Jeremías
23 “¡Aungei pu camañfe* apümcaquefilu ca huall püle yequefilu tañi pu ufisa! ¡Feichi pu ufisa iñche tañi cuidaquefiel!” feipi Chau Jehová.
2 Jehová, Israel ñi Chau Ngünechen, feipifi pu huentru camañquefilu tañi pu che tüfachi dungu: “Eimün fill püle yefimün tañi pu ufisa, fentecünulaimün tamün huall püle yeafiel ca cuidalafimün”.
“Feimu castigahuaiñ ta eimün tamün huesa femün mu” pi Chau Jehová.
3 “Feimu com huall mapu mu cheu ñi yefiel tañi pu ufisa, iñche trahulafiñ pu mülehuelu, fei cüpaltuafiñ engün tañi lelfün cachu mu, nieaingün coñi ca fentren-ngeaingün. 4 Eluafiñ engün camañfe ñi cüme cuidayafiel. Llicalayaingün ca pellquelayaingün rume. Quiñe no rume faltalayai” pi Chau Jehová.
5 “Ngüneduamaimün, püllelepai ta antü, fei David mu tripayai tañi cüpanche nor chengelu” pi Chau Jehová. “Feiti lonco ülmen ngünenieai, nieai adümuhun ca incayafi ti nor dungu mapu mu. 6 Tañi antü mu montulngeai ta Judá, fei Israel cüme feleai. Ca tañi üi feipingeai: Jehová mu Cüpai Taiñ Nor Dungu”.
7 Chau Jehová feipi: “Püllelepai ta antü, fei feipingehuelayai: ‘¡Taiñ mongelechi Chau Jehová ñi üi mu, tati entufilu pu Israel che Egipto mapu mu!’. 8 Doi mai feipingeai: ‘Taiñ mongelechi Chau Jehová ñi üi mu, tati entufilu pu Israel che ñi cüpanche norte mapu püle ca com huall mapu mu cheu tañi yefiel, fei cüpaltufi engün’. Fei engün müleaingün quisu tañi mapu mu”.
9 Tüfa feipifiñ pu huerquen:
Rume cutrantupiuquelen.
Müllmülli com tañi foro.
Chau Jehová tañi duam mu ca tañi yamfal dungun*
quiñe ngollife huentru reque felen,
quiñe huentru reque rume pulcutulu.
10 Tüfachi mapu mu fentrelei pu ñihuafe.
Ti mapu rume hueñancülei tañi malisiangen mu
ca huellin mapu mu* ancüquei ta cachu.
Pu che huesa femquei ca allmalltuquei tañi nehuen-ngen.
11 “Ti huerquen ca ti sacerdote caiñetuquefi ta Chau Dios.
Cafei iñche tañi ruca mu pen tañi huesa femün” pi Chau Jehová.
12 “Feimu trayafcüleai* ca dumiñcüleai tañi rüpü.
Ültrentucungeai engün* ca tranaingün.
Feiti tripantu tañi castigangeal engün
huercülelafiñ quiñe cutrancahun” pi Chau Jehová.
13 “Cafei pen quiñe ünufal dungu ñi femün Samaria ñi pu huerquen.
Tañi feipicünuel engün Baal mu cüpai,
fei hueluraquiduamelquefi tañi pu che Israel.
14 Cafei pen rume huesaque dungu ñi femün Jerusalén ñi pu huerquen.
Ñihualuuqueingün ca re coilatuqueingün.
Quelluntucuquefingün pu huesaque che,
nor raquiduamtulaingün tañi huesa femün mu.
Com tüfachi pu che Sodoma che reque troquiquefiñ
ca pu Jerusalén che Gomorra che reque troquiquefiñ”.
15 Feimu Chau Jehová, Ñidolcülelu pu hueichafe mu,* feipi tüfachi dungu pu huerquen mu:
“Eluafiñ ñi iyal ajenjo
ca ñi pütocoal venenongechi co.
Jerusalén ñi pu huerquen ngüchaltucuquefi pu che mülelu com ti troquiñ mapu mu ñi caiñetuafiel ta Chau Dios”.
16 Tüfa ñi feipin Chau Jehová, Ñidolcülelu pu hueichafe mu:
“Allcütulayafimün chem tamün huldunguleteu pu huerquen.
Fei engün ngünencaeimünmeu.
Ti afmatun dungu ñi feipin engün tripai quisu tañi piuque mu,
Chau Jehová feipilai tüfachi dungu.
17 Fei engün amulei ñi feipifiel pu che tañi yamnienoeteu:
‘Chau Jehová feipi: “Cüme feleaimün”’.
Ca feipiquefingün com pu che trencül piuquengelu:*
‘Chem huesa dungu no rume contulayaimünmu’.
18 ¿Inei cüme hueniyequefui ta Chau Jehová,
fei tañi peal ca tañi allcütual tañi dungun?
¿Inei cüme ngüneduami ca allcütufi tañi dungun?
19 ¡Adquintumün! Chau Jehová pengelai tañi fütra illcun* quiñe fütra cürüf reque.
Quiñe fütra cürüf nagpayai meulen reque pu huesaque che ñi lonco mu.
20 Chau Jehová huechunentule chem ñi ayünieel tañi piuque,
fei hula illcuhuelayai.
Eimün cüme adümürpuaimün tüfachi dungu afaelchi antü mu.
21 Iñche huercülafiñ pu huerquen, huelu lefcülen amuingün.
Nütramcalafiñ engün, huelu huldunguingün.
22 Huelu cüme hueniyeelimu engün,
quelluafuingün tañi pu che ñi allcütual tañi dungun,
ñi elcünual tañi huesa rüpü ca tañi huesa femün”.
23 “Pülleleli ca camapuleli, iñche ta Chau Ngünechen ngen, ¿felelai am?” pi Chau Jehová.
24 “¿Quiñe huentru ellcahuafui* quiñe ellcaupeyüm cheu tañi penoafiel iñche?” pi Chau Jehová.
“Iñche com penien ti huenu ca ti mapu meu, ¿felelai am?” pi Chau Jehová.
25 “Allcütufiñ pu huerquen huldunguquelu coilaque dungu iñche tañi üi mu. Feipi engün ‘¡Peuman! ¡Peuman!’. 26 Pu huerquen, ¿tuntepuai* tañi huldunguquefiel coilaque dungu? Huldunguqueingün coilaque dungu ñi mülen tañi piuque mu. 27 Hueluquentu nütramcahuingün tañi peuma, femngechi ngüchaltucuquefingün tañi pu che ñi ngoimayal* tañi üi, chumngechi tañi pu chau ngoimaingün tañi üi Baal ñi duam mu. 28 Ti huerquen niele quiñe peuma, nütramcape. Huelu tati nielu iñche ñi dungun, rüf dungupe iñche tañi dungun”.
“¿Trürümngepei mai ti pinu* ca ti fün?” feipi Chau Jehová.
29 “Tañi dungun trüri cütral reque ca quiñe pañillhue martillo reque* trafocaquelu fütra cura, ¿felelai am?” pi Chau Jehová.
30 “Feimu fau mülen tañi caiñetuafiel pu huerquen. Tüfa engün hueluquentu hueñequeingün tañi dungun” pi Chau Jehová.
31 “Fau mülen iñche tañi caiñetuafiel pu huerquen” pi Chau Jehová. “Pu feipiquelu: ‘¡Chau Dios feipi!’”.
32 “Fau mülen tañi caiñetuafiel pu huerquen nütramcalu tañi coilaque peuma. Tañi coilaque dungun ca tañi mallma dungun mu hueluraquiduamelquefi tañi pu che” pi Chau Jehová.
“Huelu iñche huercülafiñ engün ca feipiquelafiñ chem no rume. Feimu cümelcalayafingün tüfachi troquiñche” pi Chau Jehová.
33 “Cafei ti troquiñche mu quiñe che, quiñe huerquen cam quiñe sacerdote ramtuelmu ‘¿Chem fanechi dungu* niei Jehová?’, mülei tamün feipial ‘“¡Eimün ta fanechi dungu tati! Iñche famentuhuaiñ”* pi Chau Jehová’. 34 Cafei quiñe huerquen, quiñe sacerdote cam quiñe che troquiñche mu feipile ‘¡Tüfa ta Chau Jehová ñi fanechi dungu!’,* iñche castigayafiñ feichi huentru ca tañi pu che. 35 Quisuque eimün feipimequefimün tamün chafche* ca tamün peñi tüfachi dungu: ‘¿Chem huiñoldungui* Jehová? ¿Chem feipi Jehová?’. 36 Huelu nütramcahuelayaimün Chau Jehová ñi fanechi dungu.* Chem tamün feipin quisuque eimün fei ta fanechi dungu.* Eimün huelucünufimün taiñ mongelechi Chau Ngünechen Jehová ñi dungun, Ñidolcülelu pu hueichafe mu.
37 Tüfa feipiafimi ti huerquen: ‘¿Chem huiñoldungueimu Chau Jehová? ¿Chem feipi Chau Jehová? 38 Eimün feipimequelmün “¡Jehová ñi fanechi dungu!”,* Chau Jehová feipi: “Iñche huercühuiyiñ ‘Feipilayaimün “¡Jehová ñi fanechi dungu!”’,* huelu tamün feipimequefiel mu ‘Tüfa ta Jehová ñi fanechi dungu’,* 39 iñche huitrañpüramuhuaiñ, fei camapu ütrüfentuhuaiñ iñche tañi adquiñ mu, eimün ca ti huaria tamün elufiel eimün ca tamün pu cuifiqueche. 40 Iñche tañi pin mu rumel yehuelcangeaimün ca illamcangeaimün, turpu ngoimangelayai”’”.