TROQUIÑ ÑI CHILLCATUNGEAL 19
ÜLCANTUN 22 ¡Cüpape ti Ngünenien deu elcünungelu!
Chau Jehová, ¿chumngechi juzgacheai cüpalechi antü mu?
Jehová “ayünielai ta inei no rume ñi apümcangeal” (2 PED. 3:9).
¿CHEM QUIMAIÑ?
Maneluhuafuiñ Jehová mu ñi juzgayafiel pu che nor dungu mu.
1. ¿Chumngelu am ta müleiñ afmatufalchi antü mu?
FAMÜLQUE mu, tañi feipicünuel ta Biblia femtripamequei. Inaduammequefiyiñ chumngechi ti rey del norte ca ti rey del sur chaftumequehuingu inei ñi ngünenieafiel com ti mapu (Dan. 11:40). Ca inaduamqueiñ Jehová tañi dungu ñi com püle amuldungumequengen ca fentrenque che ñi serfinierpufiel ta Jehová (Is. 60:22; Mat. 24:14). Ca elungequeiñ fentren quellu taiñ hueniyeafiel ta Jehová, yochi cüme acuquei tüfa (Mat. 24:45-47).
2. ¿Chem mu maneluhuafuiñ acule ti fütra cutrancahun? Huelu ¿com quimniepeaiñ mai?
2 Jehová quelluniequeiñmu taiñ doi cüme adümafiel chem dungu ñi rupayal pichiñma mu (Prov. 4:18; Dan. 2:28). Pichiñma mu acuai ti fütra cutrancahun, feita rume cüdaungeai llemai. Conle, deu quimaiñ quiñeque dungu, tüfa quelluaiñmu taiñ serfinieafiel Jehová ca taiñ quiñeucüleal. Huelu quiñeque dungu quimlayaiñ tañi rupayal. Tüfachi troquiñ mu, hunelu peaiñ chumngelu ñi caletun quiñeque dungu taiñ raquiduamquefel cuifi, ca chumngechi adümnierpufiyiñ famülque mu. Ca inaduamaiñ chem dungu quimnieiñ ñi rupayal cüpalechi antü mu ca ñi chumal ta Jehová.
¿CHEM DUNGU QUIMLAIÑ?
3. Cuifi mu, ¿chem raquiduamquefuiñ ñi rupayal acule ti fütra cutrancahun? Ca, ¿chumngelu femngechi raquiduamquefuiñ?
3 Cuifi raquiduamquefuiñ conle ti fütra cutrancahun, pu feyentunofilu Jehová elungelayai tañi montual, layaingün Armagedón mu piquefuiñ. ¿Chumngelu femngechi raquiduamquefuiñ? Tañi rupan Noé ñi antü Fütra Mangin Co mu, ca femngechi rupayai cüpalechi antü mu piquefuiñ. Petu ñi acunon ti Fütra Mangin Co, Jehová cerrantucufi ti puerta ti fütra huampo ruca meu, femngechi ñi conpunoal ta che. Ca femngechi femai acule ti fütra cutrancahun, pu feyentunolu montulayai piquefuiñ (Mat. 24:37-39).
4. ¿Chumngelu feipihuelaiñ com ñi rupan Noé ñi antü ca femngechi rupayal cüpalechi antü mu?
4 ¿Raquiduampeafuiñ mai ñi rupan ti Fütra Mangin Co ca femngechi rupayai cüpalechi antü mu? Feingelai. Biblia feipilai.a Rüfcünu, Jesús feipi: “Noé ñi antü reque ca femngechi feleai mülele eimün meu ti Huentru ñi Fotüm”. Huelu feipilai com ñi rupan Noé ñi antü mu ca femngechi rupayal cüpalechi antü mu. Feimu iñchiñ feipilayafuiñ feichi Jehová cerrantucufilu ti puerta ca femngechi rupayai cüpalechi antü mu. Ca femngechi rupanofule rume, huelu fentren quimeltun entuafuiñ ñi rupan Noé tañi antü mu.
5. 1) Petu ñi rupanon ti Fütra Mangin Co, ¿chem femi Noé? (Hebreos 11:7; 1 Pedro 3:20). 2) ¿Chumngechi trürümafuiñ Noé ñi amuldungun iñchiñ taiñ amuldungun mu?
5 Noé allcütufi Chau Jehová ñi ngüfetun dungu, fei deumai ti fütra huampo ruca, femngechi pengeli tañi feyentun (papeltunge Hebreos 11:7; 1 Pedro 3:20). Ca femngechi pu che allcütufiel Chau Dios tañi cümeque dungu, tañi femün mu pengelquei tañi feyentun (Hech. 3:17-20). Pedro feipi: “Noé amuldunguquefui Chau Dios ñi nor dungu” (2 Ped. 2:5). Taiñ ngüneduampeel quimlaiñ Noé ñi amuldungulelfiel caque quiñeque che feichi mu. Taiñ antü mu yafüluuqueiñ taiñ quimeltuafiel caque quiñeque che huall mapu mu. Huelu fente yafüluuliyiñ rume, puulayafuiñ com pu che mu petu ñi acunon Jehová ñi antü. ¿Chumngelu feipiafuiñ?
6, 7. ¿Chumngelu feipiafuiñ taiñ amuldungulelnoafiel com che petu ñi acunon Jehová ñi antü?
6 Peaiñ chem pi Jesús tunte puhual taiñ amuldungun. Feipicünui “amuldungungeai huall mapu püle, femngechi com troquiñche ñi quimal engün” (Mat. 24:14). Ti amuldungun com femtripamequei taiñ antü meu, doi huaranca quehun dungu mu amuldunguqueiñ, ca internet mu mülei ti pagina jw.org pingelu. Tüfa mu huall mapu mülechi pu che conafui ñi quimafiel ti cümeque dungu.
7 Jesús feipi petu ñi acunon tañi juzgacheal, tañi pu discipulo puulayafuingün “com pu huaria Israel mapu meu” (Mat. 10:23; 25:31-33). Tüfa pengeli tañi pu discipulo ñi amuldungulelnoafiel caque quiñeque che. Famülque mu, fentren che mülei cheu catrütungequei taiñ amuldungun. Cafei fill antü fentren pichiqueche choyüngequei. Eluuliyiñ rume taiñ amuldungulelafiel itrofill che, huelu puulayaiñ com fei engün mu petu ñi acunon Jehová ñi antü (Apoc. 14:6).
8. ¿Chem ramtuhuafuiñ? (Ca inaduamnge ti adentun).
8 Taiñ deu peel, ca ramtuhuafuiñ chi: Tuchi amuldungulelngenolu, ¿chumngeaingün acule ti fütra cutrancahun? Jehová ca elfalcünufi Jesús ñi juzgacheal, fei engu ¿chumngechi juzgayafi pu amuldungungenolu? (Juan 5:19, 22, 27; Hech. 17:31). Ti texto nüucülelu tüfachi articulo mu feipi Jehová “ayünielai ta inei no rume ñi apümcangeal”, “ayüniei ta com pu che ñi nor raquiduamtual” (2 Ped. 3:9; 1 Tim. 2:4). Huelu Jehová petu feipilaeiñmu chumngechi ñi juzgayafiel feichi pu che. Rüfcünu, duamfal-lai taiñ feipiaeteu.
Petu ñi acunon ti fütra cutrancahun quiñeque che quimelelngelai ti cümeque dungu, ¿chumayu Jehová? (Inaduamnge parrafo 8).c
9. ¿Chem feipicünueiñmu Jehová Biblia mu?
9 Biblia mu Jehová feipicünui quiñeque dungu tañi femal. Huiñomongeltuafi pu “norngenochi che” turpu quimelelngenolu ti cümeque dungu, fei cacünutunolu tañi mongen (Hech. 24:15; Luc. 23:42, 43). Fei tüfa peaiñ cangelu ramtun.
10. ¿Ca chem ramtuhuafuiñ?
10 Pu che lalu ti fütra cutrancahun mu, ¿turpu huiñomongetuhuelayaingün? Biblia cüme quimfalcünui com pu chaftufilu Jehová Armagedón mu, Jehová ca ti cümeque püllü apümcayayu rumel mu (2 Tes. 1:6-10). Huelu fütra cutrancahun mu ca layai che cutran, füchan, caquelu che ñi duam mu, cam chem dungu mu rume. Fei engün cai, ¿ca huiñomongetulayaingün? (Ecl. 9:11; Zac. 14:13). ¿Huiñomongetupeaingün mai pu “norngenochi che” engün ti hue mapu mu? Rüfcünu, quimlaiñ.
¿CHEM DUNGU QUIMIYIÑ?
11. ¿Chem mu juiciantucungeai pu che Armagedón mu?
11 Iñchiñ ta quimnieiñ quiñeque dungu ñi rupayal. Juiciantucungele pu che Armagedón mu, ngüneduamüñmangeai chem ñi femfiel Cristo ñi pu peñi (Mat. 25:40). Feichi pu che quellufilu ta Cristo ca pu dullinque cristiano ufisa reque troquingeai. Ca quimnieiñ conle ti fütra cutrancahun, quiñeque dullin cristiano petu mülecayai mapu mu, huelu epe puule Armagedón yengetuaingün huenu mu. Fei petu mülele dullinche mapu mu, pu che cüme piuquengelu elungeai ñi quelluntucuafiel pu dullin cristiano ca tañi cüdau (Mat. 25:31, 32; Apoc. 12:17). ¿Chumngelu falintufali com tüfachi dungu?
12, 13. ¿Chumai chi quiñeque che deu apümcangele ti “Fütra Babilonia”? (Ca inaduamnge ti adentun).
12 Conle ti fütra cutrancahun ca apümcangele ti “Fütra Babilonia”, quiñeque che feipiafui chi: “¿Tüfachi dungu no ama feipiquefui pu testigo?”. Quiñeque che pefilu ñi apümcangen ti “Fütra Babilonia”, ¿fei hula feyentupeafi mai Chau Jehová? (Apoc. 17:5; Ezeq. 33:33).
13 Ngüneduamaiñ ñi rupan Moisés ñi antü mu. Tripatulu pu Israel che Egipto mapu mu, inanieyu “fentren catripanche” (Éx. 12:38). Quiñeque engün feyenturpui chi deu ñi pefiel ñi femtriparpun ti mari huesa dungu ñi feipicünuel ta Moisés. Ca femngechi pu che feyenturpule deu apümcangele ti Fütra Babilonia, ¿chem piaiñ? ¿Cümelai? Feula hula feyentuingün ¿pipeaiñ mai? Femlayaiñ. Inayentuafiyiñ mai taiñ Huenu Chau Jehová “cutranpiuqueyechequelu, cuñillchequei, illcufemquelai, rume piuqueyechequei ca com tañi feipin rüfngei” (Éx. 34:6).b
Quiñeque che pefiel mu ñi apümcangen ti “Fütra Babilonia” acordayaingün tüfa ñi amuldunguyahun pu testigo pütrün tripantu mu. (Inaduamnge parrafo 12, 13).d
14, 15. Ñi eluafiel rumel mongen ta quiñe che, ¿chem ngüneduamlayai Jehová, ca chumngelu? (Salmo 33:4, 5).
14 Quiñeque peñi, lamngen niele familia serfiquenofilu ta Jehová, feipiafui chi: “Cümeafui ñi layal petu puunole ti fütra cutrancahun, femngechi elungeafui ñi huiñomongetual”. Ñi piuqueyeniefiel tañi pu che feipiafuingün tüfa. Huelu Chau Jehová ñi eluafiel rumel mongen quiñe che, ngüneduamlayai chem antü ñi lan. Jehová fei tati norngechi Juez, com tañi femün huelulcauquelai (papeltunge Salmo 33:4, 5). Maneluhuafuiñ ti ’Juez ngelu com mapu mu’ tañi femal nor dungu (Gén. 18:25).
15 Jehová ca ngüneduamlayai cheu ñi mülen ti che ñi eluafiel rumel mongen. Cheu tañi mülen quiñeque che turpu quimelngelai ti cümeque dungu. Fei engün “capüra” reque troquifemlayafeyu Jehová (Mat. 25:46). Iñchiñ falintuquefiyiñ tüfachi che, Jehová mai ti Juez ngelu com mapu meu doi falintuqueyu engün. Quimlaiñ Jehová chumcünuafiel ti dungu ti fütra cutrancahun mu. Feichi mu, fei quimelelfile tañi üi com pu che, fei engün eluhuafui chi tañi feyentual quisu meu (Ezeq. 38:16).
Deu conle ti fütra cutrancahun, quiñeque che ¿feyentupeafui mai Chau Jehová mu?
16. Biblia mu, ¿chem quimürpuiñ Chau Jehová mu? (Ca inaduamnge ti adentun).
16 Biblia quimeltueiñmu Jehová ñi rume falintufiel pu che. Quisu huli tañi Fotüm iñchiñ taiñ duam mu, femngechi taiñ rumel mongeleal (Juan 3:16). Com iñchiñ ngüneduamiyiñ taiñ piuqueyenieteu ta Chau Jehová (Is. 49:15). Quisuque quimüñmaeiñmu taiñ üi. Fente cüme quimnieiñmu, feimu laliyiñ, huiño deumatuaiñmu taiñ chumngequefel cuifi ca huiñoleltuaiñmu taiñ raquiduamquefel (Mat. 10:29-31). Rüf maneluhuafuiñ taiñ Huenu Chau mu ñi cüme juzgayafiel caque quiñeque che, ¿chumngelu am? Quisu quimün-ngei, norngei ca cutranpiuqueyechequei (Sant. 2:13).
Maneluhuafuiñ Jehová ñi cüme juzgayafiel caque quiñeque che, quisu am quimün-ngei, norngei ca cutranpiuqueyechequei. (Inaduamnge parrafo 16).
17. ¿Chem peaiñ cangelu troquiñ mu?
17 Deu quimtuculu iñchiñ com tüfachi dungu, quimfali fantepu mu rume falin-ngei taiñ amuldungun cüdau. ¿Chumngelu cai? Ca, ¿chem quelluaiñmu ñi afelnoal ti amuldungun? Cangelu troquiñ mu peaiñ.
ÜLCANTUN 76 ¿Chum duamcülequeimi?
a Peaimi chumngelu cacünutui tüfachi dungu peaimi ti troquiñ “A Jehová le gusta enseñar de forma sencilla” tripalu La Atalaya 15 marzo 2015 tripantu, pagina 8-10.
b Deu apümcangele ti Fütra Babilonia, Gog tuulu Magog lefcontuafi Jehová ñi pu che. Fei tati hue feyentulu ca mülei ñi quimfalcünual tañi feyentulen.
c ¿CHEM PENGELI TI ADENTUN? Tüfachi cüla adentun pengeli chumngelu puhul-layaiñ ti amuldungun itrocom che meu: 1. Quiñe domo mülei quiñe pais mu epe com pu che niei quiñe religion cristianangenolu ca cuñihun-ngei amuldungual fei mu. 2. Quiñe curehuen mülei quiñe pais cheu catrütungequei taiñ amuldungun ti gobierno ñi duam mu ca cuñihun-ngei. 3. Quiñe huentru fütra camapu mülei ca cheu ñi mülen puhun-ngelai.
d ¿CHEM PENGELI TI ADENTUN?: Quiñe domo püntütripai Jehová mu, fei petu acordamequei chem ñi quimün tañi apümcangeal ti “Fütra Babilonia”. Cüpa huiñotui Jehová mu, fei amutui tañi pu chau testigongelu ñi ruca mu. Femngechi femle quiñe che, inayentuafiyiñ taiñ Huenu Chau Jehová, feimu cutranpiuqueyeafiyiñ ca ayüucüleaiñ tañi huiñotun Jehová mu ti che.