Jeremías

43 Fei Jeremías fentecünui ñi feipifiel pu che com tañi feipin Jehová, fei engün tañi Chau Ngünechen. Feipifi engün com tañi feipifaleteu Jehová, fei engün ñi Chau Ngünechen. 2 Fei hula Azarías, tüfa Hosaya ñi fotüm, Johanán, tüfa Caréah ñi fotüm, ca com caquelu mallma huentru feipifingün ta Jeremías: “¡Tami feipimequen re coila tati! Taiñ Chau Ngünechen Jehová huercülaeimu tami feipial ‘Amulayaimün tamün mülepual Egipto mu’. 3 Feichi huentru Baruc, feita Nerías ñi fotüm, ngüchaltucueimu tami caiñetumuafiel, femngechi taiñ huehuaeteu pu Caldea che, taiñ langümngeal cam taiñ yengeal cañpüle, Babilonia mu”.

4 Femngechi Johanán, feita Caréah ñi fotüm, com pu loncolechi hueichafe* ca com pu che inalafingün Chau Jehová ñi dungun ca mülenaglaingün Judá mapu mu. 5 Huelu mai, Johanán, feita Caréah ñi fotüm, ca com pu loncolechi hueichafe yetufingün pu mülehuechi Judá che, feichi pu che ñi yengefel huall püle fillque troquiñche mu, huelu huiñotuingün Judá mapu mu tañi mülenagal. 6 Yetufingün pu huentru, pu domo, pu pichiqueche, ti lonco ülmen ñi pu ñahue, com pu che ñi elcünulelfiel Nebuzaradán ta Guedalías, ca yetufingün Chau Ngünechen ñi huerquen Jeremías pingelu ca Baruc, feita Nerías ñi fotüm. Nebuzaradán loncolefui pu soltau. Guedalías fei ta Ahicam ñi fotüm, Safán ñi fotüm. 7 Inalafingün Chau Jehová ñi dungu, feimu conpuingün Egipto mapu mu ca puhuingün Tahpanhés huaria mu.

8 Fei hula Tahpanhés huaria mu Jeremías llohui Chau Jehová ñi dungun. Feipingei: 9 “Nüfinge fütraque cura ca tucuafimi cemento mu. Femnge tüfa cheu ñi mülen ti terraza deumangelu ladrillo mu, conhue püle ti faraon ñi ruca Tahpanhés huaria mu. Femaimi pu judio huentru ñi adquiñ mu. 10 Fei hula feipiafimi engün: ‘Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: “Mütrümfalafiñ* Nabucodonosor,* Babilonia ñi lonco ülmen, iñche tañi cüdaufe. Tucuan tañi ülmen huancu huente tüfachi cura iñche tañi tacuel, ca huente cura mu Nabucodonosor tucuai tañi afmatufal tolto ruca.* 11 Fei cüpayai ca lefcontuafi Egipto mapu. Quiñeque che layai huesa cutran mu. Quiñeque che presuyengeai. Ca quiñeque che layai fütra cuchillo mu. 12 Iñche cütraltuafiñ cheu ñi poyengequen Egipto ñi pu dios. Cafei Nabucodonosor lüpümafi feichi pu dios, fei cañpüle yetuafi. Chumngechi quiñe camañfe* tacuuquei tañi macuñ mu, ca femngechi Nabucodonosor tacuhuai reque Egipto mapu mu. Fei ñi chumngenon rume* tripayai. 13 Fei teifücayafi ti huitracünuelchi cura poyengequelu, mülelu Bet-Semes huaria* Egipto mapu mu, fei cütraltuafi cheu ñi poyengequen Egipto ñi pu dios”’”.