‘Op die proef gestel ten opsigte van geskiktheid’—Hoe?
1 Weens die voortdurende groei in Jehovah se organisasie is daar ’n voortgesette behoefte aan bekwame broers om as bedieningsknegte te dien. Die meeste van die broers wat nog nie aangestel is nie, insluitende tieners, wil graag in die gemeente dien. Wanneer hulle ekstra werk gegee word, voel hulle nuttig en voel hulle dat hulle iets bereik. Om verder vooruitgang te maak, moet hulle eers “op die proef gestel word ten opsigte van geskiktheid” (1 Tim. 3:10). Hoe word dit gedoen?
2 Die rol van die ouer manne: As deel van die proses om ’n broer te meet aan die skriftuurlike vereistes vir bedieningsknegte wat in 1 Timoteus 3:8-13 uiteengesit word, sal die ouer manne ’n broer se geskiktheid om verantwoordelikhede na te kom op die proef stel. Hulle kan hom vra om nuttige take te verrig, soos om tydskrifte en lektuur uit te gee, mikrofone te behartig, te help om die Koninkryksaal in stand te hou, ensovoorts. Die ouer manne sal kyk na sy gesindheid en hoe hy sy toewysings behartig. Hulle sal oplet na eienskappe soos betroubaarheid, stiptelikheid, ywer, beskeidenheid, ’n gewillige gesindheid en die vermoë om goed met ander oor die weg te kom (Fil. 2:20). Stel hy ’n goeie voorbeeld wat sy kleredrag en persoonsversorging betref? Is hy verantwoordelik? Hulle wil in “sy voortreflike gedrag sy werke . . . [sien] met ’n sagmoedigheid wat by wysheid behoort” (Jak. 3:13). Streef hy waarlik daarna om in die gemeente van hulp te wees? Voer hy Jesus se opdrag uit om ‘dissipels van mense te maak’ deur ywerig aan die veldbediening deel te neem?—Matt. 28:19; sien Die Wagtoring van 1 September 1990, bladsye 18-28.
3 Die Bybel verstrek nie ’n minimum ouderdom vir iemand om as ’n bedieningskneg aangestel te word nie. Ons sal egter nouliks verwag dat hulle in hulle vroeë of middeltienderjare sal wees, veral aangesien daar gesê word dat hulle ’n vrou en kinders kan hê (1 Tim. 3:12). Hierdie manne moenie swig voor “die begeertes wat eie is aan die jeug” nie, maar moet hulleself ernstig gedra en ’n goeie reputasie asook ’n skoon gewete voor God en die mense hê.—2 Tim. 2:22.
4 Hoewel natuurlike vermoëns nuttig is, is dit ’n mens se gesindheid en houding wat werklik saak maak. Wil ’n broer graag op ’n nederige wyse God loof en sy broers dien? Indien dit die geval is, sal Jehovah sy pogings seën om in die gemeente vooruitgang te maak.