Jeremías
20 Jeremías huldungui tüfachi dungu, fei ti sacerdote Pasjur allcütumequeyu. Pasjur fei ta Imer ñi fotüm ca doi falin loncolelungefui Chau Jehová ñi ruca mu. 2 Fei hula Pasjur hulelfi ta Jeremías, tüfa Chau Ngünechen ñi huerquen, ca trariñmafi tañi namun rangi epu fütraque trafla mu. Tüfa mülefui Benjamín ñi Doicülechi Puerta mülelu Chau Jehová ñi ruca mu. 3 Huelu ca antü, Pasjur lifrecünufi ta Jeremías, fei traringehuelai tañi namun rangi epu fütraque trafla mu. Fei Jeremías feipieyu:
“Feula Pasjur pingehuelayaimi, Chau Jehová üitueimu tati Llican Fill Püle. 4 Tüfa ñi feipin Chau Jehová: ‘Iñche tañi pin mu, eimi ca com tami pu hueni quimle chem tami rupayal, rume llicayaingün. Fei engün layaingün tañi pu caiñe ñi fütra cuchillo mu, ca eimi peafimi. Hultucuan com pu Judá che Babilonia ñi lonco ülmen tañi cuhu mu. Fei Babilonia mu yengeai engün ca langümngeai fütra cuchillo mu. 5 Pu caiñe ñi cuhu mu hultucuan com falinque chemcün* mülelu tüfachi huaria mu, com tañi nieel, com tañi falinque fillem ca com falinque chemcün nielu Judá ñi pu lonco ülmen. Müntuñmangeai* tañi nieel ca yengetuai Babilonia mu. 6 Eimi cai, Pasjur, ca com pu mülelu tami ruca mu, presuyengeaimün Babilonia mu. Tiye mu layaimi ca rüngaltucungeaimi com tami pu hueni eimün, huldungulu cai eimi coilaque dungu’”.
7 Ngünencaen, ahuem, Chau Jehová, ngünencangen.
Doi nehuen-ngeimi iñche mu, feimu huehuimi.
Com antü pu che ayecauquei iñche mu.
Com pu che ayentuqueneu.
8 Dungulu iñche, mülei tañi huiraral ca huldungual:
“¡Quehuan dungu! ¡Apümcan dungu!”.
Chau Jehová tañi dungun mu pu che lucatuqueneu* ca ayentuqueneu com antü.
9 Fei hula feipin: “Dunguhuelayan Chau Dios mu
ca dunguhuelayan tañi üi mu”.
Huelu fei tañi dungun üicülechi cütral reque feletui tañi piuque mu ca tañi foro meu.
Nehuen-ngehuelan tañi ngünenieafiel,
fei topalan ñi dunguhuenoal.
10 Allcün fentren rupa tañi dunguyengen.
Ti llican dungu hualloñmaeneu reque.*
“¡Dalluntucufimün! ¡Dalluntucumeafiyiñ!”.
Com pu che tañi feipimequeteu ñi cüme feleal ayülefuingün ñi tranapual.
“Huedhued dungu femafui chi,
fei huehuafiyiñ ca castigayafiyiñ”.
11 Huelu Chau Jehová afcadinieneu quiñe llicafalchi hueichafe reque.*
Feimu tañi pu inantucueteu mutrurtucuhuaingün ca hueulayaingün.
Rume yehueleaingün, cüme tripalayai tañi femün.
Rumel illamcangeaingün, turpu ngoimangelayai.*
12 Huelu eimi, ngüneduamquefimi ti nor che, ahuem, Chau Jehová, Ñidolcülelu pu hueichafe mu.
Eimi pequefimi doi ellcalechi raquiduam* ca piuque.
Eimi mu maneluuquen tañi juzgangeal,
feimu eluen* tañi peal chumngechi huiñoleltuafimi ta che tañi huesa femün.
13 ¡Ülcantulelafimün ta Chau Jehová! ¡Püramyeafimün ta Jehová!
Fei montulfi pu pofre pu huesaque che ñi cuhu mu.
14 ¡Choyüngenofuli, doi cümeafui!
¡Doi cümeafui tañi ñuque ñi choyünoaeteu!
15 Malisiangepe ti huentru yelelfilu cümeque dungu tañi chau, fei feipifi:
“¡Nieimi quiñe fotüm, quiñe pichi huentru!”,
fei tañi ayühuelafiel.
16 Feichi huentru trürümngepe ti fillque huaria Chau Jehová ñi apümcafiel, fei ñi cutranpiuqueyenofiel.
Pulihuen mu allcüpe ñi huirarün pu che, fei rangiantü allcüpe ñi cüpalen ta hueichan.
17 ¿Chumngelu* langümlaeneu petu ñi mülen tañi ñuque ñi pütra meu?*
Femngechi ñi ñuque iñche tañi rüngan reque feleafui,
fei rumel niepüñeñcüleafui.
18 ¿Chemu ta choyüngen?
¿Tañi peal cutrancahun, hueñancün
ca tañi yehuelcangeal tunte puule* tañi mongen?