IMisa

Incazelo: Njengoba kwaphawula iBandla Elingcwele Lamasiko ESonto LamaRoma Katolika, iMisa “—Lingumhlatshelo lapho uMhlatshelo weSiphambano ukhunjulwa khona;—Isikhumbuzo sokufa nokuvuka kweNkosi, eyathi ‘yenzani lokhu ukuba ningikhumbule’ (Luka 22:19); —Idili elingcwele lapho, ngokuhlangana koMzimba neGazi leNkosi, aBantu bakaNkulunkulu bahlanganyela izinzuzo zoMhlatshelo wePhasika, bavuselele iSivumelwano Esisha uNkulunkulu aye wasenza nomuntu kwaba kanye ngeGazi likaKristu, futhi ngokholo nangethemba lifanekisela futhi landulele idili lokuphela kwezwe embusweni kaBaba, kumenyezelwa ukufa kweNkosi ‘ize ifike.’” (Eucharisticum Mysterium, May 25, 1967) Liyindlela yeSonto lamaKatolika yokwenza lokho abaqonda ukuthi uJesu Kristu wakwenza eSidlweni Sakusihlwa Sokugcina.

Ingabe isinkwa newayini kushintsha ngokoqobo kube umzimba negazi likaKristu?

‘ESivumweni Sokholo’ ngoJune 30, 1968, uPapa Paul VI wathi: “Sikholelwa ukuthi njengoba isinkwa newayini okwabusiswa iNkosi ngeSidlo Sakusihlwa Sokugcina kwashintshwa kwaba uMzimba Negazi LikaKristu okwakuzonikelwa ngenxa yethu esiphambanweni, ngakho isinkwa newayini okubusiswa umpristi kuyashintshwa kube uMzimba Negazi LikaKristu osesihlalweni sobukhosi esikhazimulayo ezulwini, futhi Sikholelwa ukuthi ukuba khona kweNkosi okuyimfihlakalo, ngaphansi kokubonakala kwalezozinto ezingqondweni zethu ezibonakala zifana ngaphambili ngisho nangemva kokuBusiswa, kuwukuba khona kweqiniso, nokungokoqobo. . . . Lolushintsho oluyimfihlakalo iSonto lilubiza ngokufanelekile ngokuthi ukuguqulwa kwesimo.” (Official Catholic Teachings—Christ Our Lord, Wilmington, N.C.; 1978, Amanda G. Watlington, k. 411) Ingabe imiBhalo eNgcwele iyavumelana naleyonkolelo?

UJesu wayesho ukuthini uma ethi, “Lokhu kungumzimba wami,” “Lokhu kuyigazi lami”?

Math. 26:26-29: “Besadla, uJesu wathabatha isinkwa, wasibusisa, wasihlephula, wanika abafundi bakhe, wathi: Thabathani nidle; lokhu kungumzimba wami. Wayesethabatha isitsha, wabonga, wabanika, wathi: Phuzani nonke kuso; ngokuba lokhu kuyigazi lami lesivumelwano elithululwa ngenxa yabaningi kukho ukuthethelelwa kwezono. Kepha ngithi kini: Kusukela manje angisayikuphuza kulesisithelo somvini, kuze kufike lolosuku engiyakusiphuza ngalo nani sisisha embusweni kaBaba.”

Ngokuqondene nenkulumo ethi “lokhu kungumzimba wami” nethi “lokhu kuyigazi lami,” kumelwe siphawule okulandelayo: IMo ifundeka kanje, “lokhu kusho umzimba wami,” “lokhu kusho igazi lami.” (Omalukeke banezelwe.) INW ifundeka ngokufanayo. ILEF ihumusha lenkulumo kanje, “lokhu kumelele umzimba wami,” “lokhu kumelele igazi lami.” (Omalukeke banezelwe.) Lezizinguqulo ziyavumelana nalokho okuphawulwe emongweni wendaba, evesini lama-29, ezinguqulweni ezihlukahlukene zamaKatolika. IKx ifundeka kanje: “Angisayikusiphuza lesithelo somvini futhi, ngize ngisiphuze kanye nani, siyiwayini elisha, embusweni kaBaba.” (Omalukeke banezelwe.) ICC, NAB, Dy nazo futhi zibonisa uJesu ebhekisela kokwakusenkomishini ‘njengesithelo somvini,’ futhi lokhu kwakungemva kokuba uJesu ethé, “Lokhu kuyigazi lami.”

Cabangela inkulumo ethi “lokhu kungumzimba wami” nethi “lokhu kuyigazi lami” ngombono wenye inkulumo esobala esetshenziswe emiBhalweni. UJesu futhi wathi, “Mina ngingukukhanya kwezwe,” “Mina ngiyisango lezimvu,” “Mina ngingumvini owonawona.” (Joh. 8:12; 10:7; 15:1) Ayikho kulezinkulumo eyayisikisela ukuguqulwa isimo ngokuyisimangaliso, akunjalo?

Kweyoku-1 Korinte 11:25, umphostoli uPawulu wabhala ngokuqondene neSidlo Sakusihlwa Sokugcina futhi waveza umqondo ofanayo ngamazwi ahluke kancane. Esikhundleni sokucaphuna uJesu njengowathi ngokuqondene nesitsha, “Phuzani nonke kuso; ngokuba lokhu kuyigazi lami lesivumelwano,” lenkulumo wayibeka ngalendlela: “Lesisitsha siyisivumelwano esisha egazini lami.” Ngokuqinisekile lokhu kwakungasho ukuthi lesisitsha sasiguqulwe ngokuyisimangaliso ngendlela ethile saba isivumelwano esisha. Ingabe akukhona yini okunengqondo ukuphetha ngokuthi okwakusesitsheni kwamelela igazi likaJesu lelo elenza isivumelwano esisha sasebenza?

UJesu wayesho ukuthini ngenkulumo yakhe ekuJohane 6:53-57?

“Khona uJesu wathi kubo: Ngiqinisile, ngiqinisile ngithi kini: Uma ningayidli inyama yeNdodana yomuntu, niphuze igazi layo, aninakuphila phakathi kwenu. Odla inyama yami, aphuze igazi lami, unokuphila okuphakade; mina ngiyakumvusa ngomuhla wokuphela. Ngokuba inyama yami ingukudla isibili, negazi lami lingukuphuza isibili. Odla inyama yami, aphuze igazi lami, uhlala kimi, nami kuye. Njengalokho uBaba ophilayo ungithumile, nami ngiphila ngoBaba, lowo ongidlayo naye uyakuphila ngami.”—Joh. 6:53-57.

Ingabe lokhu kumelwe kuqondwe njengokusho ukuthi kwakumelwe bayidle ngokoqobo inyama kaJesu futhi baphuze igazi lakhe? Uma kunjalo, uJesu bekungasho ukuthi wayekhuthaza ukweqiwa koMthetho uNkulunkulu ayewunikeze amaIsrayeli ngoMose. LowoMthetho wawukwenqabela ukudliwa kwanoma iliphi igazi. (Lev. 17:10-12) Ngokuphambene nokukhuthaza into enjalo, uJesu wakhuluma ngokunamandla ngokumelene nokwephula noma iyiphi yezimfuneko zoMthetho. (Math. 5:17-19) Ngakho kumelwe ukuba uJesu wayecabanga ngokudla nokuphuza ngomqondo ongokomfanekiso, ngokubonisa ukholo enanini lomhlatshelo wakhe ophelele wobuntu.—Qhathanisa noJohane 3:16; 4:14; 6:35, 40.

Ingabe uJesu wayala abafundi bakhe ukuba bangabi nje nesikhumbuzo sokufa kwakhe kodwa babe nesiko elaliyovuselela ngokoqobo umhlatshelo wakhe?

NgokweDocuments of Vatican II: “ESidlweni Sokugcina, ngobusuku akhashelwa ngabo, uMsindisi wethu wamisa uMhlatshelo Wesithebe SoMzimba Negazi Lakhe. Lokhu wayekwenzela ukuvuselela umhlatshelo weSiphambano . . . ”—(New York, 1966), yahlelwa nguW. M. Abbott, S.J., k. 154; omalukeke banezelwe.

ICatholic Encyclopedia ithi: “ISonto lihlose ukuba iMisa libhekwe ‘njengomhlatshelo oyiqiniso nofanele’ . . . Nokho, umthombo oyinhloko wemfundiso yethu, yisiko, lelo kusukela ezikhathini zasendulo elimemezela amandla okunxusa uMhlatshelo weMisa.”—(1913), Umq. X, kk. 6, 17.

UJesu ngokwakhe wathi: “Yenzani lokhu ukuba ningikhumbule.” (Luka 22:19; 1 Kor. 11:24) KuLuka 22:19, iKx neDy ifundeka kanje: “Yenzani lokhu ngenxa yokungikhumbula.” INAB ifundeka kanje: “Yenzani lokhu njengendlela yokungikhumbula.” UJesu akazange asho ukuthi lokho akwenza ngeSidlo Sokugcina kwakungumhlatshelo wakhe noma ukuthi abafundi bakhe kwakumelwe bavuselele umhlatshelo wakhe.

Heb. 9:25-28: “Kungesikho futhi ukuba azinikele kaningi, njengalokhu umpristi omkhulu [wamaJuda] engena endaweni engcwele iminyaka ngeminyaka, ephethe igazi elingesilo elakhe; uma kwakunjalo wayemelwe ukuhlupheka kaningi selokhu kwasekelwa izwe; kodwa kalokhu ubonakalisiwe kanye . . . ukuba asuse izono ngokuzinikela kwakhe. Futhi njengalokhu kumiselwe abantu ukuba bafe kanye, emva kwalokhu ukwahlulelwa, kunjalo noKristu, esenikelwe kanye.” (Omalukeke banezelwe.)

Ingabe kumane nje “kuyimfihlo ejulile”?

IBhayibheli liyabhekisela ezimfihlakalweni zaphezulu, noma izimfihlakalo ezingcwele. Kodwa azikho kulezi eziphikisana namaqiniso abekwe ngokukhanyayo ngokomBhalo. Ngokuqondene nalabo ababeka amasiko abo ngaphambi kwemiBhalo, uJesu wathi: “Bazenzisi, waprofetha kahle ngani uIsaya, ethi: Lesisizwe singidumisa ngezindebe zomlomo, kepha inhliziyo yaso ikude nami; kodwa bangikhonza ngeze befundisa izifundiso eziyimiyalo yabantu.”—Math. 15:7-9.

Ingabe uJesu wayesho ukuthi lesikhumbuzo sigcinwe mhlawumbe nsuku zonke noma masonto onke?

IBasic Catechism ithi: “Imisebenzi Ekhethekile YamaKristu AngamaKatolika” ihlanganisa “ukuhlanganyela eMiseni maSonto onke nangeholide lesibopho.” (Boston, 1980, k. 21) “Abathembekile eqinisweni bakhuthazwa ukuba bahlanganyele eMiseni futhi bathole iSidlo njalo, ngisho kungaba nsuku zonke.”—The Teaching of Christ—A Catholic Catechism for Adults, Abridged Edition (Huntington, Ind.; 1979), k. 281.

Ingabe yonke imiBhalo ebhekisela “ekuhlephuleni isinkwa” ibonisa ukuthi kwakukhunjulwa ukufa kukaKristu? (IzE. 2:42, 46; 20:7) UJesu ‘wahlephula isinkwa’ lapho kuhlanganyelwa ekudleni ngisho nangaphambi kweSidlo Sakusihlwa Sokugcina. (Marku 6:41; 8:6) Isinkwa esasisetshenziswa ngamaJuda ngalesosikhathi sasingesona leso abantu abaningi namuhla abasijwayele. Lapho sidliwa, kwakumelwe sihleshulwe njalo.

UJesu akazange asho ngokuqondile ukuthi iSikhumbuzo sokufa kwakhe kwakumelwe sigcinwe kaningi kangakanani. Nokho, wasimisa ngosuku lwePhasika lamaJuda, lolo phakathi kwabafundi bakhe olwathathelwa isikhundla iSikhumbuzo sokufa kukaKristu. IPhasika laliyisenzakalo saminyaka yonke, ligujwa ngoNisan 14. Ngokufanayo, uMkhosi wamaJuda weSinkwa Esingenamvubelo, uMkhosi Wamasonto (iPentekoste), uMkhosi Wamadokodo, noma Wokuvuna, noSuku Lokubuyisana konke kwakwenziwa kanye ngonyaka.

Ingabe ukuthandaza iMisa kukhulula imiphefumulo esesihlanzweni?

ITeaching of Christ—A Catholic Catechism for Adults ithi: “Igama elithi ‘isihlanzo’ alikho eBhayibhelini, ngisho nemfundiso yesihlanzo ayifundiswa nhlobo khona. . . . Izincwadi zoFata zibhekisela kaningi hhayi nje kuphela ebukhoneni besihlanzo, kodwa futhi ekutheni abathembekile abangasekho bangasizwa imithandazo yabaphilayo, ikakhulukazi ngoMhlatshelo weMisa.”—Kk. 347, 348.

Ngokuqondene nesimo sabafileyo, imiBhalo eNgcwele ithi: “Abaphilayo bayazi ukuthi bayakufa, kepha abafileyo abazi-lutho.” (UmSh. 9:5) “Umphefumulo [“umphefumulo,” Kx; “umuntu,” JB] owonayo uyakufa.” (Hez. 18:4) (Bheka futhi amakhasi 276-278, ngaphansi kwesihloko esithi “Ukufa.”)