Jeremías

41 Ti 7 cüyen mu, Ismael puhui Mizpá huaria mu quiñentrür 10 huentru, ayüfuingün ñi peafiel Guedalías, tüfa Ahicam ñi fotüm. Ismael fei ta Netanías ñi fotüm, Elisamá ñi lacu,* ti lonco ülmen ñi familia mu tuhui ca falin huentrungefui cüdahuelfilu ti lonco ülmen. Petu imequelu engün Mizpá huaria mu, 2 Ismael, tüfa Netanías ñi fotüm, ca 10 huentru tañi compañeteu huitrapüraingün ca fütra cuchillo mu langümfingün Guedalías, tüfa Ahicam ñi fotüm, Safán ñi lacu. Femngechi Ismael langümfi feichi huentru elcünulu Babilonia ñi lonco ülmen tañi loncoleal ti troquiñ mapu. 3 Cafei Ismael langümfi com pu judio mülelu Guedalías engün Mizpá huaria mu, ca langümfi pu Caldea hueichafe* mülelu tiye mu.

4 Fei quiñe antü rupalu* ñi langümngen Guedalías, petu ñi quimngenon ti dungu, 5 cüpai 80 huentru tuulu Siquem, Siló ca Samaria mu. Cupilcülefuingün tañi payun, huichafcalefui* tañi tacun ca catrüuquefuingün tañi cuerpo. Cafei tañi cuhu mu cüpalingün olibano ca fün chalintucun* ñi yeafiel Chau Jehová ñi ruca mu. 6 Fei hula Ismael, tüfa Netanías ñi fotüm, tripai Mizpá huaria mu, fei ngümalen trafmefi pu huentru. Puulu cheu ñi mülen engün, feipifi: “Cüpamün. Pepafimün Guedalías, Ahicam ñi fotüm”. 7 Huelu conpulu müten huaria mu, Ismael, feita Netanías ñi fotüm, ca tañi pu hueichafe langümfingün pu huentru ca ütrüftucufingün rüngan mu.

8 Huelu 10 huentru feipifingün ta Ismael: “Langümmulayaiñ. Lelfün mu ellcanieiñ* cachilla, cahuella,* aceite ca miel”. Feimu Ismael langümlaeyu engün chumngechi langümngei tañi pu peñi. 9 Ismael ütrüftucufi pu huentru tañi langümfiel quiñe fütra rüngan mu. Ti lonco ülmen Asá deumafui feiti rüngan Baasá ñi duam mu, tüfa Israel ñi lonco ülmen. Ismael, feita Netanías ñi fotüm, apolfi tüfachi rüngan pu huentru ñi langümel.

10 Ismael presuyefi pu caquelu che Mizpá mu mülelu, ti lonco ülmen ñi pu ñahue ca com pu che mülehuelu Mizpá mu. Nebuzaradán, ti loncolechi soltau, elcünufui feichi pu che ñi cuidayaeteu Guedalías, feita Ahicam ñi fotüm. Huelu Ismael, tüfa Netanías ñi fotüm, presuyefi feichi pu che ca trecacünuhui ñi rupayal pu Ammón che ñi mapu mu.

11 Johanán, feita Caréah ñi fotüm, ca com pu loncolechi hueichafe tañi compañeteu, quimürpuingün fente tañi huesa femün Ismael, tüfa Netanías ñi fotüm. 12 Feica müten amuingün com tañi pu hueichafe engün tañi quehuayafiel ta Ismael, Netanías ñi fotüm, fei pepufingün cheu ñi mülen fentren co* Gabaón mu.

13 Com pu che mülelu Ismael engün rume ayühuingün pefilu ta Johanán, feita Caréah ñi fotüm, ca com pu loncolechi hueichafe tañi compañeteu. 14 Fei hula com pu che mülefulu Mizpá mu, Ismael ñi presuyefiel, huiñotuingün, fei amutuingün Johanán engün, feita Caréah ñi fotüm. 15 Huelu Ismael, feita Netanías ñi fotüm, ca 8 tañi pu huentru montuingün ñi langümnoaeteu Johanán, fei amutuingün pu Ammón che ñi mapu mu.

16 Johanán, feita Caréah ñi fotüm, ca com pu loncolechi hueichafe tañi compañeteu, yetufingün pu Mizpá che tañi montulfiel. Feichi pu che ñi presuyefiel Ismael, feita Netanías ñi fotüm, deu langümfilu ta Guedalías, tüfa Ahicam ñi fotüm. Gabaón mu Johanán entufi ca yefi pu huentru, pu hueichafe, pu domo, pu pichiqueche ca pu che cüdauquelu ülmen ruca mu. 17 Amuingün ca umapuingün Kimham ñi umañtuhue, püllelelu Belén mu. Ayüfuingün ñi amuleal ñi rüpü ca puhual Egipto mu, 18 llicaquefilu cai engün pu Caldea che. Llicai engün Ismael langümfilu cai ta Guedalías, feichi huentru ñi dulliel Babilonia ñi lonco ülmen tañi loncoleal ti troquiñ mapu. Ismael fei ta Netanías ñi fotüm. Guedalías fei ta Ahicam ñi fotüm.