Mateus

28 Dung salpu ari Sabbat, di ari parjolo sian minggu i, dung binsar mata ni ari, laho ma si Maria Magdalena dohot si Maria na asing tu kuburan.

2 Masa ma gempa* na mansai gogo, ai turun do suru-suruan ni Jahowa sian banua ginjang. Dung i digulingkon ma batu i jala hundul ma ibana di atasna. 3 Marsinondang do suru-suruan i songon hilap jala pangkeanna bontar songon salju. 4 Hitir-hitir ma angka panjaga i alani biarna, pola marjogal songon halak na mate.

5 Alai didok suru-suruan i ma tu angka borua i, “Unang ma mabiar, huboto do Jesus naung diuhum mate di hau i do na niluluanmuna. 6 Ndang dison be ibana, ai nunga dipahehe ibana songon na nidokna i. Ro ma hamu jala ida ma inganan hapeahanna hian. 7 Hatop ma hamu laho jala paboa ma tu angka siseanna, nunga hehe ibana sian na mate. Ai nunga dijoloani ibana hamu tu Galilea. Idaonmuna do ibana disi. Ingot ma na hudok on.”

8 Hatop ma nasida laho sian kuburan i. Marlojong ma nasida mardongan biar dohot las ni roha laho paboahon i tu angka sisean ni Jesus. 9 Tompu ma didapothon Jesus nasida jala ninna ma, “Horas!” Gabe didapothon nasida ma ibana, ditiop ma patna jala marsinggang tu ibana. 10 Dung i ninna Jesus ma tu nasida, “Unang hamu mabiar! Laho ma hamu, paboa ma tu angka haha anggingku asa ro tu Galilea jala idaon ni nasida ma ahu disi.”

11 Tingki di pardalanan dope angka borua i, mulak ma deba angka panjaga i tu kota laho paboahon sude na masa i tu angka malim kepala.* 12 Marrapot ma nasida dohot angka pangituai, dung i dilehon ma godang hepeng logam perak tu angka tentara i. 13 Ninna ma, “Dokkon hamu ma, ‘Na ro do angka siseanna manangko bangkena bornginna i tingki modom hami.’ 14 Jala molo tarboto i tu gubernur, hupatorang* hami pe tu ibana boasa masa i, unang pola mabiar hamu.” 15 Dijalo nasida ma hepeng logam perak i jala dihatahon nasida ma songon naung diparentahon i, ujungna gabe rarat ma barita i di saluhut halak Jahudi sahat tu saonari.

16 Laho ma sisean na 11 i tu Galilea, tu dolok naung pinaboa ni Jesus hian asa pajumpang nasida. 17 Tingki diida angka sisean i Jesus, marsinggang ma nasida, alai na deba ganggu dope rohana. 18 Didapothon Jesus ma nasida jala ninna ma, “Nunga dipasahat tu ahu saluhut huaso na di banua ginjang dohot na di tano on. 19 Alani i, laho ma hamu, bahen ma saluhut halak sian nasa bangso gabe siseanku, didi hamu ma nasida di bagasan goar ni Ama, Anak, dohot tondi parbadia. 20 Ajari hamu ma nasida mangulahon sude naung huparentahon tu hamu. Ida ma, sai na dongananku do hamu sahat tu panutup ni jaman on.”*