Jeremías
29 Jeremías, Chau Ngünechen ñi huerquen, huirintucui carta Jerusalén mu. Fei huercülelfi tüfachi carta pu mülehuechi loncolelu cañpüle yengelu, pu sacerdote, pu huerquen ca com pu che. Nabucodonosor entufui feichi pu che Jerusalén mu tañi yetuafiel Babilonia mu. 2 Jeremías huirintucui ti carta deu tripatulu Jerusalén mu ti lonco ülmen Jeconías, tañi ñuque, pu cüdauquelu ülmen ruca mu, Judá ca Jerusalén ñi pu principe, pu artesano ca pu cüdauquelu pañillhue mu.* 3 Jeremías feipifi ta Elasá ca Guemarías ñi yeafiel ti carta. Elasá fei ta Safán ñi fotüm. Guemarías fei ta Hilquías ñi fotüm. Fei Sedequías, Judá ñi lonco ülmen, huercüfi tüfachi epu huentru Babilonia mu ñi pemeafiel Nabucodonosor, Babilonia ñi lonco ülmen. Ti carta feipilei:
4 “Tüfa ñi feipin Jehová, Ñidolcülelu pu hueichafe mu,* Israel ñi Chau Ngünechen, fei feipifi com pu che cañpüle yengelu, pu che ñi entufiel Jerusalén mu tañi yengeal Babilonia mu: 5 ‘Deumayaimün ruca cheu tamün müleal. Anümaimün anümca ca iñmuaimün ñi fün. 6 Nieaimün domo, ca nieaimün fotüm ca ñahue. Eluafimün tamün pu fotüm ñi nieal domo ca tamün ñahue ñi nieal füta. Femngechi ñi nieal engün fotüm, ñahue ca püñeñ. Üye mu fentren chengerpuaimün, doi alün-ngepe tamün pu che. 7 Quintumün ñi cüme feleal ti huaria cheu tamün yefiel. Llellipuafimün Chau Jehová ñi füreneafiel ti huaria. Cüme felen niele ti huaria, eimün cüme feleaimün. 8 Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: “Cuñiutucuhuaimün tamün ngünencanoaeteu pu huerquen ca pu pelontuchequelu mülelu eimün mu. Ngüneduamlayaimün rume tañi peuma engün. 9 ‘Huldungueimünmu coilaque dungu iñche tañi üi mu. Iñche huercülafiñ engün’ pi Chau Jehová”’”.
10 “Tüfa ñi feipin Chau Jehová: ‘Femtripale 70 tripantu Babilonia mu, iñche adquintuhuaiñ ca huechunentuan tañi feipicünuel, fei huiño cüpaltuhuaiñ tüfachi mülehue mu’.
11 ‘Iñche cüme quimnien tañi chumal eimün tamün duam mu’ pi Chau Jehová. ‘Ayünien tamün cüme feleal ca tamün cutrancaunoal. Cüpa eluhuaiñ cümeque dungu cüpalechi antü mu ca maneluhun. 12 Eimün mütrümmuan* ca ngillatumuan, fei iñche allcütuhuaiñ’.
13 ‘Eimün quintumuan, com piuque mu quintumuan, feimu pemuan. 14 Iñche tañi pin mu eimün pemuan’ pi Chau Jehová. ‘Trahulafiñ tamün pu che cañpüle yengelu. Com troquiñche ca com mapu mu cheu tamün yefiel, iñche trahuluhuaiñ. Ti mapu cheu tamün yefiel, iñche huiño cüpaltuhuaiñ’ pi Chau Jehová.
15 Huelu eimün feipimün: ‘Chau Jehová elueiñmu tañi pu huerquen Babilonia mu’.
16 Huelu Chau Jehová dungufi ti lonco ülmen anülelu David ñi ülmen huancu mu ca com pu che mülelu tüfachi huaria mu, tamün pu peñi yengenolu cañpüle eimün mu. Feipingei engün: 17 ‘Tüfa ñi feipin Chau Jehová, Ñidolcülelu pu hueichafe mu: “Huesalcayafiñ engün fütra cuchillo mu, ngüñün ca cutran mu. Iñche tañi pin mu funalechi* higo reque feleaingün, ünufalngelu ca pepi ingequenolu”’.
18 ‘Inantucuafiñ engün fütra cuchillo mu, ngüñün ca cutran mu. Tañi femfiel mu, com mapu mülechi gobierno llicayai engün. Com troquiñche mu cheu tañi yefiel engün malisiangeaingün, afmatufalngeaingün tañi femngen mu ca ayentungeaingün.* 19 Iñche fentren rupa huercülelfiñ tañi pu cüdaufe, tüfa tañi pu huerquen, huelu tüfa engün allcütulaingün tañi dungun’ pi Chau Jehová.
‘Eimün inalaimün tañi feipin’ pi Chau Jehová.
20 Feimu allcütuafimün Chau Jehová ñi dungun, com pu che cañpüle yengelu, pu che ñi entufiel Jerusalén mu tañi yengeal Babilonia mu. 21 Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen. Feipi ñi rupayal pu huldungulu coilaque dungu iñche tañi üi mu, tüfa ta Acab, Colaya ñi fotüm, ca Sedequías, Maaseya ñi fotüm. Fei feipi: ‘Hultucuafiñ engu Nabucodonosor* ñi cuhu mu, tüfa Babilonia ñi lonco ülmen. Fei langümayu tamün adquiñ mu. 22 Com pu Judá che yengelu Babilonia mu acordayai chem ñi rupan engu tañi malisiacheal. Feipiaingün: “¡Chau Jehová fempe eimi mu chem ñi femfiel Sedequías ca Acab! ¡Babilonia ñi lonco ülmen afümfi engu cütral mu!”. 23 Yehuefali tañi femün engu Israel mu, coningu ñihuan dungu mu caquelu huentru ñi domo engu, ca huldunguingu coilaque dungu iñche tañi üi mu, huelu iñche huercülafiñ tañi femngechi femal.
“Iñche mai quimnien, iñche ta penien” pi Chau Jehová’”.
24 “Ca feipiafimi ta Semaya, ti Nehelam che: 25 ‘Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: “Eimi tami üi mu huercülelfimi carta com pu Jerusalén che, com pu sacerdote ca ti sacerdote Sofonías, tüfa Maaseya ñi fotüm. Ti carta feipilei: 26 ‘Jehoiadá sacerdotengehuelayai, feula Jehová sacerdotecünueimu tami loncoleal Chau Jehová ñi ruca mu, tami castigayafiel chem huedhued che rume huerquen femfaluuquelu ca tami trarintucuafiel tañi namun, cuhu ca tañi pel rangi 2 fütraque trafla mu. 27 Huelu, ¿chumngelu* norümtulafimi Jeremías, ti Anatot huentru? Tüfa Chau Dios ñi huerquen femfaluuquei eimün mu. 28 Cafei huercüeiñmu tüfachi dungu Babilonia mu: “¡Rupayai fentren tripantu! Deumayaimün ruca cheu tamün müleal. Anümaimün anümca ca iñmuaimün ñi fün...”’”’”.
29 Ti sacerdote Sofonías papeltui ti carta Jeremías ñi adquiñ mu, tüfa Chau Dios ñi huerquen. 30 Fei hula Jeremías llohui Chau Jehová ñi dungun. Feipingei: 31 “Huercülelafimi com pu che cañpüle yengelu tüfachi dungu: ‘Tüfa ñi feipifiel Chau Jehová ta Semaya, ti Nehelam che: “Iñche huercülafiñ ta Semaya, huelu huldungueimünmu ca ayüfui tamün maneluhual coilaque dungu mu, 32 feimu tüfa ñi feipin Jehová: ‘Castigayafiñ ta Semaya, ti Nehelam huentru, ca tañi pu cüpanche. Quiñe huentru no rume tañi familia mu mongetripalayai tüfachi troquiñche mu. Semaya ngüchaltucufi pu che ñi caiñetuafiel ta Chau Jehová, feimu pelayai tati cümeque dungu ñi femafiel tañi pu che’ pi Chau Jehová”’”.