Noé, Daniel, Job chachanakjam Diosar taqe chuym confiyapjjañäni istʼapjjarakiñäni

1, 2. 1) Noé, Daniel, Job uka chachanakat yatjjatañajja, ¿kunatsa chʼamañchtʼistaspa? 2) Aka yatichäwejj kuna textot apstʼatäkitï ukjja, ¿kunapachas Ezequielajj qellqäna?

¿USUTA, qollqet pistʼata, jan waltʼayañatak arknaqata, yaqha ukham jan walinakanti uñjasta? ¿Awisajj Jehová Diosar kusisita serviñajj chʼamakiti? Ukhamächi ukhajja, Noé, Daniel, Job uka chachanakan sarnaqäwipat yatjjatañaw chʼamañchtʼätam. Jupanakajj pantjasir jaqëpjjänwa, jiwasjamarakiw jan walinakan uñjasipjjäna. Jupanakat yaqhepajja, niyaw jiwayatas uñjasipjjäna. Ukhamäkchïnsa, Diosat janipuniw jitheqtapkänti. Taqe chuyma confiyirita, istʼasiritwa Diosajj jupanakar uñtʼäna (Ezequiel 14:12-14 liytʼañataki).

² Aka yatichäwejj kuna textot apstʼatäkitï ukjja, Ezequiel chachajj Babilonia markanwa 612 antes de Cristo (a.C.) maran qellqäna,a Jerusalén markan tukjasiñapatak phesqa mara faltkipana (Ezeq. 1:1-3; 8:1). Cheqas Noé, Daniel, Job uka chachanakjamajj jukʼanikiw Jerusalén markan Diosar jan jitheqtas servipjjäna, istʼapjjarakïna, jupanakakiw salvasipjjarakïna (Ezeq. 9:1-6). Ukanakat yaqhepajj akanakawa: Jeremías, Baruc, Ébed-mélec ukhamarak recabitanaka.

 3. ¿Kunsa aka yatichäwin yatjjataskañäni?

³ Aka ñanqha pachajj tukjatäjjani ukhajja, Jehová Diosajj khitinakarutï Noé, Daniel, Job uka chachanakarjam cheqapar sarnaqerit uñjkani ukanakarukiw salvani (Apoc. 7:9, 14). Kunatsa Jehová Diosajj uka chachanakar cheqapar sarnaqerit uñjäna, ukwa jichhajj yatjjataskañäni. Sapa maynit yatjjatkasajja, kuna jan walinakansa uñjasipjjäna ukwa yatjjatañäni, ukjjarusti kunjamsa jupat yateqasisa Diosar taqe chuym confiysna, istʼaraksna ukwa yateqarakiñäni.

4, 5. 1) ¿Kuna jan walinakansa Noé chachajj uñjasïna? 2) ¿Kunatsa aguantatapajj wali musparkañajja?

⁴ ¿Kuna jan walinakarus saykatäna? Noé chachan achachilapan awkipa, mä arunjja Enoc chachajj jakkäna uka tiemponjja, jaqenakajj jan walinakpunwa lurapjjäna. Jehová Dios ‘contraw jan walinak parljjapjjäna’ (Jud. 14, 15). Sapürutjamaw jan walinakajj jukʼamp utj-jjäna. Noé chachajj jakkäna uka urunakanjja, “aka oraqejj ñanqha lurañampi [...] phoqhantatänwa”. Jan wali angelanakajja, jaqer tukusaw aka oraqenkir warminakampi casarasipjjäna, wawanakapajj jan wali qhoru jaqenakäpjjänwa (Gén. 6:2-4, 11, 12). Ukampis Noé chachajj janiw jupanakjamäkänti. Bibliarjamajja, “[Jehová] Tatitojj Noerojj wali sumwa uñjarakïna”. Jupajj “Diosar jaysasapuniw sarnaqarakirïnjja. Jaqenak taypinsti jupa sapakiw Diosan munañaparjamajj sarnaqäna” (Gén. 6:8, 9).

⁵ ¿Kunsa uka arunakajj Noé chachat amuytʼayistu? Qhawqha tiempos Noé chachajj Jehová Diosar jan jitheqtasa, jan wali jaqenak taypin servïna uk nayraqat amuytʼañäni. Jichha tiemponjja jaqenakajj 70, 80 maranakakwa jaktanjja. Ukampis Noé chachajja, niya 600 maranakaw uka jan wali jaqenak taypin Diosar servïna (Gén. 7:11). Noé chachan tiempopanjja, janiw mä congregacionajj utjkänti, janiw jilanakapas kullakanakapas Diosar serviñan yanaptʼapkänti, ukampis jiwasajj mä congregacionanwa Diosar sirvtanjja, ukanwa chʼamañchtʼasiraktanjja.b

 6. ¿Kunjamsa Noé chachajj jan ajjsartʼirïtap uñachtʼayäna?

⁶ Noé chachajj janiw suma jaqëñatakiki chʼamachaskänti, jan ukasti, jan ajjsartʼasaw Diosar confiyatapjja yatiyäna. Ukatwa Bibliajj “kunatï cheqapäki uk yatiyiri” sasin jupat qhanañchi (2 Ped. 2:5). Apóstol Pablojj akham qellqarakïna: “Diosar confiyatap laykuw akapachar juchañchäna” sasa (Heb. 11:7). Noé chachatjja, jaqenakajj larusipjjänwa, inas jan wal lurañatakis, arknaqapjjchïna. Ukampis janipuniw “jaqenakar ajjsa[rirïkänti]” (Prov. 29:25). Jehová Diosaw jan ajjsarirïñapatak yanaptʼäna.

 7. ¿Kuna jan walinakansa Noé chachajj uñjasïna?

⁷ Noé chachajj 500 maranak jilaw Jehová Diosan munañaparjam sarnaqjjäna, ukhaw Diosajj mä arca lurañapatak mayïna, ukhamat jaqenakasa, animalanakas salvasipjjañapataki (Gén. 5:32; 6:14). Jupatakejja, mä jachʼa arca lurañajj chʼamakïpachänwa. Kunjamsa jaqenakajj uk uñjasin larusipjjani, jarkʼañsa munapjjani uk yatirakpachänwa. Ukampis Jehová Diosaruw confiyäna, istʼarakïna. “Kunjämtejj Diosajj siskatayna ukhamwa taqe kunsa luräna” (Gén. 6:22).

 8. Diosaw kunatï wakiski uk churistani sasin confiyatapjja, ¿kunjamsa Noé chachajj uñachtʼayäna?

⁸ Noé chachatakejj esposaparu, wawanakaparu sum uywañas chʼamakïpachänwa. Uma Juicio nayrajja, yapuchañajj wali chʼama tukuñänwa. Noé chachatakis ukhamarakïpachänwa (Gén. 5:28, 29). Ukampis, janiw familiapatak kunatï wakiski ukanakat sinti llakiskänti, antisas Diosar serviñaw jupatakejj nayrankäna. Jupajj 40 jan ukajj 50 maranakas arca lurkchïnjja, Jehová Diosar serviñaw nayrankäna. Uma Juicio qhepatsa 350 maranakampiw Diosar serviskakïna (Gén. 9:28). Noé chachajj taqe chuymaw Diosar confiyäna, Jupar istʼasapuniw sarnaqerïna, ukatwa wali yateqaskayajja.

9, 10. 1) ¿Kunjamsa Noé chachjam Diosar confiysna, istʼaraksna? 2) Diosan leyinakapar istʼañäni ukhajja, ¿kunsa Diosajj lurani?

⁹ ¿Kunjamsa Noé chachjam Diosar taqe chuym confiysna, istʼaraksna? Jehová Diosajj cheqapar lurki uk arjjatasa, Supayan apnaqat akapachampi jan chikachasisa, Diosan Reinop nayrar uchasa (Mat. 6:33; Juan 15:19). Cheqas ukham luratasatwa akapachankir jaqenakajj uñisipjjestu. Amuytʼañataki, chacha warmjam ikthapiñ toqetsa, casarasiñ toqetsa Diosan leyinakaparjamaw sarnaqtanjja, ukatwa yaqhep cheqanakan televisionansa radionsa jiskʼachapjjestu (Malaquías 3:17, 18 liytʼañataki). Ukampis Noé chachjamaw jaqenakar jan ajjsarktanti, antisas Jehová Diosaruw ajjsartanjja. Jupakiw wiñay jakañ churistaspa (Luc. 12:4, 5).

¹⁰ Sapa mayniw akham jisktʼasiñasa: “¿Jaqenakajj nayat larusipkchinisa, jiskʼachapkchitanisa Jehová Diosar serviskakïti? ¿Jakañatak kunatï wakiski uk jikjjatañajj chʼamäni ukhasa, Diosaw yanaptʼitani sasajj confiyaskakïti?” sasa. Jumatï Noé chachat yateqasis Diosar taqe chuym confiyäta, istʼarakïta ukhajja, Jehová Diosaw yanaptʼätam, janirakiw jaytkätamti (Filip. 4:6, 7).

11. ¿Kuna jan walinakansa Daniel waynasa kimsa amigonakapas Babilonia markan uñjasipjjäna? (Página 3 ukankir dibujo uñjjattʼäta).

¹¹ ¿Kuna jan walinakarus saykatäna? Danielajj Babilonia markar apatänwa, uka markankirinakajja, yaqha diosanakar adoriri, layqasiri ukhamäpjjänwa. Babilonionakajj judionakar uñisipjjänwa, Jehová Diosatsa larusipjjänwa (Sal. 137:1, 3). Taqe ukanakajja, Danielarusa, Diosat jan jitheqtir judionakarusa, wal chuym ustʼaypachäna. Daniel waynarusa, Hananías, Misael, Azarías amigonakaparus reyir servipjjañapatakiw Babilonionakajj wakichasipkäna, ukatwa kuns lurasipki uk wal uñchʼukipjjpachäna. Kunsa manqʼapjjani uksa jupanakaw amtapjjäna. ‘Ukampisa Danielajj janiw uka reyin manqʼapampisa ni vinopampis qʼañuchasiñ munkänti’ (Dan. 1:5-8, 14-17).

12. 1) ¿Danielajj kunjam jaqënsa? 2) ¿Kunjam jaqetsa Diosajj Danielar uñjäna?

¹² Daniel waynajj yaqha jan waliruw saykatañapäna. Niyakejjay taqe kuns sum lurañ yatchïnjja, jukʼampi lurañanakwa reyejj churäna (Dan. 1:19, 20). Danielajj inas jachʼa jachʼa tukjjchispäna, taqe kunan razonanïkaspas ukham amuyasjjchispäna. Ukampis humilde chuymanïnwa, kuntï lurkäna ukanakatsa Jehová Diosaruw jachʼañchäna (Dan. 2:30). Amuytʼañataki, Danielajj waynäskchïnsa, Jehová Diosajj Noé, Job chachanakampi chikwa sutip aytäna, ukhamat jupanakat yateqasiñasataki. Diosajj Daniel waynar wal confiyäna, ukham confiyasajj janiw pantjaskänti. Danielajj jiwañkamaw Diosar servïna, istʼarakïna. Niya 100 maranïkäna ukhaw mä angelajj munasiñampi akham säna: “Diosan munatapa” sasa (Dan. 10:11).

13. ¿Kunatsa Jehová Diosajj Daniel chachan jilïrit uttʼayatäñapatak yanaptʼpachäna?

¹³ Diosan yanaptʼatapatwa, Danielarojj Babilonia markansa, Medopersia markansa mä jachʼa jilïrit uttʼayapjjäna (Dan. 1:21; 6:1, 2). Inas markapar yanaptʼañapataki Diosajj ukham yanaptʼchïna, kunjamtï Egipto markan José chacharusa, Persia markan Ester, Mardoqueo ukanakarus yanaptʼkäna ukhama (Dan. 2:48).c Jehová Diosan yanaptʼapa ukham uñjañajj Ezequiel chacharusa, jiltʼapkäna uka katuntat judionakarus wal chuymachtʼpachäna.

14, 15. 1) Daniel chachan tiempopampi jichha tiempompejja, ¿kunansa niya pachpaki? 2) ¿Kunsa awk taykanakajj Danielan awk taykapat yateqasipjjaspa?

¹⁴ ¿Kunjamsa Daniel chachjam Diosar taqe chuym confiysna, istʼaraksna? Diosar adorañ toqetsa, sum sarnaqañ toqetsa, Jachʼa Babiloniampi qʼañuchat tiemponwa jaktanjja, uka Babiloniasti oraqpachankir kʼari religionanak apnaqeripawa. Bibliarjamajja, ‘Jachʼa Babiloniajj demonionakan utjäwipawa’ (Apoc. 18:2). Ukampis jiwasajj yaqha markat jutiri jaqenakjamätanwa, ukatwa jaqenakajj jan jupanakjamätas laykojj jiwasat larusipjje (Mar. 13:13). Ukhamajj Daniel chachjam Jehová Diosaru jakʼachasipjjañäni. Jiwasatï Jupar confiyañäni, humilde chuymaniñäni, istʼasirïñäni ukhajja, Jehová Diosajj munasirakistaniwa (Hageo 2:7).

¹⁵ Awk taykanakajja, Danielan awk taykapat wal yateqasipjjaspa. ¿Kunatsa? Danielajj wawäkän ukhajja, Judá markan jan walinakaw utjäna, ukhamäkchïnsa Jehová Diosar munasiskakïnwa. Cheqas awk taykapan sum yatichatapatwa Diosar ukham munasïna (Prov. 22:6). Amuytʼañataki, Daniel sutejj “Diosaw juezajajja” sañwa muni, ukhamasti, Danielan awk taykapajj Diosar munasipjjpachänwa. Awk taykanaka, wawanakamar Jehová Diosat pacienciampiw yatichapjjañama. Jan qarjtapjjamti (Efes. 6:4). Jupanakampi orasipjjam, jupanakatakis mayipjjarakim. Jumanakatï Biblian yatichäwinakap chuymanakapar uchapjjätajja, Jehová Diosajj bendisipjjätamwa (Sal. 37:5).

16, 17. ¿Kuna jan walinakarus Job chachajj saykatäna?

¹⁶ ¿Kuna jan walinakarus saykatäna? Job chachan jakäwipajj mä akatjamatwa mayjtʼäna. “Jupasti inti jalsu toqenkir jaqenakatjja wali qamirïnwa” (Job 1:3). Ukhamarak wali uñtʼata, wali respetatarakïnwa (Job 29:7-16). Ukhamäkchïnsa, janiw mayninakat sipansa, wali jilankkaspasa, janis Diosan yanaptʼap munkaspa ukham amuyaskänti. Antisas Jehová Diosajj jupat akham sänwa: ‘Nayan servirejja, cheqa, aski jaqe, jupasti janipuniw khitirus ñanqha lurañ munkiti’ sasa (Job 1:8).

¹⁷ Ukampis jakäwipajj mä akatjamatwa mayjtʼäna. Janiw wawanakasa ni kunapas utj-jjänti, wali llakitäsajj jiwjjañwa munäna. Kunjamtï yatktanjja, taqe uka jan walinak Supayaw luraskäna, interés laykukis Job chachajj Diosar sirvkaspa ukham kʼarintarakïna (Job 1:9, 10 liytʼañataki). Supayajja uka arunakampejj Jehová Dios contraw parlaskäna. Ukhamajj ¿kʼarïtap uñachtʼayañatakejj kunsa Diosajj luräna? Diosat jan jitheqtatapsa, Jupar taqe chuyma munasitapsa Job pachpa uñachtʼayañapatakiw Diosajj jaytäna.

18. 1) ¿Kunas Job chachan sarnaqäwipat musparaytamjja? 2) Kunjamtï Jehová Diosajj Job chachar uñjkäna ukajj ¿kunsa Jehová Diosat yatichistu?

¹⁸ Jehová Diosas Job chachar jan walinakampi yantʼkaspa ukham amuyañapatakiw Supayajj jan walinak luräna (Job 1:13-21). Ukatjja, kimsa kʼari amigonakapaw chuymachtʼir puripjjäna. Ukampis chuymachtʼañat sipansa, jan sinttʼasisaw ‘Diosaw castigtamjja’ sasin sapjjäna (Job 2:11; 22:1, 5-10). Ukhampachas Job chachajj janipuniw Diosat jitheqtkänti. Awisajj ‘jan sum amuytʼasisas (NM)’ parlkchïnjja, kunjamsa tʼaqesiskäna, ukjja Diosajj sum yatïna (Job 6:1-3). Kunja llakitänsa uksa yatirakïnwa, Supayajj walja kutis jan wali arunakampi, kʼarintasa Job chachar llakimpi aynachtʼaykchïnjja, janipuniw Diosat jitheqtkänti. Taqe jan walinakajj tukuyjjäna ukhajja, Jehová Diosajj kunanakapatï utjkän ukat sipansa, mä ukhampwa churäna, 140 maranakampwa yaptʼarakïna (Sant. 5:11). Job chachajj uka qhepatjja, taqe chuymaw Diosar serviskakïna, ¿kunjamatsa uk yattanjja? Kunattejj Job chachajj walja patak maranak jiwatäjjäna, ukhaw Ezequiel profetajj aka yatichäwin textop qellqäna.

19, 20. 1) ¿Kunjamsa Job chachjam Diosar taqe chuym confiysna istʼaraksna? 2) ¿Kunjamsa Jehová Diosjam khuyaptʼayasiñamp yaqhanakar uñjsna?

¹⁹ ¿Kunjamsa Job chachjam Diosar taqe chuym confiysna, istʼaraksna? Walinsa jan walinsa uñjaskchiñänejja, Jehová Diosar serviñaw jakäwisan nayrankañapa. Taqe chuymaw Jupar confiyañasa istʼañasaraki. Ukham lurañatakejj walja razonanakaw utjistu. Jiwasajj Job chachat sipansa, khitis Supayajja, kuna jan walinakampis yantʼistu uk sum yattanjja (2 Cor. 2:11). Kunatsa Diosajj jan walinak jan chhaqtayki ukjja, Bibliankir Job librow sum qhanañchistu. Danielan profeciapatjja, Diosan Reinopajj oraqpachankir mä gobiernötapa, Jesusan amparapankatapsa sum yatiraktanjja (Dan. 7:13, 14). Uka Reinorakiw taqe jan walinak wiñayatak chhaqtayani, uksa sum yatiraktanjja.

²⁰ Job chachan sarnaqäwipajja, tʼaqesipki uka jilat kullakanakasat sinttʼasirïñ yatichistu. Awisajja, Job chachjamaw jan sum amuytʼasis parlapjjarakispa (Ecl. 7:7). Cheqas juchañchañat sipansa, kunatsa ukham sapjje uk amuyañatakiw chʼamachasiñasa. Ukhamatwa khuyapayasir Jehová Dios Awkisat yateqasiñäni (Sal. 103:8).

21. Noé, Daniel, Job chachanakan sarnaqäwinakapajja, ¿kunansa 1 Pedro 5:10 qellqatampejj niya pachpakïpjje?

²¹ Noé, Daniel, Job uka chachanakajj janiw mä pachpa tiempon jakapkänti, janirakiw pachpa jan walinakansa uñjasipkänti, ukampis uka jan walinakarojj atipjapjjänwa. Sarnaqäwinakapajj apóstol Pedron arunakap amtayistu, jupajj akham sänwa: “Wali khuyapayasir Diosajja, [...] mä jukʼa tiempo tʼaqesipjjatam qhepatjja, jumanakar wakichañ tukuyjjaniwa. Jupajj sum saytʼayapjjätam, chʼamaniruw tukuyapjjarakïtam, suma cimientjjaruw uttʼayapjjarakïtam” sasa (1 Ped. 5:10).

22. ¿Kunsa jutïr yatichäwin yatjjataskañäni?

²² Apóstol Pedron arunakaparjamajja, Jehová Diosaw servirinakaparojj jan ajjsarirïpjjañapatakisa, suma saytʼatäpjjañapatakis yanaptʼani. Taqeniw Diosat jan jitheqtañataki, Jupar serviskakiñataki chʼam katoqañ muntanjja. Ukatwa Noé, Daniel, Job chachanakjam Jehová Diosar taqe chuym istʼaña, confiyañ muntanjja. Kunjamtï jutïr yatichäwin yatjjataskañänejja, jupanakajj Diosar sum uñtʼapjjäna, ukaw Jupar taqe chuym serviñatak yanaptʼäna. Cheqas kunjamtï Proverbios 28:5 textojj siskejja, Diosajj kuntï jupanakat suykäna uk sum amuyapjjäna. Jiwasajj jupanakjamaw luraraksna.