Jeremías
48 Jehová, Ñidolcülelu pu hueichafe mu,* Israel ñi Chau Ngünechen, feipi chem ñi rupayal pu Moab che. Feipi:
“¡Aungei ta Nebo! ¡Apümcangei!
Quiryataim yehuelcangei ca hueungei.
Yehuelcangei ca apümcangei cheu ñi ellcauquen che.*
2 Inei no rume saquihuelafi ta Moab.
Hesbón mu pu caiñe quiñehuingün tañi huehuafiel:
‘Cüpamün, apümcayafiyiñ ñi ngehuenoal tüfachi troquiñche’.
Ahuem, Madmén, inantucueimu ti fütra cuchillo,
feimu ca ñücüfcülenge.*
3 Horonaim püle allcüngequei ñi huirarün pu che,
apümcangei ca com teifücangei.
4 Moab teifücangei.
Tañi pu pichiqueche huiraringün tañi ngüman.
5 Pu che af ngümalai petu ñi püralen Luhit mu.
Ti rüpü nagcülepalu Horonaim püle allcüngei ñi huirarün pu che, cutrancaucülei engün ti apümcan dungu mu.
6 ¡Lefmahuaimün tamün mongetripayal!
Huellin mapu* mülechi enebro anümca reque feleaimün.
7 Eimi maneluuqueimi tami femün ca tami falinque fillem mu,
feimu ca hueungeaimi.
Tami dios Kemós cañpüle yengeai,
quiñentrür tañi pu sacerdote ca tañi pu principe engün.
8 Ti apümcaquelu lefcontuafi com ti huaria,
quiñe no rume montulayai.
Ti nag mapu layai
ca ti laf mapu* apümcangeai, chumngechi feipi Jehová.
9 Marcacünungepe ti rüpü amulelu Moab mu.
Fei apümcangele, lefmahuai
ca llicafalngeai tañi fillque huaria,
fei ngehuelayai che.
10 ¡Malisiangepe ti che femlu Chau Jehová ñi piel huesa duam mu!
¡Malisiangepe ti che pinolu ñi langümcheal tañi fütra cuchillo mu!
11 Petu ñi huechengen pu Moab che ca fantepu mu cüme duamcüleingün.
Trüri engün ti pulcu reque elcünungelu tañi llid engu.*
Tucungelai cangelu metahue mu
ca turpu cañpüle yengelai.
Feimu doi cüme pulcungetulai engün,
ca tañi nümün felecai müten.
12 ‘Feimu, püllelepai ta antü, fei huercüafiñ huentru tañi huaichüfrulpayafiel engün’ pi Chau Jehová. ‘Huaichüfafingün ca huellimafingün tañi metahue, fei trafocayafingün tañi fütraque meseng.* 13 Pu Moab che yehueleai Kemós ñi duam mu, chumngechi pu Israel che yehueleingün Betel ñi duam mu, tüfa tañi maneluhun fel.
14 Eimün feipimün: “Nehuen-ngechi hueichafengeiñ, pepicaucüleiñ taiñ hueichayal”, ¿yehuelaimün tamün feipial tüfa?’.
15 ‘Moab apümcangei,
lefcontungei tañi fillque huaria,
ca langümngei tañi pu doi nehuen-ngechi huechequeche’
pi ti Lonco Ülmen, Jehová pingelu, Ñidolcülelu pu hueichafe mu.
16 Pichin antü mu apümcangeai pu Moab che.
Püllelei tañi hueungeal.
17 Pu che huallmaniefilu* cutranpiuqueyeayu,
com pu che quimnielu tañi üi engün.
Feipiafimün: ‘¡Ngüneduamaimün chumngechi ñi trafon ti nehuen-ngechi fara, ti ayüfal retrü!’.
18 Quisu saquiuhuelayaimi
ca huihulen anünge, ahuem, Dibón ñi ñahue.
Ti apümcaquefilu Moab caiñetupaeimu
ca teifücayafi tami fütraque cura malal.*
19 Aroer che huitracünuunge ina rüpü mu ca ngüneduamnge.
Ramtuafimi ti huentru ca ti domo lefmaumequelu: ‘¿Chem rupai?’.
20 Moab yehuelcangei ca rume llicalei.
Ngümayaimün ca huiraraimün.
Arnón mu huldunguaimün: Moab apümcangei.
21 Puhui tañi juiciantucungeal ti laf mapu, Holón, Jáhaz ca Mefaat. 22 Ca juiciantucungeai Dibón, Nebo, Bet-Diblataim, 23 Quiryataim, Bet-Gamul, Bet-Meón, 24 Queriyot, Bozrá ca com ti fillque huaria mülelu Moab mapu mu, tati camapulelu ca tati püllelelu.
25 ‘Pu caiñe ñi duam mu nehuen-ngehuelai Moab,
huatrongei* tañi lipang’ pi Chau Jehová.
26 ‘Ngollilafimün ta Moab, tüfa mallmahui, fei chaftufi ta Chau Jehová.
Ümülcaumequei tañi rapin mu
ca ayentungei.
27 Eimi ayentufimi ta Israel,
dunguyefimi ca nengümnengümtuimi tami lonco,
fei ¿pefimi mai Israel rangi pu hueñefe engün?
28 Pu Moab che, elcünumün fillque huaria ca mülenagaimün fütraque cura mu,
paloma reque feleaimün nielu tañi dañe* lil mu’”.
29 “Allcüiñ ñi rume mallmangen Moab. Rume trencül piuquengei.*
Quimcahun-ngei, doicülelu troquiuquei ca rume mallma piuquengei”.
30 “‘Quimnien tañi illcufe chengen’* pi Chau Jehová,
‘huelu falilai tañi feipin, huechutripalayai.
Fei engün chem no rume femlayai.
31 Feimu ngümayeafiñ ta Moab.
Huiraran com pu Moab che ñi duam mu
ca eyütuan pu Quir-Heres huentru ñi duam mu.
32 Iñche ngümafiñ ta Jazer
huelu doi ngümayan eimi tami duam mu, ahuem, Sibmá, anümca ofad reque felelu.
Tami fütraque choyün* rumei lafquen mu.
Puhui lafquen mu, Jazer huaria mu.
Ti caiñe apümcaeimu
tami hualüng fün ca tami cosecha ofad.
33 Ti tucucahue ca Moab mapu mu
ngehuelai rume ayühun.
Iñche tañi pin mu, cheu ñi cütrüngequen ofad, tripalai pulcu.
Inei no rume ayühunquechi huirarlayai petu pünocafilu ofad.
Ca dungu mu huirarai pu che’”.
34 “‘Hesbón puulu Elealé püle allcüngei quiñe huirarün.
Jáhaz püle allcüngei ñi nehuentu dungun,
cafei Zóar mu puulu Horonaim ca Eglat-Selisiyá püle.
Ca com arcüai* Nimrim ñi co.
35 Iñche tañi pin mu ngehuelayai Moab mu
pu yequelu chalintucun* ngillatuhue mu
ca pu chalintucuquefilu tañi pu dios’ pi Chau Jehová.
36 ‘Feimu quiñe flauta reque* eyütuai* tañi piuque Moab ñi duam mu,
quiñe flauta reque* eyütuai* tañi piuque pu Quir-Heres huentru ñi duam mu,
ngehuenoalu cai tañi falinque fillem ñi nierpuel.
37 Com ti lonco cupilcalei
ca cupilcalei com payun.
¡Catrücalei com tañi cuhu engün
ca yenieingün sacu tacun* cintura püle!’”.
38 “‘Com huente ruca püle Moab mu
ca com tañi plaza meu
re ngümamequei pu che.
Trafocafiñ ta Moab
quiñe metahue reque ütrüfentungelu’ pi Chau Jehová.
39 ‘¡Rume llicalei! ¡Ngümamün!
¡Yehuelen amutui Moab!
Moab ayentungei,
com tañi huallmanieteu rume llicalei tañi femngen mu’”.
40 “Tüfa tañi feipin Chau Jehová:
‘Quiñe ñamcu reque* nagpalu ñi nüal chem tañi iyal,
pu caiñe ünifcünuai reque* tañi müpü huente Moab mu.
41 Pu huaria hueungeai
ca tañi fütraque cura malal nüngeai.
Feichi antü pu Moab hueichafe ñi piuque
trürai quiñe domo ñi piuque reque choyümequelu ñi püñeñ’”.
42 “‘Moab mallmahui, fei chaftufi ta Chau Jehová,
feimu apümcangeai, ngehuelayai tüfachi troquiñche.
43 Ahuem, Moab che, eimi tami adquiñ mu
mülei llican, quiñe lolo ca quiñe huachi’ pi Chau Jehová.
44 ‘Inei rume lefmaule ñi llicahuenoal, tranaconai lolo meu.
Fei inei rume tripale lolo mu, tranaconai huachi mu’.
‘Iñche tañi pin mu puhuai ti tripantu ñi castigangeal Moab’ pi Chau Jehová.
45 ‘Pu lefmaulu Hesbón mu tañi cuñiutucungeal, quellungelayai.
Hesbón mu tripayai quiñe cütral
ca rangiñ Sehón mu tripayai hueihuiñ cütral.*
Tüfa lüpümafi Moab tañi tol
ca pu quehuafe soltau ñi foro lonco’.*
46 ‘Ahuem, Moab, aungeimi eimi!
Kemós ñi troquiñche ngehuelai.
Tami pu fotüm presuyengei
ca tami pu ñahue cañpüle yengei.
47 Huelu trahulafiñ pu Moab che presuyengelu afaelchi antü mu’ pi Chau Jehová.
‘Tüfa mu fentepui ñi juiciangen ta Moab’”.