Lukas

2 Di tingki i, ro ma parenta sian Kesar Augustus asa sude jolma di sandok tano on pasurathon dirina. 2 (Dibahen do on parjolo sahali di tingki ni si Kirenius gabe gubernur ni Siria.) 3 Gabe mulak ma sude jolma pasurathon dirina tu huta hatubuanna be. 4 Borhat ma nang si Josep sian kota Nasaret di Galilea tu Judea tu kota ni si Daud na margoar Betlehem, ala pinompar ni si Daud do ibana. 5 Laho ma ibana pasurathon dirina rap dohot si Maria naung gabe tunggane boruna jala nunga jonok tingki ni si Maria laho tubu-tubuan.* 6 Dung disi nasida, dapot ma tingki ni si Maria laho tubu-tubuan.* 7 Ditubuhon ma sada anak, anak buhabajuna. Dibungkus ma dohot lampin jala dipeakhon tu bagasan palangka,* ai ndang adong dapot ni nasida inganan laho marborngin.

8 Adong do di luat i angka parmahan na marborngin di adaran manjaga biru-biru ni nasida tingki borngin. 9 Tompu ma jongjong suru-suruan ni Jahowa di jolo ni angka parmahan i jala marsinondang ma hasangapon ni Jahowa di tonga-tonga ni nasida. Gabe mabiar situtu ma nasida. 10 Alai didok suru-suruan i ma tu angka parmahan i, “Unang hamu mabiar, ai na pasahathon barita na uli do ahu tu hamu taringot tu las ni roha na laho hilalaon ni sude jolma. 11 Nunga tubu di hamu sadari on Sipalua, di huta ni si Daud, i ma Kristus Tuan i. 12 On ma tanda di hamu: Jumpangmuna ma sada poso-poso dibungkus dohot lampin jala peak di bagasan palangka.” 13 Tompu ma ro mansai torop angka tentara parbanua ginjang rap dohot suru-suruan i mamuji Debata jala ninna ma, 14 “Hasangapon ma di Debata di banua ginjang jala dame ma di tano on di tonga-tonga ni jolma na hinalomohon ni rohana.”

15 Dung mulak angka suru-suruan i tu banua ginjang manadingkon nasida, ninna angka parmahan i ma sama nasida, “Beta ma hita tu Betlehem marnida na masa, na pinaboa ni Jahowa tu hita.” 16 Hatop ma nasida laho jala jumpang ni nasida ma si Maria, si Josep dohot poso-poso i peak di bagasan palangka. 17 Dung diida nasida i, dipaboa angka parmahan i ma barita naung binege ni nasida taringot tu dakdanak i. 18 Longang do sude na mambege na pinaboa ni angka parmahan i. 19 Alai, disimpan si Maria do sude hata i di rohana jala dirimang-rimangi. 20 Dung i mulak ma angka parmahan i, dipuji jala dipasangap ma Debata alani sude na binege dohot na niida ni nasida, songon na pinaboa ni suru-suruan i tu nasida.

21 Dung ualu ari, jumpang ma tingkina asa disunat dakdanak i. Dibahen ma goarna Jesus, goar na pinaboa ni suru-suruan i andorang so di bortian dope ibana.

22 Dung jumpang muse tingki laho paiashon diri mangihuthon Patik ni si Musa, diboan si Maria dohot si Josep ma Jesus tu Jerusalem laho pasahathon ibana tu Jahowa, 23 songon na tarsurat di Patik ni Jahowa, “Nasa baoa buhabaju, ingkon papulikon do tu Jahowa.” 24 Dipelehon nasida do pelean hombar tu Patik ni Jahowa, i ma “sapasang anduhur manang dua anak ni darapati”.

25 Adong do sahalak baoa di Jerusalem na margoar si Simeon. Diulahon ibana do na sintong jala dihabiari do Debata. Dipaima-ima do pangapulion tu Israel jala ditogu-togu tondi parbadia do ibana. 26 Jala nunga dipaboa Debata tu ibana marhite tondi parbadia, na so mate ibana so jolo diida Kristus na sinuru ni Jahowa. 27 Marhite panogu-noguon ni tondi parbadia, laho ma ibana tu bagas joro. Tingki diboan natua-tuana Jesus tusi laho mangulahon na nidok ni Patik i, 28 diabing si Simeon ma poso-poso i jala dipuji ma Debata, ninna ma, 29 “Saonari, ale Tuan Natumimbul, nunga boi be mate naposomon di bagasan dame songon na nidokmi. 30 Ai nunga huida dalan haluaon na sian Ho 31 na pinaradem di jolo ni sude bangso, 32 ibana do panondang na pasidingkon haholomon na manghungkupi angka bangso jala gabe hasangapon ni bangsom Israel.” 33 Mansai longang ma amang dohot inang ni dakdanak i mambege na nidokna taringot tu dakdanak i. 34 Dipasu-pasu si Simeon ma nasida jala ninna ma tu si Maria ina ni dakdanak i, “Alani dakdanak on, torop ma halak Israel madabu manang hehe. Jala torop ma halak manginsahi ibana, 35 marhite i patar ma tarida isi ni roha ni torop halak. Hansit ma hilalaonmu, songon na tinusuk ni sada podang na ganjang.”

36 Adong ma disi sahalak panurirang borua naung matua, i ma si Hanna boru ni si Panuel sian marga Aser. Dung marhamulian, holan pitu taon do ibana rap dohot tunggane dolina. 37 Mabalu ma ibana jala saonari nunga marumur 84 taon. Sai ro do ibana tu bagas joro arian nang borngin laho marhobas tu Debata, marhite marpuasa dohot martangiang. 38 Di tingki i, didapothon ibana ma nasida jala didok ma mauliate tu Debata. Dihatahon ibana ma taringot tu dakdanak i tu sude halak na maima-ima haluaon ni Jerusalem.

39 Dung sidung diulahon si Josep dohot si Maria sude na hombar tu Patik ni Jahowa, mulak ma nasida tu hutana di Nasaret na di Galilea. 40 Lam magodang ma dakdanak i jala lam gogo, lam marbisuk jala tongtong ma ibana dihalomohon Debata.

41 Ganup taon, somal do natua-tuana laho tu Jerusalem mangarayahon Paska. 42 Dung marumur 12 taon Jesus, borhat do nasida tu perayaan i songon na somal. 43 Tingki mulak nasida dung sidung perayaan i, tinggal do Jesus di Jerusalem di na so pamotoan ni natua-tuana. 44 Dirimpu nasida do naung rap ibana dohot dongan sapardalanan. Dung sadari mardalan, dilului nasida ma ibana di tonga-tonga ni angka keluarga dohot ale-ale ni nasida. 45 Alai ndang dapot ni nasida ibana, mulak ma muse nasida tu Jerusalem jala sai dilului ma ibana. 46 Dung tolu ari, jumpang ni nasida ma ibana di bagas joro. Hundul do ibana di tonga-tonga ni angka guru, manangihon jala manungkuni nasida. 47 Longang do sude na umbege hatana i alani pangantusion dohot angka alusna. 48 Dung diida natua-tuana i ibana, longang ma nasida. Didok inana i ma, “Boasa bahenonmu songon on tu hami amang? Susa do amangmu dohot ahu mangalului ho.” 49 Alai ninna ibana ma tu nasida, “Boasa pola luluanmuna ahu? Ndang diboto hamu na ingkon di jabu ni Damang ahu?” 50 Alai ndang diantusi nasida na nidokna i.

51 Dung i, mulak ma ibana raphon nasida tu Nasaret. Tongtong do dioloi ibana nasida. Jala disimpan inana i do sude hatana i di bagasan rohana. 52 Lam magodang ma Jesus, lam marbisuk jala lam dihalomohon Debata dohot jolma ma ibana.