Imibuzo Evela Kubafundi

◼ Ingabe amazwi kaJesu akuMathewu 11:24 asho ukuthi labo uJehova ababhubhisa ngomlilo eSodoma naseGomora bayovuswa?

Ekuphenduleni lombuzo ngokucophelela eminyakeni edlule, siye saxoxa ngamazwi kaJesu akuMathewu 10:14, 15; 11:20-24; noLuka 10:13-15. Ukubukezwa kwamuva kwalokhu, kusikisela ukuthi lamavesi akudingekile ukuba athathwe njengezinkulumo ezisho ikusasa labantu baseSodoma/neGomora. Kodwa ngaphambi kokuba sihlole okunye ukukhulumela kweBhayibheli kwabantu ababhujiswa kuleyomizi, ake sicabangele lokho uJesu akusho.

Lapho eseGalile, uJesu ‘[wa]jezisa imizi okwakwenziwe kuyo iningi lemisebenzi yakhe yamandla, ngokuba ingaphendukanga.’ Wabala emithathu: “Maye kuwe-Korazini! Maye kuwe-Betsayida! Ngokuba uma kwakwenziwe eTire naseSidoni imisebenzi yamandla eyenziwe kini, ngakube kade yaphenduka . . . Kuyakuba-ngcono kulo iTire neSidoni ngosuku lokwahlulelwa kunakini. Nawe-Kapernawume uyakuphakanyiselwa ezulwini na? Uyakwehliselwa eHayidese; ngokuba uma yayenziwe eSodoma imisebenzi yamandla eyenziwe kuwe, ngabe likhona nanamuhla. . . . Kuyakuba ngcono kulo izwe laseSodoma ngosuku lokwahlulela kunakuwe.” (Mathewu 11:20-24) UJesu wakhuluma amazwi afanayo lapho ethuma abafundi abayi-12 ukuba bayoshumayela, kamuva abangama-70.—Mathewu 10:14, 15; Luka 10:13-15.

Ngaphambi kuka-1964, sasicabanga ukuthi lamavesi asho ukuthi abantu baseKorazini, eBetsayida, naseKapernawume babefanelwe ukubhujiswa kwaphakade. Nokho, izihloko zeNqabayokulinda ngo-1964 nango-1965 zakwenza kwacaca ukuthi bonke abaseHayidese, noma eSheoli (ithuna elivamile lesintu) bayophuma ngovuko futhi emva kwalokho ‘bahlulelwe ngokwemisebenzi yabo.’—IsAmbulo 20:13.

Lezozihloko zathi: UMathewu 11:23 noLuka 10:15 uthi iKapernawume lalingeke linyuselwe ezulwini kodwa ‘laliyokwehliselwa eHayidese,’ okungenani okusho ukuhlaziswa kwabantu balowomuzi. Emavesini afanayo, uJesu uphawula iTire/neSidoni lasendulo. NgokukaHezekeli 32:21, 30, abantu baseSidoni, ababelahliwe uNkulunkulu, baya eSheoli. (Isaya 23:1-9, 14-18; Hezekeli 27:2-8) Njengoba uJesu afanisa iSodoma neTire neSidoni, lokho kwabonisa ukuthi nabantu baseSodoma babeseSheoli.

Nokho, ukuhlolwa kabusha kukaMathewu 11:20-24 kuye kwabangela ukuba kubuzwe ukuthi ingabe uJesu lapho wayekhuluma ngokubhujiswa kwaphakade novuko yini. Iphuzu lakhe laliyindlela abantu baseKorazini, eBetsayida, naseKapernawume ababengasabeli ngayo, nendlela okwakubonakala kungokungenakwenzeka ngayo ukuba baguquke ngisho nangoSuku Lokwahlulela. Ukuthi “kuyakuba-ngcono” ngeTire/neSidoni neSodoma/neGomora “ngosuku lokwahlulelwa” kwakuyihaba (ukweqisa ukuze kugcizelelwe iphuzu) uJesu ayengaqondile ukuba lithathwe njengoba linjalo, njengamanye amahaba asobala awasebenzisa. Ngokwesibonelo:

“Kulula ukuba kudlule izulu nomhlaba kunokuba kuwe ibalana elilodwa lomthetho.” “Kuyakudlula izulu nomhlaba, kepha amazwi ami awasoze adlula.” (Luka 16:17; 21:33; Mathewu 5:18; qhathanisa namaHeberu 1:10-12.) Siyazi ukuthi amazulu angokoqobo nomhlaba awasoze adlula. (IHubo 78:69; 104:5; UmShumayeli 1:4) UJesu wathi futhi: “Kulula ukuba ikamela lingene ngentunja yosungulo kunokuba onothileyo angene embusweni kaNkulunkulu.” (Marku 10:25) Ngokuqinisekile, uJesu wayengasho ukuthi akukho muntu ocebile oyoba umfundi; abanye ekhulwini lokuqala leminyaka baba amaKristu agcotshiwe. (1 Thimothewu 6:17-19) Ukusebenzisa kukaJesu ukweqisa kwakungenjongo yokuba agcizelele ukuthi kunzima kangakanani ngomuntu ocebile ukuba abeke uNkulunkulu ngaphambi komcebo wezinto ezibonakalayo nokunethezeka.—Luka 12:15-21.

Ngakho, ukusho kukaJesu ukuthi ‘kuyakubangcono eTire noma eSodoma ngosuku lokwahlulela’ kwakungasho ukuthi labobantu bayoba khona ngosuku lokwahlulela. Kungenzeka wayemane egcizelela ukuthi babengasabeli kanjani futhi benecala kangakanani abaningi eKorazini, eBetsayida, naseKapernawume. Sithi abaningi ngoba abanye eKapernawume bamamukela uKristu. (Marku 1:29-31; Luka 4:38, 39) Nokho, ngokwesisekelo leyomizi yamenqaba. Abanye bezakhamizi zayo, njengababhali nabaFarisi, kungenzeka bona ngisho nakumoya ongcwele, okungekho kuthethelelwa ngakho ngisho ‘nasesimisweni sezinto esizayo.’ Abantu abanjalo baya eGehena.—Mathewu 12:31, 32; 23:33.

Ngaphandle kwamazwi kaJesu okukhulunywa ngawo, uHezekeli 32:21, 30 uyasitshela ukuthi abantu abangamaqaba baseTire/neSidoni lasendulo baseSheoli; ngakho basohlwini lokuvuswa. Khona-ke, kuthiwani ngezakhamizi ‘zezwe laseSodoma ngosuku lokwahlulela’? Iqiniso nje lokuthi uJesu wafanisa iSidoni neSodoma alinikezi amathemba esikhathi esizayo ngalabobantu uNkulunkulu ababhubhisa ngesibabule nangomlilo. Kodwa ake sibone okunye iBhayibheli elikushoyo ngalendaba.

Okunye ukukhulumela okuqondile kukuJuda 7. UJuda wayesanda kukhuluma (1) ngamaKristu abhujiswa ngenxa yokuntula ukholo, (2) nezingelosi ezona futhi ‘ezigcinelwe ukulahlwa kosuku olukhulu ngezibopho ezimiyo phansi kobumnyama.’ Khona-ke uJuda wabhala: “Njengokuba iSodoma neGomora . . . imisiwe ibe-yisiboniso, izwa isijeziso somlilo omiyo njalo.” Lelivesi belisetshenziswa ngokubhekiselwe ekubhujisweni kwaphakade kwemizi uqobo, hhayi abantu. Nokho, ngenxa kaJuda 5 no-6, cishe abantu abaningi bayocabangela ivesi 7 njengelisho ukujeziswa kwabantu ngabanye. (Ngokufanayo, uMathewu 11:20-24 angaqondwa njengogxeka abantu, hhayi amatshe noma izakhiwo.) Ngenxa yalokhu, uJuda 7 angasho ukuthi abantu abakhohlakele baseSodoma/neGomora bahlulelwa futhi babhujiswa phakade.a

Uma sibheka kwenye indawo, sikuthola kungokuphawulekayo ukuthi iBhayibheli lihlanganisa uZamcolo neSodoma/neGomora izikhathi ezingaphezu kwesisodwa. Kumuphi umongo wendaba?

Lapho ebuzwa ‘ngokuphela kwezwe,’ uJesu wabikezela ngokufika ‘kokuphela’ ‘nangosizi olukhulu olungazange lube-khona kwasekuqaleni kwezwe.’ (Mathewu 24:3, 14, 21) Waqhubeka wakhuluma ‘ngosuku lukaNowa’ nangalokho ‘okwenzeka emihleni kaLoti’ njengezibonelo zabantu abangasinakanga isixwayiso ngembubhiso ezayo. UJesu wenezela: “Kuyakuba-njalo ngosuku eyokwambulwa ngayo iNdodana yomuntu.” (Luka 17:26-30; qhathanisa noMathewu 24:36-39.) Ingabe uJesu wayebonisa isimo nje, noma ingabe umongo wendaba asebenzisa kuwo lezibonelo usikisela ukuthi izahlulelo zaphakade zazihilelekile?

Kamuva, uPetru wabhala ngezahlulelo zikaNkulunkulu nangokujezisa kwaKhe labo ezibafanele. Khona-ke uPetru wasebenzisa izibonelo ezintathu: izingelosi ezona, izwe lamandulo lesikhathi sikaNowa, nalabo ababhujiswa eSodoma/naseGomora. UPetru wathi, lokhu okushiwo muva, ‘kwaba yisiboniso kubo abangayikumesaba uNkulunkulu.’ (2 Petru 2:4-9) Ngemva kwalokho, waqhathanisa lokho abantu ababhekana nakho ngoZamcolo nokuza ‘kosuku lokwahlulela nokubhubha kwabantu abangamesabi uNkulunkulu.’ Lokho kwandulela isithembiso samazulu amasha nomhlaba omusha.—2 Petru 3:5-13.

Ngokufanayo, ekupheleni kwesimiso sezinto esikhohlakele samanje, ingabe labo uNkulunkulu ayobabhubhisa bayobe bethole ukwahlulelwa kokugcina? Yilokho okuboniswa eyesi-2 Thesalonika 1:6-9: “Kuyinto elungile kuNkulunkulu ukuba abuyisele ukuhlupheka kubo abanihluphayo, aniphe nina enihluphekayo ukuphumula kanye nathi ekwambulweni kweNkosi uJesu, evela ezulwini, enezingelosi zamandla akhe, elangabini lomlilo, ephindisela kwabangamazi uNkulunkulu nakwabangalaleli ivangeli leNkosi yethu uJesu, abazakunikwa isijeziso esingukubhujiswa okuphakade, basuke phambi kobuso beNkosi naphambi kwenkazimulo yamandla akhe.”

Kukhona ukufana okuthakazelisayo kwamazwi phakathi kwalencazelo nalokho uJesu athi kwenzeka endabeni yaseSodoma. Ngaphezu kwalokho, uMathewu 25:31-46 nesAmbulo 19:11-21 ubonisa ukuthi “izimbuzi” ezinqunywa empini kaNkulunkulu ezayo ‘ziyojeziswa phakade’ “echibini lomlilo,” elifanekisela ukubhujiswa kwaphakade.b—IsAmbulo 20:10, 14.

Ngakho, ngaphezu kwalokho uJuda 7 akushoyo, iBhayibheli lisebenzisa iSodoma/neGomora noZamcolo njengeziboniso zendlela esiyoba yiyo isiphelo sembubhiso sesimiso samanje esonakele. Khona-ke, kusobala ukuthi labo uNkulunkulu ababhubhisa kulezozahlulelo ezidlule bathola ukubhujiswa okungenakuguquka. Yiqiniso, ngamunye wethu angakuqinisekisa lokho ngokuzibonakalisa ethembekile kuJehova manje. Ngaleyondlela siyofanelekela ukuphila ezweni elisha ukuze sibone ukuthi obani abavusayo nokuthi obani angabavusi. Siyazi ukuthi izahlulelo zakhe ziphelele. UElihu uyasiqinisekisa: “Impela uNkulunkulu akenzi okubi; uSomandla akahlanekezeli ukwahlulela.”—Jobe 34:10, 12.

[Imibhalo yaphansi]