Jeremías
10 Ahuem, pu Israel che, allcütumün chem ñi feipin Chau Jehová eimün mu. 2 Tüfa tañi feipin Chau Jehová:
“Inalayafimün ñi femquen pu troquiñche
ca rume llicalayafimün chem ñi pengequeel huenu mu.
Pu troquiñche llicaquefi, huelu eimün femlayaimün.
3 Pu che tañi huimtun re coila dungu tati.*
Catrüquefingün chem anümca rume mahuida mu
ca ti artesano adentucünufi tañi cuhu mu ca tañi herramienta mu.
4 Tañi cüme adngeal* tuculelngei plata ca oro,
cafei martillo ca clafu mu clafantucungei tañi trannoal.
5 Feiti fillque adentun* quiñe espantapajaro reque felei cheu ñi nganel pepino. Pepi dungulaingün.
Pepi trecalaingün, feimu mülei tañi yengeal.
Llicalayafimün. Tüfa engün huesalcachequelai
ca chem cüme dungu no rume femlai”.
6 Ahuem, Chau Jehová, eimi trürümfalngelaimi.
Eimi alüpüraleimi. Ca tami üi yamfalngei* ca nehuen-ngei.
7 Ahuem, Lonco Ülmen ngünenielu pu troquiñche, com che mülei tami yamnieaeteu. Tüfa tañi femal com pu che.
Fillque troquiñche ca com gobierno mu mülei ta quimche,
huelu quiñe no rume trürümfalngelai eimi mu.
8 Com ngünefalngelaingün ca quim raquiduamquelaingün.
Quiñe anümca pepi quimeltuquelafi pu che, tüfa quiñe ngünencan dungu.*
9 Cüpalingün chapüdcülechi plata* Tarsis mu ca oro Ufaz lof mu.
Quiñe artesano deumaeyu ca ti cüdauquelu pañillhue* ñi cuhu mu deumaeyu.
Tañi tacun deumangei callfü füu ca coñol cal.*
Com deumaeyu engün pu adümuhun-ngechi artesano.
10 Huelu Jehová, rüf Chau Ngünechen ngei,*
mongelechi Dios ca Lonco Ülmen rumel mülequelu.
11* Eimün feipiafimün tüfachi dungu:
“Tati pu dios deumalaingün ti huenu ca ti mapu,
fei ngehuetulayai engün mapu mu, ngehuelayai engün com ti mapu mu”.
12 Chau Ngünechen deumafi ti mapu, tañi nehuen mu deumafi.
Fei tañi quimün mu cüme anümcünufi ti cüme mapu
ca tañi adümuhun mu huinüfcünufi* ti huenu.
13 Eluulu ñi allcütuñmangeal tañi dungun,
ti co mülelu huenu mu nengümcauquei.
Quisu tañi pin mu püramquefi tromü cheu ñi afpun ti mapu.
Deumai llüfqueñ* tañi mahunal
ca entufi ti cürüf cheu tañi mülen.
14 Com pu huentru ngünefalngelaingün ca nielaingün quimün.
Com pu cüdauquelu pañillhue mu yehueleai tañi adentun mu.
Tañi pañillhue adentun* re coila tati,
nielaingün mongen.
15 Ngünencachequei* ca ayentufalngei engün.
Acule ti antü ñi juiciantucungeal, ngehuetulayai.
16 Huelu Jacob ñi Chau Ngünechen trürlai fei engün mu.
Fei deumafi com ti mülelu.
Com tañi nieel mu doi ayüfalngei ta Israel.
Jehová Ñidolcülelu pu hueichafe mu* pingei.
17 Ahuem, domo, hualloñmanieimu* pu caiñe,
fei huitrañpüramfinge tami duamnieel, fei amutunge.
18 Tüfa ñi feipin Chau Jehová:
“Feula huemünentuafiñ* tati pu che tüfachi mapu mu
ca eluafiñ engün tañi cutrancahual”.
19 ¡Aungen ta iñche! ¡Müna huesa rupan!
Tremotulayai* tañi allfen.
Feipin: “Tüfa iñche tañi cutran ca mülei tañi nehuentuleal.
20 Teifücañmangen tañi tolto ruca* ca catrücangei com tañi llasu.
Tañi pu püñeñ quisucünueneu ca ngehuetulai engün.
Ca ngelai inei no rume tañi huinüfcünual tañi tolto ruca ca tuculelafiel pañu.
21 Pu camañfe* quim raquiduamlaingün
ca ramtulafingün ta Jehová no rume.
Feimu adümuhun-ngelaingün
ca com tañi quechan culliñ fill püle amuingün”.
22 ¡Allcütunge! ¡Quiñe huercün dungu! ¡Tiye püle cüpalei!
Quiñe fütra nüyün cüpalei norte mapu püle,
fei ngehuelayai che Judá ñi fillque huaria ca cheu ñi ellcahual* auca trehua* feletuai.
23 Ahuem, Chau Jehová, iñche cüme quimnien, tati huentru ngen-ngelai tañi rüpü.
Tati huentru trecalelu ngen-ngelai ñi adcünual quisu tañi trecan rume.
24 Ahuem, Chau Jehová, nor dungu mu norümtuen,
huelu illculen mu femlayaimi, femngechi apümcalayaen.
25 Fei illcutuafimi pu troquiñche tami rulpacünueteu,
ca pu familia ngillatunolu tami üi mu.
Tüfa engün apümcafingün ta Jacob.
Felei, lefcontufingün, apümcafingün
ca huellicünufingün tañi mapu.