1 Korint

7 Saonari, on ma alus ni sungkun-sungkun na sinuratmuna i: Dumenggan ma sahalak baoa ndang mangulahon seks tu* sahalak borua. 2 Alai alani godang ni halak na mangulahon seks na so patut,* ganup ma baoa martunggane boru jala ganup ma borua martunggane doli. 3 Dilehon tunggane doli ma hak* ni tunggane boruna. Jala dilehon tunggane boru ma hak ni tunggane dolina. 4 Ndang marhuaso tunggane boru tu dagingna sandiri, alai tunggane dolina do na marhuaso. Songon i ma, ndang marhuaso tunggane doli tu dagingna sandiri, alai tunggane boruna do na marhuaso. 5 Unang ma ditahan tunggane doli hak* ni tunggane boruna jala unang ma ditahan tunggane boru hak ni tunggane dolina. Asing ma molo nunga saroha hamu asa unang mangulahon i satongkin, laho mangalehon tingkimuna martangiang. Alai dungkon i ingkon marsada do hamu, asa unang gabe diela-ela Sibolis hamu ala ndang boi dirajai hamu dirimuna. 6 Alai ndang parenta na hudok on. Boi do i ulahononmuna manang ndang. 7 Naeng ma nian ninna rohangku sude jolma songon ahu. Alai ganup do halak dapotan silehon-lehon sian Debata. Alani i do adong na mamillit marhasohotan jala adong na mamillit ndang marhasohotan.

8 Tu angka na so marhasohotan dohot tu angka ina na mabalu, hudok ma tu hamu, dumenggan ma nasida tongtong ndang mardongan saripe songon ahu. 9 Alai molo so boi dirajai nasida dirina, dumenggan ma nasida marhasohotan sian apala sai marsigorgor giot-giot ni daging* ni nasida.

10 Hupaboa ma parenta on tu angka na marhasohotan, sian Tuan i do parenta on ndang sian ahu. Ndang boi tunggane boru manadingkon tunggane dolina. 11 Alai molo ingkon tadingkononna do tunggane dolina i, tongtong ma ibana ndang marhasohotan. Molo so i, mulak* ma ibana muse tu tunggane dolina. Jala tunggane doli, ndang boi tadingkononna tunggane boruna.

12 Hudok ma tu angka na asing, alai ndang sian Tuan i na hudok on, sian ahu do. Molo ndang halak na porsea tunggane boru ni sahalak donganta baoa, jala olo do tunggane boruna i rap tading dohot ibana, unang ma ditadingkon ibana tunggane boruna i. 13 Molo ndang halak na porsea tunggane doli ni sahalak donganta borua, jala olo do tunggane dolina i rap tading dohot ibana, unang ma ditadingkon ibana tunggane dolina i. 14 Ai nunga gabe badia tunggane doli na so porsea i, alani tunggane boruna. Jala nunga gabe badia tunggane boru na so porsea i, alani tunggane dolina. Molo ndang songon i, ramun ma angka ianakhonmuna. Alai saonari, nunga badia be nasida. 15 Alai molo ditadingkon tunggane doli manang tunggane boru na so porsea i do dongan saripena, loas ma ibana laho. Molo masa sisongon i, ndang pola ingkon rap tading be donganta baoa manang donganta borua i dohot dongan saripena na so porsea. Ai nunga dijou Debata hamu asa mangolu di bagasan dame. 16 Hamu angka tunggane boru, sian dia ma diboto hamu na so boi hamu paluahon tunggane dolimuna? Hamu pe angka tunggane doli, sian dia ma diboto hamu na so boi hamu paluahon tunggane borumuna?

17 Nang pe songon i, ganup ma halak mangolu hombar tu silehon-lehon ni Jahowa, i ma songon tingki na dijou Debata i ibana. Jala hupasahat do tudu-tudu on di sude huria. 18 Molo marsunat do sasahalak tingki dijou Debata, tongtong ma ibana songon i. Jala molo ndang marsunat ibana tingki dijou Debata, unang pola disunat ibana. 19 Marsunat manang na so marsunat pe sasahalak, ndang i na ringkot. Alai, mangoloi parenta ni Debata do na ringkot. 20 Songon dia pe sasahalak tingki dijou, hot ma ibana songon i. 21 Hatoban do ho tingki dijou? Unang pola marsak ho alani i. Alai molo boi do ho malua, marsitutu ma ho asa malua. 22 Ai manang ise hatoban na tarjou gabe siihuthon Tuan, halak na dimerdekahon do i jala ampuna ni Tuan. Suang songon i ma, manang ise na merdeka jala na tarjou, gabe hatoban ni Kristus ma ibana. 23 Ai arga do hamu ditobus.* Alani i, unang be olo hamu gabe hatoban ni jolma. 24 Hamu ale angka dongan, songon dia pe sasahalak tingki dijou, hot ma ibana songon i di jolo ni Debata.

25 Saonari, taringot tu halak na so hea marhasohotan, ndang adong hujalo parenta sian Tuan i taringot tu nasida. Alai ala dipatuduhon Tuan i do asi ni rohana tu ahu, boi do hamu porsea tu hatangku taringot tu nasida. 26 Ala tingki hasusaan do saonari, dumenggan ma sasahalak tongtong hot songon ibana nuaeng. 27 Adong do tunggane borum? Unang ma tadingkon ibana. Alai, molo ndang adong dope tunggane borum unang pola lului. 28 Molo marhasohotan ho, ndang mardosa ho disi. Jala molo marhasohotan halak na so adong dope dongan saripena, ndang mardosa ibana. Alai halak na marhasohotan hilalaonna do godang hasusaan. Alani i, naeng hupadao do nian hamu sian i.

29 Ale angka dongan, parrohahon hamu ma on, otik nama tingkina. Mulai saonari, songon na so martunggane boru ma halak naung martunggane boru. 30 Jala songon na so tangis ma halak na tangis, songon halak na so marlas ni roha ma halak na marlas ni roha, songon halak na so marnampuna ma halak na manuhor, 31 jala songon halak na so mandapot gok laba sian portibi on ma halak na mandapot laba sian portibi on. Ai muba do sude na masa di portibi on. 32 Didok rohangku, asa malua do hamu sian holso ni roha. Ai baoa na so mangoli, angka na hombar tu ulaon ni Tuan i do disarihon,* ala naeng las do roha ni Tuan bahenonna. 33 Alai halak na mangoli, angka na di portibi on do disarihon ibana, ai naeng las do roha ni tunggane boruna bahenonna, 34 gabe tarbagi ma rohana. Borua na so muli jala namarbaju dope, angka ulaon ni Tuan i do disarihon* asa badia daging dohot pingkiranna. Alai, angka na di portibi on do disarihon halak na muli, ai naeng do bahenonna las roha ni tunggane dolina. 35 Hudok pe songon i, laho mambahen na denggan do ahu tu hamu, ndang na laho mangambati* hamu. Alai na lomo do rohangku manjujui hamu asa ulahononmuna na denggan, asa tongtong marhobas tu Tuan i jala ndang adong na mangambati.

36 Alai molo so boi do dirajai halak na so marhasohotan giot-giot ni dagingna,* dumenggan ma ibana marhasohotan molo nunga tuk umurna. Ai ndang mardosa ibana disi. 37 Alai molo didok roha ni sasahalak ndang porlu ibana marhasohotan, boi dirajai ibana giot-giot ni dagingna,* jala nunga ditontuhon di rohana na so marhasohotan ibana, na denggan do na binahenna i. 38 Alani i, na denggan do na binahen ni halak na marhasohotan, alai dumenggan do molo ndang marhasohotan.

39 Ndang boi marhasohotan sahalak tunggane boru tu na asing, saleleng mangolu dope tunggane dolina. Alai molo dung mate tunggane dolina, boi ma ibana muli tu manang ise pe lomo ni rohana, asal ma tu halak na mangihuthon Tuan. 40 Alai ninna rohangku, dumenggan ma asa unang marhasohotan be ibana, jala pos do rohangku adong do tondi parbadia di ahu.