Qhubeka Uthuthuka

LAPHO uqala ukufunda ukusebenzisa izimiso zeBhayibheli, waqala ukushintsha kancane kancane endleleni yakho yokucabanga, endleleni yokukhuluma, nasekuziphatheni kwakho. Okuningi kwalokhu kwenzeka ngisho nangaphambi kokuba ubhalise eSikoleni Senkonzo Esingokwasezulwini. Manje cishe usuthuthuke waze wanikezela ukuphila kwakho kuJehova. Ingabe lokho kusho ukuthi usungayeka ukuthuthuka? Akunjalo neze. Ukubhapathizwa kwakho kumane nje kuyisiqalo.

Umfundi uThimothewu wayesekhonza njengomdala ongumKristu kakade lapho uPawulu emtshela ukuba ‘azindle’ ngeseluleko ayenikwe sona nangamalungelo enkonzo ayewaphathisiwe—‘agxile’ kulezi zinto—ukuze “intuthuko [yakhe] ibonakale kubo bonke abantu.” (1 Thim. 4:12-15) Kungakhathaliseki ukuthi usanda kuqala ukulandela indlela yeqiniso noma usungumakad’ ebona ekuphileni kobuKristu, kumelwe ukukhathalele ukuthuthuka.

Ulwazi Nezinguquko

Kweyabase-Efesu 3:14-19, sifunda ukuthi umphostoli uPawulu wathandazela ukuba akholwa nabo ‘bakwazi ngokuphelele ukuqonda ububanzi nobude nokuphakama nokujula’ kweqiniso. Ukuze kwenzeke lokho, uJesu waphana ngezipho ezingabantu ukuze zifundise, zilungise futhi zakhe ibandla. Ukuzindla njalo ngeZwi likaNkulunkulu eliphefumulelwe, kuhlanganise nesiqondiso sabafundisi abangomakad’ ebona, kungasisiza ukuba ‘sikhule’ ngokomoya.—Efe. 4:11-15.

Lokho kukhula kuhlanganisa ‘nokwenziwa basha emandleni ashukumisa ingqondo.’ Lokhu kuhilela ukuba nokuthambekela kwengqondo okunamandla okuvumelana nokukaNkulunkulu noKristu. Kudinga ukuba sihlale sivulekele ekucabangeni kwabo, ukuze ‘sigqoke ubuntu obusha.’ (Efe. 4:23, 24) Lapho utadisha amaVangeli, ingabe lokho kulandisa kokuphila kukaKristu ukubheka njengesibonelo sokuba usilandele? Uyazibheka yini izici ezithile uJesu azibonisa, bese wenza umzamo wangempela wokuzilingisa ekuphileni kwakho?—1 Pet. 2:21.

Izindaba ozikhulumayo lapho kuxoxwa zingaba uphawu lwezinga othuthuke ngalo. Labo asebegqoke ubuntu obusha abalibali izindaba ezingamanga, ezinenhlamba, eziyichilo noma ezingakhi. Kunalokho, abakushoyo ‘kuyakha ukuze kudlulisele okuhle kwabezwayo.’ (Efe. 4:25, 26, 29, 31; 5:3, 4; Jude 16) Izimpendulo zabo nabakushoyo ngasese nasemihlanganweni yebandla zembula ukuthi iqiniso liyakushintsha ukuphila kwabo.

Uma ‘ungasaphonseki ngapha nangapha sengathi uphonswa amagagasi futhi uyiswa lé nalé yiyo yonke imimoya yemfundiso,’ unikeza obunye ubufakazi bentuthuko. (Efe. 4:14) Ngokwesibonelo, usabela kanjani uma izwe likufumbela ngemibono emisha, iminako ethile, noma izinhlobo ezithile zokuzijabulisa? Ingabe ulingekela ukuba ulahlekelwe yisikhathi sezibopho ezingokomoya ukuze uphishekele izinto ezinjalo? Ukwenza kanjalo kungakhinyabeza intuthuko yakho engokomoya. Yeka ukuthi kuhlakaniphe kangakanani ukuthengisisa isikhathi sokuphishekela izinto ezingokomoya!—Efe. 5:15, 16.

Indlela osebenzelana ngayo nabantu nayo ingaba isibonakaliso sentuthuko yakho engokomoya. Ingabe uye wafunda ukuba ‘nobubele besisa, ubathethelela ngokukhululekile’ abafowenu nodadewenu?—Efe. 4:32.

Intuthuko yakho ekwenzeni izinto ngendlela kaJehova kufanele ibonakale ebandleni nasekhaya. Kumelwe ibonakale nasesikoleni, ezindaweni zomphakathi nasemsebenzini. (Efe. 5:21–6:9) Uma kuzo zonke lezi zindawo ubonisa izimfanelo zokwesaba uNkulunkulu ngokugcwele, khona-ke, intuthuko yakho iyazibonakalisa.

Sisebenzise Isipho Sakho

UJehova unikeze ngamunye wethu amakhono neziphiwo. Ulindele ukuba siwasebenzise ngokwenzuzo yabanye ukuze ngathi, abonakalise umusa wakhe ongafanelwe. Mayelana nalokhu, umphostoli uPetru wabhala: “Ngokwesilinganiso ngamunye amukele ngaso isipho, sisebenziseni ekukhonzaneni njengabaphathi abahle bomusa ongafanelwe kaNkulunkulu.” (1 Pet. 4:10) Uwenza kanjani umsebenzi wakho wokuba umphathi?

UPetru uyaqhubeka: “Uma umuntu ekhuluma, makakhulume njengokungathi ukhuluma amazwi kaNkulunkulu angcwele.” (1 Pet. 4:11) Leli vesi ligcizelela umthwalo wokukhuluma ngokuvumelana ngokuphelele neZwi likaNkulunkulu, ukuze uNkulunkulu akhazinyuliswe. Indlela lokhu kukhuluma okwenziwa ngayo nayo kumelwe ikhazimulise uJehova. Ukuqeqeshwa okunikezwa ngeSikole Senkonzo Esingokwasezulwini kungakusiza ukuba usebenzise isipho sakho ngaleyo ndlela—ukhazimulise uNkulunkulu ngendlela osiza ngayo abanye. Unalokho njengomgomo, ungayikala kanjani intuthuko yakho esikoleni?

Kunokubala ukuthi mangaki amaphuzu osusebenzele kuwo ephepheni lakho leseluleko, noma uhlobo lwezabelo oye wazabelwa, cabanga ngezinga ukuqeqeshwa kwakho okuye kwawuthuthukisa ngayo umhlatshelo wakho wokudumisa. Isikole sisilungiselela ukuba sibe abaphumelela ngokwengeziwe enkonzweni yasensimini. Ngakho zibuze: ‘Ingabe ngiyakulungiselela ngempela lokho engiyokusho ensimini? Sengikufundile yini ukubonisa isithakazelo somuntu siqu kulabo engifakaza kubo? Ngiyasibeka yini isisekelo sezimpindelo ngokushiya abantu nombuzo esiyoxoxa ngawo ngesikhathi esilandelayo? Uma ngifundela othile iBhayibheli, ingabe ngisebenzela ukuthuthuka njengomfundisi ofinyelela inhliziyo?’

Intuthuko ungayikali ngamalungelo enkonzo owanikwayo. Intuthuko yakho ibonakala kulokho okwenzayo ngesabelo sakho, hhayi ngaso nje kuphela. Uma unikwe isabelo esihlanganisa ukufundisa, zibuze: ‘Ngilisebenzise ngempela ikhono lokufundisa? Ingabe inkulumo yami ngiyibeke ngendlela eye yathonya ukuphila kwalabo abayizwile?’

Isikhuthazo sokuba usebenzise isipho sakho sisho ukuqhutshwa. Ingabe awuqhutshwa ukuba usebenze nabanye enkonzweni yasensimini? Uyawafuna yini amathuba okusiza amalungu ebandla lakini asanda kuhlanganyela, amasha noma abuthakathaka? Uyavolontiya ukuhlanza iHholo LoMbuso noma usize ngezindlela ezihlukahlukene emihlanganweni yesigodi neyesifunda? Ingabe ngezinye izikhathi ungabhalisela ukuba iphayona elisizayo? Ungase ukwazi yini ukukhonza njengephayona elivamile noma usize ebandleni okunesidingo esikhulu kulo? Uma ungumzalwane, uyazama ukuhlangabezana nezimfuneko ezingokomBhalo zezinceku ezikhonzayo nabadala? Ukuzimisela kwakho ukusiza nokwamukela umthwalo wemfanelo kuluphawu lokuthuthuka.—IHu. 110:3.

Indima Efezwa Okuhlangenwe nakho

Uma uzizwa ungenakwenza okutheni ngenxa yokungabi nokuhlangenwe nakho ekuphileni kobuKristu, ungadumali. IZwi likaNkulunkulu ‘lingahlakaniphisa oyisiwula.’ (IHu. 19:7; 119:130; IzAga 1:1-4) Ukusebenzisa iseluleko seBhayibheli kusenza sizuze ekuhlakanipheni okuphelele kukaJehova, okuyigugu elikhulu kunanoma iyiphi imfundo etholakala ngokuba nokuhlangenwe nakho kukodwa. Nokho, njengoba sithuthuka enkonzweni yethu kuJehova, sithola okuhlangenwe nakho okulusizo. Singakusebenzisa kanjani ukuze kusisize?

Ngenxa yokubhekana nezimo ezihlukahlukene zokuphila, umuntu angase alingeke ukuba acabange ngale ndlela: ‘Ngiye ngabhekana nalesi simo ngaphambili. Ngiyakwazi okumelwe ngikwenze.’ Ingabe kungaba inkambo yokuhlakanipha leyo? IzAga 3:7 ziyaxwayisa: “Ungabi ngohlakaniphileyo emehlweni akho.” Okuhlangenwe nakho kumelwe kusinike amaphuzu ahlukahlukene esingawacabangela lapho sibhekana nezimo ekuphileni. Kodwa uma sithuthuka ngokomoya, okuhlangenwe nakho kwethu kumelwe kugcizelele ezingqondweni zethu nasezinhliziyweni ukuthi sidinga isibusiso sikaJehova ukuze siphumelele. Khona-ke, intuthuko yethu ibonakala ngokulungela ukuphendukela kuJehova ukuze asiqondise ekuphileni kwethu, hhayi ngokubhekana kwethu nezimo ngokuzethemba. Kubonakala ngokuqiniseka kwethu ukuthi akukho lutho olungenzeka ngaphandle kwemvume yakhe nangokulondoloza kwethu ubuhlobo bokumethemba nobuseduze noBaba wethu osezulwini.

Qhubeka Welulekela Phambili

Umphostoli uPawulu, naphezu kokuba umKristu ovuthiwe ngokomoya nogcotshiwe, waqaphela ukuthi wayedinga ‘ukwelulekela phambili’ ukuze azuze umgomo wokuphila. (Fil. 3:13-16) Ingabe unawo lowo mbono?

Usuthuthuke ngezinga elingakanani? Kala intuthuko yakho ngokuthi usubugqoke ngokuphelele kangakanani ubuntu obusha, ukuthi usuzinikele ngokuphelele kangakanani ebukhosini bukaJehova, nokuthi ukhuthele kangakanani ekusebenziseni izipho zakho ukuze udumise uJehova. Njengoba uzuza emfundweni yeSikole Senkonzo Esingokwasezulwini, izimfanelo eziqokonyiswa eZwini likaNkulunkulu kumelwe zibonakale ngokuqhubekayo endleleni yakho yokukhuluma neyokufundisa. Gxila kulezi zici zokukhula kwakho. Yebo, jabula ngazo, futhi intuthuko yakho iyobonakala kalula.