Jeremías
19 Tüfa tañi feipin Chau Jehová: “Pemeafimi quiñe huentru cüdauquelu rag* ca ngillayafimi quiñe pichi metahue. Yefinge quiñeque loncolelu troquiñche mu ca quiñeque loncolelu pu sacerdote meu, 2 fei amunge Hinón laf mapu mu,* ti cüdauquelu rag ñi puerta püle. Tiye mu huldunguaimi chem tami feipiaeteu iñche. 3 Feipiaimi: ‘Allcütumün Chau Jehová ñi dungun, Judá ñi pu lonco ülmen ca pu Jerusalén che. Tüfa tañi feipin Jehová, Ñidolcülelu pu hueichafe mu,* Israel ñi Chau Ngünechen:
“Cüpalan quiñe rume huesa dungu tüfachi mapu mu. Com pu allcüntuculu rume llicaleaingün. 4 Tüfa engün elcünueneu ca tañi femün mu quimfalcünungelai tüfachi mapu, feimu femngechi feman. Tiye mu elufingün chalintucun* caquelu dios, feichi pu dios ñi quimnofiel engün, tañi pu cuifiqueche ca Judá ñi pu lonco ülmen. Cafei tiye mu langümfingün fentren che culpaquenolu. 5 Deumalelfingün fillque ngillatuhue ta Baal tañi lüpümafiel tañi pu fotüm cütral mu, femngechi elufingün lüpümngeelchi chalintucun ta Baal. Huelu iñche huercülafun ca feipiquelafun tüfachi dungu, raquiduamquelafun rume”’.
6 ‘“Feimu, ngüneduamnge, pichilehuei ta antü, fei Tófet cam Hinón laf mapu pingehuelayai tüfachi mapu, doi mai Cheu ñi Langümngequen pingetuai ti laf mapu” pi Chau Jehová. 7 “Huesalcayafiñ chem ñi ayünieel pu Judá che ca pu Jerusalén che tüfachi mapu mu. Iñche tañi pin mu tañi pu caiñe ñi cüpa langümeteu langümayu fütra cuchillo mu. Cafei eluafiñ* pu üñüm* ca pu culliñ ñi iyafiel tañi lachi cuerpo. 8 Iñche tañi pin mu pu che rume llicayai tañi femngen tüfachi huaria ca ayentungeai.* Com pu rupalu tiye mu adquintunieai, fei afmatulehueaingün ca huiqueñhuiqueñai* com tañi cutrancahun mu. 9 Hualloñmangeai engün,* fei hualloñmaeliyu tañi pu caiñe ñi cüpa langümeteu, rume huesa duamcüleaingün, fei iñche eluafiñ ñi ilotungeal tañi pu fotüm ca tañi pu ñahue. Hueluquentu ilotuhuaingün”’.
10 Fei hula trafofinge ti pichi metahue adquiñ püle pu huentru tami compañeteu, 11 fei feipiafimi: ‘Tüfa tañi feipin Jehová, Ñidolcülelu pu hueichafe mu: “Femngechi teifücayafiñ reque tüfachi troquiñche ca tüfachi huaria, chumngechi trafongequei quiñe metahue, fei cüme elcünungetulayafui. Tófet mu rüngaltucungeai pu la, feihuelayai caquelu la ñi rüngaltucungeal”’.
12 ‘Tüfachi dungu feman tüfachi mapu ca tañi pu che mu’ feipi Jehová. ‘Femngechi tüfachi huaria Tófet reque feleai. 13 Cafei fillque ruca mülelu Jerusalén mu, ca Judá ñi pu lonco ülmen tañi ruca podcüleai tüfachi mapu reque, Tófet pingelu. Pu che huente ruca mu* elufingün chalintucun ti antü, cüyen ca pu huangülen, cafei elufingün hutrulngeelchi* chalintucun caquelu dios, feimu com tüfachi ruca podcüleai tati’”.
14 Jeremías tripatulu Tófet mu, cheu tañi huercüeteu Jehová ñi huldungual, amui lepün püle* Chau Jehová ñi ruca mu ca feipifi com pu che: 15 “Tüfa tañi feipin Jehová, Ñidolcülelu pu hueichafe mu, Israel ñi Chau Ngünechen: ‘Tüfachi huaria ca com tañi pu troquiñche trencül piuque mu* pilaingün ñi inayal tañi feipin. Feimu huercülelafiñ ti cutrancahun tañi feipicünufiel engün’”.