Het jy geweet?
Hoeveel was die weduwee se twee muntstukke werd?
In die eerste eeu G.J. was die jaarlikse tempelbelasting wat die Jode betaal het, “twee dragmas”, wat ongeveer twee dae se loon was (Matteus 17:24). Daarenteen het Jesus gesê dat twee mossies verkoop word “vir ’n muntstuk van geringe waarde”, wat gelykstaande was aan 45 minute se werk. Trouens, vyf mossies kon vir twee keer soveel, of die loon vir omtrent 90 minute se werk, verkry word.—Matteus 10:29; Lukas 12:6.
Die arm weduwee, wat deur Jesus waargeneem is, het ’n bydrae by die tempel ingegooi wat baie minder werd was as dit. Hierdie twee muntstukke, of twee lepta, was destyds die kleinste kopermuntstukke wat in Israel gebruik is. Dit was gelykstaande aan net 1⁄64 van ’n dagloon, of minder as 12 minute se loon as dit bereken word volgens ’n gemiddelde werksdag van 12 uur.
Jesus Christus het gesê dat die weduwee se gawe groter is as dié van almal wat “uit hulle oorvloed” meer bygedra het. Waarom? Die verslag meld dat sy “twee muntstukkies” gehad het; sy kon dus een bygedra het en die ander een vir haarself gehou het. Maar sy het “alles [gegee] wat sy gehad het, haar hele lewensonderhoud”.—Markus 12:41-44; Lukas 21:2-4.
Wanneer het Saulus bekend geword as Paulus?
Die apostel Paulus is as ’n Hebreër met Romeinse burgerskap gebore (Handelinge 22:27, 28; Filippense 3:5). Hy het dus waarskynlik van kleins af die Hebreeuse naam Saulus sowel as die Romeinse naam Paulus gehad. Party van Paulus se familielede het eweneens Romeinse en Griekse name gehad (Romeine 16:7, 21). Dit was ook nie ongewoon vir Jode van daardie tyd, veral dié wat buite Israel gewoon het, om twee name te hê nie.—Handelinge 12:12; 13:1.
Meer as ’n dekade nadat hy ’n Christen geword het, was hierdie apostel blykbaar hoofsaaklik onder sy Hebreeuse naam, Saulus, bekend (Handelinge 13:1, 2). Maar hy het moontlik op sy eerste sendingreis, omstreeks 47/48 G.J., verkies om sy Romeinse naam, Paulus, te gebruik. Hy het die opdrag gekry om die goeie nuus aan nie-Jode te verkondig, en hy het dalk gevoel dat sy Romeinse naam aanvaarbaarder sou wees (Handelinge 9:15; 13:9; Galasiërs 2:7, 8). Hy het miskien ook die naam Paulus gebruik omdat die Griekse uitspraak van sy Hebreeuse naam, Saulus, baie dieselfde is as dié van ’n Griekse woord wat ’n slegte konnotasie het. Wat ook al die rede vir die verandering was, Paulus het getoon dat hy bereid was om “alles vir alle soorte mense [te word] om op elke moontlike manier sommige te red”.—1 Korintiërs 9:22.
[Prent op bladsy 12]
’n Lepton, werklike grootte