Chau Dios yamniefi ca falintuniefi pu domo

JESÚS mülelu Mapu mu, pengeli ñi chumngen ta Jehová ca chem tañi raquiduamquen. Quisu feipi: “Femquelan chem dungu rume re quisu ngünehun. Iñche feipiquen Chau ñi quimeleteuchi dungu müten”, ‘Iñche rumel femquen tañi Chau ñi ayüqueelchi dungu’ (Juan 8:28, 29; Colosenses 1:15). Feimu ngüneduamliyiñ chem raquiduamquefui Jesús pu domo mu, ca quimaiñ chumngechi raquiduamquei Jehová pu domo mu.

Tañi raquiduamqueel ta Jesús trürlai tañi feipiqueel pu huentru pu domo mu. ¿Chumngechi am? Jesús ñi quimeltun, ¿chumngechi quelluafui pu domo fachantü?

Jesús raquiduamquelai podngechi dungu tati pu domo mu. Tati pu lideres religiosos quimeltuchequei tati pu huentru dungufile quiñeque domo conafui huesaque illutun tañi piuque mu. Feimu elungequelai pu domo ñi nütramcayal huentru engün ñi adquintunieteu caquelu che. Ca femngechi pu domo mülei ñi munuluucüleal engün müten. Huelu Jesús feipi huentru mai mülei tañi ngünehual, fei ñi nienoal huesaque raquiduam. Jesús feipilai ñi huichunentungeal pu domo caquelu che mu (Mateo 5:28).

Feichi antü mu, pu religiosos quimeltuquei pu huentru hudayafui ñi domo chem dungu mu rume (Mateo 19:3, 9). Huelu Jesús feipi: ‘Tati hudalu tañi domo fei ca domo cureyetule, ñihualdomofengei ñi hudafiel meu tañi hunen domo’ (Marcos 10:11, 12). Tati pu judio raquiduamqueingün quiñe huentru cudumfile quiñe ñihua domo, ‘ngelai culpan’ piqueingün. Ca raquiduamquefuingün quiñe domo cudumuule quiñe huentru engu, fei mai ta culpai. Huelu Jesús raquiduamquelai femngechi. Doi mai feipi tati curehuen müten tañi cudumuhual. Jesús femngechi pengeli ñi falintuquefiel pu domo.

Famülque mu, ¿chumngechi inaniequeiñ Jesús tañi raquiduam? Trahunche pu Dunguquelu Ineingen Jehová, pu domo ca huentru quiñentrür poyeafuingün ta Chau Dios. Pu domo llicalelaingün ñi lelinieaeteu pu huentru huesa illutun dungu mu. Tati pu huentru inaniequei tüfachi ngülam: “Tati pu cuseque püllü yamnieafimi quisu tami ñuque reque. Ca tati pu üllchaque domo, quisu tami deya reque troquiafimi com cüme lif piuque meu” (1 Timoteo 5:2).

Jesús quimeltuquefi pu domo. Jesús ñi antü mu, pu religioso piquelafui ñi quimeltulngeal tati pu domo. Huelu Jesús quimeltuquefi tati pu domo, ramtuquefi chem raquiduamcülen engün. Jesús raquiduamquelafui pu domo ñi deumayal iyael müten. ¿Chumngechi quimnieiñ? Jesús ayüniefui ñi allcütual María tañi quimeltun (Lucas 10:38-42). María ñi lamngen, Marta pingelu, ca ayüfui ñi allcütual Jesús tañi quimeltun. Feimu lalu Lázaro, pengeli ñi piuque mu niefiel tüfachi quimeltun (Juan 11:21-27).

Jesús cüpa quimfui chem raquiduamcülen tati pu domo. Jesús ñi antü mu, pu domo femngechi raquiduamqueingün niele quiñe cüme falin püñeñ, fei hula ayüucüleaingün. Tañi püñeñ profeta ngele, ‘doi cümeafui’ piquefuingün. Feimu quiñe antü, quiñe domo feipifi Jesús: “Rume saquin-ngei ti domo tami choyüeteu” (Lucas 11:27, 28). Huelu Jesús feipieyu doi cümei feyentuafiel ta Chau Dios. Femngechi Jesús pengeli pu domo ñi nieal püñeñ, ‘fei hula ayüucüleafui’ piquelai. Doi mai quimeltui tati pu domo ñi hueniyeafiel Chau Dios ñi rüf ayüucüleal (Juan 8:32).

Famülque mu, ¿chumngechi inaniequeiñ Jesús tañi raquiduam? Müleyüm quiñeque ramtun lifru mu, pu domo elungequei tañi huiñoldungual trahun mu. Fentren domo inayentufali ñi cüme femquen engün. Quimeltulelquefi tañi pu püñeñ ca tati pu che Biblia meu, feimu müna yamfali engün (Tito 2:3). Tati pu loncolelu quimniei tati pu domo ñi rume quimeltuchefengen engün (Salmo 68:11; inaduamnge ti huichulechi dungu “Apostol Pablo, ¿catrüntucufi ñi dungunoal ti pu domo?”).

Jesús duamtuniequefi ti pu domo. Cuifi antü, doi falintungequei quiñe huentru püñeñ quiñe domo püñeñ mu. Quiñe cuifi lifru feipi: “Ayühun-ngei nielu fotüm, huelu ahungei nielu ñahue”. Tati chau mülefui ñi quintulafiel quiñe füta tañi ñahue. Ti chau ca mülefui ñi hulal dote tañi nieñmangeal tañi ñahue. Füchale tañi pu chau, tati ñahue cuidalayafeyu tañi fütangen mu. Feimu tati pu chau ayülafui tañi nieal ñahue.

Jesús falintuquefi ti pichique huentru ca pichique domo. Jesús huiñomongeltufi Jairo tañi ñahue, ca huiñomongeltufi quiñe lantu domo ñi huentru puñen (Marcos 5:35, 41, 42; Lucas 7:11-15). Ca tremoltufi quiñe domo 18 tripantu ñi cutrancülen. “Abrahán tañi cüpanche” pifi. Feichi antü mu tati pu huentru müten feipingequei “Abrahán tañi cüpanche” (Lucas 13:10-16). Ñi feipin ta Jesús pengeli ñi falintuquefiel tüfachi domo ca chumngechi ñi falintuquefiel pu huentru. Jesús ca yamfi tüfachi domo ñi maneluucülen Chau Dios mu (Lucas 19:9; Gálatas 3:7).

Famülque mu, ¿chumngechi inaniequeiñ Jesús tañi raquiduam? Quiñeque lof mu feipingequei: “Falilai tremümal quiñe ñahue. Fütangei, cañpüle amuquetui”. Trahunche mu femngechi raquiduamquelaiñ iñchiñ. Doi mai trahunche mu, tati chau cüme cuidaniequei com tañi pu ñahue, tañi pu fotüm. Tati pu chau ayüniefui com tañi pu yall ñi amual colegio mu ca ñi nieal atencion medica.

Jesús maneluucülequei ti pu domo mu. Jesús ñi antü mu, tati pu domo falintuñmangequelai ñi dungun juicio mu. Quiñe historiador feichi antü mu feipi: “Tati pu domo manelfal-lai tañi domo ngen mu engün”.

Huelu Jesús femngechi raquiduamquelai. Huiñomongetulu Jesús, feipifi quiñeque domo tañi feipial ‘huiñomongetui Jesús’ pial engün (Mateo 28:1, 8-10). Tüfachi pu domo pefi Jesús ñi langümngen ca ñi rüngalngen, huelu feipilu ‘huiñomongetui Jesús’ feyentungelaingün (Mateo 27:55, 56, 61; Lucas 24:10, 11). Huelu Jesús maneluucülei tüfachi pu domo mu, feimu huercüeyu ñi feipial ‘huiñomongetui Jesús’ (Hechos 1:8, 14).

Famülque mu, ¿chumngechi inaniequeiñ Jesús tañi raquiduam? Pu loncolelu trahunche mu yamniequefi pu domo, feimu allcütuquefi ñi feipin engün. Ca femngechi tati pu huentru allcütuquefi tañi domo (1 Pedro 3:7; Génesis 21:12).

Tati huentru inayentufile Jesús, cüme duamelafi tañi domo ca yamnieafi. Tüfa raquiduamcülefui Jehová deumafilu tati domo (Génesis 1:27, 28). Tati pu huentru raquiduamquelai tañi domo müte falinon, doi mai inaqueingün tati ngülam Biblia mu tripalu ñi ayüucüleal tañi domo (Efesios 5:28, 29).

Peafiyiñ ñi rupan quiñe domo Yelena pingelu. Tañi füta huesa duamelqueyu. Ti huentru tremi quiñe lof mu ñi mülequen quehuan dungu, fei mu hueñengequei ti domo ca hulelcangequei. Tati domo eluhui ñi papeltual Biblia. Quisu feipi: “Biblia elueneu nehuen. Quimürpun Chau Dios rüf piuqueyeneu ca falintuqueneu. Feimu raquiduamün ‘tañi huentru papeltule Biblia, norcületuafui tañi raquiduam’ piquefun. Rupalechi tripantu mu, tañi füta papeltui Biblia. Norcünutui tañi mongen, fei fautizahui tañi conal Chau Dios tañi pu che mu. Yelena feipi: “Fei hula tañi füta quim ngüneuquei. Mür quimürpuyu ñi perdonahual. Biblia ñi ngülam doi cüme duamelqueneu. Tañi curehuen-ngen doi cüme amuletui” (Colosenses 3:13, 18, 19).

Yelena müten rupalai femngechi dungu mu. Famülque mu fentren domo niei ayühun. Quiñentrür tañi füta engu inaquei Biblia ñi ngülam ñi cüme amuleal tañi curehuen-ngen, femngechi tati domo yamniengequei ca falintungequei trahunche mu (Juan 13:34, 35).

Com pu cristiano, huentru, domo ngefuliyiñ rume, quimnieiñ taiñ culpafe ngen, feimu huelulcayafuiñ. Huelu quimnieiñ fülconliyiñ Chau Dios Jehová meu, culpafe ngehuelayaiñ, lifretripayaiñ. ¡Feita rume cüme maneluhun tati! (Romanos 8:20, 21).