Jeremías
1 Tüfachi dungu feipi Jeremías,* Hilquías ñi fotüm. Tüfa sacerdotengerquei Anatot huaria mülelu Benjamín mapu mu. 2 Jeremías llohui Chau Jehová ñi dungun Josías ñi antü mu. Feichi mu Josías yeniefui 13 tripantu tañi ngünenieel, Amón ñi fotümngefui ca lonco ülmen-ngefui Judá mu. 3 Jeremías ca llohui Chau Ngünechen ñi dungun. Tüfa rupai Jehoiaquim ñi antü mu puulu hula 11 tripantu ñi ngünenieel Sedequías. Feichi mu cañpüle yengetui pu Jerusalén che, ti 5 cüyen mu. Jehoiaquim fei ta Josías ñi fotüm, Judá ñi lonco ülmen. Sedequías fei ta Josías ñi fotüm, Judá ñi lonco ülmen.
4 Llohun Chau Jehová ñi dungun. Feipieneu:
5 “Iñche petu tami deumanoeteu pütra meu,* deu quimnieyu.*
Petu tami choyüngenon,* huichucünueyu iñche mu.
Fillque troquiñche mu iñche tañi huerquencünueyu”.
6 Huelu iñche feipin: “¡Aungen, Doi Fütra Ñidol Jehová!
Iñche quim dungulan. Rume hueche huentrungen”.
7 Chau Jehová feipieneu:
“Feipilayaimi ‘Rume hueche huentrungen’.
Iñche huercüayu tati pu che meu, eimi mülei tami amual
ca com tañi feipiel mülei tami feipiafiel engün.
8 ‘Iñche afcadinieyu ca montulayu’ pi Jehová,
feimu ngelai tami llicayal tañi chumngen mu engün”.
9 Fei hula Chau Jehová fampuhuli tañi cuhu, fei topañmaeneu tañi hun. Chau Jehová feipieneu: “Tami hun mu tucun iñche tañi dungun. 10 Fachantü elfalcünueyu tami huldungulelafiel pu troquiñche ca pu gobierno, tami ngedunentual* ca trafocayal, tami apümcayal ca teifücayal, tami deumayal ca anümal”.
11 Fei ca huiño llohun Chau Jehová ñi dungun. Feipieneu: “Jeremías, ¿chem dungu penieimi?”. Iñche huiñoldungun:* “Penien quiñe rou almendro”.*
12 Jehová feipieneu: “Cüme penieimi. Iñche trepeluucülen* ca pepicaucülen ñi huechurpual tañi dungun”.
13 Ca quiñe rupa llohun Chau Jehová ñi dungun. Feipieneu: “¿Chem penieimi?”. Fei huiñoldungun: “Penien quiñe challa huadcülelu,* norte püle mülei ca cülülei sur püle”. 14 Fei hula Jehová feipieneu:
“Norte püle cüpayai ti cutrancahun,
ca cutrancayafi com pu che mülelu tüfachi mapu mu.
15 Chau Jehová feipi: ‘Iñche trahulmequefiñ com pu troquiñche mülelu fillque gobierno norte püle, fei cüpayaingün.
Quisuque lonco ülmen tucuai tañi ülmen huancu
Jerusalén ñi puerta püle,
fei huall püle lefcontuafingün com tañi fütra cura malal*
ca com tati huaria Judá mu mülelu.
16 Pu che tiye mu mülelu elcünueneu,
fitrun* chalintucun* eluquefingün caquelu dios
ca pochongnagingün* ñi püramyeafiel chem tañi deumael quisu tañi cuhu mu,
feimu juzgayafiñ tañi pu che tañi huesa femün mu engün’.
17 Huelu eimi pepicaunge tami cüdahual.
Mülei tami amual ca feipiafiel engün com tañi huercün dungu.
Llicalayafimi engün.
Femnolmi, iñche tañi pin mu, doi llicaleaimi tañi adquiñ mu engün.
18 Iñche nehuencünueyu quiñe nehuen-ngechi huaria reque,
quiñe orcon pañillhue reque,* fütra cobre malal reque tami chaftuafiel com ti troquiñ mapu,
Judá ñi pu lonco ülmen, tañi pu principe,
tañi pu sacerdote ca tati pu che mülelu tüfachi mapu mu.
19 Rüfcünu quehuangeaimi,
huelu hueungelayaimi.
‘Iñche afcadinieyu ca montulayu’ pi Chau Jehová”.