Imibuzo Evela Kubafundi

■ Ngenxa yokuthi umzalwane oqhubeka esebenza emsebenzini odinga ukuhloma ngeke abhekwe njengoyisibonelo, ingabe kungaba okungalungile ngomunye woFakazi BakaJehova ukufuna ukuvikelwa iziphathimandla ezihlomile?

UJesu wathi: “Bonke abaphatha inkemba bayakubhubha ngenkemba.” (Mathewu 26:52) Ngokuvumelana nalesimiso, amaKristu avuthiwe ayalwa ukuba agweme umsebenzi ofuna ukuba aphathe isibhamu (okwanamuhla okufana ne“nkemba”). Nokho, lokhu akusho ukuthi akumelwe afune futhi athole ukuvikelwa iziphathimandla ezingamaphoyisa ezihlomile. Kungani sisho njalo?

AmaRoma 13:1-4, ebhekisela ‘embusweni’ onguhulumeni wobuntu osebenza ngokuvunyelwa uNkulunkulu phakathi nalesimiso esikhona, athi: “Ngokuba uyisikhonzi sikaNkulunkulu, kube-kuhle kuwe. Kepha uma wenza okubi, yesaba; ngokuba awuyiphatheli ize inkemba; ngokuba uyisikhonzi sikaNkulunkulu, umphindiseli wokwehlisela ulaka kowenza okubi.” Ngakho uNkulunkulu uyakuvumela ukuhloma okunjalo “kwamandla ombuso,” ukuze isilinganiso esithile somthetho nokuhleleka kugcinwe phakathi kwesintu. Nokho, lapho uKristu njenge“Nkosi yokuthula” eletha “ukuthula okungapheli,” ukusetshenziswa kwazo zonke izikhali zobudlova kuyoba into edlule. Ngokuvumelana nemiBhalo, khona-ke, amaKristu namuhla angamukela ukuvikelwa okuvela ‘embusweni,’ nakuba wona ngokwawo aye ‘akhanda izinkemba zawo zaba amakhuba’ ngokuthembela eMbusweni kaNkulunkulu ozayo.—Isaya 2:4; 9:6, 7.

Singaqhathanisa isimo sanamuhla nesesikhathi sikaJeremiya. Kwakungaleso sikhathi lapho uJehova asebenzisa impi ka“Nebukadiresari inkosi yaseBabele, inceku yami” ukuba ilethe isahlulelo embusweni ohlubukayo wakwaJuda. Ingabe uJeremiya noBaruki bazihlomisa ukuze bavikeleke kulesosimo esibucayi? Cha, ngoba uJehova ngokwakhe wenza uJeremiya “umuzi obiyelweyo, nensika yensimbi, nezingange zethusi ngakulo izwe lonke.” Futhi nakuba engahlanganyelanga nempi ye“nceku” yesahlulelo kaJehova, bamukela ukukhululwa ileyo “nceku” lapho iJerusalema libhujiswa.—Jeremiya 1:17-19; 25:9; 39:11-14.

Ngokufanayo namuhla, oFakazi BakaJehova bajonga ukuthula njengoba bememezela isigijimi soMbuso ezweni lobudlova. Nokho, uma nje uJehova esavumele iziphathi zemibuso ukuba ziphathe “inkemba” noma okwanamuhla okufana nayo okugcina ukuhleleka, bangakwamukela ngokuqondile ukuvikela kwaleyo“nkemba.”