Jeremías
30 Jeremías llohui Chau Jehová ñi dungun. Feipingei: 2 “Tüfa ñi feipin Jehová, Israel ñi Chau Ngünechen: ‘Quiñe lifru mu huirintucunge com tañi feipiel. 3 Chau Jehová feipi: “Püllelepai ta antü, fei trahulafiñ tañi pu che cañpüle yengelu, pu Israel che ca pu Judá che. Huiño cüpaltuafiñ engün tañi mapu mu ñi elufiel tañi pu cuifiqueche ca ngen-ngetuaingün” pi Chau Jehová’”.
4 Tüfa ñi feipifiel Chau Jehová pu Israel che ca pu Judá che.
5 Tüfa ñi feipin Chau Jehová:
“Allcüiñ ñi huirarün che llican dungu mu.
Com llicafali, ngelai cüme felen.
6 Fürenemun, ramtuafimün pu che, ¿quiñe huentru choyüafui quiñe püñeñ?
Feimu, ¿chumngelu* penien com pu nehuen-ngechi huentru nüniefilu tañi pütra
quiñe domo reque choyülu tañi püñeñ?
¿Chemu com fülangnagi tañi ange engün?
7 ¡Aungeai, cutrancahun müleai feichi antü!
Ngelai cangelu femngechi antü.
Feichi antü mu rume cutrancahuai Jacob,
huelu montulngeai tati”.
8 Chau Jehová, Ñidolcülelu pu hueichafe mu,* feipi: “Feichi antü mu trafocayafiñ tañi yucu engün, entuñmayafiñ tañi topel mu ca 2 troquiñ mu catrücayafiñ tañi coyunda.* Fei pu ca cüpanche* huiño esclavocünulayafi engün. 9 Fei engün serfiafingün tañi Chau Ngünechen Jehová ca tañi lonco ülmen David. Eluafiñ tüfachi huentru tañi ngünenieafiel engün”.
10 “Eimi Jacob, iñche tañi cüdaufe, llicalayaimi” pi Chau Jehová.
“Ahuem, Israel, rume llicalayaimi.
Camapu, cheu tami mülen, iñche montulayu,
ti mapu mu cheu tami yengen, montulafiñ tami cüpanche.
Jacob huiñotuai, cüme duamcületuai ca cüme feletuai,
inei no rume llicalcalayayu”.
11 “Iñche afcadinieyu ca montulayu” pi Chau Jehová.
“Huelu apümcayafiñ com pu troquiñche cheu tami yefiel,
huelu apümcalayayu ta eimi.
Norümtuayu tunte* tami duamnieel,
huelu ca castigayayu”.
12 Tüfa ñi feipin Chau Jehová:
“Tami huesa dungu nielai lahuen.
Tami allfen tremoltungelayai.*
13 Inei no rume incaquelaeimu huesa dungu mu,
pepi tremoltungelai tami allfen.
Eimi tremotulayaimi.
Fente tami huelulcan ca tami fentren culpan dungu mu,*
iñche hulelcaeyu chumngechi femquei quiñe caiñe,
castigaeyu chumngechi femafui quiñe huesa che.
15 ¿Chumngelu aungen piqueimi tami huesa dungu mu?
¡Cüme duamcületulayaimi tami cutrancahun mu!
Fente tami huelulcan ca tami fentren culpan dungu mu*
iñche femngechi femeyu.
16 Fei com pu che tami apümcaeteu, apümcangeaingün.
Com tami pu caiñe ca yengetuaingün cañpüle.
Pu che tami malocontueteu, malocontungeaingün.
Ca iñche tañi pin mu com pu che tami müntuñmaeteu* tami fillem, ca femngechi femngeaingün”.
17 “Eimi illamcangelu pingefuimi ca feipingeimi:
‘Inei no rume quintuquelafi ta Sion’,
huelu iñche tremoltuayu ca tremoltuafiñ tami allfen” pi Chau Jehová.
18 Tüfa ñi feipin Chau Jehová:
“Iñche trahulafiñ Jacob ñi pu cüpanche cañpüle yengelu
ca cutranpiuqueyeafiñ engün.
Ti huinculcülechi mapu mu huiño deumangetuai ti huaria
ca ti nehuen-ngechi adquintuhue elcünungetuai cheu tañi müleafel.
19 Tiye mu allcün-ngeai ñi ayüucülequen pu che ca ñi ülcantuquen tañi mañumal.
Iñche tañi pin mu alün-ngerpuaingün, pichin che troquingehuelayai,
rume fentreleaingün,*
ca falin chengenolu troquingehuelayai engün.
20 Jacob ñi pu yall* cüme feleaingün cuifi reque.
Cafei trahulafiñ engün, fei rumel müleaingün iñche tañi adquiñ mu.
Castigayafiñ com tañi pu caiñetueteu.
21 Tañi troquiñche mu tripayai tañi afmatufal loncolelu,
ca tañi pu cüpanche mu tripayai inei tañi ngünenieal.
Iñche tañi pin mu pülleconai, fei pülleconai iñche mu”.
“Femnoli, ¿inei nehuen piuquengeafui ñi pülleconal iñche mu?” pi Chau Jehová.
22 “Eimün iñche tañi pu chengerpuaimün ca iñche tamün Chau Ngünechen ngean”.
23 ¡Adquintumün! Chau Jehová pengelai tañi fütra illcun* quiñe fütra cürüf reque.
Quiñe fütra cürüf nagpai meulen reque pu huesaque che ñi lonco mu.
24 Chau Jehová huechunentule chem ñi ayünieel tañi piuque,
fei hula illcuhuelayai.
Eimün adümürpuaimün tüfachi dungu afaelchi antü mu.