Jeremías

32 Sedequías, Judá ñi lonco ülmen, yeniefui 10 tripantu tañi ngünenieel ca Nabucodonosor* yeniefui 18 tripantu tañi ngünenieel. Feichi mu Jeremías llohui Chau Jehová ñi dungun. 2 Feichi mu Babilonia ñi lonco ülmen tañi pu hueichafe* hualloñmaniefingün* ta Jerusalén. Jeremías, Chau Ngünechen ñi huerquen, presulefui pu Soltau ñi Lepün püle* mülelu Judá ñi lonco ülmen ñi ruca mu. 3 Fei Sedequías, Judá ñi lonco ülmen, presuntucueyu ca feipieyu: “¿Chumngelu* huldunguimi tüfachi dungu? Eimi feipimi: ‘Tüfa ñi feipin Chau Jehová: “Iñche tañi pin mu, Babilonia ñi lonco ülmen huehuafi ca nürpuafi tüfachi huaria. 4 Cafei pu Caldea che huehuafi ta Sedequías, Judá ñi lonco ülmen, rüf hultucungeai Babilonia ñi lonco ülmen tañi cuhu mu. Fei Sedequías lelinieayu ca adquintunieayu petu tañi dungufiel”’. 5 ‘Fei yeafi ta Sedequías Babilonia mu ca tiye mu mülenagai dullili hula iñche tañi chumafiel’ pi Chau Jehová. ‘Eimün hueichamequefilmün rume pu Caldea che, hueutripalayaimün’”.

6 Jeremías feipi: “Chau Jehová feipieneu tüfachi dungu: 7 ‘Hanamel, tami malle* Salum ñi fotüm, cüpayai ca feipiaimu: “Ngillañmaen tañi mapu mülelu Anatot mu, eimi hune elungeimi tañi huiño ngillayafiel”’”.

8 Chumngechi feipi Jehová, tañi malle ñi fotüm, Hanamel pingelu, pepaeneu pu Soltau ñi Lepün püle ca feipieneu: “Füreneen, ngillañmaen tañi mapu mülelu Anatot mu, Benjamín mapu mu. Eimi elungeimi tami ngen-ngetual ca tami huiño ngillayafiel. Ngillafinge”. Feichi mu quimtucun ñi femtripan Chau Jehová ñi feipin.

9 Feimu ti mapu mülelu Anatot mu ngillañmafiñ ta Hanamel, tañi malle ñi fotüm. Fei fanelelfiñ ti plata: 7 siclo* ca 10 siclo plata. 10 Fei hula huirintucufiñ quiñe escritura mu, sellafiñ, mütrümfalfiñ* testigo ca fanefiñ ti plata pesa mu. 11 Nüfiñ ti escritura pengelquelu ñi ngillael ti mapu, feiti huirintucun sellacünungelu chumngechi feipi ca huercüi ti ley, cafei nüfiñ ti escritura sellacünungenolu. 12 Fei elufiñ ti escritura ta Baruc, Nerías tañi fotüm, Mahseya ñi fotüm. Femün tüfa Hanamel ñi adquiñ mu, tüfa tañi malle ñi fotüm, pu testigo ñi adquiñ mu firmacünulu ti escritura ca com pu judio che ñi adquiñ mu anülelu pu Soltau ñi Lepün püle.

13 Fei engün ñi adquiñ mu, feipifiñ ta Baruc: 14 “Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘Nüfinge ti 2 escritura, ti escritura sellacünungelu ca ti cangelu escritura sellacünungenolu. Ca tucuafimi quiñe metahue mu ñi huesañmaunoal’. 15 Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘Tüfachi mapu mu huiño ngillangeai ruca, mapu ca anümca ofad’”.

16 Deu ñi elufiel ti escritura ta Baruc, Nerías ñi fotüm, llellipufiñ ta Chau Jehová. Feipifiñ: 17 “¡Ahuem, Doi Fütra Ñidol Jehová! Eimi tami fütra nehuen ca tami pepiluhun mu deumaimi ti huenu ca ti mapu. Chem no rume cüdaungelai tami femal. 18 Eimi pengelelquefimi tami piuqueyefiel* rume fentren che. Huelu culpale pu chau, castigaquefimi tañi pu fotüm. Eimi ta Chau Ngünechen, Yamfalngeimi* ca Nehuen-ngeimi, Jehová pingeimi, Ñidolcülelu pu hueichafe mu. 19 Chem tami ayünieel afmatufali ca nehuen-ngeimi tami femün mu. Eimi adquintuquefimi com ñi femün pu huentru, fei tami culliafiel quisuque engün chumngechi tañi miyahun ca tañi femquen mu. 20 Egipto mapu meu femimi fütraque afmatun dungu, petu quimniengequei famülque mu, femngechi Israel ca com pu che meu quimfalcünuimi tami üi, chumngechi rupamequei fachantü. 21 Fütraque afmatun dungu mu entufimi pu Israel che Egipto mapu mu. Pengelimi tami fütra nehuen ca tami pepiluhun. Llicafalchi dungu femimi.

22 Rupalu ta antü elufimi engün tüfachi mapu chumngechi feipicünufimi* tañi cuifiqueche, quiñe mapu cheu ñi mülen fentren lichi ca miel. 23 Fei engün coningün feichi mapu mu ca ngen-ngetuingün, huelu allcütulaingün tami feipin ca inalaingün tami ley dungu. Chem no rume tami huercüel femlaingün, feimu huercülelfimi com tüfachi cutrancahun. 24 ¡Adquintunge! Cüpai huentru deumalu nehuen-ngechi cura malal ñi malocontuafiel ti huaria ca nüafiel. Rüfcünu, fütra cuchillo, ngüñün ca cutran mu hultucungeai ti huaria pu Caldea che ñi cuhu mu, fei engün hueichamequefi ti huaria. Chumngechi ngüneduamimi, com tami feipiel femtripai. 25 Ahuem, Doi Fütra Ñidol Jehová, rüf hultucungeai ti huaria pu Caldea che ñi cuhu mu, huelu eimi feipien ‘Plata mu ngillafinge ti mapu ca mütrümfalfinge pu testigo’”.

26 Feica müten Jeremías llohui Chau Jehová ñi dungun. Feipingei: 27 “Iñche ta Jehová, com pu che ñi Chau Ngünechen. ¿Mülepei mai cüdaungechi dungu tañi pepi femnoafel? 28 Feimu Chau Jehová feipi: ‘Iñche tañi pin mu pu Caldea che ca Nabucodonosor,* Babilonia ñi lonco ülmen, huehuafi tüfachi huaria. Nabucodonosor nüafi ti huaria. 29 Pu Caldea che hueichamequefilu tüfachi huaria, conpuaingün, fei lüpümafingün ti huaria ca fillque ruca. Huente feichi ruca mu pu che chalintuculelquefui ta Baal ca hulingün hutrulngeelchi* chalintucun* caquelu dios mu tañi illculcayaeteu’.*

30 ‘Huechengelu ca fantepu mu, pu Israel che ca pu Judá che re huesa femingün iñche tañi adquiñ mu. Re illculcaeneu pu Israel che tañi femün mu’ pi Chau Jehová. 31 ‘Feichi antü deumangelu tüfachi huaria ca fantepu mu, rume illculen tüfachi huaria ñi duam mu. Feimu iñche tañi adquiñ mu entungeai engün, 32 fente tañi huesa femün pu Israel che ca pu Judá che tañi illculcayaeteu, fei engün, tañi pu lonco ülmen, tañi pu principe, tañi pu sacerdote, tañi pu huerquen, pu Judá huentru ca pu Jerusalén che. 33 Amuleingün tañi furintucuaeteu, adquintulaeneu engün. Fill rupa cüpa quimeltulelfiñ engün, huelu quiñe no rume pilai tañi allcütual ca tañi norümngeal. 34 Tucuingün tañi ünufal adentun* ti ruca mu yenielu tañi üi, fei tañi podümafiel. 35 Cafei Hinón laf mapu mu* deumaingün Baal ñi fillque ngillatuhue, fei tañi chalintuculelafiel ta Mólek tañi pu fotüm ca tañi pu ñahue cütral mu. Huelu iñche huercülafun tüfachi dungu, raquiduamquelafun rume ñi femal engün tüfachi ünufal dungu, femngechi ñi culpayal* pu Judá che’.

36 Feimu Jehová, Israel ñi Chau Ngünechen, feipi chem ñi rupayal tüfachi huaria. Eimün feipimün tüfachi huaria ñi huehuaeteu Babilonia ñi lonco ülmen fütra cuchillo, ngüñün ca cutran mu. Chau Dios feipi: 37 ‘Com huall mapu cheu tañi yefiel engün tañi lladcün ca rume fütra illcun mu, huiño trahulafiñ engün. Cüpaltuafiñ engün tüfachi mapu mu ca cüme feleaingün. 38 Fei engün, iñche tañi pu chengerpuaingün, ca iñche, fei engün tañi Chau Ngünechen ngean. 39 Iñche eluafiñ quiñe rume piuque ca quimelelafiñ quiñe rüpü tañi rumel yamnieaeteu, femngechi tañi cümelcaleal engün ca tañi pu yall,* deu ngehuenole engün. 40 Rumel eldungucünuan fei engün mu: fentecünulayan ñi femal cümeque dungu fei engün ñi duam mu. Tuculelafiñ tañi piuque mu tañi yamnieaeteu, femngechi tañi püntütripanoal* iñche mu. 41 Rume ayühuelaeneu tañi femafiel engün cümeque dungu, cüme anümcünuafiñ tüfachi mapu, com tañi piuque ca com tañi nehuen mu’”.*

42 “Tüfa ñi feipin Chau Jehová: ‘Chumngechi huercülelfiñ tüfachi pu che com tüfachi cutrancahun, ca femngechi huercülelafiñ engün com tüfachi cümeque dungu tañi feipicünufiel. 43 Cafei huiño ngillangeai lelfün tüfachi mapu mu, feipimequelmün rume: “Huellilei ti mapu, ngelai huentru ca culliñ, ca hultucungei pu Caldea che ñi cuhu mu”’.

44 ‘Pu che plata mu ngillayafi lelfün, huirintucuai ca sellacünuafi escritura, mütrümafi testigo Benjamín mapu mu, huall püle Jerusalén mu, Judá ñi fillque huaria mu, fillque huaria mülelu ti mapu nielu fentren huincul, fillque huaria mülelu nag mapu ca fillque huaria mülelu sur mapu meu. Iñche huiño cüpaltuafiñ tañi pu che cañpüle yengelu’ pi Chau Jehová”.