Jeremías
2 Llohun Chau Jehová ñi dungun. Feipieneu: 2 “Amunge ca huldungunge Jerusalén mu: ‘Tüfa tañi feipin Jehová:
“Cüme acordanien, eimi piuqueyeen* feichi üllchangelu eimi,
tunte* piuqueyeen petu tayu nieunon iñchiu,
acordanien chumngechi inaen huellin mapu mu,*
quiñe mapu ngancülenolu.
3 Israel lifngefui Chau Jehová ñi adquiñ mu, tañi hunenque fün”’.
‘Com pu iquefilu culpaconingün.
Contupaquefeyu huesaque dungu’ feipi ta Chau Jehová”.
4 Ahuem, Jacob ñi familia, allcütumün Chau Jehová ñi dungun,
ca com eimün, Israel ñi pu familia.
5 Tüfa ñi feipin Chau Jehová:
“Tamün cuifiqueche püntütripaingün* iñche mu,
poyefingün falinochi adentun* ca illamfal chengetuingün.
Huelu, ¿chem huesa dungu peñmaeneu tañi femngechi femal engün?
6 Feipilaingün: ‘Chau Dios entueiñmu Egipto mapu mu,
adnieiñmu huellin mapu mu,
huellilechi mapu apolelu rüngan mu,
quiñe anquen mapu rume dumiñcülelu,
quiñe mapu cheu ñi miyaunon inei no rume
ca cheu ñi mülequenon inei no rume,
fei ¿cheu mülei ta Jehová?’ pilaingün.
7 Fei hula cüpalfiñ engün cüme mapu mu
ñi iyal tañi fün ca chem tañi hulqueel.
Huelu eimün conpuimün tañi mapu mu ca podümfimün,
fei ünufalcünufimün tañi mapu.
8 Pu sacerdote ramtulaingün: ‘¿Cheu mülei Jehová?’.
Pu adümquefilu Moisés ñi ley quimlaeneu engün,
pu camañfe* caiñetueneu,
tañi pu huerquen huldunguingün Baal tañi üi mu,
fei inafingün pu dios pepi quelluquenolu.
9 ‘Feimu juzganiehuaiñ ta eimün
ca juzgayafiñ tamün pu cüpanche’ pi Jehová.
10 ‘Huelu amumün pu Kitim che ñi mapu ina lafquen mu* ca peaimün.
Felei, huercümün che Quedar mu ca cüme ngüneduamaimün.
Tiye mu ngüneduamaimün ñi rupapen mai femngechi dungu.
11 ¿Quiñe troquiñche elcünupefi mai tañi pu dios ñi poyeafiel caquelu dios mülequenolu?
Huelu tañi pu che elcünueneu iñche, tati doi afmatufalngelu, fei poyefingün tati falinolu.
12 Ahuem, huenu, ngüneduamnge, fei afmatulenge.
Fente tami llican, müllmüllcülenge’ pi Jehová.
13 ‘Tañi pu che epu huesa dungu femi:
elcünueneu iñche, tati co hulquelu mongen,
fei deumaingün rünganco,*
huechodcülechi rünganco, pepi ngülümquelai co’.
14 ‘Israel, ¿quiñe cüdaufengepei mai? ¿Quiñe esclavo reque choyüngei ruca mu?
Feimu, ¿chumngelu* hultucungei tañi malocontungeal?
Femcünufingün tañi mapu ñi llicafalngeal.
Lüpümngei tañi fillque huaria, fei ngehuelai che.
16 Pu Nof che* ca pu Tahpanés che malocontueimu.
17 Huelu eimi tami duam mu femngechi rupaimi,
elcünufimi tami Chau Ngünechen Jehová
petu tami adnieteu rüpü mu, ¿felelai am?
18 Feula, ¿chumngelu ayüimi amual ti rüpü amulu Egipto
ca pütocoal Sihor ñi co?*
¿Chemu ayüimi amual ti rüpü amulu Asiria
ca pütocoal ti Leufü ñi co?*
19 Tami huesa femün norümtueimu.
Tami poyehuenofiel mu Chau Dios, castigangequeimi.
Quimürpunge ca ngüneduamnge ñi huesalcalen elcünual tami Chau Ngünechen Jehová,
pu femquelu cutrancauquei.
Eimi yamnielaen rume’* feipi Doi Fütra Ñidol Jehová, Ñidolcülelu pu hueichafe mu.*
20 ‘Fütra cuifi trafocafiñ tami yucu
ca entuñmaeyu tami cadena.
Huelu feipimi: “Serfilayayu”.
Fillque fütra huincul mu ca miñche fütraque anümca meu
pailatranaleimi tami conal pod cudumuhun mu.
21 Doi cüme anümca ofad reque anümeyu, com cüme fün-ngefui.
Huelu, ¿chumngechi huesañmahuimi iñche tañi adquiñ mu? ¿Chumngechi ca anümca ofad ñi fücheñngetuimi?’.*
22 ‘Cüchahulmi rume bicarbonato ca fentren jabon mu,
tami culpan tropan reque* feleai iñche tañi adquiñ mu’ feipi Doi Fütra Ñidol Jehová.
23 ‘Iñche podcülelan, inalan pu Baal’ piqueimi,
huelu ¿chumngelu femngechi feipiqueimi?
Ngüneduamnge tami femquen laf mapu mu.*
Ngüneduamnge tami femün.
Trürümfalimi quiñe hue camella matu lefquelu,
fill püle lefquei, quimlai cheu ñi amual.
24 Trürümfalimi auca burra* mülelu huellin mapu.
Duamlu burro, nümünümütumequefi ti cürüf.
¿Inei catrütuafeyu duamlu burro?
Chem burro no rume cansalayai tañi quintuaeteu.
Fei pengeai puule chi antü* tañi duamburroal.
25 Ngelai tami triltrang namuncüleal*
ca huihulenoal tami pel.
Huelu eimi feipimi: ‘¡Femlai! ¡Duamfal-lai tati!
Ayüfiñ pu quimnoelchi che,*
inayafiñ engün’ pimi.
26 Chumngechi quiñe hueñefe yehuequei pengen mu tañi femün,
ca femngechi yehuelcangei pu Israel che,
tañi pu lonco ülmen, tañi pu principe,
tañi pu sacerdote ca tañi pu huerquen.
27 Feipiquefingün quiñe anümca ‘Iñche tañi chaungeimi’,
ca feipiquefingün quiñe cura ‘Eimi ta choyüen’.
Huelu furintucueneu iñche, adquintulaeneu engün.
Fei cüpale tañi cutrancahun, feipiaingün
‘¡Cüpange, montulmuiñ!’.
28 ¿Cheu mülei pu dios tami deumael?
Pepi montulelmu, cüpape engün acule tami cutrancahun.
Ahuem, Judá, fentrelei tami pu dios chumngechi fentrelei tami pu huaria.
29 ‘¿Chumngelu fentecünulaimün tamün dalluntucumufiel iñche?
Com eimün, ¿chemu caiñetumun iñche?’ pi Jehová.
30 Ngünam hulelcafiñ tamün pu yall.*
Pilaingün ñi norümngeal.
Tamün fütra cuchillo langümfi Chau Ngünechen ñi pu huerquen,
chumngechi quiñe illculechi trapial* langümfi pu culliñ.
31 Ahuem, tañi troquiñche, ngüneduamaimün Chau Jehová tañi dungun.
¿Huellin mapu reque feletun pu Israel che mu?
¿Cam fütra huesa dumiñ reque feletun?
¿Chumngelu tüfachi pu che, iñche tañi troquiñche, feipi ‘Lifreleiñ,
turpu huiñotulayaiñ eimi mu’?
32 Quiñe üllcha domo,* ¿ngoimanentupeai mai* tañi llancatu?
Quiñe novia, ¿ngoimapeai mai tañi faja rücu meu?*
Huelu iñche tañi troquiñche ngoimanentueneu ta iñche fütra cuifi mu.
33 ¡Ay fotrü, domo! ¡Rume münaleimi* tami quintual huentru tami piuqueyeaeteu!
Quisu quimeltuhuimi tami miyahual huesaque dungu mu.
34 Tami tacun* ca podcülei pu pofre ca pu culpaquenolu ñi mollfüñ mu.
Pelafiñ engün cheu tañi langümngequen,
huelu tañi mollfüñ engün com tami tacun meu mülei.
35 Huelu eimi feipimi ‘Iñche culpaquelan,
Chau Ngünechen illcuhuelai iñche mu’.
Feimu feula juiciantucuayu
feipilu cai eimi ‘Iñche culpaquelan’.*
36 Calefemtuqueimi tami femquen, fei ¿chemu duamcülelaimi?
Yehuelcahuaimi Egipto ñi duam mu,
chumngechi yehuelcahuimi Asiria ñi duam mu.
37 Chau Jehová chaftuquefi feiti pu che tami manelniefiel.
Fei engün quellulayaimu tami cüme tripayal.
Feimu amutulmi, pochongnagaimi* tami lonco* fente tami yehuelen”.