Maneluhuaiñ Jehová mu ñi cüme juzgacheal

 1. Chau Jehová, ¿chem cüme quimfalcünulelfi ta Abrahán?

¿ACORDAIMI feichi nütram ñi nieel Abrahán engu Jehová? Jehová, quiñe cüme püllü mu, feipifalfi Abrahán tañi apümcayafiel Sodoma ca Gomorra pingechi huaria. Abrahán maneluuquefui Jehová mu, huelu raquiduamcülehuei, feimu ramtufi: “¿Rüfcünu llemai trür apümcayafimi norngechi che huesaque che engu? [...] Eimi Juez ngeimi com mapu mu, fei ¿nor dungu femnoafulu am ta eimi?”. Fei Jehová cüme quimfalcünulelfi ta Abrahán turpu tañi apümcanoafiel norngechi che. Taiñ quimal tüfa rume yafültucuqueiñmu iñchiñ (Gén. 18:23-33).

 2. Jehová juzgafiel mu pu che, ¿chumngelu maneluhuafuiñ tañi femal nor dungu mu ca cutranpiuqueyen mu?

² Jehová juzgafiel mu pu che, ¿chumngelu maneluhuafuiñ tañi femal nor dungu mu ca cutranpiuqueyen mu? Chau Jehová quimniei chem ñi mülen ti pu che ñi “piuque mu” (1 Sam. 16:7). Biblia feipi Jehová ngüneduamquefi com pu che ñi piuque (1 Rey. 8:39; 1 Crón. 28:9). ¡Afmatufali! Jehová doi quimün-ngei ta iñchiñ mu, feimu iñchiñ quiñeque mu adümlayafuiñ chumngechi Jehová ñi juzgaquefiel quiñe che. Feimu ti apostol Pablo feipi Chau Jehová mu: “Pepi cüme adümngequelai tañi dulliel” (Rom. 11:33).

3, 4. Quiñeque mu, ¿chem ramtuhuafuiñ? Ca, ¿chem inaduamaiñ tüfachi troquiñ mu? (Juan 5:28, 29).

³ Quimliyiñ rume Jehová tañi norngen, ca raquiduamcüleafuiñ Abrahán reque. Fei ramtuhuafuiñ: “¿Huiñomongetupeafuingün mai Sodoma ca Gomorra mülechi pu che cam caquelu che Jehová tañi apümcafiel? ¿Ca huiñomongetuaingün chi huiñomongetule pu ‘norngenochi che’?” (Hech. 24:15).

⁴ Ca huiño nütramcayaiñ ti huiñomongetun mu. Pichi cuifi doi cüme quimfiyiñ inei engün am huiñomongetuai tañi llohual “rumel mongen”, ca inei engün am huiñomongetuai tañi ‘juiciantucungeal’ (papeltunge Juan 5:28, 29).a Doi cüme quimfilu am tüfachi dungu, feimu doi cüme entenderpuiñ caquelu dungu. Fei tüfachi troquiñ mu ca ti inalelu inaduamafiyiñ. Hunelu mu inaduamafiyiñ chem dungu quimlaiñ ca chem quimnieiñ Jehová ñi juzgachequen mu.

¿CHEM QUIMLAIÑ JEHOVÁ ÑI JUZGACHEQUEN MU?

 5. Cuifi, ¿chem raquiduamquefuiñ pu che mülequefulu Sodoma ca Gomorra mu?

⁵ Cuifi raquiduamquefuiñ pu norngenochi che Jehová tañi apümfiel, turpu huiñomongetulayaingün. Por ejemplo, Sodoma ca Gomorra mülechi pu che. Huelu ti quim manelfal cüdaufe doi cüme inaduamingün ti dungu ca rume llellipufingün ta Jehová. Cüme adümfingün ti dungu, feimu feipilayafuiñ tañi huiñomongetunoal engün feichi pu che. ¿Chumngelu am? Peafiyiñ.

 6. Jehová, ¿ca inei engün am apümcafi? Ca, ¿chem feipilai Biblia?

⁶ Ca peaiñ caquelu norngenochi che Jehová tañi apümcafiel. Por ejemplo, Fütra Mangin Co mu Jehová apümfi com che, huelu montulfi Noé ca tañi familia. Cafei Jehová feipifi pu Israel che ñi apümcayafiel com che mülelu ti Feipicünuelchi Mapu mu. Ca rupa, Jehová huercüfi quiñe cüme püllü ñi apümcayafiel quiñe pun mu 185.000 Asiria soltau (Gén. 7:23; Deut. 7:1-3; Is. 37:36, 37). Biblia feipilai Jehová tañi apümcafiel engün rumel mu, ca feipilai turpu tañi huiñomongetunoal engün. Doi cüme inaduamafiyiñ tüfa.

 7. ¿Chem quimlaiñ tati pu lalu ti Fütra Mangin Co ca tati pu Canaán che? (Inaduamnge ti adentun).

⁷ Quimlaiñ chem raquiduamquei Jehová caque quiñeque che ñi langümfiel. Quiñeque quimlafuingün chi ta Jehová, feimu nor raquiduamtulaingün chi. Biblia nütramcan mu tati Fütra Mangin Co ñi antü mu, feipi: “Noé amuldunguquefui Chau Dios ñi nor dungu” (2 Ped. 2:5). Huelu feipilai Noé ñi amuldungulelfiel caque quiñeque ta che feichi deumafilu ti fütra huampo ruca. Ca femngechi pu Canaán che, ¿com elungepeingün mai ñi quimafiel ta Jehová, fei ñi repentiuhual engün? Quimlaiñ.

 8. ¿Chem quimlaiñ pu che Sodoma ca Gomorra mu mülelu?

⁸ ¿Chem piafuiñ tati pu che mülelu Sodoma ca Gomorra mu? Quimniefuiñ ñi mülequefel quiñe norngechi huentru, Lot pingelu. Huelu quimlaiñ tañi com che tañi amuldungulelfiel. Fei mu mülequefui re huesaque che, huelu quimquelafuingün chi chem ñi cümen ca chem ñi cümenon. Biblia feipi “pichique huentru ca füchaqueche cütu” ayüfuingün ñi cudumafiel Lot ñi pu huitran (Gén. 19:4; 2 Ped. 2:7). Quimnieiñ Jehová ñi cutrantupiuqueyechequen, feimu ¿feipiafuiñ ñi huiñomongeltunoafiel com engün? Feipilayaiñ llemai. Jehová feipifi ta Abrahán ñi mülenon mari nor che no rume Sodoma huaria mu (Gén. 18:32). Feichi che norngelafuingün, feimu Jehová cümecünui tañi femfiel engün. Huelu feipilayafuiñ quiñe no rume ñi huiñomongetunoal engün huiñomongetule pu “norngenochi che”.

 9. Salomón mu, ¿chem quimlaiñ?

⁹ Biblia ca nütramcai quiñeque che norngefulu, huelu püntütripai Jehová mu. Quiñe tüfa, ti lonco ülmen Salomón. Quisu cüme quimniefui ta Jehová ca quimniefui chumngechi ñi poyeafiel, feimu Jehová rume cümelcaeyu. Huelu rupachi antü mu, poyerpufi coilaque dios. Tañi femün rume lladcülcafi ta Jehová ca huesalcafi tañi troquiñche fentren tripantu mu. Biblia feipi lalu ta Salomón: “Ürcütuaimi tami cuifique che yem engün” pingei. Ca femngechi feipingei ta David (1 Rey. 11:5-9, 43; 2 Rey. 23:13). Tañi feipingen mu Salomón, ¿huiñomongetuai piafuiñ? Biblia feipilai. Quiñeque che feipiafui tañi huiñomongetual Salomón, ¿chumngelu? Romanos 6:7 feipilu: “Tuchi lalu, rulpacünuñmangei ñi culpan”. Huelu feitachi texto feipilai com pu lalu felei ñi huiñomongetual. Re tañi lan mu müten huiñomongelngetulayai engün. Jehová quisu tañi duam mu llemai huiñomongeltuafi pu che fente ñi piuqueyeniefiel. Tüfa quiñe regalo reque felei (Job 14:13, 14; Juan 6:44). Fei, ¿huiñomongetupeai mai ta Salomón? Jehová müten quimniei, iñchiñ quimlaiñ. Huelu rüf quimnieiñ Jehová tañi femal norngechi dungu.

¿CHEM QUIMIYIÑ JEHOVÁ ÑI JUZGACHEQUEN MU?

10. Apümcafiel mu ta huesaque che, ¿chum duamquei ta Jehová? (Ezequiel 33:11; ca inaduamnge ti adentun).

¹⁰ (Papeltunge Ezequiel 33:11). Jehová feipieiñmu chum duamquei condenafiel mu quiñe che. Pedro ca femngechi feipi ñi huirintucuel ta Ezequiel. Feipi Chau Jehová “ayünielai ta inei no rume ñi apümcangeal” (2 Ped. 3:9). Feitachi dungu tüngduamelqueiñmu. Cüme quimnieiñ Jehová rumel apümcafemlayafi pu che chem mu rume. Quisu eluucülei ñi cutranpiuqueyecheal. Fei huiñomongeltunofile quiñe che, quisu quimniei chem mu tañi femnofiel.

11. ¿Inei engün huiñomongetulayai? ¿Chumngelu quimiyiñ?

¹¹ ¿Inei engün am quimnieiñ tañi huiñomongetunoal? Biblia feipi quiñeque che.b Por ejemplo, Jesús feipi Judas Iscariote ñi huiñomongetunoal (Mar. 14:21; ca ngüneduamnge Juan 17:12 ca ti nota de estudio huincadungun meu). Judas cüme quimniefui tañi caiñetufiel Jehová ca tañi Fotüm (ngüneduamnge Marcos 3:29 ca ti nota de estudio huincadungun meu). Jesús ca feipi tati pu loncolechi religioso tañi caiñetueteu huiñomongetulayai (Mat. 23:33; ngüneduamnge Juan 19:11 ca ti nota de estudio “del hombre” huincadungun mu). Pablo ca feipi pu apostata ñi huiñomongetunoal engün, tüfa caiñetuquefi Jehová ca tañi dungu ca repentiutulaingün (Heb. 6:4-8; 10:29).

12. Ñi rupan David engu Manasés mu, ¿chem quimeltueiñmu ñi cutranpiuqueyechen ta Jehová?

¹² Chumngechi ngüneduampeiñ, Jehová cutranpiuqueyechequei ca “ayünielai ta inei no rume ñi apümcangeal”. ¿Chumngechi cutranpiuqueyefi quiñeque che fütra culpalu? Ti lonco ülmen David cudumfi quiñe domo fütangelu ca langümfalfi tañi füta. Ñi femün ta David müna huesa dungu fel, huelu David nor raquiduamtui. Jehová cutrantupiuqueyeyu ca perdonaeyu (2 Sam. 12:1-13). Ti lonco ülmen Manasés epe com tañi mongen mu huesaque dungu femi, huelu Manasés repentiutui, fei Jehová cutranpiuqueyeyu ca perdonaeyu (2 Crón. 33:9-16). Tüfa pengeleiñmu Jehová rüf ayüniei ñi pengelal tañi cutrantupiuqueyechen. David Manasés engu am huiño raquiduamtulu engu, feimu Jehová huiñomongeltuayu.

13. 1) Jehová, ¿chem mu cutrantupiuqueyequefi pu Nínive che? 2) ¿Chem pi Jesús ti pu Nínive che mu?

¹³ Ca quimnieiñ Jehová ñi cutrantupiuqueyefiel pu Nínive che. Jehová feipifi ta Jonás: “Iñche ngüneduamün ñi rume huesa femmequen engün”. Huelu huiño raquiduamtulu engün, Jehová perdonaeyu. Huelu Jonás lladcüi. Jehová doi cutrantupiuqueyefi pu Nínive che, huelu Jonás femlai. Fei feipifi ta Jonás: “Quimlaingün rume chem ñi cümen ca chem ñi cümenon” (Jon. 1:1, 2; 3:10; 4:9-11). Jesús feipi pu Nínive che, repentiutulu am engün, huiñomongetuaingün “ramtucadungungele pu che” (Mat. 12:41). Femngechi quimfalcünui Jehová tañi norngen ca ñi cutranpiuqueyechequen.

14. Huiñomongetule pu Nínive che, ¿chem rupayaingün?

¹⁴ Biblia feipi pu Nínive che ñi huiñomongetual feichi antü “ramtucadungungele pu che”. ¿Chumül rupayai feitachi dungu? Jesús feipi cüpalechi antü mu ñi huiñomongetual quiñeque che “ñi juiciantucungeal” (Juan 5:29). Tüfa rupayai huaranca tripantu ñi ngünenietual ta Jesús. Feichi mu huiñomongetuai “pu norngechi che ca pu norngenochi che” (Hech. 24:15). Pu norngenochi che huiñomongetuai ñi juiciantucungeal engün. Huiñomongetule engün, Jehová engu Jesús inaduamüñmayafi ñi rüf inaniefiel tañi quimeltungeal cam ñi femnoal. Quiñe Nínive che huiñomongetule huelu pinole ñi poyeafiel ta Jehová, juiciantucungeai tañi langümngeal (Is. 65:20). Huelu com pu eluulu ñi poyeafiel ta Jehová, afnoachi mongen nierpuaingün (Dan. 12:2).

15. 1) Inei no rume pu Sodoma ca Gomorra che mu huiñomongetulayai, ¿chumngelu feipilayafuiñ tüfa? 2) ¿Chem pengeli ñi feipin Judas 7? (Inaduamnge ti huichulechi dungu “¿Chem feipifui Judas?”).

¹⁵ Jesús feipi pu che tañi famentueteu doi cutrancahuai ta Sodoma ca Gomorra meu “puule ti antü ñi ramtucadungungeal pu che” (Mat. 10:14, 15; 11:23, 24; Luc. 10:12). ¿Chem feipifui Jesús tüfa mu? ¿Doicünuupei mai ñi feipin ta Jesús? ¿Feipipefui mai pu che tañi famentueteu ñi doi huesalcan pu Sodoma ca Gomorra che mu? Femlai. ¿Chumngelu feipiafuiñ? Jesús feipi pu Nínive che ñi huiñomongetual feichi antü “ramtucadungungele pu che”. ¿Ca femngechi feipipelai ñi huiñomongetual feichi antü mu pu Sodoma ca Gomorra che? Pu Nínive che ca pu Sodoma ca Gomorra che huesa femingün, huelu pu Nínive che elungeingün tañi repentiutual. Jesús feipi pu femlu huesaque dungu ñi huiñomongetual tañi juiciantucungeal engün (Juan 5:29). Feimu feipiafuiñ quiñeque che mülelu Sodoma ca Gomorra mu, huiñomongetuafuingün. Fei quelluafuiñ ñi quimafiel Jehová ca Jesús engün.

16. Ñi huiñomongeltuafiel quiñe che, ¿chem ngüneduamüñmaquefi Jehová? (Jeremías 17:10).

¹⁶ (Papeltunge Jeremías 17:10). Feitachi texto pengeli chem quimiyiñ chumngechi ñi juzgachequen Jehová. Fei rumel inaduamüñmaquefi “pu che ñi piuque” ca ñi “ellcalechi raquiduam”. Ca ngüneduamai ñi femquen caque quiñeque che ñi dullial inei tañi huiñomongeltuafiel. Jehová ayüniei ñi pengelal tañi cutrantupiuqueyechen, huelu ngüneduamle quiñe che ñi huiñomongetunoal, eluhuai ñi huiñomongeltunoafiel. Feimu Biblia feipinole, iñchiñ feipilayaiñ quiñe che ñi huiñomongetunoal.

TATI JUEZ NGELU COM MAPU MU NOR JUZGACHEAI

17. Com tati che lalelu, ¿chem rupayai?

¹⁷ Adán ca Eva quiñehuingu Huecüfü mu ñi caiñetuafiel Chau Jehová. Feichi mu ca fantepu meu fentren che laconcülei. Ti lan quiñe “caiñe” reque felei (1 Cor. 15:26). ¿Chem rupayai feitachi che lalelu? Quiñe pichi troquiñche, 144.000 cristiano, huiñomongetuai huenu ca turpu lahuelayai engün (Apoc. 14:1). Ca huiñomongetuai “pu norngechi che”, tüfa poyequefuingün ta Jehová petu tañi mongelen. Jesús ngünenietule huaranca tripantu ca neicümngetule ta Huecüfü, pu norngechi che mülei ñi püntütripanoal Jehová mu, fei llohuaingün afnoachi mongen (Dan. 12:13; Heb. 12:1). Ca huiñomongetuaingün “norngenochi che”. Quiñeque turpu poyequelafuingün ta Jehová cam femquefuingün huesaque dungu petu tañi mongelen. Feichi ngüneniele Jesús huaranca tripantu, elungeai engün tañi cümecünutual tañi mongen ca ñi serfinieafiel ta Jehová (Luc. 23:42, 43). Ca mülefui huesaque che eluulu ñi caiñetuafiel Jehová ca tañi feipin petu tañi mongelen, feita engün Jehová huiñomongeltulayafi (Luc. 12:4, 5).

18, 19. 1) ¿Chumngelu maneluhuaiñ Jehová ñi cüme juzgayafiel pu lalelu? (Isaías 55:8, 9). 2) ¿Chem peaiñ cangelu troquiñ mu?

¹⁸ ¿Maneluhuafuiñ Jehová ñi rumel nor juzgachequen? Felei llemai. Abrahán reque quimnieiñ Jehová tati ‘Juez ngelu com mapu mu’ huelulcauquelai, cutranpiuqueyechequei ca rume quimün niei. Jehová elfalcünufi ca pepicafi ta Jesús ñi juzgacheal (Juan 5:22). Tati Chau ca tati Fotüm quimniei chem tañi mülen ñi piuque mu pu che (Mat. 9:4). Feimu nor juzgayafi llemai com pu che.

¹⁹ Rumel maneluhuaiñ Jehová mu ca tañi cüme juzgachequen. Quisu müten pepicaucülei ñi juzgacheal, iñchiñ no (papeltunge Isaías 55:8, 9). Jesús cüme inayentufi tañi Chau ñi norngen ca cutranpiuqueyechen, feimu maneluuqueiñ quisu engu müten tañi juzgacheal (Is. 11:3, 4). Acule ti fütra cutrancahun, ¿chumngechi juzgangeai pu che? ¿Chem quimlaiñ? ¿Chem quimiyiñ tüfa mu? Cüpalechi troquiñ peafiyiñ.