Jeremías

28 Feichi tripantu, hue conlu ñi ngünenieal Sedequías, Judá ñi lonco ülmen, yenielu 4 tripantu ca 5 cüyen, dungueneu ti huerquen Hananías. Tüfa Azur ñi fotüm, Gabaón mu tuhui. Fei Chau Jehová ñi ruca mu, pu sacerdote ca com pu che ñi adquiñ mu, feipieneu: 2 “Tüfa ñi feipin Jehová, Ñidolcülelu pu hueichafe mu,* Israel ñi Chau Ngünechen: ‘Trafocayafiñ Babilonia ñi lonco ülmen tañi yucu. 3 Petu ñi femtripanon 2 tripantu, huiño cüpaltuafiñ tüfachi mülehue mu itrofill chemcün* mülefulu Chau Jehová ñi ruca mu. Tüfa mu Nabucodonosor, Babilonia ñi lonco ülmen, entufi tüfachi fillque chemcün ca yetufi Babilonia mu’”. 4 “‘Ca cüpaltuafiñ fau Jeconías, Jehoiaquim ñi fotüm, Judá ñi lonco ülmen, cafei cüpaltuafiñ com pu Judá che yengefulu Babilonia mu. Iñche trafocayafiñ Babilonia ñi lonco ülmen tañi yucu’ feipi Chau Jehová”.

5 Chau Jehová ñi ruca mu huitralefui pu sacerdote ca com pu che. Fei engün ñi adquiñ püle, Jeremías, Chau Ngünechen ñi huerquen, dungufi tati huerquen Hananías. 6 Chau Ngünechen ñi huerquen Jeremías feipi: “¡Felepe mai! ¡Chau Jehová fempe! ¡Chau Jehová huechunentupe chem tami huldungumequen! ¡Babilonia mu entupe fillque chemcün mülefulu Chau Jehová ñi ruca mu, fei ñi cüpaltuafiel feichi chemcün ca com pu che cañpüle yengelu! 7 Huelu, füreneen, allcütunge, feipiayu quiñe huercün dungu eimi ca com pu che. 8 Petu tayu mülenon iñchiu, pu cuifique huerquen huldunguquefui ñi müleal hueichan, huesaque dungu ca cutran fentren troquiñ mapu ca fütraque gobierno mu. 9 Quiñe huerquen huldungule ñi müleal cüme felen ca femtripale tañi feipicünuel, quimngeai tañi rüf huercüeteu Chau Jehová”.

10 Rupalu tüfa, ti huerquen Hananías müntuñmafi* ca trafocafi ti yucu nielu Jeremías tañi topel mu, tüfa Chau Ngünechen ñi huerquen. 11 Fei hula com pu che ñi adquiñ mu Hananías feipi: “Tüfa ñi feipin Jehová: ‘Petu ñi femtripanon 2 tripantu, ca femngechi trafocayafiñ Nabucodonosor ñi yucu, tüfa Babilonia ñi lonco ülmen, cafei entuafiñ ti yucu com pu troquiñche ñi topel mu’”. Fei Jeremías, Chau Ngünechen ñi huerquen, amulei ñi trecalen.

12 Ti huerquen Hananías deu trafocafilu ti yucu nielu Jeremías tañi topel mu, Jeremías, Chau Ngünechen ñi huerquen, llohui Chau Jehová ñi dungun. Feipingei: 13 “Amunge ca feipiafimi Hananías: ‘Tüfa ñi feipin Chau Jehová: “Trafocafimi quiñe yucu mamüll, huelu feula deumayaimi pañillhue yucu”.* 14 Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: “Tucuan quiñe pañillhue yucu com tüfachi troquiñche ñi topel mu, femngechi serfiafingün Nabucodonosor, Babilonia ñi lonco ülmen, fei serfiafingün tati. Ca eluafiñ Nabucodonosor pu auca culliñ* mülelu lelfün mu”’”.

15 Fei hula Chau Ngünechen ñi huerquen Jeremías feipifi ti huerquen Hananías: “¡Hananías, füreneen, allcütunge! Chau Jehová huercülaeimu. Eimi tami femün mu tüfachi pu che maneluuquei coila dungu mu. 16 Feimu, tüfa ñi feipin Chau Jehová: ‘Iñche apümcayayu, ngehuelayaimi mapu mu. Eimi ngüchaltucufimi pu che tañi caiñetuafiel Chau Jehová, feimu tüfachi tripantu layaimi’”.

17 Feiti huerquen Hananías lai feichi tripantu, ti 7 cüyen mu.