Jeremías
22 Tüfa ñi feipin Chau Jehová: “Amunge Judá ñi lonco ülmen tañi ruca mu ca yefinge tüfachi huercün dungu. 2 Mülei tami feipial: ‘Ahuem, Judá ñi lonco ülmen, anücünuulu David ñi ülmen huancu mu, eimi, tami pu cüdaufe ca tami pu che conpulu tüfachi puerta püle, allcütumün Chau Jehová ñi dungu. 3 Tüfa ñi feipin Chau Jehová: “Incayafimün ti nor dungu. Pu ngünencachequelu ñi cuhu mu lifrenentuafimün pu hueñeñmangelu. Huesa femlayafimün quiñe ca cüpanche no rume. Huesalcalayafimün quiñe cuñifall ca quiñe lantu domo no rume. Ca tüfa mu langümlayafimün quiñe che culpanolu. 4 Eimün cüme inafilmün tüfachi dungu, pu lonco ülmen anüalu David ñi ülmen huancu mu conpuaingün tüfachi ruca ñi puerta püle. Cafei püraleaingün tañi carretela* ca tañi cahuellu mu, fei engün, tañi pu cüdaufe ca tañi pu che”’.
5 ‘Huelu eimün inanofilmün tüfachi dungu, iñche tañi üi mu feipicünun,* tüfachi ruca apümcangeai’ feipi ta Chau Jehová.
6 Chau Jehová feipi tüfachi dungu ñi rupayal Judá ñi lonco ülmen tañi ruca:
‘Galaad reque feleimi iñche mu,
huechuñ Líbano reque.
Huelu femcünuayu quiñe huellin mapu reque,*
com tami huaria huelliletuai.
7 Ca elfalcünuan che tami apümcayaeteu,
quisuque yenieai tañi hueichahue.*
Tüfa engün catrüñmayaimu tami doi cümeque cedro anümca
ca cütraltuafingün.
8 Fentren troquiñche rupayai feichi huaria mu ca huelucontu feipihuaingün: “¿Chumngelu* Jehová femngechi femfi tüfachi fütra huaria?”. 9 Fei huiñoldunguaingün:* “Fei engün elcünuingün tañi Chau Ngünechen Jehová ñi eldungu, cafei pochongnagingün* caquelu dios ñi adquiñ mu ca serfifingün”’.
10 Ngümalayaimün ti la ñi duam mu
ca hueñancütulayafimün.
Doi mai ngümacahuaimün ti amutulu ñi duam mu,
fei huiñotulayai tañi peal ti mapu cheu tañi choyüngen.
11 Tüfa tañi feipin Chau Jehová ñi rupayal Salum,* tüfa Josías ñi fotüm, feiti lonco ülmen ngüneniefi ta Judá ngüneniehuenolu tañi chau Josías ca amutui tüfachi mapu mu. Fei feipi: ‘Turpu huiñotulayai. 12 Layai cheu tañi yengen ca pehuelayafi tüfachi mapu’.
13 Aungei ti che deumalu tañi ruca ngünencan dungu mu
ca deumalu tañi fillque huenulechi pieza norngenochi dungu mu.
Eluquefi cüdau tañi chafche,* huelu chem no rume eluquelafi
ca pilai tañi culliafiel.
14 Feipilei: ‘Deumayan quiñe fütra ruca
ca huenu püle nieai fütraque pieza.
Tuculelafiñ ventana,
tacuafiñ cedro mamüll mu ca quelü pintayafiñ’.
15 Doi pünequeimi cedro mamüll caquelu che mu, feimu ¿doi ngüneniean pimi?
16 Juicio mu Josías incafi pu pofre ca pu cutrancaucülelu,
fei com cüme tripai ñi femün.
‘Josías quimnieneu, feimu femngechi femi, ¿felelai am?’ pi Jehová.
17 ‘Huelu eimi re adquintuquefimi ca piuquentucufimi chem tami huehuel ngünencan mu.
Langümquefimi che culpaquenolu.
Ngünencachequeimi ca hueñequeimi’.
18 Feimu tüfa tañi feipin Chau Jehová ñi rupayal Jehoiaquim, tüfa Josías ñi fotüm, Judá ñi lonco ülmen:
‘Hueñancütulayafingün ca feipilayaingün:
“¡Ay fotrü, tañi peñi! ¡Ay fotrü, tañi lamngen!”.
Hueñancütulayafingün ca feipilayaingün:
“¡Ay fotrü, ñidol! ¡Ay fotrü, tañi lonco ülmen!”.
19 Rüngaltucungeai quiñe burro reque,
huingüdyengeai ca huecun püle ütrüfentungeai,
huecun Jerusalén ñi puerta püle’.
20 Amunge Líbano mu ca huirarnge.
Nehuentu dungunge Basán mu
ca huirarnge Abarim püle.
Com tami pu üñam* trañmacangei.
21 Tüngcülelu eimi,* iñche dungueyu.
Huelu feipimi: ‘Allcütulayan’.
Femngechi femimi üllchangelu eimi,
turpu allcütulaen tañi dungun.
22 Quiñe cürüf cañpüle yetuafi com tami pu camañfe*
ca tami pu üñam camapu yengetuai.
Fei hula yehuelcangeaimi ca illamcangeaimi com tami huesa rupan mu.
23 Ahuem, eimi, mülelu Líbano mu,
nieimi tami dañe* rangi cedro anümca mu.
¡Rume eyütuaimi acule tami cutrancahun!
¡Rume cutrancahuaimi quiñe domo reque choyüalu ñi püñeñ!”.
24 “‘Chau Jehová feipi: ‘Eimi Conías,* Jehoiaquim ñi fotüm, Judá ñi lonco ülmen, iñche tañi mongen mu feipicünuayu, ¡tañi yihul cuhu reque* felefulmi ca mülefulmi tañi man cuhu mu, iñche ütrüfentuafeyu! 25 Iñche tañi pin mu huehuaimu tami pu cüpa langümeteu, tami pu llicalcaeteu, Nabucodonosor,* tüfa Babilonia ñi lonco ülmen ca pu Caldea che. 26 Cafei caque mapu mu ütrüfentuayu eimi ca tami ñuque, cheu tamu choyüngenon, ca tiye mu layaimu. 27 Eimi turpu huiñotulayaimi ti mapu meu tami rume ayüfiel huiñotual.
28 Tüfachi huentru Conías pingelu, ¿trürümngepei mai quiñe huechodcülechi challa falinolu,
quiñe duamngenochi metahue reque?
¿Chumngelu quechanentungei Conías ca tañi pu cüpanche?
¿Chemu huemünentungei engün* quiñe mapu mu tañi quimnofiel?’.
29 Ahuem, pu che mülelu mapu mu,* allcütumün Chau Jehová ñi dungun.
30 Tüfa ñi feipin Chau Jehová:
‘Huirintucungepe tüfachi huentru quiñe che reque nienolu yall,*
quiñe huentru reque cüme tripanoalu ñi femün tañi mongen mu.*
Quiñe tañi cüpanche no rume anüpulayai
David ñi ülmen huancu mu, fei ñi huiño ngünenieafiel ta Judá’”.