Pilippi

4 Alani i angka dongan, togu ma hamu jongjong, ai siihuthon Tuhan* do hamu. Hamu do las ni rohangku jala songon mahkota di ahu. Holong do rohangku tu hamu jala masihol do ahu tu hamu.

2 Hupangido ma tu si Euodia dohot tu si Sintike, asa marsada ni roha nasida marhobas tu Tuhan.* 3 Hupangido ma muse tu hamu angka dongan na marsihohot, sai urupi hamu ma ibotonta na dua on. Nunga loja nasida mangurupi ahu humongkop barita na uli. Urupi ma nang si Klemen dohot angka dongan na asing na tarsurat goarna di buku hangoluan.

4 Sai marlas ni roha ma hamu alani Tuhan.* Hudok ma muse: Marlas ni roha ma hamu! 5 Patuduhon ma tu saluhut halak na marbisuk do hamu. Nunga jonok be Tuhan.* 6 Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon. 7 Asa marhite Kristus Jesus, lehonon ni Debata ma tu hamu hadameon na so boi diantusi jolma, na boi manjaga roha dohot pingkiranmuna.

8 Alani i angka dongan, tongtong ma pingkirhon hamu angka na sintong, na ringkot, na badia, na hombar tu lomo ni roha ni Debata, na mambahen halak marholong ni roha, na patut sihataon, na denggan, dohot na patut sipujion. 9 Ulahon hamu ma na pinarsiajaranmuna, na jinalomuna, na binegemuna, dohot na niidamuna sian ahu. Dung i donganan ni Debata silehon dame i ma hamu.

10 Ahu naposo ni Tuhan,* las situtu do rohangku ala tongtong do ahu diingot hamu sian najolo sahat tu saonari. Diingot hamu do nian ahu najolo alai ndang boi diurupi hamu ahu. 11 Hudok pe songon i, ndang alana hurangan ahu. Ai nunga marsiajar ahu asa tongtong marlas ni roha songon dia pe parngoluonku. 12 Huboto do songon dia na marhahurangan jala huboto do songon dia na marlobi-lobi. Manang aha pe na masa tu ngolungku, butong manang male, marlobi-lobi manang marhahurangan, nunga huparsiajari be rahasiana mangkalashon na adong. 13 Margogo do ahu di sude na masa, ala dilehon Debata do huaso tu ahu.

14 Nang pe songon i, diurupi hamu do ahu di hasusaanki. 15 Hamu angka halak na di Pilippi, diboto hamu do holan hamu na mangurupi ahu jala na huurupi, dung dibege hamu parjolo sahali barita na uli jala tingki na borhat i ahu sian Makedonia. 16 Tingki di Tessalonik ahu, dilehon hamu do na porlu di ahu, ndang holan sahali alai dua hali. 17 Ndang laho mangido asa diurupi hamu ahu, alai lomo do rohangku asa parohon laba tu hamu angka na denggan na binahenmuna. 18 Adong do sude na huhaporluhon, gariada lobi. Ndang hurangan be ahu saonari dung hujalo na nilehonmuna i marhite si Epaproditus, i ma pelean na angur, na mambahen las roha ni Debata. 19 Alani i, lehonon ni Debata do sude na porlu di hamu marhite Kristus Jesus. Ai mansai balga do hasangaponna. 20 Hasangapon ma di Debatanta Ama i saleleng ni lelengna. Amen.

21 Pasahat hamu ma tabengku tu angka na badia na marsada di bagasan Kristus Jesus. Sahat ma tu hamu tabe ni angka dongan na rap dohot ahu. 22 Sahat ma tu hamu tabe ni angka na badia, tarlumobi na adong di istana ni Kesar.

23 Sai didongani asi ni roha ni Tuan Jesus Kristus na mansai balga i ma haburjuon na pinatudumuna.