Ulaon ni Apostel

13 Adong do manang na piga panurirang dohot guru di huria na di Antiokia, i ma si Barnabas, si Simeon na laos digoari si Niger, si Lucius na sian Kirene, si Menahem dongan sasingkola ni Raja Herodes, dohot si Saulus. 2 Tingki manomba Jahowa nasida jala marpuasa, marhite tondi parbadia didok ma tu nasida, “Papulik hamu ma si Barnabas dohot si Saulus di ahu, laho mangulahon ulaon naung hutontuhon tu nasida.” 3 Dung marpuasa jala martangiang nasida, diampehon nasida ma tanganna tu si Barnabas dohot tu si Saulus. Dung i, dipaborhat ma nasida na dua.

4 Borhat ma nasida na dua tu Seloikia, nasida naung disuru marhite tondi parbadia i. Sian i markapal ma nasida tu Siprus. 5 Dung sahat nasida di Salamis, dibaritahon nasida ma hata ni Debata di angka sinagoga* ni halak Jahudi. Ditogihon nasida do si Johannes asa adong mangurupi nasida.

6 Dung didalani nasida sude pulo i sahat tu Papos, pajumpang ma nasida dohot sahalak Jahudi na margoar si Bar Jesus. Ibana sahalak datu jala panurirang na mangkatahon na so tutu.* 7 Karejo do ibana tu gubernur* Sergius Paulus, i ma sahalak baoa na pistar. Dijou gubernur i ma si Barnabas dohot si Saulus ala lomo rohana mambege hata ni Debata. 8 Alai dialo si Bar Jesus na laos digoari si Elimas ma nasida (Elimas lapatanna “datu”). Diambati ibana do gubernur i asa unang porsea tu Tuan. 9 Alai gok tondi parbadia ma si Saulus na laos digoari si Paulus. Dipanotnoti ibana ma datu i. 10 Jala didok ma, “E ho anak ni Sibolis! Panipu jala parjahat do ho. Dialo ho do sude na sintong. Boasa sai dipapeol ho dalan ni Jahowa na tigor i? 11 Ida ma! Uhumon ni Jahowa ma ho. Mapitung ma ho jala ndang idaonmu be mata ni ari manang na sadia leleng on.” Satongkin i gabe rambon jala holom ma diida ibana. Dung i, dadap-dadap ma ibana mangalului sasahalak laho manogu-nogu ibana. 12 Marnida na masa i, gabe porsea ma gubernur i ai longang do rohana tu pangajarion ni Jahowa.

13 Sian Papos, markapal ma si Paulus dohot angka donganna jala sahat ma nasida di Perge di Pampilia. Alai ditadingkon si Johannes ma nasida jala mulak tu Jerusalem. 14 Nang pe songon i, ditorushon nasida do pardalananna sian Perge tu Antiokia di Pisidia. Di tingki ari Sabbat laho ma nasida tu sinagoga,* hundul ma nasida disi. 15 Dung sae dijahahon Patik dohot na Sinurat ni Angka Panurirang tu natorop i, disuru pamimpin ni sinagoga* i ma sasahalak mandok tu nasida, “Hamu angka dongan, molo adong hata sidohononmu laho patoguhon natorop on, dokkon hamu ma.” 16 Dung i jongjong ma si Paulus, dibahen ma tanda marhite tanganna, ninna ma,

“Hamu angka dongan, halak Israel dohot angka na mangkabiari Debata, tangihon hamu ma. 17 Dipillit Debata ni bangso Israel do angka ompunta, diurupi do nasida tingki panompang dope nasida di Mesir. Jala diboan do nasida kaluar sian i marhite huasona na balga. 18 Jala sabar do Ibana maradophon nasida hira-hira 40 taon di padang pasir.* 19 Dung diripashon Ibana pitu bangso di tano Kanaan, dilehon Ibana ma tano i gabe ampuna ni nasida. 20 Saluhutna i masa hira-hira 450 taon.

“Dung i dilehon ma tu nasida angka panguhum sahat tu tingki ni panurirang Samuel. 21 Alai dungkon i, dipangido nasida ma sahalak raja. Gabe dilehon Debata ma tu nasida si Saul anak ni si Kis sian marga Benjamin jala mamarenta ma ibana saleleng 40 taon. 22 Dung dibolongkon Debata si Saul, dipillit Ibana ma si Daud gabe raja ni nasida. Didok Debata do taringot tu si Daud, ninna ma, ‘Nunga jumpang ahu si Daud anak ni si Isai, las do rohangku mangida ibana. Ulahononna do sude na huhalomohon.’ 23 Hombar tu janji ni Debata, sian pinomparna ma ro sipalua ni Israel, i ma Jesus. 24 Andorang so ro sipalua i, nunga dibaritahon si Johannes tu sude halak Israel taringot tu pandidion na patuduhon hamubaon ni roha. 25 Dung naeng sidung ulaon ni si Johannes, didok ibana ma, ‘Ndang ahu na hinirim ni rohamuna i. Alai na ro ma ibana di pudingku, haru mambungka sipatuna pe ndang tama ahu.’

26 “Alani i hamu angka dongan, pinompar ni si Abraham dohot angka na mangkabiari Debata, nunga dipaboa tu hita barita taringot tu haluaon i. 27 Alai ndang ditanda penduduk ni Jerusalem dohot pamarenta ni nasida sipalua i. Diuhumi nasida do ibana. Gabe dipasaut nasida do na Sinurat ni Angka Panurirang, na dijahahon ganup ari Sabbat. 28 Nang pe ndang adong dapot ni nasida hasalaanna, alai dipangido nasida do tu si Latus asa diuhum mate ibana. 29 Dung dipasaut nasida sude na tarsurat taringot tu ibana, dipaturun ma ibana sian hau i jala dipeakkon tu kuburan. 30 Alai dipahehe Debata do ibana sian na mate. 31 Jala manang na piga ari, dipatuduhon ibana do dirina tu angka na mangihuthon ibana sian Galilea sahat tu Jerusalem. Nasida ma na paboahon taringot tu ibana tu angka halak.

32 “Alani i, hupaboa hami ma tu hamu barita na uli taringot tu janji na binahen ni Debata tu angka ompunta. 33 Nunga dipasaut Debata janjina i tu hita angka pinompar ni nasida, marhite pahehehon Jesus. Songon na tarsurat di psalmen na paduahon, ‘Anakku do ho; mulai sadari on amangmu ma ahu.’ 34 Dipahehe Debata do ibana sian na mate. Jala na so mulak be ibana mardaging jolma na boi mate manang busuk. Ai didok Debata do, ‘Pos ma rohamuna, patuduhononku do holong na manongtong tu hamuna songon naung hujanjihon tu si Daud.’ 35 Jala didok do muse di psalmen na asing, ‘Ndang loasonmu busuk naposom na marsihohot i.’ 36 Disomba si Daud do Debata saleleng ni ngoluna. Dung mate, dikuburhon do ibana di lambung ni angka ompuna jala busuk do dagingna. 37 Alai Jesus na pinahehe ni Debata sian na mate, ndang busuk ibana.

38 “Hupaboa ma on tu hamu angka dongan, marhite ibana do sesaon ni Debata dosamuna, 39 jala marhite ibana ma dohonon ni Debata ndang marsala ganup halak na porsea tu ibana. Alai anggo Patik ni si Musa, ndang boi manesa hasalaanmuna. 40 Alani i manat ma hamu, asa unang masa tu hamu songon na Sinurat ni Angka Panurirang, 41 ‘Parrohahon hamu ma, hamu angka pangaleai. Tarsonggot ma hamu jala mate. Ai huulahon do sada ulaon di tingkimuna on, alai ndang porsea hamu disi nang pe adong na patorangkon i sude tu hamu.’”

42 Tingki naeng kaluar si Paulus dohot si Barnabas sian i, dipangido halak na disi ma asa dipatorang nasida muse taringot tusi di ari Sabbat na mangihut. 43 Dung sae parpunguan di sinagoga* i, godang ma halak Jahudi dohot halak na mangihuthon agama Jahudi* na manomba Debata mandapothon si Paulus dohot si Barnabas. Dijujui si Paulus dohot si Barnabas ma nasida asa tongtong di bagasan asi ni roha ni Debata na mansai balga i.

44 Di ari Sabbat na mangihut, hampir sude ma halak na di kota i marpungu laho manangihon hata ni Jahowa. 45 Dung diida halak Jahudi angka natorop i, mangiburu ma roha ni nasida. Dialo jala diinsahi nasida ma na nidok ni si Paulus i. 46 Di bagasan habaranion didok si Paulus dohot si Barnabas ma tu nasida, “Tu hamu do nian ringkot parjolo pasahaton hata ni Debata. Alai ndang dijalo hamu i jala dibahen hamu do dirimuna ndang tama manjalo hangoluan saleleng ni lelengna. Nuaeng pe, laho nama hami marbarita tu bangso na asing. 47 Ai nunga diparentahon Jahowa tu hami, tingki na nidokna i, ‘Nunga hupillit ho gabe hatiuron tu angka bangso, asa baritahononmu haluaon sahat tu ujung ni tano on.’”

48 Dung dibege halak na sian bangso na asing hata i, las ma roha ni nasida, gabe dipuji nasida ma hata ni Jahowa. Jala gabe porsea ma sude halak na marpangalaho na denggan na mambahen nasida tama mandapot hangoluan saleleng ni lelengna. 49 Ujungna, gabe tarsar ma hata ni Jahowa tu sude luat i. 50 Alai dijujui halak Jahudi ma angka borua na sangap na manomba Debata dohot angka baoa na sangap di kota i, asa dialo nasida si Paulus dohot si Barnabas. Gabe dibalbali ma si Paulus dohot si Barnabas jala dipalao ma nasida sahat tu parbatasan ni kota i. 51 Dipaspashon si Paulus dohot si Barnabas ma orbuk ni pat ni nasida tu halak na disi. Dung i borhat ma nasida tu Ikonium. 52 Alai tongtong ma marlas ni roha angka sisean i jala gok tondi parbadia do nasida.