Jupjam iyawsäwinïpxañäni

Suma amuytʼasir warmi

KUNAPACHATÏ Abigailax uywatapar uñjäna ukhax mä jan waltʼäwiw utjani sasaw amuyäna. Chiqas uka waynax wali sustjatapunïnwa, ¿kunats ukham sustjatäpachäna? Kunattix pusi patak soldadonakaw uywiripan utapar taqpach chachanakaru jiwarayir sarasipkäna. ¿Kunats uk lurañ amtapxäna?

Nabal sat chachapan juchapata. Jupax wali qhuru ukat jiskhisir jaqipunïnwa. Jichhax jan waliruw purtʼasïna, kunattix Jehová Diosar luqtiri comandantempiw qallasïna. Uk uñjasaw Nabalan mä irnaqiripax —inas uwij awatirïchïna— Abigailar yatiyir saräna, jupacha aka jan waltʼäwinak askichaspa sasa. ¿Kunsa mä warmix ukataq soldadonakampix luraspäna?

Janïr uk yatxatkasax jupar sum uñtʼapxañäni. ¿Abigailax kuna kasta warmïpachänsa? ¿Kunanakas juparux jan walin uñjasiypachäna? ¿Ukat iyawsäwipax kunsa yatichistu?

Suma uñnaqtʼani ukat chʼikhi warmi

Abigailampi Nabalampix janiw kunans kikpapkänti. Nabalatakix ukham warminïñax wali sumänwa, ukampis Abigailatakix ukham chachaniñax janiw walïkänti. Chiqpachansa, Nabalax wali qamirïnwa ukatwa wali aytat jaqïkaspas ukham amuyasïna. Ukampis taqinjamakiw Nabal chacharux jan wali jaqit uñtʼapxäna. Ukham wali uñisir jaqitx Biblian janiw yaqha jaqinakat parlkiti. Ukat sutipaxa, “jan amuytʼani” jan ukax “jan yatiñani” sañ muni. Yurkän ukhatpun uka suti uskupxchïna jan ukax ukham jaqïtap layku ukham sutiñchamp uskupchïna ukax janiw yatiskiti. Ukampis uka sutix jupatakjamapunïnwa. Nabalax “qhuru jan wali jaqïnwa”. Qallasiri, machiri, axsarkaya ukat taqinin uñisit jaqïnwa (1 Samuel 25:2, 3, 17, 21, 25).

Ukampis Abigailax janiw ukhamäkänti. Sutipaxa “Awkijax Walpun Kusisi” sañ muni. Awk taykanakax imill wawapan suma uñnaqtʼanïtapatxa wali kusisitaw jikxatasiñ yatipxi, ukampis yatiñanïpki uka awk taykanakaxa, wawanakapax chʼikhi kankañanïñapwa munapxi. Khitinakatï suma uñnaqtʼanïpki ukanakax suma amuytʼanïñata, yatiñanïñata, jan axsarirïñata ukat iyawsäwinïñatsa janiw llakisipkiti ukax taqi chiqanwa uñjasi. Ukampis Abigailax janiw uka kasta jaqinakjamäkänti. Jupax wali suma uñnaqtʼanïkchïnsa, “wali chʼikh[ïnwa]” sasaw Bibliax qhanañchi, mä arunxa, wali amuytʼasir warmïnwa (1 Samuel 25:3).

Ukham wali amuytʼasir chʼikhi warmïsaxa, ¿kunatarak uka qhuru jan wali jaqimp casaraspachänsti? Khä tiemponakanxa awk taykan amtaparjamaw casarasipxäna. Chiqas awk taykaw khitimpis wawapax casarasini uk amtapxirïna. Abigailax janis ukhaman jikxataskchïnxa, inas Nabalamp casarasiñapatak awk taykapax wiytapchïna. Wali qamirïtapata ukat wali aytat jaqïtapat inas uk lurapxchïna jan ukax wali pisin jakasipxatap layku lurapxchïna. Chiqpachansa, wali qamirïkchïnsa janiw mä suma chachäñatakix walikänti.

Wali amuytʼan awk taykanakax jaqichasiñar respetomp uñjapxañapatakiw wawanakapar yatichapxi. Ukatwa qullqi layku jaqichasipxañapatak jan wiytapkiti, janirakiw wawäskipan mä jaqimp uñtʼasipxañapatak wiytapkiti (1 Corintios 7:36, NM). Ukampis Abigailax casaratäxänwa ukhamax janiw kunas lurañjamäxänti, ukatwa mä suma warmïñatakix chʼamachasïna.

Wali colerataw jan wali arunakamp tuqjäna

Jichhax mä jachʼa jan waltʼäwiw utjäna. Nabalax Davitan chuymap ustʼayäna, Davitax Diosan ajllitapänwa, Samuel profetaw juparux Saúl lanti reyjama uttʼayatayna (1 Samuel 16:1, 2, 11-13). Uka qhuru Saúl reyix Davitaruw jiwayañ munäna, ukatwa Davitax 600 chachanakampix wasarar imantasir jaltxapxäna.

Nabal chachax Maón sat markanwa jakasïna, uywanakanïnwa ukat inas Carmelo marka jakʼan mä qhawqha uraqinakanïchïna.a Uka chiqanxa Nabalan 3.000 uwijanakap awatiñatakix wali sumäpachänwa, kunattix paypach markanakax uywa awatiñatak suma pastonakan qullunakanïnwa. Uka chiqanakax wali sumänwa, yaqha chiqanakax waña jan qamañjama ukhamänwa, uka markax aynach tuqina Parán sat jawir thiyankänwa. Ukat Inti jalsu tuqiruxa qullunaka waña uraqi pasasinxa mar Muerto uka qutarakiw jikxatasïna. Uka qullunakan kʼullkʼu thakinaka ukat jachʼa pʼiyanakaw utjäna, ukanwa Davitampi uywatanakapampix imantasipxäna, manqʼañatakix janiw kunas utjkänti kuntï jikxatapkäna ukak manqʼasipxäna. Nabal chachan uywa awatirinakapampix inas sapa kuti jikisipxirïchïna.

¿Kunjamasa Nabalan awatirinakapar uñjapxäna? Jupanakax mä uwij sapa kutiw apaqapxasapäna ukampis janiw uk lurapkänti, antisas uywanakaru ukat awatirinakarux jan walinakatwa jarkʼaqapxäna (1 Samuel 25:15, 16). Uka awatirinakax jan walin awisax jikxatasipxäna. Kunattix uywa manqʼan animalanaka, ukat Israel markat aynach tuqin yaqha markanakamp qurpanïtapatxa walja lunthatanakaw utjäna.b

Uka wasar uraqin walja chachanakar manqʼa churañax Davitatakix wali chʼamäpachänwa. Ukatwa mä urux tunka chachanakar Nabalan ukar khitäna, ukhamat yanap mayiñataki. Kunapachatï uwijanakat tʼawra yawiñ horasäki ukhax walja manqʼañanak wakichapxirïna, ukhaw Davitax khitäna. Sum amuytʼasisa ukat suma arunakwa Nabal chachar parlañatakix ajllïna. Jupax sullkätap laykux awkipäkaspas ukhamwa Nabalarux uñjäna, ukat respetompiw akham säna: “nayasti juman wawamarakïtwa” sasa. ¿Uk istʼasax Nabalax kamspachänsa? (1 Samuel 25:5-8.)

¡Wal thithïna! Jan wali arunakampi wali colerataw Davitan uywatanakapar tuqji sasaw uka waynax Abigailar yatiyäna. Jan walinak lurasinsa uywiripan utapat kʼithaskaspa ukhamwa Davitat parläna, ukat mañqʼañsa, umsa, aychsa janiw churañ munkänti. Ukat janis suma jaqïkaspa ukhamwa jiskʼachäna. Kunjamtï Saulax uñiskänxa inas ukham Nabalax Davitar uñisirakchïna. Ukampis Jehová Diosatakix janiw ukhamäkanti: Jupax wal Davitar munasïna, mä jan istʼasir uywatarjam uñjañat sipansa, Israel markan reyiparjamaw uñjäna (1 Samuel 25:10, 11, 14).

Kunapachatix Nabalan jan wali luratapat Davitar yatiyapkäna ukhax akham sasaw säna: “¡Taqini armanakam katusipxam!” sasa. Ukat jupax waktʼayasisax kawkïr juramenttï arsuwaykäna uk phuqañatakiw 400 chachanakampi Nabalan utapankiri taqpach chachanakar jiwarayir sarapxäna (1 Samuel 25:12, 13, 21, 22). Nabalan jan wal luratapatwa Davitax wal colerasïna ukampis kuntï jupax lurañ amtkänxa ukaw jan walïkänti. Uka tuqit Bibliax akham siwa: “Jaqin qʼapisiñapax janiw Diosan chiqa kankañap lurkiti” sasa (Santiago 1:20, MT). Jichhasti, ¿kuns Abigailax utapankirinakar qhispiyañatakix luräna?

“Jumas qullanarakïman suma amuytʼan warmïtamata”

Chiqpachansa, Abigailax Nabalan jan wali luratapat ratukiw askichañ qalltäna. Chachapax jan khitirus istʼir jaqïnwa, ukampis jupax istʼasir warmïnwa. Uka waynax Nabalat akham sänwa, uka chachax “wali qhurupuni[wa]” ukat “jan parlxayañjama” sasa (1 Samuel 25:17).c Nabalax wali mintat jaqïkaspas ukham tuküna ukat janiw khitirus istʼirïkänti. Jichhürunakanxa ukham jachʼa jachʼa tukur jaqinakax waljaw utji. Ukampis Abigailax janiw ukhamäkänti, uywatapax sum uk yatïna. Ukatwa Abigailar yatiyirix saräna.

Ukham jan waltʼäwi utjatapatxa, “Abigail warmix jankʼakiw” sartasïna. Jïsa ratuk amuytʼasir warminwa. Ukampis aka sarnaqäwinxa, jankʼakiw kuns luräna sasax pusi kutiw aytasi. ¿Kunsa lurpachäna? Tʼantʼa, vino, uwij aycha, grano jampʼi, uva pasasampi ukat higo pasasampi lurat tortanakwa Davitampir uywatanakapampir churañatakix apäna. Utap sum uñjir mä suma warmjamax kuntï utapan utjkäna ukanak sum yatïna. Chiqas Proverbios librox mä suma warmitwa parli, uka librox qhipatsa qillqaskchïnxa Abigailax uka suma warmjamänwa (Proverbios 31:10-31). Ukat uywatanakaparuw nayraqat uka regalomp khitäna ukat jupax qhipatwa saräna. Ukampis ‘chachaparux janiw yatiykänti’ sasaw aka sarnaqäwix qhanañcharaki (1 Samuel 25:18, 19).

¿Ukham lurasax chachapar janit respetkpachäna? Janiwa. Nabalax Diosan ajllitaparuw jiskʼachäna, ukham lurasax jan juchani walja jaqinakaw jupan juchapat jiwarapxañapäna. Abigailatï jan kuns lurkasapänxa, ¿chachapjam jachʼa juchanirakïsapänti? Janiw yatktanti. Abigailatakix chachapar istʼañat sipansa Jehová Diosat jan jithiqtañaw wali askïnxa.

Kunapachatï Davitampir ukat uywatanakapampir uñjäna ukhax ratukiw Abigailax asnopat saraqasax Davitan nayraqatapan altʼasïna (1 Samuel 25:20, 23). Altʼat chuymampiw disculpa mayisïna, chachajaru ukat utajankirinakarux khuyaptʼayasiñam uñachtʼayakimaya sasaw axsarañ chuymamp mayisïna. Kuna arunakampis Davitan chuymap llampʼuptayañatakix parlpachäna, uk jichhax amuytʼañäni.

Nayraqataxa, kuna juchatix utjki ukax nayxankpan sänwa, ukat jumaruw pampachtʼañamatak achiktʼassma sasaw Davitar mayisïna. Ukat chachajax kunjamäkitix sutipax ukhamarjamaw parlaraki sasaw sarakïna. Ukham arunakampixa, janiw juchachasiñamäkiti sasin inas Davitar sañ munchïna. “Jumax [Jehová] Tatitutaki chʼama tukutam layku” sasin Davitar siskäna ukhaxa, Diosan qhitanitätapwa uñachtʼayäna. Ukat kunapachatï “[Jehová] Tatitux [...] Israelan jilïripat uttʼaykarakïtam” sasin siskäna ukhax Davitar Diosax reyjama uttʼayañätapatwa Abigailax yatïna. Ukat jan juchar purimti, ukhamat chuymamax jan mayjtʼañapataki mä arunxa concienciamax jan tʼaqhisiñapataki sasaw säna (1 Samuel 25:24-31). Chiqas ¡wali suma arunakapunïnwa!

¿Davitax kamspachänsa? Abigailan uka suma regalop katuqtʼasaxa, akham sänwa: “Israelan [Jehová] Tatitu Diosapasti qullanäpan. Jupaw jumaru nayampi jikisiñataki khitantam. Ukhamaraki jumas qullanarakïman suma amuytʼani warmïtamata. Chiqpachansa jumaw nayarux jaqi jiwayañata qhispiyarakista” sasa. Ukat Davitax jupar jankʼak thaqir jutatapatsa jachʼañchänwa, ukat jumaw jachʼa juchar jan mantañatak yanapistaxa sasaw säna. “Jichhax jan kuna llakiniki utamar kuttawayxam” sänwa. Ukat “arunakamxa istʼsmawa” sasaw Davitax wali llampʼu chuymampi sarakïna (1 Samuel 25:32-35).

“Nayax jupan mä serviripakïtwa”

Abigailax utapar sarkasax inas kuntï Davitampi parlapkäna ukanakat lupʼchïna. Chiqas Davitax wali suma jaqïtapa ukat chachapax wali qhurütapwa amuypachäna. Ukampis janiw kunas lurañjamäxänti. Ukat ‘Abigail warmix utaparu kuttanxäna’ sasaw Bibliax qhanañchi. Jïsa, mä suma warmikïskakiñatakiw chachapa ukar kuttʼxäna. Ukampis jan jaqir jiwayañapatakix Davitar ukat uywatanakaparux mä regalo apatapat Nabal chachaparux yatiyañapänwa. Jïsa, yatiyañapapunïnwa. Kuntï warmipax lurkatayna ukanak yaqha jaqiruk parlir istʼasapäna ukhax wali jiskʼachataw uñjasisapäna, jan ukhamar purtʼasiñatakixa, jupa pachpaw chachapar yatiyañ munäna. Ukampis janiw ukürpachax yatiykänti, kunattix Nabal chachapax mä jachʼa manqʼäwi luräna ukat wali machantatänwa (1 Samuel 25:36).

Wali amuytʼasir warmjamax qhiparmanthi alwakamaw apaqtayasiñapkam suyäna. Ukat janiw axsarayaskarakïnti, kunattix umatap apaqtayasisax uk istʼasin wal colerasisapäna. Ukhampachaw kuntï lurkatayna ukanak yatiyäna. Wal colerasini ukat nuwjkitanich sasin inas amuyarakchïna. Ukampis kunapachatï yatiykäna ukhax Nabal chachax “jan sartkiriw lurasiwayäna” (1 Samuel 25:37).

¿Kunas kamachpachäna? Biblian akham siwa: “[‘Chuymapax’, NM] jan sartkiriw lurasiwayäna” sasa. Inas chuymat usutäskchïna janiw yatktanti. Tunka uru pasatatwa jiwxäna, ukat inas jan usutäkchïnti. Ukampis Bibliax akham siwa: “Tatitux Nabal jaqirux wasitatwa castigäna, ukampiw Nabalax jiwxäna” sasa (1 Samuel 25:38). Jïsa, Diosaw Nabalarux castigäna ukhamatwa Abigailax jan tʼaqhisxänti. Jichhürunakanxa, Diosax janiw khitirus castigkiti. Ukampis janiw khitin tʼaqhisiñapsa munkiti, qhuru jaqinakarux uñisirakiwa ukat kunapachatï wakiskani ukhax jankʼakiw tʼaqhisitanakarux arxatarakini ukwa aka sarnakäwix uñachtʼayistu.

Chiqas Abigailatakixa, uka jan wali chachampi jan jakxañax mä bendicionänwa, ukampis Jehová Diosax yaqha bendicionwa jupatakix wakichaskäna. Kunapachatï, Nabalan jiwatapat Davitax yatxäna ukhaxa, Abigail warmin ukaruw khitäna jupampi casarasiñxat parlanipxañapataki. ¿Uk istʼasax Abigailax kamspachänsa? “Nayax jupan mä serviripakïtwa. Jupan esclavonakap kayunakap jariñatakisa jankʼakirakïtwa, jupatix ukham luram sitaspa ukapachaxa” sasaw säna. ¡Wali altʼat chuymanipunïnwa! Esclavonakaman kayunakap jarï sasaxa llampʼu chuymanïtapwa uñachtʼayäna ukat Davitan esposapäxaw sas janirakiw jachʼa jachʼa tukkänti. Abigailax jankʼakiw wasitat sartasïna ukat Davitampi casarasirakïna (1 Samuel 25:39-42).

¿Ukham casarasisax wali suma jan kuna llakini ukham qamasiña sañti munpacha? Janiw ukhamäkänti, Davitan esposapäñax chʼamakïnwa. Jupax Ahinoam sat warmimpi casaratänwa, kunjamtï Diosar luqtir warminakax chachapan walja warminakanïpxatap laykux jan waltʼäwinakar saykatapkänxa ukhamarakiw Abigailax jan waltʼäwinakar saykatañapäna.d Ukampis Davitax janïr reyïkasax kunayman jan waltʼäwinakaruw saykatañapäna. Ukhampachasa, Abigailax Davitarux yanaptʼapunïnwa, ukat mä wawanïpxänwa, Abigailarux Davitax munasïnwa ukat jarkʼaqarakïnwa. Mä kutix jan wali jaqinakaw Abigailar katuntasin apapxatäyna, ukatsa qhispiyarakïnwa (1 Samuel 30:1-19). Jïsa, Davitax Jehová Diosjamarakiw mä warmin suma amuytʼiritapata, jan axsariritapata ukat jan jithiqtirïtapat sum uñjarakïna.

[Qhanañchäwinaka]

[28 janan fotopa]

Chachapat sipansa, Abigail warmix istʼasirïnwa

[29 janan fotopa]

Davitampi parlkasaxa, Abigailax llampʼu chuymanïtapa, jan axsarirïtapa ukat chiqapar amuytʼirïtapwa uñachtʼayäna