Wagtoring – AANLYN BIBLIOTEEK

“Gehoorsaam asseblief die stem van Jehovah”

God se woord vir ons deur Jeremia
- 12. Wat moet die ouer manne soms doen om die gemeente te beskerm?
  
  ¹² Baie Jode het die hulp versmaai wat Jehovah keer op keer deur middel van Jeremia aangebied het. Net so kan iemand wat hom vandag aan ernstige sonde skuldig gemaak het, onberouvol wees en die hulp van die ouer manne verwerp. In so ’n geval moet die ouer manne die skriftuurlike voorskrif volg om die gemeente te beskerm deur die oortreder uit te sit. (1 Kor. 5:11-13; sien die venster “Die lewe sonder wet”, op bladsy 73.) Maar beteken dit dat daar vir ewig geen hoop vir hom of haar sal wees nie, dat hy of sy nooit weer Jehovah se guns sal kan geniet nie? Nee. Die Israeliete was lank opstandig; tog het God gesê: “Keer terug, julle afvallige kinders. Ek sal julle afvallige toestand genees” (Jer. 3:22).a Jehovah nooi oortreders om tot hom terug te keer. Trouens, hy beveel hulle om dit te doen.
  
  DIE LEWE SONDER WET
  
  Wat was die Jode se lewensomstandighede ná Jerusalem se vernietiging? Jeremia gee ons ’n gedeeltelike beskrywing in Klaagliedere 2:9. Die mure van die stad het stukkend gelê, en dalk ook die poorte, wat die stad vroeër beskerm het. Maar nog erger, daar was “geen wet” nie. Het Jeremia bedoel dat die oorlewendes ’n onbeheerbare massa geword het? Dit is waarskynliker dat hy verwys het na die verlies van geestelike veiligheid en vertroosting wat die Jode voorheen geniet het toe getroue priesters en profete hulle in God se Wet onderrig het. Die valse profete aan wie hulle nou aandag geskenk het, het geen ware ‘visioen’, of leiding, van Jehovah gebied nie; wat hulle “in visioene gesien” het, was waardeloos.—Klaagl. 2:14.
  
  Iemand wat uit die Christengemeente gesit is, sal moontlik voel asof hy in ’n soortgelyke situasie is. Die hartlike vriendskap wat hy voorheen met sy geestelike broers en susters gehad het, is nie meer daar nie, en ook nie die liefdevolle aandag van die ouer manne nie. En hy is verwyderd van die lewensbelangrike geestelike onderrigting wat hy geniet het. In die wêreld, waar daar “geen wet” van Jehovah is nie, ervaar hy waarskynlik ’n groot gevoel van verlies. Hy kan nogtans weer ’n goedgekeurde posisie voor Jehovah verkry en ryk seëninge geniet (2 Kor. 2: 6-10). Maar jy stem sekerlik saam dat dit veel beter is om Jehovah te gehoorsaam en nooit in ’n situasie te beland waar jy sonder wet is nie.

“Gehoorsaam asseblief die stem van Jehovah”

God se woord vir ons deur Jeremia
- a Hier het Jehovah die noordelike koninkryk van Israel aangespreek. Die lede van daardie tienstammeryk was al sowat 100 jaar in ballingskap toe Jeremia sy boodskap verkondig het. Hy het erken dat dié nasie tot in sy dag nog geen berou getoon het nie (2 Kon. 17:16-18, 24, 34, 35). Individue kon nietemin weer God se guns verkry en selfs uit ballingskap terugkeer.