kweNkosi emisiwe “ihashi elimhlophe” kusukela ekupheleni kweZikhathi zabeZizwe ngo-1914. Sivuswa amadlingozi ngokunqoba kwayo, siyamemeza, ‘Gibela, wena mgibeli wobukhosi ehhashini elimhlophe, ekunqobeni kwakho okungenakulinganiswa eHarmagedoni, ngokuvikela umbusi wendawo yonke uJehova uNkulunkulu, uMniki wale“sibonakaliso” esingokwesiprofetho.’
Ungakuphendula kanjani okulandelayo:
□ Abagibeli bamahhashi bakuqala nini ukugibela kwabo?
□ Yikuphi okwakulindelwe okwagcwaliseka ngaleso sikhathi?
□ Yikuphi ukugibela kokuqala umgibeli wokuqala akwenza, futhi wamukelwa kanjani?
□ IsAmbulo 6:1, 2; 19:11-16 namaHubo 45:3-8 ayibonisa kanjani injongo yokugibela kwamuva kwalomgibeli?