Jeremías

33 Jeremías ca quiñe rupa llohui Chau Jehová ñi dungun. Feichi mu petu presulefui pu Soltau ñi Lepün püle.* Feipingei: 2 “Tüfa ñi feipin Jehová, tati deumalu ti mapu. Chau Jehová, deumafi ti mapu ca cüme anümcünufi. Jehová pingei tañi üi: 3 ‘Mütrümaen,* iñche huiñoldunguayu.* Iñche nütramcayayu fütraque dungu quimfalngenolu, fillque dungu tami quimnofiel’”.

4 “Jehová, Israel ñi Chau Ngünechen, feipi chem ñi rupayal fillque ruca mülelu tüfachi huaria mu ca Judá ñi pu lonco ülmen tañi ruca. Feichi ruca teifücafingün ñi incañpehual, fei ñi lefcontunoaeteu pu caiñe ñi nehuen-ngechi cura malal ca tañi fütra cuchillo. 5 Ca feipi chem ñi rupayal pu che caiñetupafilu pu Caldea che. Feichi mu langümfiñ che tañi fütra illcun mu,* ca tañi lachi cuerpo apolfi fillque ruca. Iñche adquintuhuelafiñ tüfachi huaria fente tañi huesa femün engün. Fei feipi: 6 ‘Tremoltuafiñ* pu che ca eluafiñ ñi cülfüncüleal. Tremoltuafiñ engün ca eluafiñ fentren tüngün* ca cüme felen. 7 Cüpaltuafiñ pu Judá che ca pu Israel che cañpüle yengelu. Cüme elcünutuafiñ engün chumngechi ñi felefel ellaca mu. 8 Fente culpafulu rume* iñche mu, iñche liftuafiñ engün. Rulpacünuan com tañi culpan ca tañi huelulcan* ñi femün iñche mu. 9 Tüfachi huaria ñi üi ayühuelaeneu. Com troquiñche mapu mu allcüngeai com cümeque dungu ñi femfiel tañi pu che, feimu püramyengean ca saquingean. Pu troquiñche ngüneduamle com cümeque dungu ñi femfiel ti huaria ca ñi elufiel cüme felen, rume llicayaingün ca müllmüllaingün’”.

10 “Tüfa ñi feipin Chau Jehová: ‘Eimün feipiaimün, tüfachi mapu huellilei, ngelai huentru ca culliñ. Felei, huellilei Judá ñi fillque huaria ca Jerusalén ñi rüpü, ngelai huentru, pu che ca culliñ. Huelu huiño allcüngeai 11 ñi rumeñma ayüucülen pu che, ca tañi dunguquen ti novio ca ti novia. Pu che feipiai: “¡Chau Jehová cüme piuquengei, rumel piuqueyechequei,* feimu mañumafimün Chau Jehová, Ñidolcülelu pu hueichafe mu!”’.*

‘Huiño cüpaltuafiñ pu che camapu yengelu. Müleaingün chumngechi ñi felefel ellaca mu. Feimu tüfa engün yeafi chalintucun* ñi mañumafiel Chau Jehová tañi ruca mu’ pi Chau Jehová”.

12 “Tüfa ñi feipin Chau Jehová, Ñidolcülelu pu hueichafe mu: ‘Tüfachi huellilechi mapu, cheu ñi mülenon huentru ca culliñ, ca com tañi huaria mu, huiño mületuai cachu. Femngechi pu camañfe* yeafi tañi quechan culliñ ñi ürcütual’.

13 ‘Fillque huaria mülelu ti mapu nielu fentren huincul, fillque huaria mülelu nag mapu, fillque huaria mülelu sur mapu, Benjamín mapu, huall püle Jerusalén mu ca Judá ñi fillque huaria mu, pu camañfe huiño raquiaingün pu ufisa rupamequelu miñche tañi cuhu mu’ pi Chau Jehová”.

14 “Chau Jehová feipi: ‘¡Ngüneduamnge! Püllelepai ta antü, fei huechurpuan ti cüme dungu ñi feipicünufiel pu Israel che ca pu Judá che. 15 Feichi antü mu eluafiñ ta David quiñe cüpanche nor chengelu. Nor dungu femai mapu mu. 16 Feichi antü mu montulngeai ta Judá, ca Jerusalén cüme feleai. Femngechi feipingeai tañi üi: Jehová mu Cüpai Taiñ Nor Dungu’”.

17 “Tüfa ñi feipin Chau Jehová: ‘Rumel müleai quiñe che David mu cüpalu, fei anüleai Israel ñi ülmen huancu mu, 18 cafei pu Leví sacerdote rumel nieaingün quiñe huentru iñche tañi adquiñ mu, fei hulai lüpümngeelchi chalintucun, lüpümai fün chalintucun ca hulai fillque chalintucun’”.

19 Jeremías ca huiño llohui Chau Jehová ñi dungun. Feipingei: 20 “Tüfa ñi feipin Chau Jehová: ‘Eimün catrütulayaimün iñche tañi eldungucünufiel ti antü ca ti pun, fei ñi acunoal ti antü ca ti pun. 21 Ca femngechi catrütungelayai iñche tañi eldungucünufiel tañi cüdaufe David, fei ñi nienoal quiñe fotüm lonco ülmen-ngealu ca anülelu ñi ülmen huancu mu tañi ngünenieal. Ca femngechi catrütungelayai iñche tañi eldungucünufiel pu Leví sacerdote, tüfa tañi pu cüdaufe. 22 Chumngechi raquifalngelai pu huangülen mülelu huenu mu ca ti cuyüm mülelu lafquen mu, ca femngechi iñche rüf huechunentuafiñ ñi feipicünufiel tañi cüdaufe David ñi cüpanche ca pu Leví che ñi cüdahuelqueteu’”.

23 Jeremías ca huiño llohui Chau Jehová ñi dungun. Feipingei: 24 “¿Ngüneduamlaimi ñi feipin tüfachi pu che? Feipingün: ‘Jehová famentuafi* ti 2 familia tañi dullifiel’. Cafei yamquelafingün* iñche tañi pu che. Quiñe troquiñche reque troquilafingün.

25 Tüfa tañi feipin Chau Jehová: ‘Chumngechi cüme eldungucünufiñ ti antü ca ti pun ca chumngechi cüme elcünun ley* ti huenu ca ti mapu mu, 26 iñche turpu famentulayafiñ Jacob ñi cüpanche ca tañi cüdaufe David ñi pu cüpanche. Tañi cüpanche mu dullian inei tañi ngünenieafiel Abrahán, Isaac ca Jacob ñi cüpanche. Huiño cüpaltuafiñ tañi pu che cañpüle yengelu, fei cutranpiuqueyeafiñ engün’”.