Pilippi

1 Sian si Paulus dohot si Timoteus, naposo ni Kristus Jesus, mandapothon sude angka na badia, angka sintua, dohot angka parhobas na adong di Pilippi na marsada dohot Kristus Jesus.

2 Anggiat ma dijalo hamu asi ni roha na mansai balga dohot hadameon sian Debata Amangta dohot sian Tuan Jesus Kristus.

3 Sai mandok mauliate do ahu tu Debata molo huingot hamu. 4 Sai hutangiangkon do hamu di bagasan las ni roha 5 marningot na binahenmuna humongkop barita na uli sian mulai dibege hamu i sahat tu tingki on. 6 Alani i pos do rohangku di Debata, naung mamungka ulaon na denggan di tonga-tongamuna, urupanna do hamu pasaehon i sahat tu ari ni Kristus Jesus i. 7 Ndang sala molo songon i pandapothu taringot tu hamu sude, ai tongtong do hamu di bagasan rohangku. Rap do hamu dohot ahu mangkilala asi ni roha na mansai balga i, tingki dipenjara ahu nang tingki di jolo ni pamarenta laho humongkop barita na uli.

8 Diboto Debata do sihol ni rohangku tu hamu sude, ai holong situtu do rohangku tu hamu songon holong ni Kristus Jesus. 9 Sai hutangiangkon do asa lam martamba-tamba holongmuna, parbinotoanmuna dohot pangantusionmuna na bagas. 10 Hutangiangkon do asa diboto hamu dia na rumingkot, alani i gabe ndang marcacat* jala ndang gabe tartuktuk na asing alani hamu sahat tu ari ni Kristus i. 11 Hutangiangkon do muse asa diurupi Jesus Kristus hamu mangulahon godang ulaon na denggan. Dung i gabe dipasangap jala dipuji ma Debata.

12 Porlu do botoonmuna on angka dongan, gabe lam tarbarita do barita na uli alani na masa tu ahu. 13 Ai diboto sude halak do songon i nang angka pengawal ni istana, alani Kristus do ahu dipenjarahon. 14 Jala ala na dipenjarahon i ahu, gabe lam togu do haporseaon ni godangan angka dongan jala gabe lam barani do nasida paboahon hata ni Debata.

15 Adong do nian na paboahon taringot tu Kristus i alani late ni roha jala ala naeng marbada. Alai adong do deba na mangulahon i sian ias ni roha. 16 Ala holong do roha ni nasida tu Kristus i umbahen diulahon nasida i sian ias ni roha. Ai diboto nasida do naung dipillit ahu mampartahanhon barita na uli. 17 Alai halak na mangulahon i alani late ni roha, holan naeng marbada do nasida jala ndang sian ias ni rohana mangulahon i. Dirimpu nasida do gabe marsak ahu di bagasan penjara alani i. 18 Alai ndang pola boha i. Sian ias ni roha manang ndang nasida mangulahon i, gabe tarbarita do Kristus alani i jala las do rohangku disi. Gariada sai marlas ni roha do ahu, 19 ai huboto do dapothu do haluaon alani tangiangmuna dohot ala diurupi tondi parbadia na sian Jesus Kristus. 20 Pos do rohangku jala mangkirim do ahu ndang na laho maila ahu. Ala ndang mabiar ahu paboahon i, gabe dipasangap ma Kristus saonari songon di tingki naung salpu. Asa marhite pamatangku, dipasangap ma ibana manang mangolu pe ahu manang na mate.

21 Molo di ahu, tu Kristus do hangoluan jala laba do hamatean. 22 Molo umleleng ahu mangolu di tano on, godang ma na boi huulahon tu Kristus. Alai ndang paboaonku manang na dia na hupillit. 23 Maol do ahu mamillit na dua i. Lomo do rohangku manadingkon hangoluan di tano on asa rap dohot Kristus, ai dumenggan do i. 24 Alai gumodang do labana di hamu molo tongtong ahu mangolu di tano on. 25 Alani i huboto do na tongtong ahu mangolu jala rap dohot hamu, asa boi lam denggan hamu marhobas tu Debata jala marlas ni roha di bagasan haporseaon. 26 Dung i, marlas ni roha situtu ma hamu di bagasan Kristus Jesus tingki ro ahu mandapothon hamu.

27 Pahombar hamu ma pangalahomuna tu barita na uli taringot tu Kristus i. Asa molo ro ahu manang na ndang, begeonku ma barita taringot tu hamu jala botoonku ma na togu hamu jongjong, saroha, sapingkiran, masiurupan asa tongtong porsea tu barita na uli, 28 jala ndang mabiar tu musu. On ma na patuduhon na laho mate do nasida, alai na laho malua ma hamu. Jala Debata do na patuduhon on. 29 Nunga dilehon hasangapon tu hamu, asa dohot hamu marsitaonon alani Kristus jala ndang holan porsea tu ibana. 30 Nunga dihilala hamu saonari parungkilon songon na huhilala, jala dibege hamu do na marungkil ahu sahat tu saonari.