Lithini IBhayibheli NgoNkulunkulu NangoJesu?

UKUBA abantu bebengalifunda lonke iBhayibheli bengenamqondo abawuthole kusengaphambili kaZiqu-zintathu, bebengafinyelela yini emqondweni onjalo ngokwabo? Lutho neze.

Okufika ngokukhanya bhá kumfundi ongathathi-hlangothi ukuthi uNkulunkulu yedwa onguMninimandla onke, uMdali, uhlukile futhi akafani nanoma ubani omunye, nokuthi uJesu, ngisho nasekuphileni kwakhe engakabi umuntu, naye uhlukile futhi akafani nomunye, ungumuntu odaliwe, ongaphansi kukaNkulunkulu.

UNkulunkulu Munye, Akamthathu

IMFUNDISO yeBhayibheli yokuthi uNkulunkulu munye ibizwa ngokuthi monotheism (ukukholelwa kuNkulunkulu oyedwa). Futhi uL. L. Paine, uprofesa womlando wamasonto, ubonisa ukuthi ukukholelwa kuNkulunkulu oyedwa esimweni sakho sangempela akumvumeli uZiqu-zintathu: “ITestamente Elidala likhuluma kuphela ngoNkulunkulu oyedwa. UNkulunkulu ungumuntu oyedwa ohlukile. Umqondo wokuthi uziqu-zintathu uyatholakala lapho . . . awunasisekelo nakancane.”

Ingabe kwaba noshintsho ekukholelweni kuNkulunkulu oyedwa ngemva kokuba uJesu eze emhlabeni? UPaine uyaphendula: “Kuleliphuzu alikho igebe phakathi kweTestamente Elidala neLisha. Isiko lokukholelwa kuNkulunkulu oyedwa liqhutshekiselwa phambili. UJesu wayengumJuda, eqeqeshwe abazali abangamaJuda ngemibhalo yeTestamente Elidala. Imfundiso yakhe yayingeyobuJuda kwasemsukeni wayo; yebo ivangeli elisha, kodwa hhayi imfundiso entsha yenkolo. . . . Futhi wawamukela njengenkolelo yakhe siqu umbhalo osemqoka wokukholelwa kwamaJuda kuNkulunkulu oyedwa: ‘Yizwa, O Israyeli, iNkosi uNkulunkulu wethu inguNkulunkulu oyedwa.’”

Lawomazwi atholakala kuDuteronomi 6:4. INew Jerusalem Bible (NJB) yamaKatolika lapha ifundeka kanje: “Lalela, Israyeli: UYahweh uNkulunkulu wethu nguye, nguYahweh okuwukuphela kwakhe.”a Ngokohlelo lolimi lwakulelovesi, igama elithi “nguye” alinazo izakhi zobuningi okwenza siqaphele ukuthi limane lisho umuntu oyedwa.

Umphostoli uPawulu ongumKristu naye akazange abonise ushintsho ngohlobo lomuntu uNkulunkulu ayilo, ngisho nangemva kokuba uJesu eze emhlabeni. Wabhala: “UNkulunkulu munye.”—Galathiya 3:20; bheka futhi neyoku-1 Korinte 8:4-6.

Izikhathi eziyizinkulungwane kulo lonke iBhayibheli, kukhulunywa ngoNkulunkulu njengomuntu oyedwa. Lapho ekhuluma, kunjengomuntu oyedwa ongahlukene phakathi. IBhayibheli likhanya ngokuthe bhá kulokhu. Njengoba uNkulunkulu esho: “NginguJehova; yilo igama lami; angiyikunika omunye inkazimulo yami.” (Isaya 42:8) “NginguYahweh uNkulunkulu wakho . . . Awuyikuba nabanye onkulunkulu ngaphandle kwami.” (Omalukeke sizenzele.)—Eksodusi 20:2, 3, JB.

Kungani bonke abalobi beBhayibheli abaphefumlelwa uNkulunkulu bekhuluma ngoNkulunkulu njengomuntu oyedwa uma eqinisweni engabantu abathathu? Lokho bekuyofeza yiphi injongo, ngaphandle kokuba kudukise abantu? Ngokuqinisekile, ukuba uNkulunkulu wayakhiwa abantu abathathu, wayeyokwenza abalobi bakhe beBhayibheli bakwenze kukhanye ngokuthe bhá ukuze kungabikho kungabaza ngakho. Okungenani abalobi bemiBhalo YamaKristu YesiGreki abathintana ngokuqondile neNdodana yakhe siqu uNkulunkulu babengenza kanjalo. Kodwa abazange.

Kunalokho, lokho abalobi beBhayibheli abakwenza kwakhanya ngokuthe bhá wukuthi uNkulunkulu unguMuntu oyedwa—uMuntu oyingqayizivele, ongahlukene okungekho-muntu olingana naye: “Mina nginguJehova, akakho omunye; ngaphandle kwami akakho uNkulunkulu.” (Isaya 45:5) ‘Wena wedwa ogama lakho linguJehova; ungoPhezukonke emhlabeni wonke.’—IHubo 83:18.

Akayena Unkulunkulu Owakhiwa Abaningi

UJESU wabiza uNkulunkulu ngokuthi “Nkulunkulu wedwa oqinisileyo.” (Johane 17:3) Akakaze abhekisele kuNkulunkulu njengonkulunkulu owakhiwa abantu abaningi. Kungalesosizathu kungekho eBhayibhelini lapho kubizwa khona noma ubani ngokuthi uMninimandla onke ngaphandle kukaJehova. Ngaphandle kwalokho, kwenza incazelo yegama elithi “mninimandla onke” ibe yize. Kokubili uJesu nomoya ongcwele akukaze kubizwe ngalokho, ngoba uJehova kuphela ophakeme. KuGenesise 17:1 uthi: “NginguNkulunkulu uSomandla.” Futhi uEksodusi 18:11 uthi: “UJehova mkhulu kunabo bonke onkulunkulu.”

EmiBhalweni YesiHeberu, igama elithi ʼelohʹah (unkulunkulu) linezindlela ezimbili zobuningi, okungukuthi, ʼelo·himʹ (onkulunkulu) nelithi ʼelo·hehʹ (onkulunkulu bokuthile). Lezindlela zobuningi ngokuvamile zibhekisela kuJehova, lapho-ke ngalinye lihunyushelwa ebunyeni ngokuthi “uNkulunkulu.” Ingabe lezindlela zobuningi zibonisa ukuba khona kukaZiqu-zintathu? Cha, azikubonisi. KuyiDictionary of the Bible, uWilliam Smith uthi: “Umqondo owukucabangela wokuthi elithi [ʼelo·himʹ] lalibhekisela kubantu abathathu abakuNkulunkulu manje awusekelwa nayisazi esisodwa. Kungaba yilokho izazi zohlelo lolimi ezikubiza ngokuthi ubuningi bobukhosi, noma lichaza umqondo wokugcwala kwamandla aphezulu, amandla esewonke aboniswa uNkulunkulu.”

IAmerican Journal of Semitic Languages and Literatures ithi ngelithi ʼelo·himʹ: “Cishe ngokungaguquguquki lihunyushwa nesichasiso sesenzo esisebunyeni, futhi liba nesimo sesiphawulo esisebunyeni.” Ukuze sifanekise lokhu, isiqu esithi ʼelo·himʹ sivela izikhathi ezingama-35 sihamba sodwa emlandweni wendalo, futhi isikhathi ngasinye isenzo esichaza lokho uNkulunkulu akusho nakwenza sisebunyeni. (Genesise 1:1–2:4) Ngakho-ke, leyoncwadi iyaphetha: “Elithi [ʼelo·himʹ] kunalokho kumelwe lichazwe njengobuningi obuchaza izinga, liveza umqondo wobukhulu nowobukhosi.”

Elithi ʼelo·himʹ alisho “abantu,” kodwa “onkulunkulu.” Ngakho labo abaphikisa ngokuthi leligama liveza umqondo kaZiqu-zintathu bazenza abakholelwa konkulunkulu abaningi, abakhulekeli bakaNkulunkulu ongaphezu koyedwa. Ngani? Ngoba bekuyosho ukuthi kunonkulunkulu abathathu kuZiqu-zintathu. Kodwa cishe bonke abasekeli bakaZiqu-zintathu bayawenqaba umqondo wokuthi uZiqu-zintathu wakhiwa onkulunkulu abathathu abahlukene.

IBhayibheli futhi liyawasebenzisa lamagama athi ʼelo·himʹ nelithi ʼelo·hehʹ lapho libhekisela konkulunkulu bezithombe bamanga abaningana. (Eksodusi 12:12; 20:23) Kodwa ngezinye izikhathi lingase libhekisele kunkulunkulu oyedwa wamanga, njengalapho amaFilisti ebhekisela ‘kuDagoni unkulunkulu [ʼelo·hehʹ] wawo.’ (AbAhluleli 16:23, 24) UBali ubizwa ngokuthi ‘unkulunkulu [ʼelo·himʹ].’ (1 AmaKhosi 18:27) Ngaphezu kwalokho, leligama liyasetshenziswa kubantu. (IHubo 82:1, 6) UMose watshelwa ukuthi wayezokhonza “njengoNkulunkulu” [ʼelo·himʹ] kuAroni nakuFaro.—Eksodusi 4:16; 7:1.

Ngokusobala, ukusebenzisa iziqu ezithi ʼelo·himʹ nesithi ʼelo·hehʹ konkulunkulu bamanga, ngisho nakubantu, kwakungavezi umqondo wokuthi ngamunye wayengonkulunkulu abaningi; nokusebenzisa elithi ʼelo·himʹ noma ʼelo·hehʹ kuJehova akusho ukuthi ungumuntu ongaphezu koyedwa, ikakhulukazi lapho sicabangela ubufakazi balo lonke iBhayibheli ngalendaba.

UJesu Uyisidalwa Esihlukile

LAPHO esemhlabeni, uJesu wayengumuntu, nakuba ayephelele ngoba uNkulunkulu owadlulisela amandla kaJesu okuphila esibelethweni sikaMariya. (Mathewu 1:18-25) Kodwa leyo akuyona indlela aqala ngayo. Yena ngokwakhe wathi ‘wehla ezulwini.’ (Johane 3:13) Ngakho kwakungokufanele ukuba kamuva athi kubalandeli bakhe: “Niyothini uma ningabona iNdodana yomuntu [uJesu] inyukela lapho eyayikhona ngaphambili?”—Johane 6:62, NJB.

Ngakho-ke, uJesu wayephila ezulwini ngaphambi kokuba eze emhlabeni. Kodwa ingabe wayephila njengomunye wabantu abakuNkulunkulu umninimandla onke, ongusimakade onguziqu-zintathu? Cha, ngoba iBhayibheli lisho ngokucacile ukuthi ekuphileni kwakhe engakabi umuntu, uJesu wayengumuntu womoya odaliwe, njengoba nje nezingelosi zingabantu bomoya abadalwe uNkulunkulu. Kokubili izingelosi noJesu abazange babe khona ngaphambi kokuba badalwe.

UJesu, ekuphileni kwakhe engakabi umuntu, ‘wayeyizibulo layo yonke indalo.’ (Kolose 1:15, NJB) ‘Wayewukuqala kwendalo kaNkulunkulu.’ (IsAmbulo 3:14, RS, uhlelo lwamaKatolika.) “Ukuqala” (ngesiGreki, ar·kheʹ) akunakuchazwa ngokufanele njengokusho ukuthi uJesu ‘wayengumqalisi’ wendalo kaNkulunkulu. Ezincwadini zakhe zeBhayibheli, uJohane usebenzisa izindlela ezihlukahlukene zegama lesiGreki elithi ar·kheʹ izikhathi ezingaphezu kwama-20, futhi lezi ngaso sonke isikhathi zinencazelo efanayo ‘yokuqala.’ Yebo, uJesu wadalwa uNkulunkulu njengokuqala kwendalo kaNkulunkulu engabonakali.

Phawula indlela lokho kubhekisela emvelaphini kaJesu okuhlangana ngayo namazwi ashiwo ‘ukuHlakanipha’ okungokomfanekiso encwadini yeBhayibheli yezAga: “UYahweh wangidala, ngiwulibo lomklamo wakhe, ngaphambi komsebenzi wakhe omdala kakhulu. Ngaphambi kokuba kumiswe izintaba, ngaphambi kwamagquma, ngazalwa; ngaphambi kokuba enze umhlaba, amathafa, nezinto zokuqala zomhlaba.” (IzAga 8:12, 22, 25, 26, NJB) Nakuba igama elithi ‘ukuHlakanipha’ lisetshenziselwa ukwenza samuntu lowo owadalwa uNkulunkulu, izazi eziningi ziyavuma ukuthi eqinisweni liyingxenye yenkulumo emelela uJesu njengesidalwa somoya ekuphileni kwakhe engakabi umuntu.

Njengoba ‘ayewukuHlakanipha’ ekuphileni kwakhe engakabi umuntu, uJesu uyaqhubeka ethi ‘wayeseceleni [kukaNkulunkulu], eyingcweti enkulu.’ (IzAga 8:30, JB) Ngokuvumelana nalendima yokuba ingcweti enkulu, eyabaseKolose 1:16 ithi ngoJesu “ngaye uNkulunkulu wadala konke ezulwini nasemhlabeni.”—Today’s English Version (TEV).

Ngakho kungalesisebenzi esiyingcweti, njengokungathi isisebenzi esikanye naye esingaphansi, uNkulunkulu uMninimandla onke adala zonke ezinye izinto. IBhayibheli lifushanisa lendaba ngalendlela: “Kithina kunoNkulunkulu oyedwa, uYise, okuvela kuye konke . . . neNkosi eyodwa, uJesu Kristu, okwavela ngayo konke.” (Omalukeke sizenzele.)—1 Korinte 8:6, RS, uhlelo lwamaKatolika.

Akungabazeki ukuthi uNkulunkulu wayekhuluma nalengcweti uma ethi: “Masenze abantu ngomfanekiso wethu.” (Genesise 1:26) Abanye baye bathi isivumelwano esithi “ma-” nongumnini u“wethu” kulamazwi kubonisa ukuba khona kukaZiqu-zintathu. Kodwa uma ubungathi, ‘Masizenzele okuthile,’ akekho ngokuvamile obengakuqonda lokhu njengokuveza umqondo wokuthi abantu abaningana bahlangene njengoyedwa phakathi kwakho. Umane usho ukuthi abantu ababili noma ngaphezulu bayosebenza ndawonye ekwenzeni okuthile. Ngokunjalo, lapho uNkulunkulu esebenzisa isivumelwano esithi “ma-” nongumnini u“wethu,” wayemane nje ekhuluma nomunye umuntu, isidalwa sakhe sokuqala somoya, ingcweti enkulu, uJesu ongakabi umuntu.

Ingabe UNkulunkulu Wayengalingwa?

KUMATHEWU 4:1, kukhulunywa ngoJesu ‘njengolingwa uSathane.’ Ngemva kokubonisa uJesu “imibuso yonke yezwe nenkazimulo yayo,” uSathane wathi: “Konke lokhu ngizakukunika khona, uma uziwisa phansi, ukhuleke kimi.” (Mathewu 4:8, 9) USathane wayezama ukubangela uJesu ukuba angathembeki kuNkulunkulu.

Kodwa lokho bekungaba kanjani uvivinyo lokwethembeka uma uJesu ebenguNkulunkulu? Ingabe uNkulunkulu wayengahlubuka kuye ngokwakhe? Cha, kodwa izingelosi nabantu bangahlubuka kuNkulunkulu futhi bakwenza. Ukulingwa kukaJesu bekungaba nengqondo kuphela uma ayengeyena uNkulunkulu, kodwa engumuntu ohlukile ongazenzela izinqumo, lowo owayengaba ongathembekile uma ayethanda, njengengelosi noma umuntu.

Ngakolunye uhlangothi, kungokungenakucatshangwa ukuthi uNkulunkulu wayengona futhi angathembeki kuye ngokwakhe. “Umsebenzi wakhe uphelele . . . unguNkulunkulu wokwethembeka . . . ulungile, uqotho yena.” (Duteronomi 32:4) Ngakho ukuba uJesu wayenguNkulunkulu, wayengeke alingwe.—Jakobe 1:13.

Njengoba engeyena uNkulunkulu, uJesu wayengaba ongathembekile. Kodwa wahlala ethembekile, ethi: “Suka, Sathane, ngokuba kulotshiwe ukuthi: Wokhuleka eNkosini uNkulunkulu wakho, umkhonze yena yedwa.”—Mathewu 4:10.

Isihlengo Sasiyinani Elingakanani?

ESINYE sezizathu eziyinhloko zokuba uJesu eze emhlabeni naso sihlangene ngokuqondile noZiqu-zintathu. IBhayibheli lithi: “Munye uNkulunkulu, munye nomlamuleli phakathi kukaNkulunkulu nabantu, umuntu uKristu Jesu, owazinikela abe-yinhlawulo yabo bonke.”—1 Thimothewu 2:5, 6.

UJesu, engengaphezu futhi engengaphansi komuntu ophelele, waba isihlengo esakukhokhela ngokuthe nsé lokho okwalahlwa uAdamu—ilungelo lokuphila komuntu okuphelele emhlabeni. Ngakho uJesu wayengabizwa ngokufanelekile ngokuthi “uAdamu wokugcina” ngumphostoli uPawulu, owathi endabeni efanayo: “Njengalokhu kuAdamu bonke bayafa, ngokunjalo futhi kuKristu bonke bayakuphiliswa.” (1 Korinte 15:22, 45) Ukuphila kobuntu okuphelele kukaJesu ‘kwakuyinhlawulo’ eyayifunwa ukulunga kwaphezulu—hhayi ngaphezulu, hhayi ngaphansi. Ngisho nesabantu isimiso esiyisisekelo sokulunga siwukuthi inani elikhokhelwayo kufanele lilingane nobubi obenziwe.

Nokho, ukuba uJesu wayeyingxenye kaNkulunkulu, inani lesihlengo laliyoba likhulu kakhulu kunalokho okwakudingwa uMthetho kaNkulunkulu. (Eksodusi 21:23-25; Levitikusi 24:19-21) Kwakungumuntu ophelele kuphela, uAdamu, owona e-Edene, hhayi uNkulunkulu. Ngakho isihlengo, ukuze sivumelane ngempela nokulunga kukaNkulunkulu, kwakufanele sibe esilingana ncamashí—umuntu ophelele, “uAdamu wokugcina.” Ngakho-ke, lapho uNkulunkulu ethumela uJesu emhlabeni njengesihlengo, wenza uJesu ukuba abe yilokho okwakuyokwanelisa ukulunga, hhayi isimo sikaNkulunkulu, noma umuntu ongunkulunkulu, kodwa umuntu ophelele, ‘omncinyane kunezingelosi.’ (Heberu 2:9; qhathanisa neHubo 8:5, 6.) Ingxenye kaNkulunkulu umninimandla onke—uYise, iNdodana, noma umoya ongcwele—kwakungenzeka kanjani ukuba ibe encinyane kunezingelosi?

‘UyiNdodana Ezelwe Yodwa’ Kanjani?

IBHAYIBHELI libiza uJesu ngokuthi ‘iNdodana ezelwe yodwa’ kaNkulunkulu. (Johane 1:14; 3:16, 18; 1 Johane 4:9) Abakholelwa kuZiqu-zintathu bathi njengoba uNkulunkulu engusimakade, ngakho neNdodana kaNkulunkulu ingusimakade. Kodwa umuntu angaba kanjani indodana futhi ngesikhathi esifanayo alingane noyise?

Abakholelwa kuZiqu-zintathu bathi endabeni kaJesu, amazwi athi ‘ozelwe yedwa’ awafani nencazelo yesichazamazwi “yokuzala,” ‘okuwukudlulisela inzalo njengobaba.’ (Webster’s Ninth New Collegiate Dictionary) Bathi endabeni kaJesu asho “umqondo wobuhlobo obungenasiqalo,” uhlobo lobuhlobo bendodana kuphela ngaphandle kokuyizala. (Vine’s Expository Dictionary of Old and New Testament Words) Ingabe lokho kuzwakala kunengqondo kuwe? Ingabe umuntu angaba nendodana ngaphandle kokuba ayizale?

Ngaphezu kwalokho, kungani iBhayibheli lisebenzisa lona kanye igama elifanayo lesiGreki elihunyushwa ngokuthi “ozelwe yedwa” (njengoba uVine evuma ngaphandle kwencazelo) ekuchazeni ubuhlobo bukaIsaka noAbrahama? AmaHeberu 11:17 akhuluma ngoIsaka ‘njengozelwe yedwa’ ka-Abrahama. Akungabazeki ukuthi endabeni kaIsaka, wayezelwe yedwa ngomqondo ovamile, engalingani ngobudala noma ngesikhundla noyise.

Igama eliyisisekelo lesiGreki elihunyushwa ngokuthi “ozelwe yedwa” elisetshenziswe kuJesu nakuIsaka ngelithi mo·no·ge·nesʹ, livela kumoʹnos, osho ukuthi “yedwa,” nogiʹno·mai, okuyigama eliwumsuka elisho “ukuveza,” “ukuba khona (ukuqala ukuphila),” kusho iExhaustive Concordance kaStrong. Ngakho-ke, elithi mo·no·ge·nesʹ lichazwa ngokuthi: “Ozelwe yedwa, okuwukuthi umntwana owukuphela kwakhe.”—A Greek and English Lexicon of the New Testament, kaE. Robinson.

ITheological Dictionary of the New Testament, eyahlelwa nguGerhard Kittel, ithi: “Elithi [mo·no·ge·nesʹ] lisho ‘umntwana owukuphela kwakhe,’ okuwukuthi, ongenabafowabo noma odadewabo.” Lencwadi ithi futhi kuJohane 1:18; 3:16, 18; nakweyoku-1 Johane 4:9, “ubuhlobo bukaJesu abufani nje kuphela nalobo bomntwana oyedwa kuyise. Buyibo ubuhlobo bozelwe yedwa kuYise.”

Ngakho uJesu, iNdodana ezelwe yodwa, waba nesiqalo sokuphila kwakhe. Futhi uNkulunkulu uMninimandla onke angabizwa ngokufanelekile ngokuthi uMzali, noma uYise, ngomqondo ofanayo ubaba wasemhlabeni, njengoAbrahama, azala ngawo indodana. (Heberu 11:17) Ngakho-ke, lapho iBhayibheli likhuluma ngoNkulunkulu ‘njengoYise’ kaJesu, lisuke likuqondile elikushoyo—ukuthi bangabantu ababili abahlukene. UNkulunkulu mdala. UJesu mncane—ngesikhathi, isikhundla, amandla, nangolwazi.

Lapho umuntu ecabangela ukuthi uJesu wayengeyona indodana kaNkulunkulu yomoya ewukuphela kwayo eyadalwa ezulwini, kuba sobala ukuthi kungani kwasetshenziswa amazwi athi “iNdodana ezelwe yodwa” endabeni yakhe. Abanye abantu bomoya abadaliwe abangenakubalwa, izingelosi, nabo babizwa ngokuthi “amadodana kaNkulunkulu,” ngomqondo ofana nalowo uAdamu ayeyindodana kaNkulunkulu ngawo, ngoba amandla abo okuphila avela kuJehova uNkulunkulu, isiPhethu, noma uMthombo wokuphila. (Jobe 38:7; IHubo 36:9; Luka 3:38) Kodwa bonke laba badalwa kusetshenziswa “iNdodana ezelwe yodwa,” eyayiwukuphela kwayo eyayizalwe uNkulunkulu ngokuqondile.—Kolose 1:15-17.

Ingabe UJesu Wayebhekwa NjengoNkulunkulu?

NAKUBA uJesu ngokuvamile ebizwa ngokuthi uyiNdodana kaNkulunkulu eBhayibhelini, akekho noyedwa ekhulwini lokuqala leminyaka owake wamcabangela njengonguNkulunkulu iNdodana. Ngisho namademoni, ‘akholwayo ukuthi uNkulunkulu munye,’ ayazi kokuhlangenwe nakho kwawo endaweni yomoya ukuthi uJesu akayena uNkulunkulu. Ngakho, ngokunembile, abiza uJesu ngokuthi ‘uyiNdodana kaNkulunkulu’ ehlukile. (Jakobe 2:19; Mathewu 8:29) Futhi lapho uJesu efa, amabutho amaRoma angamaqaba ayeseduze ayazi ngokwanele ukuba angasho ukuthi lokho ayekuzwe kubalandeli bakhe kumelwe ukuba kuyiqiniso, hhayi ukuthi uJesu wayenguNkulunkulu, kodwa ukuthi “nempela lo ubeyiNdodana kaNkulunkulu.”—Mathewu 27:54.

Ngakho-ke, amazwi athi ‘iNdodana kaNkulunkulu’ abhekisela kuJesu njengomuntu odaliwe ohlukile, hhayi njengengxenye kaZiqu-zintathu. NjengeNdodana kaNkulunkulu, kwakungenakwenzeka ukuba abe uNkulunkulu ngokwakhe, ngoba uJohane 1:18 uthi: “Akekho oke wabona uNkulunkulu.”—RS, uhlelo lwamaKatolika.

Abafundi babebheka uJesu ‘njengomlamuleli oyedwa phakathi kukaNkulunkulu nabantu,’ hhayi njengoNkulunkulu ngokwakhe. (1 Thimothewu 2:5) Njengoba ngokwencazelo umlamuleli engumuntu ohlukile kulabo abadinga ukulanyulwa, bekungaba into ephikisanayo ngoJesu ukuba abe mdibi-munye nelinye lamaqembu azama ukuwalamula. Lokhu bekungaba ukuzishaya okuthile angeyikho.

IBhayibheli liyakhanya futhi aliguquguquki ngobuhlobo bukaNkulunkulu noJesu. UJehova uNkulunkulu kuphela onguMninimandla onke. Wamdala ngokuqondile uJesu engakabi umuntu. Ngakho-ke, uJesu waba nesiqalo futhi akasoze alingane noNkulunkulu ngamandla noma ubuphakade.

[Umbhalo waphansi]

[Amazwi acashunwe esihlokweni ekhasini 14]

Njengoba edalwe uNkulunkulu, uJesu usesikhundleni esingaphansi ngesikhathi, amandla, nangolwazi

[Isithombe ekhasini 15]

UJesu wathi wayephila engakabi umuntu, njengoba ayedalwe uNkulunkulu njengokuqala kwendalo kaNkulunkulu engabonakali