Njengoba ubumpofu banda, abantu abaningi baye baphishekela impumelelo engokwezimali bengenandaba nakho konke okunye. Abanye basebenzisa ukungathembeki ukuze bayifinyelele. Nokho, lapho beba amaKristu eqiniso, kufanele babe sebesishiye ngokuphelele lesimo sengqondo ukuze bavumelane nezindinganiso zeBhayibheli zokulunga.

Nokho, ngisho namanye amaKristu aphinde abambeke ekuzibekeleni imigomo yezwe. Angase awele ekuziphatheni okungesikho okobuKristu ukuze afinyelele impumelelo. Abazali abayinaki imikhaya yabo. Abantu ngabanye abayinaki inkonzo yabo eya kuNkulunkulu. Ucabanga ukuthi ubuyoba yini umphumela ngokuqondene nokwaneliseka ekuphileni nenjabulo?

Lisixwayisa ngomphumela, iBhayibheli lithi: “Abafuna ukuceba bayela ekulingweni, nasesihibeni, nasezinkanukweni eziningi zobuwula ezilimazayo . . . Ngokuba ukuthanda imali kuyimpande yakho konke okubi; abanye ngokuyifisa badukelwa ukukholwa, bazigwaza ngeminjunju eminingi.”—1 Thimothewu 6:9, 10.

Uthando lwengcebo luyinkosi eqhwagayo. Luqhwaga isikhathi sabantu, amandla, namakhono abo; futhi luqeda ukuzinikela kokwesaba uNkulunkulu. Ngokuvamile luyengela abantu ekufuneni ingcebo eningi ngisho nangokwengeziwe nodumo lwezwe, ngaleyondlela lubaqhelise ngokwengeziwe okholweni kunanini ngaphambili. Ngokufanelekile iBhayibheli lithi: “Othanda imali akayikusutha ngemali, nothanda okuningi akaneliswa yizithelo.”—UmShumayeli 5:10.