¿Sapürut Jehová Diosar thaqhasktanjja?

1, 2. 1) ¿Jeremías tiempon jakirinakajj Diosar yupaychañ toqet kunjamäpjjänsa? 2) ¿Usutäpjjatap yatisisajj kunsa lurapjjañapäna?

JEREMIASAJJ wali llakitaw uñjasïna. ¿Kunatsa? Markapajj kunjamtï jikjjataskäna ukat jupanakajj kunjamsa uñjasipjjani uk Diosajj yatiykäna ukaw chuymapan wal llakisiyäna. Ukat nayranakapajj mä uma jalsjamäspa ukat jachanakapajj walja jalir umjamäspa ukwa munäna, ukhamat jachaskakiñataki. Kuntï markapan lurapkäna ukanak uñjasaw wali llaktʼasit jikjjatasïna (Jer. 9:1-3; Jeremías 8:20, 21 liytʼasiñapawa). Jupanakajj Diosan Leyinakaparjamajj janiw sarnaqapkänti ukat arunakaparus janirakiw istʼapkänti, ukatwa jan waltʼäwin uñjasipjjañapäna (Jer. 6:19; 9:13).

² Taqe kunas sumakïskiwa sasin kʼari yatichäwi pʼeqtʼirinakapajj sapjjaspa ukwa judionakajj istʼañ munapjjäna, kunsa Jehová Diosajj jupanakat amuyi ukjja janiw yatiñ munapkänti (Jer. 5:31; 6:14). Kunjamtï mä usut jaqejj qolliripat chuymachtʼkir arunakak istʼañ munki ukat kuna jan waltʼäwintï jikjjataski uk janis yatiñ munkaspa ukar uñtasitäpjjänwa. Jiwasatï wali usuta uñjassna ukhajja, ¿janit qollirimp sum uñjayasisajj ukarjam qollanaka katoqañ munksna? Jehová Diosar yupaychkasajj ukhamarakiwa, Jeremías tiempon jakapkäna ukanakajja, kunjam chuymampis yupaychasipki uk uñjayasiñatakiw jupanakajj Diosar thaqhapjjañapäna. Jupanakajj akham sasaw jisktʼasipjjañapäna: ‘¿Kawkinkis Jehová Diosajja?, [NM]’ sasa (Jer. 2:6, 8).

 3. 1) ¿‘Kawkinkis Jehová Diosajja’ siski uka jisktʼarojj kunjamsa judionakajj qhanañchapjjaspäna? 2) ¿Kunjamatsa Jehová Diosar thaqhapjjaspäna?

³ Kunatï askïki jan ukajj jan askïki uk amtañatakisa ‘kawkinkis Jehová Diosajja’ sasaw jisktʼasipjjañapäna, ukhamatwa Diosan yanapap thaqhapjjatap uñachtʼayapjjaspäna. Uka judionakajja janiw uk lurapkänti. Ukampis Jerusalén markajj tʼunjatäjjäna uka qhepatsa ukat Babilonia markat kuttʼanisasa, ‘Jehová Diosaruw thaqhapjjañapäna’, ukhamatwa jikjjatapjjaspäna ukat thakipsa uñtʼapjjarakispänwa (Jeremías 29:13, 14 liytʼasiñapawa). ¿Kunjamsa thaqhapjjaspäna? Nayraqatjja, Diosan yanaptʼap taqe chuyma mayisisa. David reyejj ukhamwa luräna, jupajj akham sasaw Diosarojj achiktʼasïna: “Tatay, thakim uñachtʼayita, thakiman irpnaqasita” sasa (Sal. 25:4). Sedequías chachajj tunka mara apnaqaskäna ukhajja, mayisitanak istʼir Jehová Diosajja akham sasaw Jeremías profeta toqejj säna: “Nayar artʼasita, nayasti istʼarakïmawa, ukatsti kunanaktejj jumajj jan yatkta, uñjkarakta ukanakwa uñachtʼayarakïma” sasa (Jer. 33:3). Diosat jitheqtir reyisa ukat markasa Jupar thaqhapjjaspäna ukhajja, kuntï ‘jan yatipkäna’ ukanakwa Diosajj jupanakar qhanañchasapäna, sañäni kunjamsa Jerusalén markajj tʼunjätani ukat kunjamaraksa uka chʼusa markajj paqallq tunka mara qhepat wasitat lurasiñapäna ukwa qhanañchaspäna.

4, 5. ¿Kunjamanakatsa judionakajj Jehová Diosar thaqhapjjarakispäna?

⁴ Ukatjja, kunjamsa Diosajj jupanakar walja maranak uñjäna uka toqenakat yatjjatasaw thaqhapjjarakispäna. Ukhamatwa, kunatï Jupatakejj askïki ukat jan askïki ukanak amtapjjaspäna. Jupanakatakejja Moisesan qellqatanakapasa ukat Diosat jan jitheqtasa servirinakan sarnaqäwinakapat qellqatanakasa utjarakïnwa, Israel markana ukat Judá markan reyinakapan sarnaqäwinakapatwa yatipjjäna. Taqe ukanakat amuytʼañasa ukat cheqpach profetanakar istʼañasa, ‘¿kawkinkis Jehová Diosajja?’ siski uka jisktʼar qhanañchañatakiw yanaptʼaspäna.

⁵ Ukatsti, jupanakasa ukat yaqhanakasa kunjamansa jikjjatasipjje uka toqenakat amuytʼasaw Jehová Diosar thaqhapjjaspäna. Ukat jupanakajj janiw yantʼasa ukat pantjasis yateqapjjañapapunïkänti, ukampis kunjamsa sarnaqapjjäna ukat kunsa Jehová Diosajj amuyäna uka toqenakat lupʼiñaw yanaptʼaspäna. Jïsa, ukham amuytʼasajja, kunjamtï sarnaqapkäna ukat kunsa Diosajj amuyi ukwa yatipjjaspäna (Pro. 17:10).

 6. ¿Kunjamsa Job chachan sarnaqäwipajj yanaptʼistu?

⁶ ¿Kunsa uka sarnaqäwit yateqsna? ¿Mä amtar janïr purkasasa ukat kun lurañ ajlliñatakisa ‘kawkinkis Jehová Diosajja’ sasin jisktʼasipuntanti? Awisajj kuns jan amuytʼasis luratas amuyasiñäni ukhajja, janiw aynachtʼañasäkiti. Diosat jan jitheqtir Job tatas jan walin jikjjataskäna ukhajja jupa pachpatakwa llakisjjäna. Taqe jaqes ukham amuyunïtap amtayañatakejja, Eliú chachajj akham sänwa: “Janiw jupanakar irnoqeri Diosarojj thaqtapkiti” sasa (Job 35:10). Ukat sarakïnwa: “[Jehová] Diosan muspharkaña luräwinakap amuytʼarakim” sasa (Job 37:14). Job chachajja, Diosan muspharkañ luräwinakapata ukat jaqenakarojj kunjamsa uñji ukanakwa uñjañapäna. Jupa pachpaw Diosatakjam sarnaqañ yateqawayatayna. Uka jan waltʼäwiru atipjasasa ukat Jehová Diosajj kunjamsa yanaptʼäna uk uñjasasa, akham sänwa: “Nayasti kuntejj jan amuytʼkayäta ukanakatwa parlaskäyätjja, muspharkaña yänakata, kunanakatejj jan amuytʼañjamäki taqe ukanakatwa parlaskäyätjja. Jichhakamasti nayajj jumatjja mayninakan parlatap toqekwa uñtʼayäsmajja, ukampis jichhajj naya kipkaw jumarojj uñkatsma” sasa (Job 42:3, 5).

 7. ¿Kunjamtï 156 janan uñjaski ukarjamajja, kunsa jichhajj yatjjatañäni?

⁷ Jeremiasajja, Jehová Diosar thaqhaskakïnwa ukat jikjjatarakïnwa. Walja maranaka Jupar yupaychkasajja, ‘kawkinkis Jehová Diosajja’ sasin jisktʼasiskakïnwa ukampis markapankirinakajja janiw ukham jisktʼasipkänti. Jupat yateqasisajja, kunjamsa oración toqesa, Bibliat yatjjatasasa ukat jiwasan sarnaqäwis toqesa Jehová Diosar thaqsna ukat jikjjatsna ukanakatwa jichhajj yatjjatañäni (1 Cró. 28:9).

 8. ¿Kunjamanakan jikjjatasisas Jeremiasajj Diosar mayisïna?

⁸ Judá markar walja maranaka yatiykäna ukhajja, taqe chuyma mayisisaw Jeremiasajj Jehová Diosar thaqhäna. Kunapachatï Jeremiasajj jaqenakar yatiyañapäkäna, ukat uka luräwi jan phoqerjam amuyaskäna ukat kunatsa jan walinakajj utjäna ukanak jan sum amuykäna ukhajj Jehová Diosaruw yanap mayïna. Ukatsti Diosajj istʼänwa ukat kunjamsa lurañapäna uksa qhanañcharakïnwa. Ukanakat mä qhawqha yatjjatañäni.

 9. 1) Jeremías 15:15, 16 uka qellqatarjamajja, ¿kunjam arunakampis profetajj mayisïna, ukat kunjamsa Diosajj istʼäna? 2) ¿Kunjamtï jikjjatasktan ukjja kunatsa Diosar yatiyañasäspa?

⁹ Mä urojja, markan jan wali luräwinakapat Jeremiasajj qhanañchañapäkäna ukhajja, taqenis uñiskaspa ukhamwa amuyasïna. Ukatwa Jehová Diosar yanap mayisïna. Oracionapajja Jeremías 15:15, 16 qellqatanwa jikjjatasi, ukanwa kunjamsa Diosan yanaptʼatajj jikjjatasïna uk qhanañchi (liytʼasiñapawa). Kunatï llakisiykäna ukwa yatiyäna, ukat Diosan arunakap jikjjatasajja manqʼäkaspas ukhamwa manqʼantäna, mä arunjja, kusisitaw jikjjatasïna. Jehová Diosan sutip apañasa, ukat arunakap yatiyañasa kunja askisa uk amuyañapatakiw Diosajj yanaptʼäna. Ukhamanakan jikjjatasisajja Diosajj kawkinkisa ukwa sum amuyäna. ¿Kunsa jupat yateqsna?

10. Janiw sutipat parljjäti sasin Jeremiasajj siskäna ukhajja, ¿kunjamatsa Jehová Diosajj yanaptʼäna?

¹⁰ Mä kutejja, Imer chachan yoqapa Pasur (Pasjur) sat kʼari sacerdotejj Jeremiasar nuwantkäna ukhajja, Jehová Diosan sutipat janiw parljjäti sasaw Jeremiasajj säna. Ukham arsutaparojja, ¿kunjamatsa Jehová Diosajj yanaptʼäna? (Jeremías 20:8, 9 liytʼasiñapawa.) Jehová Diosajj alajjpachatsa profetarojj parlankaspa ukham janiw Bibliajj qhanañchkiti. Ukampis arunakapajja ninjamaw nakhantitu chʼakanakamppacha jawqʼjitu sasaw Jeremiasajj säna, ukhamat yatiyaskakïnwa. Kunjamtï uñjawayktanjja, Diosaru taqe chuyma mayisiñampi ukat Munañap phoqhañajj wali askïtap amuyañampiw profetjam irnaqaskakiñapatakejj yanaptʼäna.

11, 12. Jan wali jaqenakan sarnaqäwipat Jeremías profetajj jisktʼkäna ukarojja, ¿kunjamsa Diosajj qhanañchäna?

¹¹ Jan wali jaqenakan sum jakasipjjatapaw Jeremiasar pächasiyäna, uksti Jehová Diosaruw yatiyäna (Jeremías 12:1, 3 liytʼasiñapawa). Jehová Diosajj cheqapar uñjirïtapat janis pächaskchïnjja, kunatï llakisiykäna uk istʼatäñwa munäna. Qhana arsusitapajja, Diosamp wali sum apasitapwa uñachtʼayi, kunjamtï mä wawajj munat awkipampi sum apaskejja ukhama. Kunatsa walja judionakajj jan walinak lurkasas suman jakasipjjäna ukjja Jeremiasajj janiw sum amuykänti. ¿Uka jisktʼapar Diosajj istʼpachänti? Jïsa, jan wali lurir jaqenakarojj tukjäwa sasaw Jehová Diosajj säna (Jer. 12:14). Mayisïwinakap Diosajj istʼkäna ukaw Diosan cheqa kankañapar atinisiskakiñapatakejj yanaptʼpachäna. Ukatwa alajjpachankir Awkiparojj qhana arunakampi ukat sapa kuti mayisirïpachäna.

¹² Sedequías reyin apnaqäwipajj niya tukusiñampejjänwa, babilonionakajj Jerusalén marka muyuntapkäna ukhajja, Jeremiasajj Jehová Diosarojj akham sänwa: “Jumaw sapa mayni jaqeru luratanakap uñjtajja, ukatsti luratanakaparjamarakiw kunsa churtajja” sasa (Jer. 32:19). Cheqaparjam uñjañatakejj kunsa Jehová Diosajj amtäna uk Jeremiasan sum amuyatapwa uka arunakajj uñachtʼayi: Diosajj sapa mayni yupaychirinakapan luratanakapjja uñjiwa ukat taqe chuyma mayisitanakapsa istʼarakiwa, ukat “luratanakaparjamarakiw kunsa churtajja” siski uka arunakajj cheqätapjja Jehová Diosan taqe chuyma servirinakapajj sum amuyapjje.

13. ¿Kunatsa Diosajj munañap phoqapuniniwa sasin atinistanjja?

¹³ Diosajj cheqapar uñjatapsa ukat kunjams amtap phoqe ukat phoqarakini uka toqet inas jan pächaskstanti. Ukhamäkchisa Jeremiasan sarnaqäwipat amuytʼañajj yanaptʼistaspawa ukat kunas llakisiyistu jan ukajj ajjsarayistu ukanaksa Diosaruw yatiyaraksna. Profetjama taqe chuyma mayisiñajja, Diosar jukʼamp atinisiña ukat amtapajj phoqasipuniniw sasin atinisiñasatakiw yanaptʼistani. Ukatjja kunjamsa Diosan amtapajj phoqasi jan ukajj kunatsa jankʼak jan phoqaski ukanak janis amuykstanjja, Jupajj munañaparjamaw taqe kuns luri, ukar atinisitaswa oracionasan uñachtʼaysna. Jehová Diosajja, munañaparu ukat tiempoparuw phoqani. Ukjja Jupaw arsuwayi, ukat janipuniw pächasktanti. Diosan amtapa amuyañataki sapür mayisisa ukat kunjamsa ukajj phoqasi ukanak amuyasajja, sapüruw ‘kawkinkis Jehová Diosajja’ sasin jisktʼasisktanjja (Job 36:5-7, 26).

14. Jeremiasajj Diosan markapan sarnaqäwinakapat yatjjatatapjja, ¿kunjamats yattanjja?

¹⁴ ‘¿Kawkinkis Jehová Diosajja?’ siski uka jisktʼaru qhanañchañatakejja, ‘Diosaruw uñtʼañapäna’ uk jupajj sum yatïna (Jer. 9:24). Nayrïri ukat payïri Reyes libro qellqkäna uka urunakanjja Diosan markapajj kunjamsa sarnaqapjjäna uka toqenakatjja Jeremiasajj sum yatjjatpachäna, kunattejj akham sutinakwa ukan ayti “Salomonan [...] libro[pan] qellqatawa”, “Israelana reyinakapana [...] librona” ukat “Judá ukankir reyinakan [...] libropana” sasa (1 Rey. 11:41; 14:19; 15:7). Ukhamasti, Jehová Diosajj kunanaksa luratayna, kunas Jupatakjamäna ukat markapajj kuntï amtkäna ukjja kunjamsa uñjäna ukanak sum amuyjjäna. Uka urunakanjja, Moisés, Josué, Samuel, David ukat Salomón uka chachanakar Diosajj amuytʼayas qellqaykäna uka libronakajj utjarakïnwa. Jupat nayra utjkäna uka profetanakarusa ukat mitanakaparusa sum uñtʼarakïna. ¿Kuntï yatjjatkän ukajj kunjamsa yanaptʼäna?

15. ¿Kunjamsa Elías profetan profecía arunakap yatjjatañajj Jeremiasar yanaptʼäna?

¹⁵ Samaria marka apnaqer Acab reyin warmipajj kunjamsa jikjjatasiñapäna uk Jeremiasajj qellqarakïnwa, anunakawa Jezabel warmirojj manqʼantapjjani Jezreel sat oraqena sasaw Elías profetajj arsutayna (1 Rey. 21:23). Kunjamtï yatktanjja, uka profeciarjamajj niya tunka kimsaqallqoni maranak qhepatjja, Jezabel warmejj mä ventanat jaqoqata, Jehú chachan caballonakapampi takjjatata ukat anunakan manqʼantataw uñjasïna (2 Rey. 9:31-37). Eliasan profeciapajj kunjamsa phoqasïna ukanak yatjjatañajja Diosan arunakapar atinisiñatakiw Jeremiasarojj yanaptʼpachäna. Jïsa profetjama irnaqaskakïna ukhajja, Diosan luratanakapat yatjjatañaw jukʼamp iyawsäwipar yanaptʼäna.

16, 17. ¿Kunatsa Jeremiasajj jan wali reyinakarojj yatiyaskakpachäna?

¹⁶ Jichhajj yaqhatarak amuytʼañäni. Jeremiasarojj Joacim (Jehoiaquim) ukat Sedequías uka jan wali reyinakan arknaqatpachas yatiyaskakiñatakejj ¿kunas jupar yanaptʼäna? “Mä suma jachʼa perqani markäkaspas ukhama, mä hierrot sayir perqäkas[pas] ukhama, broncet lurat perqäkas[pas]” ukhamwa Jehová Diosajj Judá reyinakan nayraqatapan jupar tukuyäna (Jer. 1:18, 19). Khitinakasa ukat kunjamsa Judá ukat Israel marka apnaqapjjäna ukanakjja Jeremiasajj sum yatjjatäna. Kunjamsa Manasés chachajj “Tatitun templopana paypacha patiopanjja yaqha [altaranak] lurayäna, ukatsti alajjpachankir taqe [warawaranakaru] ukanakjja loqtäna”, wawanakaparus sacrificion loqtañatakiw nakhantayäna ukat jan juchaninakarus jiwarayarakïnwa, taqe ukanakjja sum yatïna (2 Rey. 21:1-7, 16; Jeremías 15:4 liytʼasiñapawa). Ukatjja Manasés chachajj wali altʼat chuymanir tuküna ukat Diosar mayisiskakïna ukhajja, “Diosajj juparojj istʼänwa, ukhamarak achiktʼasitanakapsa, ukatsti [...] wastat apnaqjjañapataki” uttʼayjjäna ukanaksa sum yatïna (2 Crónicas 33:12, 13 liytʼasiñapawa).

¹⁷ Kunjamsa Jehová Diosajj Manasés reyirojj khuyaptʼayäna ukjja, janiw Jeremiasajj qellqatanakapan qhanañchkiti. Ukat niya tunka phesqani marakiw uka reyin jiwatapatjj pasaskäna ukhaw Jeremiasajj profetjam irnaqañ qalltäna, ukhamasti uka reyejj nayra jan wali luräwipat arrepentiskäna ukhajja, kunjamäjjänsa ukjja sumwa yatpachäna. Manasés chachajj jan wal lurkäna ukhajj kunjamans jikjjatasïna ukat arrepentisjjäna ukhas kunjamäjjänsa, ukanak yatiñaw Jeremiasarojj Diosan khuyapayasiñap thaqhapjjañapatakejj Sedequiasjam reyinakaru yatiyaskakiñatak yanaptʼäna. Kʼari diosanakar yupaychirïtapata ukat jan juchan jaqenakar jiwayirit wali uñtʼat reyisa, arrepentisïnwa ukat Diosan perdonapsa jikjjatarakïnwa. Jiwasatï Jeremías tiempon jakasäna ukhajja, ¿yaqha jan wali reyinakajj apnaqkäna uka urunakan yatiyaskakiñatakejj Manasés chachan sarnaqäwipajj yanaptʼistaspänti?

18. ¿Kunarutï Urías chachajj purtʼaskäna ukatjja kunsa Jeremiasajj yateqpachäna, ukat ukjja kunjamatsa yattanjja?

¹⁸ Profetjam irnaqkäna ukhajja, kunjamsa mitanakapajj sarnaqapjjäna ukanak uñjasaw Jeremiasajj yateqäna. Jupanakat maynejj Urías (Uriya) sat sutinïnwa. Kunapachatï Joacim reyejj apnaqkäna ukhajja, Jerusalén ukat Judá marka contraw arsüna, ukampis reyir ajjsarasajj Egipto markaruw tʼijtjjäna. Ukat reyejj irptanipjjam ukat jiwayapjjam sasaw yanapirinakapar säna (Jer. 26:20-23). ¿Kunarutï Urías chachajj purtʼaskäna ukatjja Jeremiasajj yateqpachänti? Jïsa, kunattejj jan ajjsarasaw kawkhantï templojj jikjjataskäna uka cheqanakan judionakan tʼunjäwipat qhanañchaskakïna. Jeremiasajj jan ajjsartʼasaw yatiyaskakïna, ukat Jehová Diosajj janipuniw jaytanukkänti. Jupajja, Safán chachan Ahicam sat yoqap toqew profetar jan walinakat jarkʼaqpachäna (Jer. 26:24).

19. Jehová Diosajj markapatak profetanak khitatapatjja, ¿kunsa Jeremiasajj yateqäna?

¹⁹ Jehová Diosajj Jeremías toqe markapar yatiykäna ukhajja, kunjamtï jakkäna ukanakatwa yateqarakïna. Joacim reyejj pusi mara apnaqaskäna ukhajja, Josías reyejj apnaqkäna uka urunakan taqe kuntï Diosajj jupar parlkäna ukhat jupan urunakapkamajj kuna arunaksa katoqäna ukanak qellqam sasaw Jehová Diosajj Jeremiasar säna. ¿Kuna amtampisa? Judionakajj jan wali luräwinakap jaytapjjañapatak chʼamañchtʼañatakïnwa ukhamat Diosan perdonap katoqapjjañapataki (Jeremías 36:1-3 liytʼasiñapawa). Jeremiasajja, wali alwat sartasaw Diosan arunakap yatiyir saräna, ukatsti ajjtaskañ jan wali luräwinakap jaytapjjañapatakiw achiktʼäna (Jer. 44:4). Jehová Diosajj khuyapayasiñapatwa profetanakar khitäna, ukjja Jeremiasajj pachpa sarnaqäwipatwa amuyäna. ¿Ukajj janit Diosjam khuyaptʼayasirïñapatakejj yanaptʼkpachäna? (2 Cró. 36:15.) Jerusalén markajj tʼunjatäjjäna uka qhepatjja, kunatsa akham säna uk amuytanwa: “Tatitun munasiñapasti, khuyapayasiñapasa jan tukuskirirakiwa. Sapärmanthiw machaqar tukuraki” sasa (Lam. 3:22, 23).

20. ¿Kunjamsa Jeremiasat yateqasisajj Diosar thaqsna?

²⁰ Sapüruw kuns amttanjja. ¿Diosan munañaparjam lurañatakit chʼamachastanjja, mä arunjja ‘kawkinkis Jehová Diosajja’ sasin jisktʼastanti? (Jer. 2:6-8.) Amtañäni, Jeremiasajj Taqe Chʼamani Diosaruw mä amtar puriñatakejj jakʼachasïna, ukampis judionakajja janiw ukhamäpkänti. Jeremiasat yateqasisa kuntï lurktan uka toqet Diosajj kunsa amuyi uk sapüru thaqhañajj wali askipuniwa.

21. Yatiyir sarktan ukhajj jan suma chuymampi katoqkistaspa ukhajja, ¿kunjamsa oracionajj yanaptʼistaspa?

²¹ Janiw jachʼa amtar puriñatakik Diosar thaqhañasäkiti. Kuna urutï Diosan arunakap yatiyir sarañatak tiempo apstʼaskta uka urutakis Jupar thaqhañasarakiwa. Sañäni, inas ikiñat sartasajj wali qenayrantata alajjpach uñjchisma, utaruk qheparam siskiristams ukhama, ukat yatiyapkäta ukawjajj inas walja kuti yatiyatäjjchi, jan ukajj uka cheqan jakirinakajj janipun istʼañs munapkchiti uk inas amtaschisma. Ukhaman jikjjatasisajja, ¿janit oración toqe Jehová Diosar thaqtañajj wakiskaspa? Ukham lurasajja, Diosan arunakapajj wali askïtapa ukat taqe jaqenakar Diosajj yatiyañas munatap amuyañatakiw yanaptʼätam. Ukhamatwa, Diosan arunakapajj kusisiñ churatap amuyäta kunjamtï Jeremiasajj jikjjataskäna ukhama (Jer. 15:16, 20). Diosan arunakap yatiykasajj jan suma chuymampi maynejj katoqeristam jan ukajj jiskʼachiristam ukhajja, kunjamsa jikjjatasta uk Diosaruw yatiyañama. Suma arunakampi parljjayañatakisa ukat suma chuymampi Diosan arunakap yatiyaskakiñatakisa Jupajj qollan ajayumpiw yanaptʼistaspa, uk janipun armapjjañäniti (Luc. 12:11, 12).

22. ¿Kunatsa yaqhep oracionanakajj jan istʼatäkaspa?

²² Ukampisa, yaqhep oracionanakajj janiw istʼatäkaspati (Lamentaciones 3:44 liytʼasiñapawa). Kutkatasiri yaqhep judionakan mayisitanakapjja, Jehová Diosajj janiw istʼkänti. ¿Kunatsa? Jupanakajj ‘Diosan leyiparojj janiw istʼañ munapkänti’ (Pro. 28:9). Kuntï jupanakar uñjasajj yateqkäna ukjja Jeremiasajj sum amtpachäna, jiwasajj ukhamarakwa amtañasäspa: maynitï mayisitaparjam jan sarnaqki ukajja, Diosatakejj janiw walïkiti ukat mayisitanakapajj janiw istʼatäkaspati. Jan ukar purtʼasiñatak chʼamachasipjjapuniñäni.

23, 24. 1) Diosan munañap uñtʼañ munstan ukhajja, ¿kun lurañasas wakisi? 2) ¿Kunjamsa Bibliat sapaki yatjjatkasajj jukʼamp sum yatjjatsna?

²³ Jehová Diosaru taqe chuyma yanapap mayisisajja, Bibliat sapaki yatjjataskakiñasawa, ukaw Diosan munañap sum uñtʼañatak yanaptʼistani. Ukhamarus Jeremiasajj janiw phoqatpach Biblianïkänti, ukampis jiwasan utjistuwa. Kunjamtï Jeremiasajj Diosan amuytʼayata libronaka qellqañatak yatjjatañapäkänjja, ukhamarakiw Diosan arunakapat yatjjatañasa ukat ‘kawkinkis Jehová Diosajja’ sasin jisktʼasisaw Jupan yanapap thaqsna. Kunapachatï Jupan munañap uñtʼañataki chʼamachasktan ukhajja, Diosar atinisitaswa uñachtʼaytanjja, ukatjja jalir umani jawir lakaru ayruntata qoqjamäñäniwa, saphinakapasti uka uma toqeru saphintatarakïniwa (Jeremías 17:5-8 liytʼasiñapawa).

²⁴ Wali amuyumpi Biblia liyktan ukhajja, Diosajj kunsa jiwasat suyi ukanak amuyañatakiw chʼamachasiñasa. Biblian yatichäwinakapat kawkïrsa amtañ muntan ukat ukarjam sarnaqsna ukanak thaqtañäni. Ukat sarnaqäwinakata, Diosan kamachinakapata, leyinakapata ukat yatiñapat parlki ukajj kunjamsa sapüru mä amtar puriñataki yanaptʼistaspa uk amuytʼañäni. Jiwasatï yanapapa thaqhañäni ukhajja, kunatï jiwasatakejj chʼamäki ukanak lurañatakiw Diosajj Arup toqe yatichistaspa. Jïsa, kunanaktï nayrajj ‘jan yatkayätan, uñjkarakiyätan ukanakwa’ Bibliampejj amuysna (Jer. 33:3).

25, 26. ¿Kunatsa experiencianakat amuytʼañajj yanaptʼistaspa?

²⁵ Ukatsti kunjamanakansa jiwasasa ukat yaqhanakasa jikjjatasipjje taqe ukanakat amuytʼañaw yanaptʼarakistaspa. Kunjamtï Urías profetajj Diosar jan atinisjjäna ukhamanakaruw yaqhep jilat kullakanakajj purtʼasiwayapjje (2 Tim. 4:10). Jupanakan pantjasitapat yateqassnawa ukat janiw jupanakjam jan waltʼäwinakar purkañäniti. Kunjamsa Jehová Diosajj khuyapayasiñapampi uñjistu ukanak lupʼiñasawa, kunjamtï Jeremiasajj Diosan khuyapayañapata ukat sinttʼasitapata yuspärkäna ukhama. Jan kunas kamachañjamäjjani ukhasa, Diosas armtʼaskistaspa ukham janipuniw amuyañasäkiti. Kunjamtï Jeremiasar uñjkäna ukhamarakiw Diosajj uñjaskistani.

²⁶ Jichhürunakan kunjamsa Diosajj yupaychirinakapar yanaptʼi uka toqenakat lupʼisajja, jiwasarojj kunjamsa sapürus taqe kunan yanaptʼistu ukanakwa amuyañäni. Japón markankir Aki sat kullakat parltʼañäni, cristianjam uñtʼatäñajj janis askïkaspa ukhamwa jupajj amuyäna. Mä urojja, tamanak tumptʼir jilatan warmipamp yatiyaskäna ukhajja, akham sasaw säna: “Kuntï Jehová Diosatak lurkta ukjja Jupajj janiw askit uñjkpachati ukat janiw askirjamas uñjkitaniti, ukhamäkchisa nayrar sarantañatak chʼamachasiskaktwa” sasa. Tamanak tumptʼir jilatan warmipajja, jupar uñkatasajj akham sänwa: “Nayajj Diosar taqe chuyma serviritwa uñtʼsma” sasa. Qhepatjja, uka chʼamañchtʼkir arunakatwa Aki sat kullakajj amtasïna. Cheqansa, janis taqe chuyma Diosar servkaspa ukham amuyañapatakejja janiw kunas utjkänti. Ukat Aki sat kullakajj akham sasaw Diosar mayisïna: “Kawkharuy khitañ munchista ukar khitita. Kuntï lurañajj munkta ukwa luräjja” sasa. Ukat qhepatjja, yaqha markan mä jiskʼa tamajj japonés aru parlapkatayna uka jilat kullakanakan tantachäwiparuw saratayna ukanjja uka aru parliri ukat ukar yanaptʼañapatak qheparañapatakiw maynir thaqhasipkatayna. Aki sat kullakajja uka markanwa nasitayna, ukar sarañapatakejja tramitenak lurañajj janiw chʼamäkänti. Ukampisa, ¿kawkinsa jakaspäna? Mä kullakan phuchhapaw utapat mistjjatayna, ukan qheparam sasaw uka kullakajj satayna. “Kunjamtï mä rompecabeza anatañajj yäpar armthapiskejja, ukhamwa Jehová Diosajj thakinak jistʼaräna” sasaw Aki kullakajj säna.

27. ¿Kunatsa janïr kun lurkasajj ‘kawkinkis Jehová Diosajja’ sasin jisktʼasiñasa?

²⁷ Sapaki Bibliat yatjjatkasasa jan ukajj liykasasa, kunjamsa Diosan yanapap katoqapjje ukjja, walja jilat kullakanakaw qhanañchtʼistaspa. Juma pachpajj inas ukham uñjaraksta. Ukajja, jukʼampi Jehová Diosar jakʼachasiñataki ukat sapüru Jupar oración lurañatakiw chʼamañchtʼistu. Ukhamasti ‘kawkinkis Jehová Diosajja’ sasin jisktʼasiskakiñäni ukhajja, thakipan sarañasatakiw yanapistani (Isa. 30:21).