Jeremías
49 Tüfa ñi feipifiel Chau Jehová pu Ammón che:
“Israel, ¿nielai fotüm?
¿Nielai inei ñi ngen-ngeal tañi nieel?
¿Chumngelu* Malcam* ngünenietufi ta Gad?
¿Chemu tañi pu che mülei Israel tañi fillque huaria mu?”.
2 “Chau Jehová feipi: ‘Feimu, allcütumün, püllelepai ta antü,
ca iñche tañi pin mu allcüngeai ñi cüpalen ta hueichan.*
Hueichangeai ta Rabá, pu Ammón che ñi huaria.
Fei teifücangeai
ca cütraltungeai tañi püllelechi huaria’.
‘Israel müntuñmayafi* tañi nieel tañi pu malocontueteu’ pi Chau Jehová.
3 ‘¡Ahuem, Hesbón, ngümange! ¡Hai apümcangei!
Ahuem, Rabá ñi püllelechi huaria, huiraraimün.
Tucuaimün sacu tacun.*
Ngümamün ca fillque cura malal mu* huall püle lefaimün.
Malcam cañpüle yengeai,
cafei tañi pu sacerdote ca tañi pu principe engün.
4 Ahuem, ngünefalngenochi ñahue,* ¿chumngelu mallmahuimi tami fillque laf mapu mu,*
tami narfülechi laf mapu meu?
Maneluhuimi tami falinque fillem mu
ca feipimi: “¿Inei chaftupayaeneu?”’”.
5 “‘Huercülelayu quiñe rume huesa dungu’ pi ti Doi Fütra Ñidol Jehová, Ñidolcülelu pu hueichafe mu.
‘Com pu che tami hualloñmanieteu* rume huesalcayaimu.
Eimün huall püle puhuaimün,
ca inei no rume trahul-layafi pu lefmaulu’”.
6 “‘Huelu fei hula iñche trahulafiñ pu Ammón che cañpüle yengelu’ pi Chau Jehová”.
7 Chau Jehová, Ñidolcülelu pu hueichafe mu, feipifi pu Edom che:
“¿Ngehuelai quimün Temán mu?
Pu adümquelu, ¿niehuelai cümeque ngülam?
¿Funapei mai tañi quimün engün?
8 ¡Huiñotumün, lefmaumün!
¡Ahuem, pu Dedán che, amumün ca müleaimün nag mapu püle!
Puule ti antü iñche ñi castigayafiel ta Esaú,
huercülelafiñ quiñe huesa dungu.
9 Eimi mu cüpale pu cosechaquelu ofad,
fei engün ¿elcünupeafui mai ofad tañi ñimitual* pu che?
Pun meu cüpale hueñefe,
huesalcayafui, huelu tunte* tañi ayünieel müten.
10 Huelu iñche triltrangcünuafiñ ta Esaú.
Quimfalcünuan cheu tañi ellcauquen,*
femngechi tañi ellcaunoal.
Tañi pu yall,* tañi pu peñi ca tañi pu carucatu, com apümcangeaingün.
Esaú ngehuelayai.
11 Elcünunge tami pu cuñifall,
iñche mongelnieafiñ engün,
ca tami pu lantu domo maneluhuai iñche mu”.
12 Tüfa ñi feipin Chau Jehová: “Putule* ti copa pu che condenangenolu ñi putual, fei ¿eimi mülei tami castigangenoal? Rüf castigangeaimi, putuaimi tati”.
13 Chau Jehová feipi: “Iñche tañi üi mu feipicünun,* pu che llicayai tañi femngen ta Bozrá. Cafei Bozrá lucatungeai,* apümcangeai ca malisiangeai. Com tañi fillque huaria teifücalehueai rumel mu”.
14 Allcün quiñe dungu Jehová mu cüpalu
ca huercüngei quiñe huerquen ñi feipiafiel pu troquiñche:
“Trahuluhuaimün ca lefcontuafimün.
Pepicahuaimün tamün hueichayal”.
15 “Iñche femcünueyu tami illamcangeal fillque troquiñche mu,
pu che illamcaeimu.
16 Llicalcaquefuimi ta caquelu, feimu quisu ngünencahuimi
tami mallma piuquengen mu,
ahuem, eimi mülelu fütra cura ñi ellcaupeyüm.
Müleimi doi fütra huincul mu.
17 “Pu che llicayai tañi femngen ta Edom. Com pu rupalu tiye mu adquintunieai, fei afmatulehueaingün ca huiqueñhuiqueñai engün* com tañi cutrancahun mu. 18 Chumngechi apümcangei Sodoma, Gomorra ca tañi püllelechi huaria, ngehuelayai che Edom mu. Quiñe huentru no rume mülenaglayai üyeu” pi Chau Jehová.
19 ¡Ngüneduamaimün! Quiñe che pürayai cheu ñi mülen pu ufisa, fei trürümngeai trapial reque tripalu Jordán ñi fütraque mahuida mu. Huelu feica müten, iñche tañi pin mu, fei lefmahuai feichi mapu meu ca iñche dullian inei ñi loncoleal feichi mapu mu. ¿Inei am trürcülei iñche mu? ¿Inei caiñetuaeneu? ¿Chem camañfe* chaftuafeneu? 20 Feimu pu huentru allcütumün, chem ñi dulliel* Jehová tañi caiñetuafiel ta Edom ca chem raquiduamtucui ñi femafiel pu Temán che:
Pu ufisa ñi coñi huingüdcülen yengeai.
Cheu tañi mülen huelliletuai fei engün tañi duam mu.
21 Tranlu, fei trününi. Nüyüi* ti mapu.
¡Allcün-ngei ñi huirarün pu che!
Ti huirarün allcün-ngei Quelü lafquen püle.
22 ¡Ngüneduamaimün! Quiñe ñamcu reque pürayai ca nagpayai ñi nüal chem tañi iyal,
fei ünifcünuai reque* tañi müpü huente Bozrá mu.
Feichi antü pu Edom hueichafe ñi piuque
trürai quiñe domo ñi piuque reque choyümequelu ñi püñeñ”.
23 Tüfa tañi feipingeel pu Damasco che:
“Hamat ca Arpad yehuelcangei
tati huesaque dungu mu ñi allcüel engu.
Rume llicaleingu.
Ti lafquen illculei* ca pepi tüngnaglai.
24 Damasco llicalei.*
Huiñotui ca lefmahui, huelu rumeñma llicalei.
Hueñancülei ca cutrancaucülei
quiñe domo reque choyümequelu tañi püñeñ.
25 ¿Chumngelu ti afmatufal huaria elcünungelai,
ti huaria cheu ñi mülen ayühun?
26 Plaza mu trananagai tañi pu huechequeche.
Feichi antü layai com tañi pu hueichafe” pi Chau Jehová, Ñidolcülelu pu hueichafe mu.
27 “Lüpümafiñ Damasco ñi fütra cura malal,*
ti cütral lüpümafi Ben-Hadad ñi nehuen-ngechi adquintuhue”.
28 Chau Jehová feipifi pu Quedar che ca Hazor ñi pu gobierno. Feichi gobierno ñi huehuel Nabucodonosor,* Babilonia ñi lonco ülmen. Feipingei engün:
“Amumün, pürayaimün Quedar mu
ca apümcayafimün pu che mülelu tripahue antü püle.
29 Müntuñmangeai engün tañi tolto ruca* ca tañi quechan culliñ,
tañi pañu tolto ruca ca com tañi nieel.
Yeñmangeai engün tañi pu camello
ca huirarelngeai: ‘¡Huall püle llicalei pu che!’”.
30 “¡Lefmaumün, camapu amuaimün!
Ahuem, pu Hazor che, amumün ca müleaimün nag mapu püle” pi Chau Jehová
“Nabucodonosor,* Babilonia ñi lonco ülmen, adcünui quiñe dungu tamün caiñetuaeteu,
ca pepicai chumngechi tamün lefcontuaeteu”.
31 “¡Amumün, pürayaimün! ¡Lefcontuafimün ti troquiñche cüme felelu,
tüngcülen mongelelu!”* pi Jehová.
“Nielaingün puerta ca tranca,* quisuleingün.
32 Müntuñmangeai engün tañi pu camello,
ca tañi fentren culliñ.
Iñche tañi pin mu fill püle puhuai
com pu catrüquelu tañi cal lonco inafül tol püle
ca tañi cutrancahun fill püle cüpayai” pi Chau Jehová.
33 “Cheu ñi ellcahual auca trehua* feletuai Hazor,
huelliletuai rumel mu.
Ngehuelayai che tiye mu.
Ca quiñe huentru no rume mülenaglayai üyeu”.
34 Ellaconlu ñi ngünenieal Sedequías, Judá ñi lonco ülmen, ti huerquen Jeremías llohui Chau Jehová ñi dungun. Feipingei Elam mu: 35 “Tüfa ñi feipin Chau Jehová, Ñidolcülelu pu hueichafe mu: ‘Trafoafiñ Elam ñi arco, tüfa tañi nehuen fel. 36 Huercülelafiñ ta Elam ti 4 cürüf cüpalu 4 huitran mapu püle* ca huall püle cürüf mu yeafiñ engün. Ngehuelayai quiñe troquiñche cheu tañi amunoal pu Elam che’”.
37 “Apümcayafiñ pu Elam che tañi pu caiñe ñi adquiñ mu ca tañi pu cüpa langümaeteu ñi adquiñ mu. Huercülelafiñ quiñe cutrancahun, tañi fütra illcun” pi Chau Jehová. “Cafei iñche tañi pin mu inantucungeai engün fütra cuchillo mu, fei apümcangeaingün”.
38 “Tucuan tañi ülmen huancu Elam mu ca apümcayafiñ tañi lonco ülmen ca tañi pu principe” pi Chau Jehová.
39 “Huelu trahulafiñ pu Elam che presuyengelu afaelchi antü mu” pi Chau Jehová.