Heber

10 Sude na adong di Patik i, holan halinu* ni angka na denggan na naeng ro do i. Jala ndang i dope na sasintongna. Nang pe ganup taon sai dipelehon do pelean, alai ndang boi i mambahen sun denggan angka na manomba Debata. 2 Molo boi do pelean i mambahen sun denggan na manomba Debata, ndang porlu be sai dipelehon pelean. Ai molo nunga ias nasida dibahen pelean i, ndang mardosa be nasida didok roha ni nasida. 3 Alai alani pelean siganup taon i, gabe sipaingot ma i di nasida na mardosa do nasida. 4 Ai ndang boi mudar ni lombu jantan dohot mudar ni hambing manesa dosa.

5 Alani i tingki ro ibana tu portibi on, didok ibana do, “‘Ndang lomo roham tu silehon-lehon dohot tu pelean. Alai diparade Ho do sada daging di ahu. 6 Ndang dipangido ho pelean situtungon manang pelean hasesaan ni dosa.’ 7 Dung i hudok ma, ‘Ale Debata, ro do ahu laho mangulahon lomo ni roham, songon na tarsurat taringot tu ahu di gulungan* i.’” 8 Alai parjolo do didok ibana, “Ndang lomo roham jala ndang dipangido Ho pelean, silehon-lehon, pelean situtungon, dohot pelean hasesaan ni dosa,” i ma angka pelean mangihuthon na adong di Patik i. 9 Dung i didok ibana ma muse, “Ro do ahu laho mangulahon lomo ni roham.” Alani i, disesa ibana ma aturan na parjolo i asa boi marlangku aturan na paduahon i. 10 Marhite “lomo ni roha” ni Debata, nunga dipabadia be hita marhite daging ni Jesus Kristus na dipelehon sahali ro di saleleng ni lelengna.

11 Asing ni i, ganup ari do angka malim mangulahon ulaonna di ingananna be laho marhobas tu Debata. Jala mulak-ulak do dipelehon nasida pelean na sarupa, nang pe sasintongna, ndang boi pelean i manesa sude dosa. 12 Alai holan sada pelean do dipelehon Kristus laho manesa dosa ro di saleleng ni lelengna, jala hundul do ibana di siamun ni Debata. 13 Disi ma ibana paimahon sahat tu na dibahen Debata angka musuna gabe sidege-degean ni patna. 14 Marhite pelean na sada i, dibahen ibana do sun denggan angka halak na dipabadia i ro di saleleng ni lelengna. 15 Asing ni i, marhite tondi parbadia dipapos do rohanta dung didok, 16 “‘On ma parjanjian na laho bahenonku tu bangso Israel dungkon na masa i,’ ninna Jahowa. ‘Bahenonku ma angka patikku di roha ni nasida jala surathononku ma i di pingkiran ni nasida.’” 17 Dung i didok do muse, “Ndang ingotonku be angka dosa dohot angka hasalaan ni nasida.” 18 Molo dung disesa angka dosa dohot angka hasalaan i, ndang porlu be pelean hasesaan ni dosa.

19 Alani i angka dongan, marhite mudar ni Jesus, ndang pola mabiar be hita masuk* sian dalan i tu Inganan na Mansai Badia i. 20 Dibungka ibana do tu hita dalan na imbaru tu hangoluan mamolus tire i, i ma dagingna i. 21 Ala adong do di hita malim na tumimbo na mangaradoti jabu ni Debata, 22 sian ias ni roha dohot sian haporseaon na togu, tapajonok ma dirinta tu Debata. Ai nunga ias rohanta dibahen* sian panggora ni roha na jahat jala nunga ias dagingta dibahen marhite aek na ias. 23 Alani i, tongtong ma hita barani paboahon pangkirimonta, ai haposan do na manjanjihon i. 24 Taparrohahon ma angka donganta, asa boi hita masipajujuan laho patuduhon holong ni roha dohot mangulahon na denggan. 25 Unang ma tatadingkon parpunguanta songon hasomalan ni na deba, alai masipatoguan ma hita. Jala lam marsitutu ma hita mangulahon i, ai nunga lam jonok ari i.

26 Ai molo sengaja do hita mangulahon dosa, hape nunga tajalo parbinotoan na tutu taringot tu hasintongan i, ndang adong be pelean laho manesa dosanta i. 27 Alai mardongan biar ni roha, jaloonta ma panguhuman dohot rimas ni Debata na marsigorgor na mangaripashon halak na mangalo Ibana. 28 Manang ise na mangalanggar Patik ni si Musa, jala adong dua manang na tolu saksi na paboahon i, ingkon pamateon do ibana so pola mardongan asi ni roha. 29 Alani i, umborat do panguhuman tu halak na mandegei Anak ni Debata, dohot na so mangargai mudar parjanjian na pabadiahon ibana, jala na mangaleai tondi parbadia ni Debata na patuduhon asi ni roha na mansai balga i! 30 Ai taboto do, nunga didok Debata, “Ahu do na marhak mambalos. Balosonku do hajahaton ni nasida.” Jala didok do muse di na tarsurat i, “Diuhumi Jahowa do bangsona.” 31 Marjea do halak na madabu tu panguhuman ni Debata na mangolu i.

32 Alani i, ingkon ingotonmuna do angka na masa di tingki naung salpu i. Ai dung dijalo hamu hatiuron sian Debata, godang do sitaonon na masa tu hamu alai ndang talu hamu dibahen i. 33 Sipata dibahen do hamu marsitaonon jala dileai di jolo ni natorop.* Jala sipata marsitaonon do hamu rap dohot halak na manaon sisongon i. 34 Sapangkilalaan do hamu tu* angka dongan na di penjara, jala tongtong do hamu marlas ni roha nang pe dirampas artamuna. Ai diboto hamuna do na adong artamuna na dumenggan jala na manongtong.

35 Alani i, tongtong ma hamu barani mangkatai,* ai parohon pasu-pasu na godang do i. 36 Ingkon sabar do hamu, asa molo dung diulahon hamu lomo ni roha ni Debata, dapotmuna ma na dijanjihonna i. 37 Ai “satongkin nai”, “sahat nama Ibana na naeng ro i jala ndang palelengonna be i”. 38 “Alai tongtong do mangolu naposongku na mangulahon na sintong ala porsea ibana,” jala “molo mabiar do ibana, dung i gabe mandao sian Ahu, ndang lomo rohangku mangida ibana.” 39 Saonari, hita ndang halak na mabiar na gabe mandao sian Debata, jala ujungna gabe mate. Alai halak na porsea do hita asa tongtong boi mangolu.