Jeremías

40 Nebuzaradán, ti loncolechi soltau, elufi* ta Jeremías ñi tripatual Ramá huaria mu, fei lifrenentufi. Fei hula Jeremías llohui Chau Jehová ñi dungun. Tiye mu trarilen yengefui. Jeremías mülerquefui quiñentrür pu Jerusalén che ca pu Judá che, tüfa tati pu che entungelu tañi mapu mu ñi yengetual Babilonia mu. 2 Fei ti loncolechi soltau huichunentufi ta Jeremías ca feipifi: “Tami Chau Ngünechen Jehová feipicünui ñi huesalcangeal tüfachi mapu. 3 Eimün culpaimün* Chau Jehová mu ca inalaimün tañi feipin. Feimu Jehová cüpali ti huesa dungu chumngechi tañi feipicünun. Feimu femngechi rupaimün. 4 Fachantü entuñmayayu tati cadena trarilelu tami cuhu mu, cümelu troquifilmi, compañaen Babilonia mu. Cüpange, iñche cuidayayu. Huelu ayünolmi tayu amual Babilonia mu, amulayaimi. Cheu rume amuafuimi ti mapu mu. Amunge cheu tami ayünieel”.

5 Petu ñi amutunon Jeremías, Nebuzaradán feipieyu: “Huiñotunge cheu ñi mülen Guedalías, tüfa Ahicam ñi fotüm, Safán ñi fotüm. Babilonia ñi lonco ülmen elfalcünufi feichi huentru ñi loncoleal Judá ñi fillque huaria. Guedalías engu mülenagnge rangi pu che mu, cam amuaimi chi cheu tami ayünieel”.

Fei hula ti loncolechi soltau elufi ta iyael ca quiñe regalo, fei elufi ñi amutual. 6 Feimu Jeremías amui Mizpá huaria mu, cheu ñi mülen Guedalías, Ahicam ñi fotüm. Mülenagi Guedalías engu quiñentrür pu che mülehuelu mapu mu.

7 Rupachi antü, com pu loncolechi soltau mülefui lelfün mu quiñentrür tañi pu hueichafe engün.* Tüfa engün allcüingün Babilonia ñi lonco ülmen tañi elfalcünufiel Guedalías, Ahicam ñi fotüm, tañi loncoleal mapu mu. Ca allcüingün ñi elfalcünulelngen Guedalías pu che doi pofrelelu mapu mu, pu huentru, pu domo ca pu pichiqueche, tüfa tati pu yengenolu Babilonia mu. 8 Feimu Mizpá huaria mu pemefingün ta Guedalías. Amui Ismael, tüfa Netanías ñi fotüm, Johanán ca Jonatán, tüfa engu Caréah ñi fotüm, Seraya, tüfa Tanhúmet ñi fotüm, Efái ñi pu fotüm, tüfa ti Netofá che, ca Jezanías, ti Maacat che ñi fotüm. Ca compañeyu engün tañi pu hueichafe. 9 Guedalías, Ahicam ñi fotüm, Safán ñi fotüm, eldungucünufi tüfachi pu huentru ca tañi pu hueichafe. Feipifi engün: “Llicalayaimün tamün cüdahuelafiel pu Caldea che. Mülenagaimün tüfachi mapu mu ca serfiafimün Babilonia ñi lonco ülmen, fei cüme feleaimün. 10 Huelu iñche mülenagan Mizpá huaria mu, femngechi tamün dunguñpeafiel cüpale pu Caldea che. Huelu eimün mülei tamün ngülümal pulcu, hualüng fün ca aceite, fei metahue mu trapümafimün. Mülenagaimün ti huaria cheu tamün mülen”.

11 Com pu judio che mülelu Moab, Ammón, Edom ca caquelu mapu mu allcüingün ñi femün Babilonia ñi lonco ülmen. Tüfa elcünufi quiñeque che Judá mapu mu ca elfalcünufi Guedalías ñi loncoleal feichi pu che mu. Guedalías, tüfa Ahicam ñi fotüm, Safán ñi fotüm. 12 Feimu com pu judio che eluhuingün ñi tripatual ti mapu mu cheu tañi yengeel. Fei cüpaingün Judá mapu mu, cheu ñi mülen Guedalías, Mizpá huaria mu. Ngülümingün fentren pulcu ca hualüng fün.

13 Johanán, tüfa Caréah ñi fotüm, ca com pu loncolechi soltau mülelu lelfün mu pepafingün Guedalías, Mizpá huaria mu. 14 Fei feipifingün: “¿Quimlaimi ñi chumün Baalís, pu Ammón che ñi lonco ülmen? ¿Quimlaimi ñi huercüfiel ta Ismael, Netanías ñi fotüm, tami langümaeteu?”. Huelu Guedalías, Ahicam ñi fotüm, feyentulaeyu.

15 Fei hula Mizpá huaria mu Johanán, Caréah ñi fotüm, ellcanquechi* feipifi ta Guedalías: “Ayünien ñi amual tañi langümafiel Ismael, Netanías ñi fotüm. Inei no rume quimlayai. ¿Chumngelu* mülei tami langümaeteu? ¿Chemu com pu Judá che trahupalu eimi mu mülei tañi fill püle amual? ¿Chumngelu mülei ñi ngehuenoal pu mülehuechi Judá che?”. 16 Huelu Guedalías, Ahicam ñi fotüm, feipifi ta Johanán, tüfa Caréah ñi fotüm: “Femlayaimi. Tami feipimequen Ismael mu re coila tati”.