Jeremías

44 Jeremías feipingei chem tañi feipiafiel com pu judio mülelu Egipto mapu mu, pu che mülelu Migdol, Tahpanhés, Nof ca Patrós mapu mu. Tüfachi dungu feipingei: 2 “Tüfa ñi feipin Jehová, Ñidolcülelu pu hueichafe mu,* Israel ñi Chau Ngünechen: ‘Eimün pefimün com ti huesa dungu ñi huercüfiel ta Jerusalén ca Judá ñi fillque huaria. Feula teifücalehuei ca ngehuelai che üye mu. 3 Tüfachi dungu rupai fente tañi huesa femün engün tañi illculcayaeteu.* Chalintuculelfingün ca serfifingün caquelu dios tañi quimnofiel, eimün ca tamün cuifiqueche ca quimlafimün. 4 Iñche fentren rupa huercülelfiñ tañi pu cüdaufe, tañi pu huerquen, fei ñi feipiafiel: “Fürenemuchi, femlayaimün feichi ünufal dungu tañi üdequefiel”. 5 Huelu fei engün allcütulaingün ca inalaingün tañi dungu ca elcünulaingün tañi huesa femün. Amuleingün ñi chalintuculelfiel caquelu dios. 6 Feimu pengelün tañi fütra illcun, fei cütral reque üyi* tañi illcun Judá ñi fillque huaria ca Jerusalén ñi rüpü püle. Feimu fanten mu huellilehuetui ca teifücalehuei’.

7 Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘¿Chumngelu* rumeñma huesalcahuimün? Tamün femün mu laquei com pu Judá huentru, pu domo, pu pichiqueche ca pu pichiche, fei ngehuelai che eimün mu, ¿chemu femngechi femimün? 8 ¿Chumngelu illculcamun tamün femün mu? Egipto mapu mu cheu tamün mülepun chalintuculelfimün caquelu dios. Eimün layaimün, fei com troquiñche mapu meu malisiangeaimün ca lucatungeaimün.* 9 ¿Deu ngoimaimün* fente tañi huesa femün tamün pu cuifiqueche ca Judá ñi pu lonco ülmen ca tañi pu domo engün? ¿Deu ngoimaimün eimün ca tamün pu domo ñi huesa femün? Huesaque dungu ñi femngen Judá mapu mu ca Jerusalén ñi rüpü püle. 10 Fantepu meu fei engün illamcaulai ca yamlaeneu.* Cafei inalaingün tañi ley dungu ca tañi huercün dungu ñi elufiel ta eimün ca tamün pu cuifiqueche’.

11 Feimu tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘Rüf huercüleluhuaiñ quiñe huesa dungu ca apümcayafiñ com pu Judá che. 12 Cafei nüafiñ pu mülehuechi Judá che, tüfa pu cüpa amulu ñi mülepual Egipto mapu mu. Com layaingün Egipto mapu meu. Fütra cuchillo ca ngüñün mu layaingün, pu illamcangelu ca pu doi falin che, com layaingün fütra cuchillo ca ngüñün mu. Fei malisiangeaingün, pu che llicayai tañi femngen mu engün, illamcangeaingün ca lucatungeaingün. 13 Castigayafiñ pu che mülelu Egipto mapu mu chumngechi castigafiñ pu Jerusalén che, fütra cuchillo, ngüñün ca cutran mu. 14 Ca pu mülehuechi Judá che amulu ñi mülepual Egipto mapu mu montulayaingün ca mongetripalayaingün. Pepi huiñotulayaingün Judá mapu mu. Ayüafuingün ñi huiñotual tiye mu, huelu huiñolayaingün. Pichin che müten mongetripayai’”.

15 Com pu huentru quimnielu tañi pu domo ñi chalintuculelfiel caquelu dios ca com pu domo huitralelu tiye mu, quiñe fütra troquiñchengefui, ca mülefui com pu che mülepulu Egipto mapu mu ca Patrós mu. Tüfa engün feipifingün ta Jeremías: 16 “Inalayafiyiñ chem tami feipimufiel Jehová ñi üi mu. 17 Huelu mai, huechurpuaiñ com taiñ feipiel: chalintuculelafiyiñ ti diosa Huenu ñi Ülmen Domo* pingelu ca eluafiyiñ hutrulngeelchi* chalintucun.* Femngechi dungu femiyiñ iñchiñ, taiñ pu cuifiqueche, taiñ pu lonco ülmen ca taiñ pu principe Judá ñi fillque huaria mu ca Jerusalén ñi rüpü püle. Feichi mu tuduamquefuiñ cofque mu ca itrocom niefuiñ. Ca chem huesa dungu no rume pequelafuiñ. 18 Fentecünuiñ taiñ chalintuculelafiel ti diosa Huenu ñi Ülmen Domo pingelu ca taiñ eluafiel hutrulngeelchi chalintucun, feimu itrocom niehuelaiñ ca taiñ pu che lai fütra cuchillo ca ngüñün mu”.

19 Pu domo ca feipingün: “Iñchiñ chalintuculelquefuiñ ti diosa Huenu ñi Ülmen Domo ca elelquefuiñ hutrulngeelchi chalintucun. Deumalelquefuiñ chalintucun cofque nielu quisu tañi adentun* ca elelquefuiñ hutrulngeelchi chalintucun. Huelu taiñ pu füta elueiñmu* taiñ femngechi femal”.

20 Fei hula Jeremías feipifi com pu che, pu huentru ca tañi domo engün, ca com pu che tañi dungumequeteu: 21 “Judá tañi fillque huaria ca Jerusalén ñi rüpü püle hulimün chalintucun, cafei tamün pu cuifiqueche, tamün pu lonco ülmen, tamün pu principe ca tati pu che. ¡Chau Jehová loncontucui ca quimtucui tamün femün! 22 Huelu af meu, Jehová afeluhui tamün huesaque femün ca tamün ünufal dungu mu. Feimu apümcangetui ca llicafalngetui tamün mapu, malisiangei ca ngehuelai che, chumngechi ñi felen fachantü. 23 Eimün hulimün feichi chalintucun ca culpaimün* Jehová mu. Allcütulaimün Chau Jehová ñi dungu ca inalaimün tañi ley dungu, tañi huercün dungu ca tañi ngülam. Feimu contupaeimünmu tüfachi rume huesa dungu, chumngechi pengequei fachantü”.

24 Jeremías amulei ñi feipifiel com pu che ca com pu domo: “Com eimün, pu Judá che mülelu Egipto mapu mu, allcütuafimün Chau Jehová ñi dungu. 25 Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘Eimün ca tamün pu domo eldungucünuimün ca huechurpuimün tamün feipin. Eimün feipimün: “Huechurpuaiñ llemai taiñ eldungucünuel, chalintuculelafiyiñ ti diosa Huenu ñi Ülmen Domo pingelu ca eluafiyiñ hutrulngeelchi chalintucun”. Eimün, pu domo, huechurpuaimün tamün eldungucünuel ca femaimün tamün feipin’.

26 Feimu, com eimün, pu Judá che mülelu Egipto mapu mu, allcütuafimün Chau Jehová ñi dungu: ‘Chau Jehová feipi: “Iñche tañi fütra üi mu eldungucünun: quiñe Judá huentru no rume com Egipto mapu mu huiño eldungucünulayai iñche tañi üi mu ca feipilayai: ‘¡Taiñ mongelechi Doi Fütra Ñidol Jehová tañi üi mu!’. 27 Iñche cüme leliniefiñ engün tañi huercülelafiel huesaque dungu, cümeque dungu no. Com pu Judá huentru mülelu Egipto mapu mu layaingün fütra cuchillo ca ngüñün mu, fei ngehuelayai engün. 28 Pichin che müten langümngelayai fütra cuchillo mu ca tripayaingün Egipto mapu mu, fei ñi huiñotual Judá mapu. ¡Com pu mülehuechi Judá che mülepalu Egipto mapu mu quimai chem dungu ñi femtripan: iñche tañi dungun cam fei engün tañi dungun!”’”.

29 “Chau Jehová feipi: ‘Iñche eluhuaiñ quiñe pengelün dungu, femngechi quimaimün iñche tamün castigayaeteu tüfachi mapu mu ca tañi rüf femtripayal ti huesaque dungu tamün feipicünufiel. 30 Tüfa ñi feipin Jehová: “Hultucuan ti faraon Hofrá, tüfa Egipto ñi lonco ülmen, tañi huehuaeteu ñi pu caiñe ca tañi pu cüpa langümaeteu. Hultucuan chumngechi hultucufiñ Sedequías, Judá ñi lonco ülmen, tañi huehuaeteu Nabucodonosor,* Babilonia ñi lonco ülmen. Nabucodonosor caiñetuquefui ta Sedequías ca ayüfui ñi langümaeteu”’”.