Jeremías
9 ¡Ayüafun tañi lonco ñi huitrunco reque feleal!
¡Ayüafun tañi nge ñi trürümngeal cülleñu* rünganco reque!*
Femngechi antü ca pun meu ngümayafun
lan mu tañi troquiñche ñi pu che.
2 ¡Ayüafun ñi nieal quiñe umañtuhue huellin mapu mu!*
Elcünuafun tañi pu che, fei hudatripayafun fei engün mu.
Com püntütripaingün* Chau Dios mu.
Com ngünencachequeingün.
3 Quiñe arco reque pepicaqueingün tañi quehun.
Manelfal chengelaingün. Re coilaque dungu mülei mapu mu.
“Hueluque femqueingün huesaque dungu,
fei allcütuquelaeneu” pi Chau Jehová.
4 “Com che cuñiutucuupe tañi chafche mu*
ca ngelai ñi maneluhual tañi peñi mu.
Com pu peñi ngünencachequei
ca com pu chafche coila dunguyechequei.
5 Com che ngünencaquefi tañi chafche
ca inei no rume rüf dunguquelai.
Quimeltufingün tañi quehun ñi coila dungual.
Fente tañi huesa femün cansaleingün.
6 Hualloñmanieimu* ngünencan dungu.
Tañi ngünencachequen engün, pilaingün tañi quimaeteu” pi Jehová.
7 Feimu tüfa tañi feipin Jehová, Ñidolcülelu pu hueichafe mu:*
“Llihumafiñ reque* tañi pu che ca ngüneduamafiñ,
fei ¿ca chem chumafun tañi troquiñche ñi püñeñ mu?
8 Tañi quehun coila dunguquei, fei quiñe flecha langümchequelu reque felei.
Cüme duam mu dunguquefingün tañi chafche, huelu huenche hun mu müten femqueingün.
Tañi piuque mu pepicahuingün tañi lefcontuafiel”.
9 “¿Juiciantucunoafulu iñche tañi femün mu engün?” pi ta Jehová.
“¿Huiñoleltunoafulu iñche chem tañi femün tüfachi troquiñche?
10 Ngümayan ca aungen pian huincul ñi duam mu.
Entuan quiñe hueñancün ülcantun huellin mapu mülechi cachu ñi duam mu.
Feiti mu com lüpümngei ca inei no rume rupalai üyeu.
Allcüngelai pu quechan culliñ.
Lefmahui pu üñüm* ca pu culliñ, amutuingün.
11 Trapümcülechi cura reque elcünuafiñ ta Jerusalén, cheu ñi ellcahual* auca trehua.*
Iñche tañi pin mu Judá ñi fillque huaria huelliletuai, ngehuelayai che.
12 ¿Inei fente quimchengei tañi adümal tüfa?
Chau Jehová, ¿inei feipifi tüfachi dungu tañi huldungual?
¿Chumngelu* lai tüfachi mapu?
¿Chemu ancülei tüfachi mapu huellin mapu reque
ca inei no rume rupalai feiti püle?”.
13 Chau Jehová huiñoldungui:* “Iñche elufiñ tañi ley dungu,* huelu tüfa engün famentufingün* ca inalafingün. Cafei allcütulafingün tañi dungun. 14 Doi mai, trencül piuquecünuhuingün,* fei inafingün chem ñi ayüel tañi piuque ca serfifingün Baal ñi fillque adentun,* chumngechi tañi quimeleteu tañi pu chau. 15 Feimu Jehová, Ñidolcülelu pu hueichafe mu, Israel ñi Chau Ngünechen, feipi tüfachi dungu: ‘Ngüneduamnge, eluafiñ tüfachi pu che ñi iyal ajenjo ca ñi pütocoal venenongechi co. 16 Rangi fillque troquiñche mu ca huall püle huercüafiñ engün, quiñe mapu ñi quimnofiel engün ca tañi pu chau no rume. Cafei iñche tañi pin mu inantucungeai engün fütra cuchillo mu, fei apümcangeaingün’.
17 Tüfa tañi feipin Jehová, Ñidolcülelu pu hueichafe mu:
‘Quim adümuhuaimün.
Trahulaimün pu domo entuquelu hueñancün ülcantun,
cüpape piafimün pu domo quim ülcantuquelu.
18 Matu cüpape engün. Ülcantupape quiñe hueñancün ül.
Femngechi taiñ nge apoleai cülleñu mu
ca hutrutripayai co* taiñ nge meu.
19 Allcün-ngei quiñe hueñancün ül Sion püle:
“¡Apümcangeiñ!
¡Rume yehuelcangeiñ!
Elcünuiñ taiñ mapu ca apümcangei taiñ ruca”.
20 Eimün, pu domo, allcütuafimün Chau Jehová ñi dungun.
Llohuafimün chem tamün feipieteu.
Quimelelafimün tamün pu domo püñeñ tüfachi hueñancün dungu,
ca hueluconque quimeltuhuaimün tüfachi hueñancün ülcantun.
21 Ti lan dungu conpui taiñ ventana mu
ca conpui taiñ nehuen-ngechi adquintuhue mu.
Femngechi yetuafi pu pichiqueche mülelu rüpü mu
ca pu huechequeche plaza meu’.
22 Feipinge: ‘Chau Jehová feipi tüfa:
“Pu che ñi lachi cuerpo funa reque feletuai lelfün mu,
huifcülechi cosecha fün reque feleai ñi catrüel ca ñi elcünuel ti cosechaquelu.
Inei no rume ñimituquelafi”’”.*
23 Chau Jehová feipi tüfa:
“Ti quimche ngelai ñi mallmahual tañi quimün mu,
ti nehuen-ngelu ngelai ñi mallmahual tañi pepiluhun mu
ca ti ricu ngelai ñi mallmahual tañi nieel mu”.
24 “Tati mallmaulu, mallmaupe tüfachi dungu mu:
ñi nieel adümuhun ca quimün iñche mu.
Iñche ta Jehová ngen, rume piuqueyechequen* ca nor dungu femquen mapu mu.
Iñche ayüquen tüfachi dungu” feipi ta Jehová.
25 Chau Jehová feipi: “Ngüneduamnge, fülcülepai* ta antü, fei juzgayafiñ com pu circuncidalelu, huelu rüf circuncidangelai engün. 26 Tüfa pu Egipto che, pu Judá che, pu Edom che, pu Ammón che, pu Moab che ca com pu catrüquelu tañi cal lonco inafül tol püle ca mülelu huellin mapu mu. Com pu troquiñche circuncidangelai engün, ca com pu Israel che circuncidangelai piuque mu”.