Imibuzo Evela Kubafundi Balo Magazini

Ingabe OFakazi BakaJehova Bayalamukela Itestamente Elidala?

OFakazi BakaJehova babheka iBhayibheli njengeZwi likaNkulunkulu futhi bamukela kokubili iTestamente Elidala neTestamente Elisha njengezingxenye zalo ezibalulekile. Kodwa, bakhetha ukusebenzisa izinkulumo ezifaneleka kakhudlwana ezithi “imiBhalo YesiHebheru” nethi “imiBhalo YamaKristu YesiGreki,” ngoba isiHebheru nesiGreki ziyizilimi eziyinhloko okwabhalwa ngazo iTestamente Elidala neTestamente Elisha.

Ngakolunye uhlangothi, abanye abazibiza ngamaKristu bamadolonzima ukwamukela iTestamente Elidala. Bathi liveza uNkulunkulu onolaka owavumela izimpi, ukubulala nezenzo okunzima ukuzivumelanisa noNkulunkulu onothando, nonezindinganiso ezinhle ovezwa eTestamenteni Elisha. Noma bathi njengoba iTestamente Elidala ligxile kakhulu enkolweni yobuJuda, aliwasizi ngalutho amaKristu. Kodwa, ngokomyalo kaNkulunkulu otholakala kuDuteronomi 12:32 othi kunganezelwa noma kukhishwe okuthile ezwini lakhe, ingabe lezi yizizathu ezizwakalayo zokwenqaba cishe izingxenye ezintathu kwezine zeBhayibheli?

Ngesinye isikhathi ngo-50 C.E. lapho umphostoli uPawulu ongumKristu evakashele abaseThesalonika, eGrisi, “wabonisana nabo ngemiBhalo, echaza futhi ebonisa ngezingcaphuno ukuthi kwakudingekile ukuba uKristu ahlupheke futhi avuke kwabafileyo.” (IzEnzo 17:1-3) Ezinye izilaleli zakhe zaba amaKristu, futhi kamuva uPawulu wazincoma, ethi: “Ngesikhathi namukela izwi likaNkulunkulu, enalizwa ngathi, anilamukelanga njengezwi labantu, kodwa njengezwi likaNkulunkulu, njengoba nje liyilo ngempela.” (1 Thesalonika 2:13) Ngesikhathi evakashile, ezincwadini ezingu-27 zemiBhalo YamaKristu YesiGreki, kubonakala sengathi kwakusalotshwe iVangeli likaMathewu kuphela. Ngakho ngokungangabazeki “imiBhalo” uPawulu ayisebenzisa ukuze abonise “ngezingcaphuno” yayithathwe emiBhalweni YesiHeberu.

Empeleni, abalobi bemiBhalo YamaKristu YesiGreki bacaphuna ngokuqondile emiBhalweni YesiHebheru izikhathi ezingaba ngu-320 futhi bayikhulumela ezinye izikhathi ezingamakhulu ambalwa. Kungani? “Ngoba zonke izinto ezalotshwa esikhathini esingaphambili zalotshelwa ukuba kufundiswe thina, ukuze kuthi ngokukhuthazela kwethu nangenduduzo evela emiBhalweni sibe nethemba.” (Roma 15:4) Lokhu kubonisa ngokucacile ukuthi labo namuhla abalamukela lonke iBhayibheli bazuza ngokwengeziwe ngokwenza kanjalo.

ImiBhalo YamaKristu YesiGreki, esekelwe emiBhalweni YesiHebheru, iwukucaciswa okuqhubekayo kweZwi likaNkulunkulu okwalethwa ukwembuleka kancane kancane kwezinjongo zikaNkulunkulu. Ayikunciphisi nakancane ukubaluleka kwemiBhalo YesiHebheru. UHerbert H. Farmer, uprofesa wemfundiso yenkolo eCambridge University, uthi amaVangeli “awanakuqondwa ngaphandle kokuwahlobanisa nalokho okwakwenzeke ngaphambili emlandweni wabantu besivumelwano esidala, esichazwe eTestamenteni Elidala.”

IZwi likaNkulunkulu alidingi ukushintshwa. Noma kunjalo, “indlela yabalungileyo injengokukhanya okukhulu okuqhubeka kukhanya ngokwengeziwe kuze kube semini enkulu.” (IzAga 4:18) Ngokwenezela imiBhalo YamaKristu YesiGreki ohlwini lwemibhalo yeBhayibheli, uNkulunkulu waletha ukukhanya okwengeziwe ngokuphathelene nokwembulwa kwenjongo yakhe ngaphandle kokunciphisa ukubaluleka kwemiBhalo YesiHebheru. Yonke iyingxenye ‘yezwi likaJehova elihlala phakade.’—1 Petru 1:24, 25.