Abavezi Bezithelo Abanobunye

“Nithele izithelo eziningi, nibe-ngabafundi bami.”—JOHANE 15:8.

 1. IBhayibheli libonisa kanjani ukuthi uJehova uyibheka njengebalulekile imithi yezithelo?

“UJEHOVA UNKULUNKULU wahlumisa emhlabathini imithi yonke ebukekayo, emihle, edliwayo.” (Genesise 2:9) KwaIsrayeli imithi esanda kutshalwa ethelayo yayivunyelwa ukuba ikhule iminyaka emithathu ngaphandle kokuba umnikazi wayo asebenzise izithelo nganoma iyiphi indlela. Ngisho noma iziphi izithelo ezaziyothelwa ngonyaka wesine zazi“yakuba-ngcwele, ezokumdumisa uJehova.” Ngomnyaka wesihlanu, umnikazi wazo wayengazisebenzisa ngokuthanda kwakhe, ngemva kokunikela izithelo zokuqala kuJehova. (Levitikusi 19:23-25; Duteronomi 26:1-10; Nehemiya 10:35-37) Ngesikhathi sempi, imithi ethelayo yayivikelwa ngokukhethekile ngaphansi koMthetho kaMose.—Duteronomi 20:19, 20.

Imithi Engatheli Iyanqunywa

 2, 3. Yini uJesu ayisho emfanekisweni womkhiwane ongatheli?

² Esihlokweni esingaphambili sibonile ukuthi amagatsha amaningi emvelo omnqumo ongokomfanekiso (Roma, isahluko 11) anqanyulwa futhi esikhundleni sawo kwafakwa amagatsha omnqumo wasendle. Kulowomfanekiso amagatsha agawulwa amelela amaJuda angenalukholo lawo enqaba ukuqaphela isiqu somnqumo noma iNzalo eyinhloko uMesiya, uJesu. Emfanekisweni ohlukile uJesu ufanisa isizwe samaJuda nawo wonke umuthi—hhayi umnqumo kodwa umkhiwane.

³ Ekwindla ka-32 C.E. uJesu wathi: “Umuntu othile wayenomkhiwane utshalwe esivinini sakhe; weza efuna isithelo kuwo, akasifumananga. Wayesethi kuso isisebenzi sesivini: Bheka, sekuyiminyaka emithathu ngiza ngifuna isithelo kulomkhiwane, ngingasifumani; wunqume, yini ukuba uyone futhi inhlabathi? Sona saphendula, sathi kuye: Nkosi, wuyeke nangalomnyaka, ngize ngivukuze inhlabathi emaceleni awo, ngiwuthelele umquba; mhlawumbe ungaze uthele ngozayo; kepha uma kungenjalo, wowunquma.”—Luka 13:6-9.

 4. UJesu wazibonisa kanjani eyi“sisebenzi somvini” esithembekile?

⁴ Ngesikhathi uJesu ekhuluma ngalomkhiwane, yena njenge“sisebenzi sesivini,” wayechithe iminyaka emithathu ezama ukuhlakulela ukholo phakathi kwamaJuda. Kodwa naphezu kwezinzuzo zawo eziningi ngaphansi kwezivumelwano sika-Abrahama nesoMthetho, kwakuyinsali encane kuphela yesizwe samaJuda eyayemukele uMesiya. (Roma 9:4, 5, 27) Phakathi nonyaka wesine wenkonzo yakhe uJesu waqinisa imizamo yakhe phakathi kwamaJuda, evukuza ngokomfanekiso futhi efaka umquba emaceleni o“mkhiwane” ongamaJuda ngokushumayela ngentshiseko nangokufundisa eJudiya, ePereya futhi ekugcineni eJerusalema nasezindaweni ezilizungezile.—Luka, izahluko 10 kuya ku-19.

 5. Kungani “umkhiwane” ongamaJuda wanqanyulwa futhi kanjani, futhi ‘waphonswa nini emlilweni’?

⁵ Nokho, phakathi nalowonyaka wesine, ezinsukwini ezimbalwa ngaphambi kokufa kwakhe, uJesu walikhalela iJerusalema futhi watshela umuzi oyinhloko-dolobha yesizwe samaJuda ukuthi indlu yawo yayisishiyiwe. (Mathewu 23:37-39) UJehova, umnikazi wo“mkhiwane” ongamaJuda, wayesewuhlolile futhi onyakeni wesine wokunakekela okwengeziwe. Ewuthola ungatheli njengesizwe, wayala ukuba unqunywe ngokuvumelana nesimiso esashiwo uJesu kuMathewu 7:19. Kanjalo uMbuso kaNkulunkulu wathathwa esizweni samaJuda futhi wanikezwa isizwe esithile, uIsrayeli ongokomoya, esiveza izithelo zawo. (Mathewu 21:43) Lolushintsho lwenzeka ngePentekoste lalowonyaka ofanayo, ka-33 C.E. Eminyakeni engamashumi amathathu nesikhombisa kamuva, ngo-70 C.E., “umkhiwane” owawusunqunyiwe ‘waphonswa emlilweni’ lapho iJerusalema nesizwe samaJuda kubhujiswa.—Mathewu 3:9, 10; Luka 19:41-44.

‘Uma Uhlala Ebubeleni Bakhe’

 6. Imifanekiso yomkhiwane ongatheli nomnqumo owafakelwa ibuqokomisa kanjani ububele bukaNkulunkulu nokuqina kwakhe?

⁶ Njengoba nje umfanekiso womkhiwane ongatheli ubonisa ukuthi kunemikhawulo yokubekezela kukaJehova, umfanekiso kaPawulu ngomnqumo, nakuba eqokomisa ububele bukaJehova, ubonisa futhi isimo sakhe esingathi sína. Ngobubele bakhe uJehova wayethumele uJohane uMbhapathizi ema‘gatsheni emvelo’ angamaJuda ukuba awatshele ukuba ‘aveze izithelo ezifanele ukuphenduka’ futhi akholwe kuJesu. (Mathewu 3:8; IzEnzo 19:4) Ngenxa yokuntula kwawo ukholo ‘anqunywa.’ Lokhu kwehla kwenani la“magatsha emvelo” angamaJuda kwasho “ingcebo yabezizwe,” lokhu phela abeZizwe ‘njengamagatsha omnqumo wasendle’ bafakelwa emthini oyisivumelwano sika-Abrahama ukuba babe yingxenye yenzalo engokomoya ka-Abrahama.—Roma 11:12, 17, 20, 21.

 7. Isiphi isixwayiso uPawulu asinezela?

⁷ Kodwa uPawulu unezela isixwayiso. Ekhuluma namaKristu agcotshiwe angesiwo amaJuda, uthi: “Ngokuba uma uNkulunkulu engayekanga amagatsha emvelo, nawe angeze akuyeka. Bheka-ke ububele nobukhali bukaNkulunkulu; ubukhali kulabo [abangamaJuda] abawayo kepha kuwe [kwabeZizwe] ububele bukaNkulunkulu, uma uhlala ebubeleni; uma kungenjalo, uzakunqunywa nawe.” (Roma 11:21, 22) Ukuze ahlale ebubeleni bukaJehova, amaKristu angabeZizwe ayefakelwe emthini oyisivumelwano sika-Abrahama ayefanele abonise ukholo oluqinile eNzalweni eyinhloko ka-Abrahama. ‘Ayemi ngokukholwa,’ ukholo okwakufanele alubonakalise ngezithelo zobuKristu, ‘anikele ngemizimba yawo ibe ngumnikelo ophilileyo, ongcwele, othandeka kuNkulunkulu, kube-ngukukhonza kwawo.’—Roma 11:20; 12:1.

 8. Isiphi esinye isifundo esiwusizo uPawulu asiveza emfanekisweni wakhe womnqumo?

⁸ UPawulu uveza esinye isifundo esiwusizo kulendlela emangalisayo uJehova enza ngayo umuthi oyisivumelwano sika-Abrahama uveze inani eligcwele la“magatsha” ayizi-144 000 amaJuda nabeZizwe. Uqhubeka athi kuzo zombili izinhlobo za“magatsha”: “Ngokuba ngomusa engiwuphiweyo ngisho kulowo nalowo phakathi kwenu ukuthi angacabangi athi mkhulu kunalokho afanele ukukucabanga, kodwa acabange kube-ngokuqonda, njengalokho uNkulunkulu abele lowo nalowo isilinganiso sokukholwa. Ngokuba njengalokhu sinezitho eziningi emzimbeni munye, kepha izitho zonke azinamsebenzi munye, kanjalo thina esibaningi simzimba munye kuKristu.” (Roma 12:3-5) Kokubili amaKristu angamaJuda nangesiwo amaJuda ayemukelwe enzalweni engokomoya ka-Abrahama ngo“bubele bukaNkulunkulu.” UPawulu wawakhumbuza: “Akusuwe othwele impande [uJehova], kepha impande ethwele wena.” (Roma 11:18) Ukuze agweme “ukunqunywa” kwakumelwe ahlale ebubeleni bukaNkulunkulu ngokugcina ubunye bawo njengo“mzimba munye kuKristu.”—Roma 11:22.

 9. Lokhu kuqukethe siphi isifundo nge“zinye izimvu,” ngakho yini okumelwe zinakekele ukuyenza?

⁹ Ingabe lesisixwayiso kumaKristu agcotshiwe sinesifundo esithile kumaKristu anamuhla angewona amaIsrayeli angokomoya? Ngokuqinisekile sinaso. Nakuba engeyona ingxenye yenzalo engokomoya evezwa isivumelwano sika-Abrahama, futhi ngakho-ke ‘engewona awalesibaya,’ lawa ange“zinye izimvu” achazwa njengengxenye ‘yezizwe zomhlaba’ ezingathola izibusiso ngalenzalo. (Johane 10:16a; Genesise 22:18) Kusobala-ke ukuthi kumelwe abe nokholo njengoAbrahama, naye omathemba akhe okuphila angawasemhlabeni, futhi ‘ahambe emkhondweni walokho kukholwa.’ (Roma 4:11, 12, 16) Kumelwe abonise ukuzithoba kwawo kuMalusi Omuhle, uKristu, iNzalo eyinhloko ka-Abrahama. Kumelwe futhi abambisane nensali yenzalo yamuva ka-Abrahama, abe “mhlambi munye” nayo ngaphansi kuka“malusi munye.” (Johane 10:14, 16b) Uma amaKristu agcotshiwe angahlali ebubeleni bukaNkulunkulu ezifaka engozini yoku“nqunywa” emthini oyisivumelwano sika-Abrahama, ingabe “nezinye izimvu” akumelwe ziqaphele ukuba zingenzi lutho olungase luzibangele zilahlekelwe umusa kaJehova?—Roma 11:22.

“Uma Bengahlali” Bengenakukholwa

10. Kwakungenzekani uma umJuda engahlali ekuntuleni kwakhe ukholo, futhi lokhu kwakuyosho ukuthini ngaye?

¹⁰ Umfanekiso womnqumo unesinye isifundo esivamile esingasebenza kumaKristu agcotshiwe nakwe“zinye izimvu.” Sisithola kumaRoma 11:23, esifundeka kanje: “Nalabo [amaJuda angenalo ukholo] uma bengahlali ekungakholweni, bayakufakelwa, ngokuba uNkulunkulu unamandla okubafakela futhi.” Lapha sibona esinye isici sobubele bukaNkulunkulu. Lapho uPawulu ebhala lencwadi (cishe ngo-56 C.E.), isizwe samaJuda kwase kukade sanqunywa njengo“mkhiwane” ongatheli. Noma, ukubuyela emfanekisweni womnqumo, ‘amagatsha amaningi emvelo’ ayese‘nqanyuliwe’ ngenxa yokuntula kwawo ukholo kuJesu, uMesiya. Kodwa uma noma imuphi ongumJuda ayengahlali ekuntuleni kwakhe ukholo, uJehova uNkulunkulu wayezimisele ukumbuyisela emnqumweni ongokomfanekiso futhi amenze ilungu lenzalo engokomoya ka-Abrahama. NgomJuda onjalo ophendukile, ukumamukela kukaJehova kwakuyosho “ukuphila kwabafileyo.”—Roma 11:14, 15.

11. Yini eye yenzeka kwe“zinye izimvu,” kodwa yini okumelwe ziyenze?

¹¹ Namuhla, abanye be“zinye izimvu” baye baba abanganaki, futhi ngokuntula ukholo, baye bayeka ukukhonza uJehova. Baye bazinquma ekuhlanganyeleni ngokukhuthele nabantu bakhe. Abanye babo baye bangena ekuhluphekeni, futhi izixwayiso eziqukethwe eZwini likaNkulunkulu ziye ‘zabafinyelela.’ Ingabe kumelwe bazizwe belahleke ngokungenakubuyiswa? IZwi likaNkulunkulu lithi: “Uma nina niselapho [ngaphandle “kwezwe” labantu bakaNkulunkulu], nimfuna uJehova uNkulunkulu wenu, niyakumfumana, uma nimfuna ngayo yonke inhliziyo yenu nangawo wonke umphefumulo wenu. Uma usekuhluphekeni, zikwehlele zonke lezizinto [izixwayiso], uyakuphendukela kuJehova uNkulunkulu wakho ngezinsuku zokugcina, ulalele izwi lakhe, ngokuba uJehova uNkulunkulu wakho unguNkulunkulu onomusa.”—Duteronomi 4:29-31.

12. (a) ‘Inceku ethembekileyo’ iye yakubonisa kanjani ukukhathalela nge“zinye izimvu” ezidukile? (b) Yiziphi izibonelo ongazilandisa ukubonisa ukuthi abanye ngokujabula baye babuyela emhlanjini?

¹² Njengeqembu elihlangene lamagatsha athelayo omuthi oyisivumelwano sika-Abrahama, “inceku ethembekile neqondayo,” abaseleyo babafowabo bakaKristu abagcotshiwe emhlabeni, isiphaphamele kakhulu isidingo esibalulekile sokuba abanye be“zinye izimvu” baphaphame ekunganakini futhi babuye babe amaKristu athelayo. (Mathewu 24:45-47) Ngenxa yalokho, “inceku” ihlela ukunyathelisa izihloko ezinjengesithi “Buyelani Kumalusi Wemiphefumulo Yenu,” esikuNqabayokulinda kaOctober 15, 1982. Kusukela ngoJanuary 1982, INkonzo Yethu YoMbuso iye yakhipha uchungechunge lwezihloko ngalendaba efanayo. Ingabe lokhu kuhola okuqinile kwe“nceku” yeNkosi kuveze imiphumela eyinzuzo? Ingabe abanye baye babuyela kuJehova uNkulunkulu wabo? Kuye kwaba njalo ngabaningi. Phawula izibonelo ezingokoqobo ekhasini 22.

“Nithele Izithelo Eziningi”

13. Yini noma ubani oye waba onganaki okumelwe ayenze, njengoba kuboniswe yimaphi amazwi kaJesu?

¹³ Yebo, noma imaphi amaKristu agcotshiwe noma abangane bawo be“zinye izimvu” abaye baba abanganaki futhi abangatheli kumelwe balalele lesisixwayiso, basabele ebubeleni bukaJehova futhi bamukele usizo ukuze babe amaKristu athelayo futhi. Emfanekisweni ohlukile ezicini eziningana zomnqumo nomkhiwane ongatheli, uJesu wazifanisa nesiqu somvini, nabafundi bakhe abagcotshiwe njengamagatsha omvini. Wathi: “Mina ngingumvini owonawona, uBaba ungumlimi. Yilelo nalelogatsha elikimi, elingatheli izithelo, uyalisusa. Yilelo nalelo elithela izithelo uyalihlunga ukuba lithele kakhulu. . . . UBaba uyakhazimuliswa ngalokhu ukuba nithele izithelo eziningi, nibe-ngabafundi bami.”—Johane 15:1-8.

14. (a) Kungaziphi izindlela ezimbili wonke amaKristu okumelwe ‘athele ngazo izithelo eziningi’? (b) Iyiphi enye imfuneko ngamaKristu agcotshiwe eboniswe emfanekisweni wo“mvini owonawona”?

¹⁴ Nakuba “ezinye izimvu” zingewona amagatsha o“mnqumo” oyisivumelwano sika-Abrahama noma wo“mvini owonawona,” uKristu Jesu, kumelwe zizibonakalise zingabafundi bakaKristu. Njengawo wonke “amagatsha” agcotshiwe angamaKristu, kumelwe zi“thele izithelo eziningi.” Lokhu zikwenza ngokuveza izimfanelo zobuKristu zobuntu obusha, kuhlanganise “izithelo zomoya.” (Galathiya 5:22, 23; Mathewu 28:19, 20; Kolose 3:5-14) Kodwa ukuze zibe ngezithela ngempela zibonisa izimfanelo ezinjalo ngenkuthalo ngokuhlanganyela emsebenzini wokushumayela “lelivangeli.” (Mathewu 24:14) Njengoba “amagatsha” agcotshiwe “omvini owonawona” kumelwe ahlale ebunyeni noKristu, “ezinye izimvu” kumelwe zihlale ebunyeni obuseduze ne“nceku ethembekileyo neqondayo,” ‘abafowabo’ bakaKristu abagcotshiwe. Ngaleyondlela kuphela bangathembela ‘ukudla ifa loMbuso abawulungiselelwa selokhu kwasekelwa umhlaba.’—Mathewu 25:31-40.

‘Izizwe Zomhlaba’ Ezizibusisayo Kakade

15. Njengoba isivumelwano sika-Abrahama siqeda ukuveza “inzalo” yesithembiso, iyiphi incazelo eyengeziwe yamaRoma 11:12 egcwalisekayo?

¹⁵ Njengoba umnqumo oyisivumelwano sika-Abrahama, ne“mpande yamafutha” engcwele (uJehova) nesiqu sawo esiqinile (uKristu), uqeda ukuveza inani eligcwele la“magatsha” angamaJuda nabeZizwe, izibusiso ezicebile kakade zidlulela ‘kwabezizwe’ abangewona amaIsrayeli angokomoya. UPawulu wakubona kusengaphambili lokhu futhi wabhala: “Kepha uma isiphambeko sabo [amaJuda emvelo] siyingcebo yezwe, nokuncipha kwabo yingcebo yabezizwe, pho, kakhulu kangakanani ukuphelela kwabo [amaKristu angamaJuda agcotshiwe]!”—Roma 11:12.

16. (a) Kukanjani ‘isiphambeko’ samaJuda sasisho “ingcebo yabezizwe”? (b) Ukuliphi ibanga umsebenzi wokufakelwa?

¹⁶ Sesibonile kakade ukuthi “isiphambeko” sesizwe samaJuda sisonke sasisho ingcebo enkulu engokomoya kwabeZizwe. Kodwa ukuba kwalamagatsha kulomnqumo wasendle amalungu enzalo engokomoya ka-Abrahama akuwakhiphanga amagatsha emvelo omnqumo ongokomfanekiso—amaKristu athembekile angamaJuda—okungenzeka ayesasele emthini noma ‘abuyiselwa’ ngemva kuka-36 C.E. Ngakho amagatsha ayizi-144 000 ahlanganisa “ukuphelela” kwamaJuda noku“phelela” kwabangewona amaJuda. (Roma 11:12, 25) Amaqiniso abonisa ukuthi ukufakelwa kwakuqhubeka kwaze kwaba phakathi kwawo-1930. Namuhla, ngemva kwesikhathi eside kangaka, kunesizathu esihle sokukholelwa ukuthi kuye kwafakelwa ‘inani eliphelele’ lawo womabili amagatsha obuJuda naweZizwe. Noma imaphi amagatsha afakelelwa kusukela ngo-1935 ngokunengqondo angaba ngamelela amagatsha angamaJuda noma angesiwo amaJuda aye anqanyulwa ngenxa yokungethembeki.

17. Kungayiphi indlela ukufakelwa kwamalungu enzalo kusho ingcebo eyengeziwe nga“bezizwe”?

¹⁷ Manje, uPawulu uthi lokhu kuphelela kwamalungu enzalo ka-Abrahama “kuyingcebo yabezizwe.” Yeka ukuthi kakhulu kangakanani ngoba ingcebo enjalo engokomoya nezibusiso azithinti amashumi ambalwa ezinkulungwane zamaKristu agcotshiwe angewona amaJuda (njengokugcwaliseka kwengxenye yokuqala yamaRoma 11:12) kodwa ngokuqondile izigidi ‘zabantu bezizwe’ abangebona abesibaya esiyisivumelwano sika-Abrahama.

18. Kungathiwani ngezithembiso zesivumelwano sika-Abrahama, ngakho iyiphi ingxenye yazo okumelwe ukuba isiqalile ukugcwaliseka?

¹⁸ Lokhu kusibuyisela esivumelwaneni sika-Abrahama. INzalo eyinhloko, uKristu Jesu, manje ubekwe esihlalweni sobukhosi emazulwini. Uye wabutha amalungu enzalo yamuva esibayeni esiyisivumelwano sika-Abrahama. Sekusondele ukuba “anqobe isango lezitha” zakhe, ngokubhujiswa kombuso wezwe wenkolo yamanga, iBabiloni Elikhulu nayo yonke inhlangano kaSathane ebonakalayo. (Genesise 22:17, 18) Ngakho-ke, akumangalisi ukuthi ingxenye yokugcina yesithembiso sika-Abrahama kakade isiqala ukugcwaliseka: “Nangenzalo yakho ziyakubusiswa izizwe zonke zomhlaba.”

19. (a) Abantu be“zizwe zonke zomhlaba” baqala kanjani ukwamukela izibusiso? (b) Liyini ithemba labo?

¹⁹ Yebo, “isixuku esikhulu . . . [e]sivela kuzo zonke izizwe,” kuhlanganise namaJuda amaningi emvelo, kakade sithola izibusiso. Ngokholo olugcwele kuAbrahama Omkhulu, uJehova uNkulunkulu, siye sazihlanganisa nensali kaIsrayeli ongokomoya, futhi si“mkhonza imini nobusuku ethempelini lakhe,” sinethemba lokuphila okuphakade emhlabeni. (IsAmbulo 7:4, 9-17) Sengathi bangaqhubeka bezilethela izibusiso ngenzalo, baqhubeke kuze kube sesimisweni esisha sezinto.

Ingabe uyakuqonda lokhu?

□ Umuthi womkhiwane ongatheli wafanekiselani, wagawulwa nini, futhi washiswa nini?

□ Iyiphi okuwukuphela kwendlela amaKristu angamaJuda nangawabeZizwe ayengagwema ngayo ukunqunywa ‘emnqumweni,’ futhi isiphi isifundo esingasithola kulokhu?

□ Kungani ukufakelwa futhi kwamaJuda aphendukayo kungaba umthombo wenduduzo kunoma ubani oye waduka?

□ Kungaziphi izindlela wonke amaKristu eqhubeka ethela izithelo?

□ Abaningi “abantu bezizwe” bazibusisa kanjani kakade?

[Ibhokisi/Isithombe ekhasini 22]

Laba Baye ‘Babuyela KuMalusi Nombonisi Wemiphefumulo Yabo’—1 Petru 2:25

Owesifazane, eNormandy, eFrance, uyabhala: “Ngemva kweminyaka eyishumi yokuphola nemizamo eminingi engaphumeleli yokubuyela ebandleni [loFakazi BakaJehova], ngangisangabaza ukuthatha isinyathelo. Ngenxa yokuziphatha kwami okuphambene nombhalo kusukela ngashiya ibandla, ngasesaba iseluleko sikaJehova nehlazo lokubhekana nabadala nalo lonke ibandla. Lapho ngiseholidini nabazali bomyeni wami ngathatha INqabayokulinda futhi ngafunda isihloko esasiphathelene nomzalwane owayepholile osimo sakhe sasifana nsé nesami. Ngifunda indlela uJehova aye waba nomusa ngayo kuye, indlela abadala abaye bamnikeza ngayo usizo lothando, nendlela amalungu ebandla aye amamukela ngayo ekubuyeni kwakhe, ngathola amandla okubuyela enhlanganweni kaJehova.”

USuzanne, uFakazi ebandleni elithile enyakatho-mpumalanga France, uyabhala: “Ngimbonga ngokuqotho uJehova, iNdodana yakhe uJesu Kristu ne‘nceku ethembekileyo neqondayo’ ngosizo olunikezwa abapholile. Ngangipholile lapho abadala bengivakashela futhi besikisela ukuhlela ukuba ngiqhutshelwe isifundo seBhayibheli. Ngasemukela futhi manje ngijabula kakhulu ngoba sengiba khona emihlanganweni futhi, futhi ngihlanganyela njalo emsebenzini wokushumayela. Manje ngiyakwazi ukubonisa uthando lobudade kwabanye abadinga isikhuthazo.”

UYolande, omunye woFakazi ongumFulentshi, kwase kuphele iminyaka engasezi emihlanganweni futhi eseyeke nokuthandaza ngenxa yokuba wayenomuzwa wecala ngokungalinaki itafula likaJehova. Ngemva kokusizwa ukuba abuyele emsebenzini onenzuzo wobuKristu, uyabhala: “Ngibonisa ukubonga kwami okujulile kuJehova ngokungisiza nangokunginikeza elinye ithuba. Ngenhliziyo yami yonke ngikhuthaza bonke abaye basalela ngezlzathu ezithile ukuba babuyele kuJehova.”

[Isithombe]

Ngesikhuthazo sothando, abaningi abapholile babuye baba ‘abathelayo’

[Umdwebo ekhasini 20]

(Ukuze ubone ukuthi kumi kanjani, bheka encwadini)

Umfanekiso kaPawulu womnqumo ubonisa indlela isivumelwano sika-Abrahama esiveza ngayo “inzalo” ephelele engokomoya

ISIVUMELWANO SIKA-ABRAHAMA (Genesise 22:16-18)