Ukwazisa Abazalwane Bethu
“Nithande abazalwane ngokungazenzisi, thandanani ngokupheleleyo omunye nomunye ngenhliziyo.”—1 PETRU 1:22.
1. Yini eyaqinisekisa abantu abaningi ukuthi oFakazi BakaJehova baqhuba ubuKristu beqiniso?
UTHANDO luyisici esihlukanisayo sobuKristu beqiniso. Phakathi nesidlo sokugcina uJesu asidla nabaphostoli bakhe, wakugcizelela lokhu, ethi: “Ngininika umyalo omusha wokuba nithandane; njengalokho nginithandile, nani nithandane. Ngalokho bonke bayakukwazi ukuthi ningabafundi bami, uma nithandana.” (Johane 13:34, 35) Abantu abaningi baqiniseka ngokokuqala ukuthi oFakazi BakaJehova baqhuba ubuKristu beqiniso lapho besemhlanganweni eHholo LoMbuso noma beye emhlanganweni omkhulu. Babona uthando lusebenza ngokoqobo, futhi ngalokhu bazi ukuthi babephakathi kwabafundi beqiniso bakaKristu.
2. Yini umphostoli uPawulu ayisho ngokuphathelene nothando, oluwuphawu oluhlukanisayo lobuKristu?
2 Sonke siyajabula ngokuthi loluphawu oluhlukanisayo lobuKristu beqiniso luyaphawuleka phakathi kwabantu bakaJehova namuhla. Noma kunjalo, njengamaKristu akuqala, siyaqaphela ukuthi kufanele njalo sifune izindlela ezengeziwe zokubonisa ukwazisa abazalwane bethu. UPawulu wabhalela ibandla laseThesalonika: “INkosi ininike ukwanda nokuchichima othandweni, omunye komunye.” (1 Thesalonika 3:12) Singalwandisa kanjani uthando lwethu komunye nomunye?
Uthando Nothando Lomzwelo Lobuzalwane
3. Ngaphezu kokuphila ukuphila okuhlanzekile, yini umphostoli uPetru athi yayidingekile ngamaKristu?
3 Encwadini evamile eyayiya emabandleni obuKristu eAsia Minor, umphostoli uPetru wabhala: “Senihlambululile imiphefumulo yenu [noma, ukuphila] ngokulalela iqiniso, nize nithande [ngothando lomzwelo, phi·la·del·phiʹa] abazalwane ngokungazenzisi, thandanani [uhlobo lwe-a·ga·paʹo] [ngokujulileyo] omunye nomunye ngenhliziyo.” (1 Petru 1:22, qhathanisa neNW.) UPetru ubonisa ukuthi akwanele ukuhlanza ukuphila kwethu. Ukulalela kwethu iqiniso, kuhlanganise nomyalo omusha, kufanele kuphumele othandweni lomzwelo ngabazalwane olungazenzisi nothando olujulile ngomunye nomunye.
4. Yimiphi imibuzo okufanele siyibuze, futhi uJesu wathini ngalokhu?
4 Ingabe uthando lwethu nokwazisa ngabazalwane bethu kuthambekele ekubeni kuboniswe kuphela kulabo esibathandayo? Ingabe sithambekele ekubeni nomusa ngakulaba, sishalazelele ukushiyeka kwabo, kuyilapho sishesha ukubona amaphutha nokwehluleka kwabanye esingenalo uthando lwemvelo ngabo? UJesu wathi: “Ngokuba uma nithanda [uhlobo lwea·ga·paʹo] abanithandayo, ninamvuzo muni na? Abenzi njalo nabathelisi na?”—Mathewu 5:46.
5. Yimuphi umehluko isazi seBhayibheli esiwenzayo phakathi kwegama lesiGreki elisho “uthando” nalelo elisho ‘uthando lomzwelo’?
5 Encwadini yakhe iNew Testament Words, uProfesa William Barclay wenza lokukhulumela okulandelayo ngegama lesiGreki elihunyushwe ngokuthi “uthando lomzwelo” nelihunyushwe ngokuthi “uthando”: “Kunokufudumala kothando ngalamagama elithi [phi·liʹa, elisho “uthando lomzwelo,” nesenzo esihlobene nalo esithi phi·leʹo]. Asho ukubheka othile ngokukhathalela kothando lomzwelo. . . . Amagama avame kakhulu a[T]estamenteni E[lisha] asho uthando ibizo elithi agapē nesenzo esithi agapan. . . . Elithi philia kwakuyigama elithandekayo, kodwa ngokuqinisekile laliyigama elisho imfudumalo nokusondelana nothando lomzwelo. . . . Elithi agapē liphathelene nengqondo: akuwona nje umuzwa ovela ngokuzenzekelayo ezinhliziyweni zethu; kuyisimiso esiphila ngaso ngenhloso. Elithi agapē liphathelene ikakhulukazi nentando. Liwukunqoba, ukwehlula, nokuphumelela. Akekho owake wathanda izitha zakhe. Ukuthanda izitha zakho kuwukunqoba konke ukuthambekela kwethu kwemvelo nemizwa. Loluthando lweagapē . . . eqinisweni lungamandla okuthanda okungathandeki, ukuthanda abantu esingabathandi.”
6. (a) Yimiphi imibuzo ehlolayo okufanele sizibuze yona? (b) NgokukaPetru, kungani singenakulinganisela uthando lwethu lomzwelo ngabazalwane kulabo abasikhangayo ngokwemvelo?
6 Ngesisekelo sokuthi imiBhalo iyakuvumela ukuba kwethu nemizwa efudumele ngabazalwane abathile kunabanye, ingabe sithambekele ekuthetheleleni imizwa yethu? (Johane 19:26; 20:2) Ingabe sicabanga ukuthi singabonisa “uthando” olungenabungane, olucatshangelwe kwabathile ngoba kumelwe senze kanjalo, kuyilapho sigodla uthando lomzwelo olufudumele ukuze silubonise kulabo abasikhangayo? Uma kunjalo, siye salahlekelwa iphuzu lesikhuthazo sikaPetru. Asiyihlanzanga ngokwanele imiphefumulo yethu ngokulalela kwethu iqiniso, ngoba uPetru uthi: “Manje njengoba ngokulalela iqiniso niye nahlanza imiphefumulo yenu kuze kube yilapho ninomuzwa wothando lomzwelo oluqotho ngakubazalwane benu abangamaKristu, thandanani ngenhliziyo epheleleyo ngamandla enu onke.”—1 Petru 1:22, The New English Bible.
‘Uthando Lomzwelo Lobuzalwane Olungazenzisi’
7, 8. Uyini umsuka wegama elihunyushwe ngokuthi “ngokungazenzisi,” ngakho kungani uPetru asebenzisa leligama?
7 Umphostoli uPetru uqhubekela ngisho nangale. Uthi uthando lwethu lomzwelo lobuzalwane kumelwe lube olungazenzisi. Igama elihunyushwe ngokuthi ‘ukungazenzisi’ livela egameni lesiGreki eliphikisana nalelo elalisetshenziselwa abadlali bomdlalo wasesiteji ababekhuluma bemboze ubuso babo ngezinto ezifihla ubuso. Lokhu kwakubenza bakwazi ukulingisa abalingiswa abaningana abahlukahlukene phakathi nomdlalo. Khona-ke leligama labe seliba nomqondo ongokomfanekiso wobuzenzisi, noma ukumbuluza.
8 Sizizwa kanjani ekujuleni kwezinhliziyo zethu ngabanye abazalwane nodade ebandleni? Ingabe emihlanganweni sibabingelela ngokumomotheka okuphoqelelwe, sibheke eceleni ngokushesha noma sidlulele phambili? Okubi kakhulu kunalokho, ingabe sizama ukukugwema ngokuphelele ukubabingelela? Uma kunjalo, yini engashiwo ‘ngokulalela kwethu iqiniso’ obekufanele kuhlanze imiphefumulo yethu kuze kube sezingeni lokuba sibe nomuzwa wothando lomzwelo oluqotho ngamaKristu esikanye nawo? Ngokusebenzisa igama elithi ‘ukungazenzisi,’ uPetru uthi uthando lwethu lomzwelo ngabazalwane bethu akumelwe lube oluboniswa ngenjongo yokubukisa. Kumelwe lube oluqotho, lusuke enhliziyweni.
‘Ngokujulileyo Ngokusuka Enhliziyweni’
9, 10. Wayesho ukuthini uPetru lapho ethi kufanele sithandane “ngokujulileyo,” noma “ngokunwebekileyo”?
9 UPetru uyanezela: “Thandanani [ngokujulileyo] [ngokwezwi nezwi, “ngokunwebekileyo”] omunye nomunye ngenhliziyo.” Akudingeki ukuba sinwebe izinhliziyo zethu ukuze sibonise uthando kulabo esibathandayo ngokwemvelo nalabo abasithandayo futhi. Kodwa uPetru usitshela ukuba sithandane “ngokunwebekileyo.” Lapho luboniswa phakathi kwamaKristu, uthando lwea·gaʹpe alulona nje uthando olusengqondweni, olucatshangelwe, njengalolo okufanele sibe nalo ngezitha zethu. (Mathewu 5:44) Luwuthando olujulile futhi ludinga umzamo. Luhilela ukunweba izinhliziyo zethu, sizanule ukuze zikwazi ukuhlanganisa abantu ababengeke basikhange ngokuvamile.
10 Encwadini yakhe ethi Linguistic Key to the Greek New Testament, uFritz Rienecker ukhulumela igama elihunyushwe ngokuthi “ngokujulileyo,” noma “ngokunwebekileyo,” ku-1 Petru 1:22. Uyabhala: “Umqondo oyinhloko uyilowo wobuqotho, intshiseko (ukungenzi into kalula . . . kodwa ngokungathi [ngo]kuzikhandla) (Hort).” Phakathi kwezinye izinto, ukuzikhandla kusho “ukunwebeka kuze kube sezingeni lokugcina.” Ngakho-ke ukuthandana ngokujulileyo ngokusuka enhliziyweni kusho ukuzikhandla ngokusemandleni ethu emizamweni yokuba nothando lobuzalwane ngawo wonke amaKristu esikanye nawo. Ingabe abanye abazalwane bethu nodade abanandawo emizwelweni yethu yothando lomzwelo? Uma kunjalo, kufanele sanuleke.
“Yanulekani”
11, 12. (a) Yisiphi iseluleko umphostoli uPawulu asinikeza amaKristu aseKorinte? (b) UPawulu wasibeka kanjani isibonelo kulendaba?
11 Ngokusobala umphostoli uPawulu wasibona isidingo salokhu ebandleni laseKorinte. Wabhalela amaKristu akhona: “Umlomo wethu uvulekele ngakini nina-baseKorinte, inhliziyo yethu yanulekile; aninyinyekile [aniyiswele indawo] kithi, kodwa ninyinyekile ezinhliziyweni zenu; kepha ukuze kubekhona ukwenanana, ngikhuluma njengakubantwana, yanulekani nani.”—2 Korinte 6:11-13.
12 Singazenula kanjani izinhliziyo zethu ukuze zihlanganise bonke abazalwane bethu nodade? UPawulu wabeka isibonelo esihle kulendaba. Ngokusobala wayefuna okuhle kakhulu kubazalwane bakhe, futhi wayengabakhumbuli ngenxa yokwehluleka kwabo kodwa ngenxa yezimfanelo zabo ezinhle. Isahluko sokugcina sencwadi yakhe kumaKristu aseRoma siyakubonisa lokhu. Ake sihlole abaseRoma isahluko 16, futhi sibone indlela esibonisa ngayo isimo esihle sengqondo sikaPawulu ngakubazalwane bakhe nodade.
Ukwazisa Okufudumele
13. UPawulu wakubonisa kanjani ukwazisa kwakhe ngoFebe, futhi ngani?
13 UPawulu wabhala incwadi yakhe eya kwabaseRoma eseKorinte cishe ngonyaka ka-56 C.E., phakathi nohambo lwakhe lwesithathu lwezithunywa zevangeli. Ngokusobala lencwadi elotshwe ngesandla wayiphathisa owesifazane ongumKristu ogama lakhe linguFebe, ilungu lebandla eliseduze laseKenikreya, owayeya eRoma. (Funda amavesi 1, 2.) Phawula indlela efudumele amncoma ngayo kubazalwane baseRoma. Ngandlela-thile, wayevikele amaKristu amaningi, kuhlanganise noPawulu, mhlawumbe phakathi nohambo lwawo oludlula ngasethekwini elimatasa laseKenikreya. Eyisoni esingaphelele, njengabo bonke abanye abantu, uFebe ngokungangabazeki wayenobuthakathaka bakhe. Kodwa kunokuba axwayise ibandla laseRoma ngokushiyeka kukaFebe, uPawulu wabayala ukuba ‘bamamukele eNkosini njengokufanele abangcwele.’ Yeka isimo esihle sengqondo!
14. Yiziphi izinto ezinhle uPawulu azisho ngoPriska noAkwila?
14 Kusukela evesini 3 kuya evesini 15, uPawulu uthumela imikhonzo kumaKristu angaphezu kwama-20 awabiza ngamagama nakwamanye amaningi aphawulwe ngamanye noma njengeqembu. (Funda amavesi 3, 4.) Ingabe uyalubona yini uthando lomzwelo lobuzalwane uPawulu ayenalo ngoPriska (noma, uPrisila; qhathanisa nezEnzo 18:2) noAkwila? Lombhangqwana wawuye wazibeka ezingozini ngenxa kaPawulu. Manje wayebingelela lezisebenzi ezikanye naye ngokubonga futhi wazithumelela amazwi okubonga egameni lamabandla abeZizwe. Yeka ukuthi lemikhonzo esuka enhliziyweni kumelwe ukuba yabakhuthaza kanjani oAkwila noPrisila!
15. UPawulu wawubonisa kanjani umusa wakhe nokuzithoba lapho ebingelela uAnidroniku noJuniya?
15 Ngokusobala, uPawulu waba umKristu ozinikele phakathi nonyaka noma emibili yokufa kukaKristu. Ngesikhathi ebhala incwadi yakhe eya kwabaseRoma, wayeseye wasetshenziswa uKristu njengomphostoli ovelele wabezizwe iminyaka eminingi. (IzEnzo 9:15; Roma 1:1; 11:13) Nokho, phawula umusa nokuzithoba kwakhe. (Funda ivesi 7.) Wabingelela uAnidroniku noJuniya ngokuthi “abaqhamileyo phakathi kwabaphostoli [abathunyiweyo]” futhi wavuma ukuthi base bekhonze uKristu isikhathi eside kunaye. Awukho nomncane nje umuzwa womhawu lapho!
16. (a) Yimaphi amazwi othando uPawulu akhuluma ngawo ngamanye amaKristu ahlala eRoma? (b) Kungani singaqiniseka kangaka ngokuthi lemikhonzo yayiyizibonelo ‘zothando lomzwelo olungazenzisi ngabazalwane’?
16 Sazi okuncane noma asazi lutho ngamaKristu akuqala okuthiwa uEphenetu, uAmpiliyatu, noStaku. (Funda amavesi 5, 8, 9.) Kodwa ngendlela nje uPawulu ababingelela ngayo bonke bobathathu, singaqiniseka ukuthi babengamadoda athembekile. Babeye bazenza bathandeka kuPawulu kakhulu kangangokuba wabiza ngamunye wabo ngokuthi “isithandwa sami.” UPawulu futhi wayenamazwi omusa ngoAphele noRufu, ebhekisela kubo ngokulandelana ngokuthi “othembekileyo kuKristu,” nokuthi “okhethiweyo eNkosini.” (Funda amavesi 10, 13.) Yeka amazwi amahle kangaka athopha ngawo lamaKristu amabili! Futhi njengoba sazi ukungagunci kukaPawulu, singaqiniseka ukuthi lamazwi ayengekhona nje ukugcina umthetho wokuloba izincwadi. (Qhathanisa neyesi-2 Korinte 10:18.) Ngokuphawulekayo, uPawulu akazange akhohlwe ukubingelela unina kaRufu.
17. UPawulu wakubonisa kanjani ukwazisa kwakhe okujulile ngodadewabo?
17 Lokho kusiletha ekwaziseni uPawulu ayenakho ngodadewabo. Ngaphandle kukanina kaRufu, uPawulu waphawula abanye abesifazane abangamaKristu abangengaphansi kwesithupha. Sesiyibonile kakade indlela yomusa akhuluma ngayo ngoFebe noPriska. Kodwa phawula ukuthi ubabingelela ngothando lomzwelo lobuzalwane olufudumele kanjani oMariya, uTrifina, uTrifosa, noPersisi. (Funda amavesi 6, 12.) Umuntu angabona ukuthi inhliziyo yakhe yayikulabodade abasebenza kanzima ‘ababekhandleke kakhulu’ ngenxa yabazalwane babo. Yeka ukuthi kukhuthaza kanjani ukubona ukwazisa kukaPawulu okusuka enhliziyweni ngabazalwane bakhe nodade, naphezu kokungapheleli kwabo!
Singazingabazi Izisusa Zabazalwane Bethu
18. Singakulwela kanjani ukulingisa uPawulu, kodwa yini engase idingeke?
18 Kungani ungalingisi uPawulu futhi uzame ukuthola okuthile okuhle kokukusho ngomzalwane ngamunye nodade ebandleni? Ngabathile ngeke ube nayo neze inkinga. Ngabanye, kungase kudingeke ukuphenyisisa okuthile. Kungani ungazami ukuzinika isikhathi esithile unabo ukuze ubazi kangcono? Ngokuqinisekile uyozithola izimfanelo ezithandekayo kubo, futhi, kwazi bani, bangase bakwazise ngokwengeziwe kunangaphambili.
19. Kungani kungafanele singabaze izisusa zabazalwane bethu, futhi uJehova usibekela kanjani isibonelo esihle sothando?
19 Akufanele singabaze izisusa zabazalwane bethu. Bonke bayamthanda uJehova; ngaphandle kwalokho babengeke banikezele ukuphila kwabo kuye. Yini ebavikela ukuba babuyele ezweni, balandele izindlela zalo ezilula? Uthando lwabo ngoJehova, ukulunga kwakhe, noMbuso wakhe ngaphansi kukaKristu. (Mathewu 6:33) Kodwa bonke, ngezindlela ezihlukahlukene, kumelwe balwe kanzima ukuze bahlale bethembekile. UJehova uyabathanda ngenxa yalokhu. (IzAga 27:11) Uyabamukela njengezinceku zakhe naphezu kwamaphutha abo nokwehluleka kwabo. Njengoba kunjalo, singobanike thina ukuba senqabe ukubamukela emizwelweni yethu yothando lomzwelo?—Roma 12:9, 10; 14:4.
20. (a) Ngokwencwadi kaPawulu eya kwabaseRoma, obani kuphela okufanele sibaxwaye, futhi ukuhola kobani esingakulandela ngokuphephile kulendaba? (b) Ngaphandle kwalokho, kufanele sibabheke kanjani bonke abazalwane bethu?
20 Okuwukuphela kwabantu uPawulu asixwayisa ukuba sibaxwaye yilabo “ababanga ukwahlukana nokukhubekisa,” nalabo abenza ‘ngokuphambene nesifundiso esafundiswa sona.’ UPawulu usitshela ukuba sibaqaphele abantu abanjalo futhi sibagweme. (Roma 16:17) Abadala bebandla bayobe bezamile ukubasiza. (Juda 22, 23) Ngakho-ke singathembela kubadala ukuba basazise uma kunabathile okudingeka sibagweme. Ngaphandle kwalokho, kufanele sibheke bonke abazalwane bethu njengabalufanele uthando lwethu lobuzalwane olungazenzisi, futhi kufanele sifunde ukubathanda ngokujulileyo ngokusuka enhliziyweni.
21, 22. (a) Yini esilindele ngaphambili? (b) Yiziphi izimo ezingase ziphakame, ngakho kuyisikhathi sokwenzani? (c) Yini ezocatshangelwa esihlokweni esilandelayo?
21 USathane, amademoni akhe, naso sonke isimiso sakhe sezwe sezinto bamelene nathi. IHarmagedoni iphambi kwethu. Iyosuswa ukuhlasela kukaGogi wakwaMagogi. (Hezekeli, izahluko 38, 39) Ngalesosikhathi, siyobadinga abazalwane bethu kunanini ngaphambili. Singase sizithole sidinga usizo lwalabo kanye esingabazisi ngokukhethekile. Noma bona kanye bangase baludinge kakhulu usizo lwethu. Manje isikhathi sokwanuleka futhi sandise ukwazisa kwethu ngabo bonke abazalwane bethu.
22 Yiqiniso, ukwazisa abazalwane bethu kuhlanganisa inhlonipho efanele ngabadala bebandla. Kulendaba, abadala ngokwabo kufanele babe izibonelo ezinhle ngokubonisa ukwazisa okufanele hhayi kuphela kubo bonke abazalwane kodwa nakubadala abakanye nabo. Lesisici salesihloko sizocatshangelwa esihlokweni esilandelayo.
Amaphuzu Okubukeza
◻ Yiluphi uphawu oluhlukanisayo IobuKristu beqiniso?
◻ Kungani kokubili uthando nothando lomzwelo ngabazalwane kudingeka?
◻ Singathandana kanjani “ngokujulileyo,” noma “ngokunwebekileyo”?
◻ KwabaseRoma isahluko 16, uPawulu wakubonisa kanjani ukwazisa ngabafowabo nodadewabo?
◻ Kungani kungafanele singabaze izisusa zabazalwane bethu?
[Isithombe ekhasini 12]
Zama ukuthola izimfanelo ezithandekayo kulabo abangakukhangi ngokwemvelo